Jeŋ Muu Fɛɛ Sane Lɛ Ni Aaana Naa Kɛya Naanɔ
“Nuŋtsɔ [Yehowa] lɛ ni yɔɔ oninejurɔ nɔ lɛ aaatswia maŋtsɛmɛi anii yɛ emlifu gbi lɛ nɔ.”—LALA 110:5.
1, 2. Mɛɛ nifeemɔ ko ni ba yɛ afi 70 Ŋ.B. ekolɛ ekɛ yiŋkɔshikɔshifeemɔ ba yɛ jeŋ muu fɛɛ maŋtsɛ ni Yehowa Nyɔŋmɔ ji lɛ he, shi yɛ nakai beaŋ nɔŋŋ lɛ, namɛi ekɛ enɔkpɛlɛmɔ eha?
JEŊ muu fɛɛ maŋtsɛ ni ŋwɛi kɛ shikpɔŋ Bɔlɔ lɛ ji lɛ ji sane ni mli wa fe fɛɛ ni ka gbɔmɛi kɛ ŋwɛibɔfoi ahiɛ. Etsɛŋ ni abaana sane lɛ naa kɛya naanɔ, shi Yehowa henyɛlɔi lɛ kɛ afii ohai babaoo etswa enɔyeli lɛ mpoa. Lɛlɛŋ, Yerusalem maŋtiase lɛ kɛ esɔlemɔ tsu ni ajɔɔ nɔ aha Yehowa lɛ hiɛkpatamɔ ni ba yɛ afii 70 Ŋ.B. lɛ kɛ yiŋkɔshikɔshifeemɔ ba jeŋ muu fɛɛ nɔyelɔ ni Bɔlɔ lɛ ji lɛ he. Shi kɛlɛ, yiŋtoo kpakpa ko yɛ ni no hewɔ ni Yehowa halaaa akɛ eeefee ehe Nyɔŋmɔ ni ji tatsɛ yɛ nakai beaŋ yɛ heloo naa Israel hewɔ lɛ,
2 Shi mɛni ji yiŋtoo lɛ? Yɛ nakai beaŋ lɛ, no mli lɛ Yehowa kɛ enɔkpɛlɛmɔ eha maŋ hee ko, mumɔŋ Israel, “Nyɔŋmɔ Israel lɛ,” taakɛ bɔfo Paulo tsɛɔ Yesu Kristo asafo lɛ. (Galatabii 6:16) Shi kɛlɛ, kɛbashi nakai beaŋ, yɛ be ni atsɛɔ lɛ Kristofoi Abe lɛ mli lɛ, Yehowa wuuko ta ko ehako mumɔŋ Israel akɛ Nyɔŋmɔ ni ji tatsɛ yɛ nakai gbɛ nɔ nɔŋŋ taakɛ ewuu ta eha heloo naa Israel yɛ Mose Mla kpaŋmɔ lɛ shishi lɛ. Eŋmɛ Roma asraafoi agbɛ po, yɛ Yudafoi lɛ ayisɛɛtsirɛmɔ shishi, ni amɛgbe Yesu Kristo yɛ sɛŋmɔtso nɔ yɛ Kalvary. Enɛ ba mli afii 37 sɛɛ dani Romabii lɛ bakpata Yerusalem hiɛ nɔ ni ji shii enyɔ nɔ yɛ afi 70 Ŋ.B. lɛ.
3, 4. Kɛjɛ Mose gbii lɛ amli aahu kɛbashi Maŋtsɛ Hezekia nɔ lɛ, mɛɛ gbɛ nɔ Nyɔŋmɔ tsɔɔ yɛ akɛ eji tawulɔ, shi yɛ mumɔŋ Israel gbɛfaŋ lɛ, mɛni ebafee anɔkwale yɛ ta ni ewuɔ kɛ ta ni amɛwuɔ lɛ he?
3 Kɛjɛ gbalɔ Mose gbii lɛ amli aahu kɛbashi Maŋtsɛ Hezekia nɔyeli be lɛ mli lɛ, Yehowa wuu tai yɛ naakpɛɛ gbɛ nɔ eha Israel maŋ lɛ, ni Israelbii lɛ wuu tai lɛ yɛ eshishi kɛ tawuu nibii diɛŋtsɛ. (5 Mose 1:30; [PAGE 243:22; 20:3, 4; Yoshua 10:42) Shi efeee nakai yɛ mumɔŋ Israel gbɛfaŋ! Kɛjɛ be mli ni agbe Yesu yɛ Yerusalem maŋ lɛ sɛɛ aahu kɛtsɔ wɔ Ŋmɛnɛŋmɛnɛ Beaŋ fɛɛ lɛ, nɛkɛ Nyɔŋmɔ ni ji tatsɛ nɛɛ halako akɛ eeewuu heloo naa ta ko eha Nyɔŋmɔ Israel lɛ. Ni akɛ nɔ ni kɛ no kpaa gbee hu lɛ, efako mumɔŋ Israelbii ni feɔ Kristofoi asafo lɛ ni amɛkɛ heloo naa tawuu nii awuu ta. Kristofoi yɛ ta kroko ni amɛbaawuu.
4 Akɛ nɔ ni kɛ enɛ kpaa gbee lɛ, hiɛnyiɛlɔi ni wuu ta kɛba Kristofoi ahemɔkɛyeli lɛ ateŋ mɔ kome ŋma nanemɛi Kristofoi ni yɔɔ Korinto, yɛ Hela lɛ akɛ: “Ejaakɛ wɔ tawuu nii lɛ . . . hewalɛ nii ni yɛ Nyɔŋmɔ hiɛ, ni akɛkumɔɔ mɔji wuji; ni wɔkumɔɔ susumɔi kɛ nɔ fɛɛ nɔ ni kwɔ ni woɔ ehe nɔ eshiɔ Nyɔŋmɔ nilee lɛ, ni wɔŋɔɔ jwɛŋmɔ fɛɛ jwɛŋmɔ nom wɔhaa Kristo toiboo lɛ, ni wɔsaa wɔhe wɔto, koni, kɛ nyɛtoiboo lɛ yi obɔ lɛ, wɔtɔ toigbele fɛɛ he owele.” (2 Korintobii 10:4-6) Mra mli yɛ nakai wolo lɛ nɔŋŋ mli lɛ, Paulo wie “jalɛ tawuu nii ni ji ninejurɔ nɔ kɛ nineabɛku nɔ” lɛ ahe.—2 Korintobii 6:7; kwɛmɔ Efesobii 6:11-18 hu.
Yehowa Baawuu Ta yɛ Harmagedon
5. Mɛɛ shidaamɔ Yesu kɔ yɛ heloo naa tawuu ni ekɛaafa ehe yɛ Getsemane abɔɔ lɛ mli lɛ he, ni mɛɛ nifeemɔ gbɛ ekaselɔi lɛ kɔɔ?
5 Beni Yesu Kristo yɔɔ shikpɔŋ nɛɛ nɔ lɛ, ekɛ tawuu nɔ ko faaa ehe yɛ be ko be ko mli. Yɛ gbi gbɛkɛ ni abaatsɔɔ esɛɛgbɛ yɛ Getsemane abɔɔ lɛ mli lɛ, ekaselɔ ni etuu ehe fɛɛ eha, Simon Petro gbala klante ni efo Yudafoi a-osɔfonukpa lɛ tsulɔ lɛ toi. Shi Yesu kɛ toi lɛ kpɛtɛ egbɛhe lɛ yɛ naakpɛɛ gbɛ nɔ ni ekɛɛ: “Mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ. Aloo osusuɔ akɛ minyɛŋ mitsɛ fai makpa ni amrɔ nɛɛ nɔŋŋ eeeha mi ŋwɛibɔfoi fe asafoi nyɔŋma kɛ enyɔ? Shi no lɛ te aaafee tɛŋŋ ni ŋmalɛi lɛ aaaba mli, akɛ ja afee nɛkɛ nɔŋŋ?” (Mateo 26:52-54) Yɛ enɛɛmɛi fɛɛ hewɔ lɛ, kɛ jeŋ tawuu ba lɛ, Nyɔŋmɔ Bi ni kɛ ehe sha afɔle lɛ anɔkwa kaselɔi lɛ hiɛɔ amɛhe ni amɛkɛwooo maŋ saji amli lɛ mli.—Yohane 17:16; 18:36.
6. Mɛɛ shidaamɔ Yehowa Odasefoi baakɔ yɛ Nyɔŋmɔ Ofe lɛ gbi wulu lɛ nɔ ta lɛ mli yɛ Harmagedon?
6 Belɛ, ha enɛ atswa jeŋmaji lɛ adafi agbɛnɛ, akɛ Yehowa Odasefoi naŋ gbɛfaŋnɔ ko yɛ “Nyɔŋmɔ Ofe lɛ gbi wulu lɛ nɔ ta” ni abaawuu yɛ “he ko ni atsɛɔ jɛi yɛ Hebri wiemɔ mli akɛ Har-Magedon” lɛ mli. Amɛbaashi no amɛha Nyɔŋmɔ ni ji tatsɛ lɛ, “Yehowa Zebaot,” kɛ ebɔfoi asafoi ni yɔɔ Yesu Kristo hiɛnyiɛmɔ shishi lɛ.—Kpojiemɔ 16:14-16; 19:11-21; Lala 84:13.
Yehowa Miihe Aje Etawuu Nifeemɔi lɛ Ashishi Ekoŋŋ
7. Akɛ Nyɔŋmɔ ni wuɔ ta lɛ, mɛɛ gbɛi akɛbale Yehowa, ni ani eka he eji nakai lolo?
7 Abana ale blema Israel Nyɔŋmɔ lɛ ni atsɛ lɛ hu akɛ Yehowa tseva·ʼohthʹ, aloo Yehowa tai a-Nyɔŋmɔ [Zebaot]. (1 Samuel 1:3, 11) Kristofonyo bɔfo Paulo tsɛ Yesaia gbalɛ lɛ yisɛɛ yɛ Romabii 9:29 ni eŋma akɛ: “Efee akɛ tai a-Nuŋtsɔ lɛ eshwɛɛɛ seshi ko ehaaa wɔ kulɛ, wɔtamɔ Sodoma, ni wɔtsɔmɔ tamɔ Gomora pɛ.” Agbɛnɛ hu, Kristofonyo kaselɔ Yakobo ŋma akɛ: “Ni mɛi ni buaa niyenii anaa lɛ abolɔmɔi lɛ ebabote Zebaot Nuŋtsɔ lɛ toiaŋ.” (Yakobo 5:4, KJ; American Standard Version) No hewɔ lɛ Paulo kɛ Yakobo tsɛ Nyɔŋmɔ akɛ Yehowa tai a-Nyɔŋmɔ [Zebaot] yɛ wɔ Ŋmɛnɛŋmɛnɛ Beaŋ klɛŋklɛŋ afii oha lɛ mli. Yɛ afii ohai 18 ni nyiɛ sɛɛ lɛ amli lɛ, Nyɔŋmɔ kɛ ehe woko heloo naa tawuu ko mli yɛ mumɔŋ Israel, Nyɔŋmɔ lsrael lɛ hewɔ, tamɔ bɔ ni efee eha blema Israel lɛ, shi kɛlɛ, eka he eji Yehowa tai a-Nyɔŋmɔ lɛ.
8-10. (a) Namɔ fa ni awuu ta lɛ yɛ ŋwɛi lɛ, ni mɛni hewɔ ni Mikael he esa kɛha tawuu lɛ fe mɔ fɛɛ mɔ lɛ? (b) Mɛni jɛ ta ni awuu yɛ ŋwɛi lɛ mli ba, ni bei enyiɛ eshwɛ dani Yehowa gbi wulu lɛ nɔ ta lɛ baashɛ?
8 Beni afɔ Mesia Maŋtsɛyeli lɛ yɛ 1914 yɛ “jeŋmaji abe” lɛ naagbee lɛ, ta te shi yɛ Yehowa Nyɔŋmɔ ŋwɛi maŋtsɛyeli he lɛ. (Luka 21:24, KJ) Namɔ fa ni awuu nakai ta lɛ? Yehowa Nyɔŋmɔ diɛŋtsɛ. Etsu e-Bi ni ewo lɛ maŋtsɛ lɛ kɛtee ta ŋa lɛ nɔ kɛ gbɛi ni ji Mikael ejaakɛ Mɔ nɛ ji mɔ pɛ ni he esa akɛ eeeha sanebimɔ ni yɔɔ nakai gbɛi lɛ mli, ni ji “Namɔ Tamɔ Nyɔŋmɔ?” lɛ hetoo. Mikael kɛ oyaiyeli bɔi nitsumɔ akɛ Yehowa tai a-Nyɔŋmɔ lɛ najiaŋdamɔlɔ ni wuuɔ ta.
9 Enɛ hewɔ lɛ, wɔkaneɔ yɛ Kpojiemɔ 12:7-10 akɛ: “Ni ta te shi yɛ ŋwɛi: Mikael kɛ ebɔfoi lɛ fa drako lɛ nɔ ta. Ni drako lɛ bɔfoi lɛ fata ehe kɛwuu, ni amɛnyɛɛɛ, ni asaŋ amɛnaa gbɛ dɔŋŋ yɛ ŋwɛi. Ni ashɛ drako kpeteŋkpele lɛ afɔ, mɔ ni ji blema onufu lɛ ni atsɛɔ lɛ diabolo (naafolɔlɔ loo Abonsam) lɛ, kɛ Satan (henyɛlɔ) lɛ ni shishiuɔ jeŋ muu lɛ fɛɛ lɛ, ashɛ lɛ afɔ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe. Ni minu gbee wulu ko yɛ ŋwɛi miikɛɛ: Agbɛnɛ yiwalaheremɔ lɛ kɛ hewalɛ lɛ kɛ maŋtsɛyeli lɛ etsɔ wɔnyɔŋmɔ lɛ nɔ, ni akɛ hewalɛ lɛ eha e-Kristo (mɔ ni efɔ lɛ mu) lɛ, ejaakɛ ashɛ wɔnyɛmimɛi lɛ anaafolɔlɔ lɛ ni folɔɔ amɛnaa yɛ wɔ-Nyɔŋmɔ lɛ hiɛ nyɔɔŋ kɛ shwane lɛ afɔ.”
10 Kɛbashi amrɔ nɛɛ, yɛ nɔ ni fe afii 70 kɛjɛ be mli ni awuu nakai ta lɛ yɛ ŋwɛi sɛɛ lɛ, “be fioo” ko pɛ eshwɛ ni Yehowa gbi wulu lɛ nɔ ta lɛ baafɛ ni Nyɔŋmɔ kɛjie ehe kpo etsɔɔ adesai ayinɔ ni yɔɔ amrɔ nɛɛ akɛ Yehowa tai a-Nyɔŋmɔ lɛ.—Kpojiemɔ 12:12; Zakaria 14:3.
Mɔ ni Wuɔ Ta Kɛhaa Yehowa Bembuu Lɛ
11. Mɛɛ be ni ato asafoku bibioo lɛ mli shwɛɛnii lɛ kɛ asafo babaoo lɛ mɛɔ, ni amɛkɛ miishɛɛ aaatswa amɛdɛ yɛ mɛni he?
11 Nilelɔ Maŋtsɛ Salomo ni hi shi yɛ blema Israel lɛ ŋma yɛ mumɔ lɛ tsirɛmɔ naa akɛ: “Nɔ fɛɛ nɔ yɛ ebe ni ato, ni nitsumɔ fɛɛ nitsumɔ ni yɔɔ ŋwɛi shishi nɛɛ yɛ ebe. . . . tawuu be yɛ, ni hejɔlɛ be yɛ.” (Jajelɔ 3:1-8) Maŋtsɛ “ni fe Salomo” lɛ kaselɔi ni yɔɔ shikpɔŋ nɔ lɛ miimɛ be ni ato aha Lɛ ni ekɛnyiɛ ŋwɛibɔfoi ni yeɔ kunim lɛ ahiɛ yɛ tawuu mli yɛ Har-Magedon lɛ. (Mateo 12:42; Kpojiemɔ 19:11-16) Jɛmɛ “ni ekɛ dadetso aaakpala amɛ [jeŋmaji lɛ]” ni eeejwara amɛ “kɛ dadetso.” (Kpojiemɔ 19:15; Lala 2:9) Kwɛ bɔ ni ekaselɔi ni sumɔɔ toiŋjɔlɛ lɛ aaatswa amɛdɛ kɛ nyamɔ yɛ naakpɛɛ gbɛ ni eeetsɔ nɔ ehere amɛyiwala lɛ hewɔ! Mɛi ni baafata he ji ehefatalɔi Maŋtsɛyeli niyelɔi “asafoku bibioo” lɛ mli shwɛɛnii lɛ kɛ “asafo babaoo” lɛ mli “tooi krokomɛi” ni yɔɔ hiɛnɔkamɔ akɛ amɛnine baashɛ Paradeiso shikpɔŋ lɛ nɔ yɛ etoiŋjɔlɛ afii akpe nɔyeli lɛ shishi lɛ hu. (Luka 12:32; Kpojiemɔ 7:9-17; Yohane 10:16) Ni amɛkɛ miishɛɛ baatswa amɛdɛ kɛ nyamɔ yɛ “Ofe lɛ nɔŋŋ lɛ shishi,” yɛ Tookwɛlɔ kɛ Maŋtsɛ, Yesu Kristo kunimyeli lɛ hewɔ, kɛbu jeŋ muu fɛɛ maŋtsɛ ni Yehowa Nyɔŋmɔ ji lɛ bem.—Lala 91:1.
12. Nɛgbɛ ta baajɛ kɛba jeŋmaji lɛ anɔ, ni mɛni baajɛ mli aba taakɛ Lala 68:2, 3 tsɔɔ lɛ?
12 Abaanyɛ akɛɛ, ni ejeee sane he woo akɛ ta ko ni jɛ he ko ni nɔ kwɔ kwraa fe adesa nɔyeli he lɛ ni akɛ tawuu nibii ni ata amɛ jogbaŋŋ ni yɔɔ hewalɛ fe enuklea okpɛlɛmii lɛ ka shikpɔŋ lɛ nɔ jeŋmaji lɛ fɛɛ ahiɛ, ekɔɔɔ he eko kɛji amɛyɛ Jeŋmaji Ekomefeemɔ gbɛjianɔtoo lɛ mli loo amɛbɛ mli. Bo toi: “Nyɔŋmɔ awo ehe nɔ, ehenyɛlɔi agbɛ ashwa, ni mɛi hu ni he tsɛɔ lɛ lɛ ajo foi yɛ ehiɛ. Huumɔ amɛ tamɔ ahuuɔ lasu lɛ; taakɛ bɔ ni wo agbaku sereɔ yɛ la he lɛ, nakai oha mɛi fɔji ahiɛ akpata yɛ Nyɔŋmɔ hiɛ.”—Lala 68:2, 3.
13. Yɛ be mli ni asaa he kɛhaa ta lɛ, namɔ wiemɔi ni yɔɔ Lala 45:2-7 lɛ kɔɔ ehe yɛ be ni sa mli lɛ?
13 Asaa nibii ni akɛbaawuu tai fɛɛ amli ta lɛ agbɛnɛ. Akɛ Nyɔŋmɔ Tawulɔ nukpa lɛ, akɛ Yehowa gbɛi he famɔ he Tawulɔ lɛ wie nɛkɛ wiemɔi ni nyiɛ sɛɛ nɛɛ ni Israel maŋ lɛ mlibii lɛ ateŋ mɔ kome ŋma yɛ mumɔ lɛ tsirɛmɔ naa lɛ akɛ: “Ohe yɛ fɛo fe gbɔmɛi abii lɛ; afɔse anunyam awo onaa, hewɔ lɛ Nyɔŋmɔ ejɔɔo kɛmiiya naanɔ. Ekaalɔ, okɛ oklante aŋmɔ ohɛ, kɛ onunyam lɛ kɛ ogbojee lɛ fɛɛ. Anɔkwale kɛ mlijɔlɛ kɛ jalɛ hewɔ lɛ, jee kpo ni oba yɛ ogbojee lɛ mli, ni eninejurɔ aaatsɔɔo nii ni yɔɔ gbeyei! Ogaimlibii lɛ anaa ba; maji lɛ tswiatswiaa shi yɛ ohiɛ; amɛtsurɔɔ maŋtsɛ lɛ henyɛlɔi lɛ atsuiiaŋ! Nyɔŋmɔ, omaŋtsɛsɛi lɛ ma shi kɛmiiya naanɔi anaanɔ; omaŋtsɛyeli tso lɛ jalɛ tso ni.”—Lala 45:2-7.
Jeŋmaji lɛ Bua Amɛhe Naa Amɛwo Yehowa
14, 15. Yɛ be mli ni ajie amɛ kɛjɛ tsuŋwoo lɛ mli lɛ sɛɛ lɛ, mɛɛ wiemɔ ni yɔɔ Lala 2 bɔfoi lɛ tsɛ sɛɛ akɛ eba mli, ni mɛɛ nibimɔi amɛbi Nyɔŋmɔ?
14 Beni ato Kristofoi asafo lɛ shishi yɛ Pentekoste yɛ afi 33 Ŋ.B. lɛ sɛɛ etsɛɛɛ lɛ, Kristofoi ni afɔ amɛ mu lɛ yoo nɔ ko ni Lala 2:1, 2 kɔɔ he diɛŋtsɛ. Ŋmalɛ nɛɛ kaneɔ akɛ: “Mɛɛba jeŋmaji lɛ feɔ hoo, ni majimaji lɛ hu jwɛŋɔ yakayaka nii nɛɛ? Shikpɔŋ nɔ maŋtsɛmɛi lɛ ete shi edamɔ shi, ni lumɛi lɛ hu efee ekome amɛtee Yehowa kɛ mɔ ni efɔ lɛ mu lɛ yinɔ ajina.” Beni Yudafoi henyɛlɔi lɛ mɔmɔ Mɔ ni Yehowa Efɔ Lɛ Mu lɛ bɔfoi lɛ klɛŋklɛŋ kwraa ni amɛwa amɛyi lɛ, amɛsaa amɛyafata amɛnanemɛi Kristofoi lɛ ahe ekoŋŋ ni amɛtsɛ Lala 2 mli wiemɔi ni yɔɔ yiteŋgbɛ lɛ taakɛ Maŋtsɛ David ŋma lɛ. Bɔfoi lɛ Asaji 4:23-30 bɔɔ amaniɛ yɛ sane lɛ he akɛ:
15 “Shi beni aŋmɛɛ amɛhe lɛ, amɛba nyɛmimɛi lɛ aŋɔɔ, ni amɛbagba nibii fɛɛ ni osɔfonukpai lɛ kɛ maŋ onukpai lɛ kɛɛ amɛ lɛ. Shi beni amɛnu lɛ, amɛkɛ jwɛŋmɔ kome hole amɛgbeei anɔ amɛha Nyɔŋmɔ ni amɛkɛɛ nuŋtsɔ, bo ni oji Nyɔŋmɔ ni fee ŋwɛi kɛ shikpɔŋ kɛ ŋshɔ kɛ nii fiaa ni yɔɔ amɛmli; bo mɔ ni otsɔ wɔtsɛ David, otsulɔ lɛ naa okɛɛ: ‘Mɛɛba jeŋmaji lɛ feɔ hoo, ni maji lɛ hu jwɛŋɔ yaka nii? Shikpɔŋ nɔ maŋtsɛmɛi lɛ ete shi edamɔ shi, ni lumɛi lɛ hu anaa ebakpe shi ewo Nuŋtsɔ [Yehowa] lɛ kɛ mɔ ni efɔ lɛ mu lɛ.’ Lɛlɛŋ, Herode kɛ Pontio Pilato kɛ jeŋmaji lɛ kɛ Israel maji lɛ hu ebabua amɛhe naa yɛ maŋ nɛɛŋ amɛwo otsulɔ krɔŋkrɔŋ Yesu, mɔ ni ofɔ lɛ mu lɛ, koni amɛfee nii fɛɛ ni onine kɛ oyiŋtoo lɛ eto efɔ shi akɛ afee lɛ. Ni agbɛnɛ hu, Nuŋtsɔ [Yehowa], kwɛmɔ amɛhe gbeyei ni amɛwoɔ lɛ, ni oha otsuji lɛ kɛ ekaa pii ajaje owiemɔ lɛ, ni okpa onine mli ni oha atsatsaa mɛi, ni otsɔ otsulɔ krɔŋkrɔŋ Yesu lɛ gbɛi anɔ ofee okadii kɛ naakpɛɛ nii.”
16, 17. (a) Ani nɔ ko eba yɛ adesai ayinɔsane he fɛɛ mli ni kɛ nɔ ni bɔi baa kɛjɛ 1914 lɛ yeɔ egbɔ? Tsɔɔmɔ mli. (b) Mɛɛ nifeemɔ gbɛ jeŋmaji lɛ yaa nɔ amɛkɔɔ lolo, ni no hewɔ lɛ enyɛɔ Yehowa nɔ ni eŋma mɛni, yɛ ‘etai awolo’ lɛ mli?
16 Shi kɛlɛ, kɛ ebalɛ akɛ jeŋmaji lɛ efee hoo, ni maŋtsɛmɛi lɛ bua amɛhe naa amɛfee ekome, ni maŋkwramɔŋ hiɛnyiɛlɔi hu fee ekome kɛte shi amɛwo Yehowa kɛ Mɔ ni Efɔ Lɛ Mu, Yesu Kristo lɛ, mɛɛ nɔ ko ni eba yɛ adesa yinɔsane be fɛɛ mli abaanyɛ akɛto nɔ ni aje shishi afii 76 ni eho nɛ yɛ 1914 lɛ he? Jeee adesai ashihilɛ be fɛɛ mli jeŋ fɛɛ ta ni ba yɛ nakai afi lɛ mli lɛ pɛ kɛkɛ, shi nakai afi lɛ hu ji be mli ni be ni ato aha Jeŋmaji lɛ, “jeŋmaji abe lɛ” ba naagbee! (Luka 21:24) Eyɛ faŋŋ akɛ Lala 2 na emlibaa ni mli lɛɛ kɛjɛ nakai afi lɛ nɔ kɛbaa.
17 Beni Jeŋmaji abe lɛ ba naagbee yɛ 1914 lɛ, no mli lɛ jeŋmaji lɛ—ni maji ni akɛɛ atsɛɔ amɛ Kristendom maji, ni amɛ mlibii lɛ ateŋ mɛi babaoo buɔ amɛhe yɛ jamɔ mli akɛ amɛji mumɔŋ Israel lɛ—ateŋ mɔ ko mɔ ko efeko klalo akɛ ebaakpee Mɔ ni Yehowa Efɔ Lɛ Mu, Yesu Kristo, kɛba je lɛ fɛɛ nɔ maŋtsɛyeli sɛi lɛ nɔ. Ni amrɔ nɛɛ, afii 71 sɛɛ kɛjɛ be mli ni aje shishi akɛ “aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase,” kɛjɛ 1919 kɛbaa nɛɛ, eka shi faŋŋ akɛ jeŋmaji ni yɔɔ Kristendom mli kɛ esɛɛ fɛɛ lɛ ejieŋ Yehowa Maŋtsɛ ni atswa ehe adafi babaoo lɛ yi ni amɛbaŋ amɛhe shi amɛwoŋ eshishi koni amɛkɛ nakai feemɔ akpoo amɛ diɛŋtsɛ amɛnɔyeli ni yɔɔ shikpɔŋ nɛɛ nɔ lɛ. (Mateo 24:14) Nɔ ni tamɔɔɔ nakai lɛ, yɛ naagbee kwraa lɛ, amɛbashe be kɛ shihilɛ mli ni amɛbaaha Yehowa aŋma “Yehowa tai awolo lɛ” naagbee nɔ kwraa lɛ mli.—4 Mose 21:14.
Nyɔŋmɔ ni Ji Tatsɛ lɛ Kunimyeli ni Yɔɔ Nyam
18. Mɛɛ nifeemɔ ko ni kɔɔ Yehowa he wɔfiɔ sɛɛ, ni namɔ baahi emasɛi, kɛha Lala 110 mlibaa?
18 No hewɔ lɛ, yaa nɔ yɛ tawuumɔ mli, O Yehowa tai a-Nyɔŋmɔ, kɛ o-Bi ablade lɛ, Yesu Kristo, yɛ omasɛi! Lɛ ji mɔ ni awie nɛkɛ gbalɛ wiemɔi nɛɛ atsɔɔ lɛ: “Ye lumɔ yɛ ohenyɛlɔi lɛ ateŋ! Nuŋtsɔ [Yehowa] lɛ ni yɔɔ oninejurɔ nɔ lɛ aaatswia maŋtsɛmɛi anii yɛ emlifu gbi lɛ nɔ. Eeekojo yɛ jeŋmaji lɛ ateŋ, eeewo jɛmɛ obɔ kɛ gbohii sɔŋŋ; eeetswa shikpɔŋ kpeteŋkpele yitso nɔ.”—Lala 110:2, 5, 6.
19. Mɛɛ sɔlemɔ wɔsɔleɔ wɔhaa Nyɔŋmɔ Ofe lɛ kɛhaa tooi krokomɛi lɛ ni ji asafo babaoo lɛ yɛ egbi wulu lɛ nɔ ta ni ka wɔhiɛ kpaakpa lɛ he?
19 O Yehowa tai a-Nyɔŋmɔ, ha otsuji anɔkwafoi ni yɔɔ shikpɔŋ nɔ lɛ aye okunimyeli ni eko kɛ lɛ yeee egbɔ ni baaba kɛtsɔ otatsɛ kɛ Maŋtsɛ, Yesu Kristo nɔ, yɛ Nyɔŋmɔ Ofe lɛ gbi wulu lɛ nɔ ta ni abaawuu yɛ he ko ni atsɛɔ jɛmɛ yɛ Hebri wiemɔ mli akɛ Har-Magedon lɛ he odase! (Kpojiemɔ 16:14) Ha asafoku babaoo ni tamɔ gwantɛŋi ni “amɛfɔ amɛtadei lɛ ahe, ni amɛha eyɛ futaa yɛ toobi lɛ la lɛ mli” lɛ kɛ anɔkwa mumɔŋ Israel shwɛɛnii lɛ ‘aje amanehulu kpeteŋkpele lɛ mli’ kɛ nyamɔ ni amɛfee oshikpɔŋ nɔ odasefoi kɛyaa naanɔi anaanɔ! (Kpojiemɔ 7:14) Ha amɛyi ana wala kɛfo mli kɛyabote o-Bi kunimyelɔ lɛ, ni baaye shikpɔŋ ni atsuu nɔ ni abaafee lɛ paradeiso fɛfɛo lɛ nɔyeli ni awuuu ta yɛ mli lɛ mli, yɛ osuɔmɔ kwɛmɔ shishi, ni ekɛ oshishijee yiŋtoo lɛ akpa gbee. Ha amɛfee odaseyeli ni anaa kɛha gbohii fɛɛ ni abaatee amɛ shi lɛ, kɛha jeŋ muu fɛɛ maŋtsɛyeli ni ji onɔ yɛ jalɛ naa lɛ yijiemɔ hu. Wɔmiida bo shi akɛ yɛ nakai beaŋ lɛ, no mli lɛ oha ana jeŋ muu fɛɛ sane lɛ naa kwraa, hɛɛ, kɛmiiya naanɔ!
Ani Okaiɔ?
◻ Mɛni ji sane titri ni ka adesai kɛ ŋwɛibɔfoi fɛɛ ahiɛ?
◻ Mɛɛ sɔrɔtofeemɔ yɔɔ tai ni Yehowa wuu eha blema Israel lɛ kɛ mumɔŋ Israel lɛ teŋ?
◻ Mɛɛ shidaamɔ Yehowa Odasefoi baakɔ yɛ Harmagedon, ni mɛni hewɔ?
◻ Mɛɛ be mli Lala 2:1. 2 na emlibaa yɛ gbɛ ni ebako mli nakai da nɔ?
◻ Mɛɛ gbɛ nɔ aaatsɔ ana jeŋ muu fɛɛ sane Iɛ naa kɛya naanɔ?
[Mfoniri ni yɔɔ baafa 24, 25]
“Asafoku babaoo” Iɛ kɛ dɛtswaa baakpɛlɛ Nyɔŋmɔ Tookwɛlɔ kɛ Maŋtsɛ kunimyelɔ lɛ nɔ