‘Mɛɛ Gbɔmɛi Sa Akɛ Nyɛtsɔmɔ!’
“Agbɛnɛ, akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔjamɔi amli?”—2 PET. 3:11.
1. Mɛni hewɔ Petro Wolo ni Ji Enyɔ lɛ ji hewalɛwoo ni ba yɛ ebe naa kɛha Kristofoi ni yɔɔ ebeaŋ lɛ?
BENI akɛ mumɔ tsirɛ bɔfo Petro ni eŋma ewolo ni ji enyɔ lɛ, no mli lɛ, awa Kristofoi asafo lɛ yi babaoo momo, shi no haaa ekãa ni asafo lɛ kɛtsuɔ nii lɛ naa aba shi, loo asafo lɛ akashwere. No hewɔ lɛ, Abonsam kɛ eŋaatsɔɔ ko ni eye omanye shii abɔ yɛ bei ni eho lɛ mli lɛ tsu nii. Taakɛ Petro ha efee faŋŋ lɛ, Satan bɔ mɔdɛŋ akɛ eeebule Nyɔŋmɔ webii lɛ kɛtsɔ amale tsɔɔlɔi, ní “amɛhiŋmɛii amli eyimɔ obɔbɔ kɛ gbalafitemɔ,” ní “amɛyɛ tsui ni he esa kɛ hiɛjoomɔ” lɛ anɔ. (2 Pet. 2:1-3, 14; Yuda 4) No hewɔ lɛ, Petro jɛ tsui krɔŋŋ mli eŋma ewolo ni ji enyɔ lɛ koni ekɛwo Kristofoi hewalɛ ní amɛya nɔ amɛye anɔkwa.
2. Mɛni Petro Wolo ni Ji Enyɔ yitso 3 lɛ wieɔ he, ni mɛɛ saji esa akɛ wɔbi wɔhe?
2 Petro ŋma akɛ: “Gbii abɔ ni miyɔɔ nɛkɛ buu nɛɛ mli nɛɛ, mibuɔ akɛ eja, akɛ mikɛ kaimɔ atsĩɛ nyɛhiɛ; ejaakɛ mile akɛ mibuu lɛ kpamɔ lɛ baafee oya . . . Shi mabɔ he mɔdɛŋ, koni mijeŋ jɛɛ sɛɛ lɛ, nyɛhiɛ ahi nii nɛɛ anɔ be fɛɛ be.” (2 Pet. 1:13-15) Hɛɛ, Petro le akɛ etsɛŋ ni ebaagbo, shi eshwelɛ ji akɛ, kaimɔi ni yɔɔ ebe naa ní ekɛhaa amɛ lɛ baaya nɔ ahi amɛjwɛŋmɔ mli. Ni yɛ anɔkwale mli lɛ, akɛ kaimɔi nɛɛ fata Biblia mli woji lɛ ahe, ni ŋmɛnɛ lɛ wɔ fɛɛ wɔbaanyɛ wɔkane. Petro Wolo ni Ji Enyɔ, yitso etɛ lɛ he miihia wɔ waa, ejaakɛ ewieɔ nibii agbɛjianɔtoo ni yɔɔ ŋmɛnɛ lɛ “naagbee gbii lɛ,” kɛ mfonirifeemɔŋ ŋwɛi kɛ shikpɔŋ lɛ hiɛkpatamɔ lɛ he. (2 Pet. 3:3, 7, 10) Mɛɛ ŋaawoo Petro yɔɔ kɛha wɔ? Mɛɛ gbɛ nɔ kɛ́ wɔkɛ ŋaawoo nɛɛ tsu nii lɛ, ebaaha Yehowa akpɛlɛ wɔnɔ?
3, 4. (a) Mɛɛ wiemɔi ni hɛleɔ mɔ shi Petro wie, ni mɛɛ kɔkɔ ebɔ kɛfata he? (b) Mɛɛ otii etɛ komɛi ahe wɔbaasusu?
3 Beni Petro wie akɛ abaakpata Satan je lɛ hiɛ lɛ sɛɛ lɛ, ekɛɛ akɛ: “Mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔjamɔi amli?” (2 Pet. 3:11, 12) Esa akɛ wɔkadi akɛ, wiemɔi ni Petro kɛtsu nii yɛ biɛ lɛ jeee sanebimɔ ni esa akɛ aha hetoo, shi moŋ eji wiemɔi ni ekɛmiihɛle Kristofoi lɛ ashi. Petro le akɛ abaabaa mɛi pɛ ni feɔ Yehowa suɔmɔnaa nii, ni jieɔ sui ni saa Nyɔŋmɔ hiɛ akpo lɛ ayi yɛ “oweletɔɔ gbi” ni baa lɛ nɔ. (Yes. 61:2) No hewɔ lɛ, bɔfo lɛ kɛfata he akɛ: “Agbɛnɛ nyɛ lɛ, suɔmɔmɛi, akɛni nyɛle momo sa hewɔ lɛ nyɛsaraa, koni akɛ gbɔmɛi fɔji [ni ji amale tsɔɔlɔi lɛ] alakamɔ sane lɛ akashãtã nyɛ hu, ni nyɛjɛ nyɛ diɛŋtsɛ nyɛshifimɔ lɛ mli nyɛgbee shi.”—2 Pet. 3:17.
4 Akɛni Petro fata mɛi ni “le” nibii ni baaba wɔsɛɛ lɛ “momo sa” lɛ ahe hewɔ lɛ, ele akɛ yɛ naagbee gbii lɛ amli lɛ, Kristofoi ji mɛi titri ni esa akɛ amɛsara koni amɛya nɔ amɛhiɛ amɛnɔkwayeli lɛ mli. Sɛɛ mli lɛ, bɔfo Yohane ha nɔ hewɔ ni esa akɛ Kristofoi aya nɔ asara lɛ fee faŋŋ. Ena kɛtsɔ hiɛ akɛ abaashwie Satan kɛjɛ ŋwɛi, ni ákɛ ‘eeegiri’ ewo mɛi ni “yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ.” (Kpoj. 12:9, 12, 17) Nyɔŋmɔ tsuji anɔkwafoi ni afɔ amɛ mu lɛ, kɛ amɛnanemɛi “tooi krokomɛi” anɔkwafoi lɛ baaye kunim. (Yoh. 10:16) Shi wɔ akɛ aŋkroaŋkroi lɛ hu? Ani wɔbaaya nɔ wɔye anɔkwa? Kɛ́ wɔbɔ mɔdɛŋ (1) wɔná sui ni saa Nyɔŋmɔ hiɛ, (2) wɔtee nɔ wɔhi shi akɛ mɛi ni muji loo kpa ko bɛ amɛhe yɛ jeŋba mli kɛ mumɔŋ, ní (3) wɔná jwɛŋmɔ ni ja yɛ naagbai ni wɔkɛkpeɔ lɛ ahe lɛ, nomɛi baaye abua wɔ ni wɔfee nakai. Nyɛhaa wɔsusua otii nɛɛ ahe wɔkwɛa.
Ná Sui ni Saa Nyɔŋmɔ Hiɛ
5, 6. Mɛɛ sui esa akɛ wɔbɔ mɔdɛŋ wɔná, ni mɛni hewɔ enɛ biɔ ‘mɔdɛŋbɔɔ’ babaoo lɛ?
5 Petro ŋma yɛ ewolo ni ji enyɔ lɛ shishijee gbɛ akɛ: “Nyɛbɔa mɔdɛŋ fɛɛ ni nyɛkɛ nuufeemɔ afata nyɛhemɔkɛyeli lɛ he; nyɛkɛ henɔyeli afataa nilee lɛ he; nyɛkɛ hiɛmiamɔ afataa henɔyeli lɛ he; nyɛkɛ Nyɔŋmɔ gbeyeishemɔ afataa hiɛmiamɔ lɛ he; ni nyɛkɛ nyɛmimɛi ahedɔɔ afataa Nyɔŋmɔ gbeyeishemɔ lɛ he, ni nyɛkɛ suɔmɔ afataa nyɛnyɛmimɛi ahedɔɔ lɛ he. Ejaakɛ kɛji nɛkɛ nii nɛɛ yɛ nyɛmli ni efa lɛ, ehaŋ nyɛfee mɛi ni ebɔɔɔ mɔdɛŋ aloo mɛi ni wooo yibii yɛ wɔ-Nuŋtsɔ Yesu Kristo he nilee lɛ gbɛfaŋ.”—2 Pet. 1:5-8, Ga Biblia hee.
6 Anɔkwa sane ji akɛ, ebiɔ ‘mɔdɛŋbɔɔ’ babaoo dani wɔbaanyɛ wɔkɛ wɔhe awo nifeemɔi ni baaha wɔná sui ni saa Nyɔŋmɔ hiɛ lɛ amli. Ákɛ nɔkwɛmɔnɔ lɛ, dani wɔbaanyɛ wɔya asafoŋ kpeei srɔtoi lɛ fɛɛ, wɔkane Biblia lɛ daa gbi, ní wɔya nɔ wɔfee aŋkro nikasemɔ jogbaŋŋ lɛ, ebiɔ ni wɔmia wɔhiɛ. Ni ekolɛ ebaabi mɔdɛŋbɔɔ kɛ gbɛjianɔtoo kpakpa koni wɔnyɛ wɔha wɔgbɛkɛ Weku Jamɔ lɛ afee nɔ ni yɔɔ miishɛɛ, ni sɛɛnamɔ yɔɔ he, ni wɔfolɔɔɔ mli. Shi kɛ́ Nyɔŋmɔjamɔ nifeemɔi nɛɛ bafee nɔ ko ni wɔfeɔ daa ni wɔfolɔɔɔ mli lɛ, ebafeɔ mlɛo kɛhaa wɔ—titri lɛ kɛ́ wɔna sɛɛnamɔi ni yɔɔ he lɛ.
7, 8. (a) Mɛni mɛi komɛi ewie yɛ gbɛkɛ Weku Jamɔ lɛ he? (b) Mɛɛ gbɛ nɔ onáa nyɛweku jamɔ lɛ he sɛɛ?
7 Nyɛmi yoo ko ŋma kɛkɔ weku jamɔ gbɛjianɔtoo lɛ he akɛ: “Ehaa wɔkaseɔ saji srɔtoi babaoo.” Nyɛmi yoo kroko hu kɛɛ akɛ: “Kɛ́ mawie anɔkwale lɛ, no mli lɛ misumɔɔɔ ni afoɔ asafo woloŋ nikasemɔ lɛ mli. No mli lɛ no ji kpee ni minyaa he waa. Shi amrɔ nɛɛ ni wɔfeɔ wɔgbɛkɛ Weku Jamɔ lɛ, mina akɛ Yehowa le nɔ ni he hiaa wɔ, kɛ be ni esa akɛ ekɛha wɔ.” Weku yitso ko kɛɛ akɛ: “Weku jamɔ lɛ yeɔ ebuaa wɔ waa. Eyɛ miishɛɛ waa akɛ ato kpee ni wɔkɛtsuɔ wɔhiamɔ nii ahe nii he gbɛjianɔ aha wɔ! Mi kɛ mihefatalɔ fɛɛ nuɔ he akɛ wɔmiijie mumɔ krɔŋkrɔŋ lɛ yibii lɛ kpo jogbaŋŋ lɛ, ni wɔmiiná miishɛɛ babaoo yɛ wɔshiɛmɔ nitsumɔ lɛ mli fe tsutsu lɛ.” Weku yitso kroko hu kɛɛ akɛ: “Gbekɛbii lɛ diɛŋtsɛ taoɔ saji amli, ni amɛmiikase nibii babaoo—ni eŋɔɔ amɛnaa. Gbɛjianɔtoo nɛɛ haa wɔnáa nɔmimaa babaoo akɛ Yehowa le nibii ni he hiaa wɔ, ni ehaa wɔsɔlemɔi ahetoo.” Ani bo hu onuɔ he nakai nɔŋŋ yɛ mumɔŋ nikeenii fɛfɛo nɛɛ he?
8 Nyɛkaŋmɛa gbɛ ni nibii bibii ha nyɛfolɔ weku jamɔ lɛ mli. Gbalashihilɛ mli hefatalɔi komɛi kɛɛ akɛ, “Yɛ otsii ejwɛ ni eho lɛ amli lɛ, daa Soo gbɛkɛ lɛ, nɔ ko baa yɛ weku lɛ mli ní shwɛɔ fioo kulɛ ehaŋ wɔfee nikasemɔ lɛ, shi wɔmiaa wɔhiɛ ni wɔfeɔ.” Yɛ anɔkwale mli lɛ, bei komɛi lɛ ekolɛ ebaabi ni nyɛtsake be ni nyɛkɛfeɔ nikasemɔ lɛ mli. Fɛɛ sɛɛ lɛ, nyɛtswaa nyɛfai shi akɛ nyɛfoŋ nyɛ-gbɛkɛ Weku Jamɔ lɛ mli kɔkɔɔkɔ—nyɛfoŋ mli otsi kome po!
9. Mɛɛ gbɛ nɔ Yehowa lɛ Yeremia yɛ mumɔŋ, ni mɛni wɔbaanyɛ wɔkase kɛjɛ enɔkwɛmɔnɔ lɛ mli?
9 Gbalɔ Yeremia fee nɔkwɛmɔnɔ kpakpa eha wɔ. Yehowa kɛ mumɔŋ niyenii ha lɛ yɛ be ni sa mli, ni ehiɛ sɔ enɛ waa. Mumɔŋ niyenii nɛɛ ye ebua lɛ ni ekɛ shifimɔ shiɛ etsɔɔ mɛi ni toii esara lɛ. Ekɛɛ akɛ: “Yehowa wiemɔ lɛ . . . etsɔ tamɔ la ní tsoɔ yɛ mitsui mli, ní aŋa yi awo miwui amli.” (Yer. 20:8, 9) No ye ebua lɛ ni enyɛ edamɔ naagbai ni ba kɛyashi akpata Yerusalem hiɛ lɛ hu naa. Ŋmɛnɛ lɛ, wɔyɛ Nyɔŋmɔ Wiemɔ tso muu lɛ fɛɛ. Kɛ́ wɔkase jogbaŋŋ, ni wɔsusu nii ahe taakɛ Nyɔŋmɔ susuɔ nii ahe lɛ, no lɛ taakɛ Yeremia fee lɛ, wɔ hu wɔbaanyɛ wɔkɛ miishɛɛ afĩ shi yɛ shiɛmɔ nitsumɔ lɛ mli, wɔye anɔkwa yɛ naagbai ni wɔkɛkpeɔ lɛ amli, ni wɔya nɔ wɔha wɔhe atse yɛ jeŋba mli kɛ mumɔŋ.—Yak. 5:10.
Yaa Nɔ Ohi Shi Akɛ Mɔ ni ‘Muji Loo Kpa ko Bɛ Ehe’
10, 11. Mɛni hewɔ esa akɛ wɔbɔ mɔdɛŋ ni wɔya nɔ wɔhi shi akɛ mɛi ni ‘muji loo kpa ko bɛ amɛhe’ lɛ, ni mɛni enɛ biɔ ni wɔfee?
10 Ákɛ Kristofoi lɛ, wɔle akɛ wɔyɛ naagbee gbii lɛ amli. No hewɔ lɛ, efeee wɔ naakpɛɛ akɛ nibii ni Yehowa nyɛ̃ɔ tamɔ amimyeli, bɔlɛnamɔ mli jeŋba sha, kɛ yiwalɛ ehe shi yɛ je lɛŋ. Abaanyɛ awie gbɛ ni Satan kɛtsuɔ nii lɛ he yɛ nɛkɛ gbɛ nɔ akɛ: ‘Kɛ́ anyɛŋ afã Nyɔŋmɔ tsuji lɛ atsui lɛ, ekolɛ abaanyɛ abule amɛ.’ (Kpoj. 2:13, 14) Belɛ esa akɛ wɔha kɔkɔbɔɔ ni Petro jɛ suɔmɔ mli ekɛha lɛ akã wɔtsui nɔ waa akɛ: ‘Nyɛbɔa mɔdɛŋ, koni ana nyɛ ní muji loo kpa ko bɛ nyɛhe yɛ Nyɔŋmɔ hiɛ, yɛ hejɔlɛ mli.’—2 Pet. 3:14.
11 Petro tĩ hewalɛwoo wiemɔi ni ekɛtsu nii mra mli lɛ mli ekoŋŋ akɛ, “nyɛbɔa mɔdɛŋ.” Ŋwanejee ko bɛ he akɛ, Yehowa—mɔ ni kɛ mumɔ tsirɛ Petro ní ewie nakai wiemɔi lɛ—le akɛ ehe miihia ni wɔmia wɔhiɛ koni wɔnyɛ wɔya nɔ wɔhi shi akɛ mɛi ni ‘muji loo kpa ko bɛ amɛhe,’ ni tsɔɔ akɛ wɔhaŋ muji ni yɔɔ Satan je lɛ mli lɛ abule wɔ. Enɛ baabi ni wɔbu wɔtsui he koni akɔnɔ fɔŋ akaná wɔtsui lɛ nɔ hewalɛ. (Nyɛkanea Abɛi 4:23; Yakobo 1:14, 15.) Kɛfata he lɛ, esa akɛ wɔfĩ shi shiŋŋ koni mɛi ni bɔ ni wɔfeɔ wɔnii akɛ Kristofoi lɛ feɔ amɛ naakpɛɛ, ni “amɛwieɔ musubɔɔ wiemɔ” amɛshiɔ wɔ lɛ anifeemɔ akaná wɔnɔ hewalɛ.—1 Pet. 4:4.
12. Mɛɛ nɔmimaa Luka 11:13 lɛ haa wɔnáa?
12 Akɛni wɔyeee emuu hewɔ lɛ, ewaa kɛhaa wɔ akɛ wɔɔfee nɔ ni ja. (Rom. 7:21-25) Ja wɔkɛ wɔhiɛ fɔ̃ Yehowa nɔ dani wɔbaanyɛ wɔye omanye ejaakɛ eŋɔɔ mumɔ krɔŋkrɔŋ ehaa mɛi ni jɛɔ anɔkwayeli mli amɛbiɔ lɛ lɛ faa. (Luka 11:13) Ni mumɔ nɛɛ haa wɔnáa sui ni saa Nyɔŋmɔ hiɛ, ní yeɔ ebuaa wɔ ni wɔnyɛɔ wɔdamɔɔ kai kɛ naagbai ni wɔkɛkpeɔ yɛ shihilɛ mli, ni baanyɛ aya nɔ afa beni Yehowa gbi lɛ bɛŋkɛɔ lɛ anaa.
Ha Naagbai ní Okɛkpeɔ lɛ Awaje Bo
13. Kɛ́ wɔkɛ naagbai kpe yɛ wɔshihilɛ mli lɛ, mɛni baaye abua wɔ koni wɔnyɛ wɔdamɔ naa?
13 Akɛni wɔyɛ nibii agbɛjianɔtoo fɔŋ nɛɛ mli lolo hewɔ lɛ, wɔkɛ naagbai srɔtoi baakpe. Shi yɛ nɔ najiaŋ ni onijiaŋ aaaje wui lɛ, mɛni hewɔ obuuu naagbai ni okɛkpeɔ lɛ akɛ hegbɛ ni oná ni okɛaatsɔɔ akɛ osumɔɔ Nyɔŋmɔ lɛɛlɛŋ, ní okɛha hemɔkɛyeli ni oyɔɔ yɛ lɛ, kɛ e-Wiemɔ lɛ mli lɛ mli awa? Kaselɔ Yakobo ŋma akɛ: “Minyɛmimɛi, kɛji nyɛgbee kai srɔtoi pii amli lɛ, nyɛbua lɛ miishɛɛ sɔŋŋ; ejaakɛ nyɛle akɛ nyɛhemɔkɛyeli kaa lɛ tsɛ́ɔ tsuishiŋmɛɛ kɛbaa.” (Yak. 1:2-4) Kaimɔ hu akɛ, “[Yehowa] le bɔ ni efeɔ ejieɔ jalɔi yɛ kaa mli.”—2 Pet. 2:9.
14. Mɛɛ gbɛ nɔ Yosef nɔkwɛmɔnɔ lɛ woɔ bo hewalɛ?
14 Susumɔ Yakob binuu Yosef, mɔ ni lɛ diɛŋtsɛ enyɛmimɛi hii hɔɔ lɛ amɛwo nyɔŋyeli mli lɛ nɔkwɛmɔnɔ lɛ he okwɛ. (1 Mose 37:23-28; 42:21) Ani yitsoŋwalɛ nifeemɔ nɛɛ ha Yosef hemɔkɛyeli tã? Ani Yosef mli fu Nyɔŋmɔ akɛni eŋmɛ gbɛ ni aye lɛ sane fɔŋ nɛɛ hewɔ? Nyɔŋmɔ Wiemɔ lɛ haa hetoo faŋŋ akɛ dabi! Kɛfata he lɛ, Yosef kɛ naagbai krokomɛi kpe yɛ no sɛɛ. Sɛɛ mli lɛ, afolɔ enaa akɛ kulɛ eyaato kabonaa, ni awo lɛ tsuŋ. Shi shikome ekoŋŋ lɛ, etee nɔ eye Nyɔŋmɔ anɔkwa. (1 Mose 39:9-21) Ni eha naagbai ni ekɛkpe lɛ waje lɛ, ni enɛ ha ajɔɔ lɛ babaoo.
15. Mɛni wɔbaanyɛ wɔkase kɛjɛ Naomi nɔkwɛmɔnɔ lɛ mli?
15 Yɛ anɔkwale mli lɛ, naagbai baanyɛ aha wɔwerɛ aho wɔhe loo wɔhao po. Ekolɛ Yosef nu he nakai bei komɛi. Nyɔŋmɔ anɔkwa tsuji krokomɛi hu nu he nakai nɔŋŋ. Susumɔ Naomi, mɔ ni wu kɛ ebihii enyɔ gboi lɛ he okwɛ. Ekɛɛ akɛ: “Nyɛkatsɛa mi Naomi dɔŋŋ, moŋ nyɛtsɛa mi Mara [eshishi ji “Joomɔ”]; ejaakɛ Ofe lɛ kɛ mi eye sane kɛ joomɔ tsɔ!” (Rut 1:20, 21) Bɔ ni Naomi nu he eha lɛ bɛ naakpɛɛ, ni shishinumɔ yɛ he. Shi taakɛ Yosef fee lɛ, Naomi haaa ehemɔkɛyeli lɛ atã, ni asaŋ eŋmɛɛɛ enɔkwayeli lɛ he. Yehowa jɔɔ yoo kpakpa nɛɛ yɛ enɛ hewɔ. (Rut 4:13-17, 22) Kɛfata he lɛ, Yehowa baasaa nibii ni Satan kɛ ejeŋ fɔŋ nɛɛ efite lɛ fɛɛ yɛ shikpɔŋ nɔ Paradeiso ni baaba lɛ mli. “Akaiŋ tsutsu nii lɛ dɔŋŋ, ni asaŋ ebaŋ jwɛŋmɔ mli dɔŋŋ.”—Yes. 65:17.
16. Mɛɛ su esa akɛ wɔná yɛ sɔlemɔ he, ni mɛni hewɔ?
16 Ekɔɔɔ he eko naagbai ni ekolɛ wɔkɛbaakpe lɛ, le ni wɔle akɛ Nyɔŋmɔ sumɔɔ wɔ be fɛɛ be lɛ baaha wɔnyɛ wɔdamɔ naa. (Nyɛkanea Romabii 8:35-39.) Eyɛ mli akɛ Satan baaya nɔ ebɔ mɔdɛŋ eje wɔnijiaŋ wui moŋ, shi kɛ́ wɔtee nɔ wɔha ‘wɔjwɛŋmɔ mli tse’ ni ‘wɔhiɛ kã shi ha sɔlemɔi’ daa lɛ, eyeŋ omanye. (1 Pet. 4:7) Yesu kɛɛ akɛ: “No hewɔ lɛ nyɛsaraa be fɛɛ be ní nyɛsɔlea, koni nyɛnyɛ nii ni baaba nɛɛ fɛɛ mli nyɛje, ní nyɛnyɛ gbɔmɔ bi lɛ hiɛ nyɛdamɔ.” (Luka 21:36) Kadimɔ akɛ wiemɔ ni ji “nyɛsɔlea” ni Yesu kɛtsu nii lɛ tsɔɔ sɔlemɔ ni akɛ hiɛdɔɔ sɔleɔ. Kɔkɔ ni Yesu bɔ wɔ akɛ wɔkɛ hiɛdɔɔ asɔle lɛ maa nɔ mi akɛ jeee be ni akɛ anyagbafeemɔ damɔɔ lɛ, kɛ e-Tsɛ lɛ hiɛ nɛ. Mɛi ni yɔɔ shidaamɔ kpakpa lɛ pɛ yi abaabaa yɛ Yehowa gbi lɛ nɔ.
Okɛ Ekãa Asɔmɔ Yehowa Daa
17. Kɛ́ ebɛ mlɛo akɛ oooye odase yɛ oshikpɔŋkuku lɛ mli lɛ, mɛɛ gbɛ nɔ gbalɔi ni hi shi yɛ blema lɛ anɔkwɛmɔnɔ lɛ he baanyɛ aba sɛɛnamɔ kɛha bo?
17 Kɛ́ wɔkɛ wɔhe wo Nyɔŋmɔjamɔ nifeemɔi amli lɛ, ewajeɔ wɔ. Enɛ haa wɔkaiɔ Petro wiemɔi nɛɛ akɛ: ‘Mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔjamɔi amli?’ (2 Pet. 3:11) Nyɔŋmɔjamɔ nifeemɔi lɛ amli otu ji sanekpakpa lɛ jajemɔ. (Mat. 24:14) Lɛɛlɛŋ, yɛ shikpɔŋkukuji komɛi amli lɛ, shiɛmɔ nitsumɔ lɛ bɛ mlɛo, ekolɛ akɛni mɛi booo wiemɔ lɛ toi loo amɛteɔ shi amɛwoɔ wɔ, loo akɛni amɛhaa nibii ni he hiaa amɛ yɛ shihilɛ mli lɛ heɔ amɛjwɛŋmɔ fɛɛ lɛ hewɔ. Yehowa tsuji ni hi shi yɛ blema lɛ hu kɛ mɛi ni hiɛ sui ni tamɔ nɛkɛ kpe. Amɛnijiaŋ ejeee wui, shi moŋ amɛtee mɛi nɛɛ aŋɔɔ shii abɔ, ni amɛkɛ Nyɔŋmɔ shɛɛ sane lɛ yaha amɛ. (Nyɛkanea 2 Kronika 36:15, 16; Yer. 7:24-26) Mɛni ye ebua amɛ ni amɛfĩ shi lɛ? Amɛna nitsumɔ ni Yehowa kɛwo amɛdɛŋ lɛ taakɛ Yehowa na lɛ lɛ, shi jeee tamɔ bɔ ni je lɛŋ bii lɛ na nitsumɔ lɛ. Kɛfata he lɛ, amɛbu Nyɔŋmɔ gbɛ́i ni kã amɛnɔ lɛ akɛ eji hiɛnyamwoo ni fe fɛɛ.—Yer. 15:16.
18. Mɛɛ tsakpãa yɔɔ Maŋtsɛyeli shiɛmɔ nitsumɔ lɛ kɛ Nyɔŋmɔ gbɛ́i lɛ ní abaawo nɔ gojoo wɔsɛɛ lɛ teŋ?
18 Wɔ hu eji hegbɛ kpele ni wɔná akɛ wɔɔjaje Yehowa gbɛ́i lɛ kɛ eyiŋtoo lɛ. Bo lɛ susumɔ enɛ he okwɛ: Wɔshiɛmɔ nitsumɔ lɛ hewɔ lɛ, kɛ́ be shɛ ni Nyɔŋmɔ baakpata ehenyɛlɔi lɛ ahiɛ lɛ, amɛnaŋ naajiemɔ ko. Yɛ anɔkwale mli lɛ, taakɛ Farao ni hi shi yɛ blema lɛ yɔse lɛ, amɛ hu amɛbaana akɛ Yehowa kɛ amɛ miiwu. (2 Mose 8:1, 20; 14:25) Yɛ nakai beaŋ nɔŋŋ lɛ, Yehowa baaha efee faŋŋ akɛ enɔkwa tsuji lɛ ji enajiaŋdamɔlɔi, ni enɛ baawo amɛhiɛ nyam.—Nyɛkanea Ezekiel 2:5; 33:33.
19. Mɛɛ gbɛ nɔ wɔbaanyɛ wɔtsɔɔ yɛ akɛ wɔmiisumɔ ni wɔkɛ Yehowa tsuishitoo lɛ atsu nii jogbaŋŋ?
19 Yɛ Petro Wolo ni Ji Enyɔ lɛ naagbee gbɛ lɛ, ekɛɛ enanemɛi Kristofoi lɛ akɛ: “Nyɛbua wɔ-Nuŋtsɔ lɛ tsuishitoo lɛ akɛ yiwalaheremɔ.” (2 Pet. 3:15) Hɛɛ, nyɛhaa wɔkɛ Yehowa tsuishitoo lɛ atsua nii jogbaŋŋ. Yɛ mɛɛ gbɛ nɔ? Kɛtsɔ sui ni saa ehiɛ ní wɔɔná, ya ni wɔɔya nɔ wɔhi shi akɛ mɛi ni ‘muji loo kpa ko bɛ amɛhe,’ jwɛŋmɔ ni ja ni wɔɔná yɛ naagbai ni wɔkɛkpeɔ lɛ ahe, kɛ agbɛnɛ hu ekãa ní wɔkɛaatsu Maŋtsɛyeli shiɛmɔ nitsumɔ lɛ nɔ. Kɛ́ wɔfee nakai lɛ, wɔnine baashɛ jɔɔmɔi ni sɛɛ efooo ni “ŋwɛi hee kɛ shikpɔŋ hee” lɛ kɛbaaba lɛ nɔ.—2 Pet. 3:13.
Ani Okaiɔ?
• Te wɔɔfee tɛŋŋ wɔná sui ni saa Nyɔŋmɔ hiɛ lɛ?
• Te wɔɔfee tɛŋŋ wɔya nɔ wɔhi shi akɛ mɛi ni ‘muji loo kpa ko bɛ amɛhe’ lɛ?
• Mɛni wɔbaanyɛ wɔkase kɛjɛ Yosef kɛ Naomi he?
• Mɛni hewɔ wɔhe ni wɔkɛwoɔ shiɛmɔ nitsumɔ lɛ mli lɛ ji hegbɛ kpele lɛ?
[Mfoniri ni yɔɔ baafa 9]
Wumɛi, mɛni baaye abua nyɛ koni nyɛ kɛ nyɛwekui lɛ aná sui ni saa Nyɔŋmɔ hiɛ?
[Mfonirii ni yɔɔ baafa 10]
Mɛni wɔbaanyɛ wɔkase kɛjɛ bɔ ni Yosef tsu naagbai ahe nii lɛ mli?