“Pesegi peñomokyreʼỹ káda día”

1, 2. ¿Mbaʼérepa iñimportánte ñamokyreʼỹ ñande rapichápe?

CRISTINA ningo oreko 18 áño, haʼe omombeʼu: “Che tuakuéra nachemokyreʼỹguasúi voi, ivaívamante ohecha cherehe. Umi mbaʼe heʼíva chéve chekutu rasy. Haʼekuéra heʼi chemitãkuñaʼirekoha, nachepohãveimaha ha chekyraha. Upévare pyʼỹinte cherasẽ ha nañeʼẽséi voi hendivekuéra. Añandu ndavaleiha mbaʼeverã”.^[1] Péicha jahecha peteĩ persóna ikatuha ohasa asyeterei noñemokyreʼỹiramo chupe.

² Umi palávra de ánimo tuichaiterei oporomokyreʼỹ. Rubén heʼi: “Heta áñorema alucha ani hag̃ua apensa ndavaleiha mbaʼeverã. Chemanduʼa peteĩ vuéltape asẽ hague apredika peteĩ ansiánondi. Haʼe ohechakuaa nachekoʼẽporãi hague. Amombeʼu chupe umi mbaʼe añandúva ha ojapysaka porãnte cherehe. Ha omensiona chéve heta mbaʼe ajapo porãva. Avei chemomanduʼa Jesús heʼi hague ñande javaleveha umi guyraʼígui. Pyʼỹinte chemanduʼa upe téxtore, pórke opokoiterei cherehe. Chemokyreʼỹeterei ningo umi mbaʼe heʼi vaʼekue chéve pe ansiáno” (Mat. 10:31).

 3. a) ¿Mbaʼéichapa apóstol Pablo ohechauka iñimportanteha ñaporomokyreʼỹ? b) ¿Mbaʼépa jahecháta ko artíkulope?

³ Ndareíri ningo la Biblia ohechauka iñimportanteha ñañomokyreʼỹ meme. Apóstol Pablo oskrivi vaʼekue umi kristiáno hebréope: “Peñatendéke che ermanokuéra, ani hag̃ua pene korasõ ou iñaña pendehegui ha ndapejeroviavéi, peñemomombyry rupi Ñandejára oikovévagui. Upéva rangue, pesegi peñomokyreʼỹ káda día. [...] Ani peichahágui pemohatã pene korasõ pe pekádo penembotavy rupi” (Heb. 3:12, 13). Ajépa ñañeñandu porã oĩ jave ñanemokyreʼỹva. Upévare, ko artíkulope ñarrespondéta koʼã porandu: ¿Mbaʼérepa iñimportanteterei ñamokyreʼỹ ñane ermanokuérape? ¿Mbaʼéichapa Jehová, Jesús ha Pablo ehémplo ñanepytyvõ ñamokyreʼỹ hag̃ua ótrope? Ha, ¿mbaʼe mbaʼépa ikatu jajapo ñaporomokyreʼỹ hag̃ua? Jahechamína koʼã mbaʼe.

 4. a) ¿Mávapa oikotevẽ oñemokyreʼỹ? b) ¿Mbaʼérepa heta persóna noporomokyreʼỹi?

⁴ Entéronte ñaikotevẽ ótro ñanemokyreʼỹ. Umi mitã koʼýte oikotevẽ ituakuéra omokyreʼỹ chupekuéra okakuaa aja. Peteĩ profesór hérava Timothy Evans heʼi: “Umi plánta oikotevẽháicha y, umi mitã [...] oikotevẽ avei oñemokyreʼỹ chupekuéra”. Ha heʼi avei: “Ojefelisitáramo umi mitãme ojapo porã jave peteĩ mbaʼe, oñandúta ojehayhu ha oñemombaʼeha chupekuéra”. Jaiko rupi “umi ára pahápe”, heta persóna opensa ijehénte ha ndohayhúi ihéntepe (2 Tim. 3:1-5). Oĩ sy ha túa nomokyreʼỹiva ifamíliape, pórke ituakuéra voi nomokyreʼỹi vaʼekue chupekuéra. Umi okakuaapámava oikotevẽ avei ánimo, péro heta vése ndorresivíri. Por ehémplo, heta oĩ ojekeháva noñemokyreʼỹi haguére chupekuéra itravahohápe.

 5. ¿Mbaʼéichapa ikatu ñamokyreʼỹ peteĩ persónape?

⁵ Ikatu ñamokyreʼỹ peteĩ persónape jafelisitáramo chupe ojapo porã haguére peteĩ mbaʼe, térã jaʼéramo chupe orekoha heta kualida porã. Avei ikatu ñaporomokyreʼỹ ñakonsolávo ñande rapichápe oñeñandu vai térã oñedesanima jave (1 Tes. 5:14). Ñande pyʼỹinte jajotopa ñane ermanokuérandi, upéicha jave jareko heta oportunida ñaanima hag̃ua chupekuéra (elee Eclesiastés 4:9, 10). Upévare iporã ñañeporandumi: “¿Aaprovechápa opa oportunida haʼe hag̃ua umi ermánope avalora ha ahayhuha chupekuéra?”. La Biblia heʼi: “Igustoite peteĩ persóna oikuaáramo la heʼi vaʼerã oñekotevẽve jave” (Prov. 15:23, TNM).

 6. ¿Mbaʼérepa Satanás oipota oñedesanima umi oservíva Jehovápe? Emoĩ peteĩ ehémplo ohechaukáva oñehaʼã hague ojapo upéva.

⁶ Proverbios 24:10 heʼi: “Rejúramo reñedesanima neprovléma heta jave, nekangýta ha ijetuʼúta ndéve reaguanta hag̃ua” (TNM). Satanás oikuaa porã ñañedesanimáramo, ikatuha jaju ñañemomombyry Jehovágui. Haʼe oñehaʼã vaʼekue opáicha rei odesanima hag̃ua Jóbpe, ha upearã heta ombosufri chupe. Péro Satanás nosẽi ijidéape, pórke Job osegi ifiél Jehovápe (Job 2:3; 22:3; 27:5). Ñande ikatu avei ñañemoĩ Satanásre, ñañehaʼãramo siémpre ñamokyreʼỹ ñande rogayguakuérape ha umi ermáno ñane kongregasionguápe. Péicha jajapóramo, entéronte javyʼáta ha ñaiméta Jehová ykére.

7, 8. a) ¿Mbaʼéichapa Jehová omokyreʼỹ vaʼekue isiervokuérape? b) ¿Mbaʼéichapa tuakuéra ikatu osegi Jehová ehémplo? (Ehecha pe taʼanga oĩva iñepyrũme).

⁷ Jehová oporomokyreʼỹ. Peteĩ salmísta oskrivi vaʼekue: “Jehová ni mbaʼevéicharõ ndohejamoʼãi umi osufrívape, haʼe katuete oipytyvõta umi oñekevrantávape ha oñeñandúvape yvýre” (Sal. 34:18, TNM). Peteĩ jey, proféta Jeremías okyhyje ha oñedesanima vaʼekue, péro Jehová opromete oipytyvõtaha chupe (Jer. 1:6-10). Ótra okasiónpe, Daniel ijedámarõ guare, Jehová omondo peteĩ ánhelpe omombarete hag̃ua ko profétape. Pe ánhel heʼi Daniélpe haʼeha peteĩ “kuimbaʼe ojeguerohorýva” (Dan. 10:8, 11, 18, 19, TNM). Ñande avei ikatu ñamokyreʼỹ umi puvlikadór ha prekursórpe, térã umi ermáno ijedávape ndaikatuvéimava ojapo heta mbaʼe yma guaréicha.

⁸ Jesús ou mboyve ko yvy ape ári oĩma vaʼekue voi Itúandi yvágape hetaiterei tiémpore. Upéicharõ jepe, Jehová oikuaa porã tekotevẽha gueteri omokyreʼỹ Itaʼýrape oĩrõ guare ko yvy ape ári. Upévare haʼe oñeʼẽ Itaʼýrape yvága guive. Por ehémplo, Jesús oñepyrũtarõ guare opredika ha avei pe último áño oĩrõ guare ko yvy ape ári, Jehová heʼi chupe: “Kóva hína che Raʼy ahayhuetéva ha aguerohorýva” (Mat. 3:17; 17:5). Katuete ningo koʼã mbaʼe omokyreʼỹetereíne raʼe Jesúspe. Oiméne ñanemanduʼa avei Jesús omano mboyve oñekevrantaiterei hague. Upévare Jehová ombou hendápe peteĩ ánhelpe omombarete ha okonsola hag̃ua chupe (Luc. 22:43). Tuakuéra, peẽ ikatu pesegi Jehová ehémplo pemokyreʼỹ memévo pene famíliape. Pefelisitákena chupekuéra ojapo porã jave peteĩ mbaʼe. Ha ohasa jave hikuái peteĩ situasión ijetuʼúva eskuélape, pemombarete ha peipytyvõ chupekuéra oaguanta hag̃ua.

 9. ¿Mbaʼépa ñaaprende Jesús otrata lájagui ijapostolkuérape?

⁹ Jesús haʼe avei peteĩ ehémplo porã ñandéve g̃uarã. Pe pyhare haʼe omano mboyve, ombojepyhéi vaʼekue ijapostolkuérape ha heʼi chupekuéra iñumílde vaʼerãha. Péro haʼekuéra osegi oñemombaʼeguasu ha ojodiskuti openságui oĩha iñimportantevéva ijapytepekuéra. Pedro katu oasegura voi núnka ndohejamoʼãiha Jesúspe (Luc. 22:24, 33, 34). Upéicharõ jepe, Jesús oguerohory chupekuéra ifiél haguére ha ojepytaso mbarete rupi ijykére ijetuʼu jave. Avei heʼi idisipulokuérape ojapotaha hikuái hetave mbaʼe haʼe ojapo vaʼekuégui, ha oasegura chupekuéra Jehová ohayhuha káda únope (Luc. 22:28; Juan 14:12; 16:27). Ha ñande, ¿jaʼépa avei ñane ermanokuérape orekoha heta kualida porã, térãpa ñañekonsentránte idefektokuérare?

10, 11. ¿Mbaʼéichapa Pablo omokyreʼỹ vaʼekue iñermanokuérape, ha mbaʼépa oĩ dispuésto ojapóvo?

¹⁰ Apóstol Pablo pyʼỹinte oñeʼẽ porã vaʼekue iñermanokuérare. Haʼe heta vése oviaha vaʼekue algúnondi, upévare ohasa tiémpo hendivekuéra ha oikuaa porã káda únope. Upéicharõ jepe, Pablo noñeʼẽi umi ermáno fállare, oguerohory guei chupekuéra. Por ehémplo, Timotéore heʼi vaʼekue: “Che raʼy ahayhuetéva, ojapóva hekoitépe ñande Ruvicha rembiapo”. Avei Pablo heʼi Timoteo ojepyʼapyha umi ermáno oikotevẽvare (1 Cor. 4:17; Filip. 2:19, 20). Pablo oñeʼẽ porã vaʼekue avei Títore umi kristiáno Corintoguápe. Heʼi hese haʼe omoirũ hague chupe hembiapópe oipytyvõ hag̃ua ermanokuérape (2 Cor. 8:23). Katuete Timoteo ha Tito ikyreʼỹeterei ohendúvo Pablo oñeʼẽ porãha hesekuéra.

¹¹ Pablo ha Bernabé oapeligra vaʼekue hekove omokyreʼỹ hag̃ua iñermanokuérape. Por ehémplo, haʼekuéra oho kuri Lístrape, jepe upe lugárpe ojejukase chupekuéra. ¿Maʼerãpa oho hikuái upépe? Ikatu hag̃uáicha omokyreʼỹ umi disípulo pyahúpe, ha oipytyvõ chupekuéra osegi hag̃ua iñeʼẽrendu Jehovápe (Hech. 14:19-22). Upéi, Pablo ohórõ guare Éfesope, peteĩ hénte aty ipochyetereíva oataka chupe. Hechos 20:1 ha 2 omombeʼu mbaʼépa oiko upérõ: “Opa rire pe guyryry guasu, Pablo ohenoika umi disípulope, omokyreʼỹ chupekuéra ha ojedespedi rire chuguikuéra oviaha Macedóniape. Haʼe ohasa umi lugár rehe, heta oñemoñeʼẽ umi upepeguápe omokyreʼỹ hag̃ua chupekuéra ha upéi oike Gréciape”. Jahechaháicha, Pablo siémpre omokyreʼỹ vaʼekue iñermanokuérape.

12. ¿Mbaʼérepa iporã jaha rreunionhápe?

¹² Jehová oipota pe iporãvéva ñandéve g̃uarã, upévare heʼi ñandéve jaha meme hag̃ua rreunionhápe. Umi rreuniónpe ningo ñaaprende heta mbaʼe chugui ha ñañomokyreʼỹ ñane ermanokuérandi (1 Cor. 14:31; elee Hebreos 10:24, 25). Oñepyrũre ko artíkulo ñañeʼẽ kuri Cristínare, haʼe heʼi: “Che ningo añeñandu porãiterei aha jave umi rreunionhápe, pórke umi ermáno siémpre chemokyreʼỹ ha añandu cherayhuha hikuái. Sapyʼánte añedeprimi, péro ag̃uahẽ jave Salónpe umi ermána oñemboja cherendápe, cheañua ha heʼi cheporãitereiha ajúvo. Haʼekuéra heʼi avei chéve cherayhuha ha ovyʼaitereiha ohechávo mbaʼéichapa aprogresa ahávo. Tuicha ningo añeñandu porãve ahendúvo umi mbaʼe”. Ko ehémplo ohechauka iñimportantetereiha ñañomokyreʼỹ (Rom. 1:11, 12).

13. ¿Mbaʼérepa ñaikotevẽ avei ótro ñanemokyreʼỹ jaservíramo jepe Jehovápe heta tiémporema?

¹³ Oiméramo heta tiémporema jaservi Jehovápe, lomímonte ñaikotevẽ ótro ñanemokyreʼỹ. Ñapensamína Josué ehémplore. Jehová oiporavo chupe odirihi hag̃ua umi israelítape ikatu hag̃uáicha oike pe Tiérra Prometídape. Josué ningo heta áñorema oservi Ñandejárape. Upéicharõ jepe, Jehová oipota Moisés omokyreʼỹ Josuépe. Upévare omanda chupe: “Enombra Josuépe opyta hag̃ua nde rekoviarã, emokyreʼỹ ha emombarete avei chupe. Pórke haʼe hína pe ohasátava ko puévlo renonderã, ha haʼe ogueraháta chupekuéra ojagarra hag̃ua pe yvy nde rehechátava hína” (Deut. 3:27, 28, TNM). Josué oikotevẽ oñemokyreʼỹ chupe, pórke oñorairõ vaʼerã heta enemígondi, ha noganamoʼãi kuri entéro umi gérra (Jos. 7:1-9). Koʼág̃arupi ñande avei ikatu ñamokyreʼỹ umi ansiáno ha superintendénte de sirkuítope. Haʼekuéra ombaʼapo jejopy okuida hag̃ua Jehová siervokuérape (elee 1 Tesalonicenses 5:12, 13). Peteĩ superintendénte de sirkuíto heʼi: “Sapyʼánte umi ermáno oskrivi oréve kárta heʼihápe omokyreʼỹeterei hague chupekuéra ore visíta. Ore roñongatupaite umi kárta, ha roñedesanima jave rolee jey jepi. Umíva ningo oremokyreʼỹeterei”.

14. ¿Mbaʼe ehémplopa ohechauka iñimportanteha ñaporomokyreʼỹ ñameʼẽta jave konsého?

¹⁴ Peteĩ vuéltape, Pablo oakonseha kuri umi kristiáno Corintoguápe, ha upéi ofelisita chupekuéra ojapo rupi la heʼíva (2 Cor. 7:8-11). Katuete ningo pe ánimo Pablo omeʼẽ vaʼekue koʼã kristiánope omokyreʼỹ chupekuéra osegi hag̃ua ojapo la iporãva. Koʼág̃a avei umi ansiáno ha tuakuéra ikatu osegi Pablo ehémplo. Peteĩ túa hérava Andreas mokõi ifamília. Haʼe heʼi: “Ñamokyreʼỹramo ñane famíliape, ñaipytyvõ hína chupekuéra ikatu hag̃uáicha iñakãguapyve ohóvo ha ojeroviave Jehováre. Avei péicha ñaipytyvõ umi mitãme imanduʼave hag̃ua umi mbaʼe ñamboʼévare chupekuéra. Pyʼỹinte ñamokyreʼỹramo ñane famíliape ojapo porã jave peteĩ mbaʼe, ndahaʼéi oikuaátanteva hikuái mbaʼépa la oĩ porãva, síno ojepokuaáta ojapo umíva”.

15. ¿Mbaʼéichapa ikatu ñaporomokyreʼỹ?

¹⁵ Jaʼe ñane ermanokuérape ñamombaʼeha umi esfuérso ojapóva ha umi kualida porãite orekóva hikuái. (2 Crón. 16:9; Job 1:8). Jajapóramo upéva, jasegíta Jehová ha Jesús ehémplo. Haʼekuéra ningo ovaloraiterei opa mbaʼe jajapóva hesehapekuéra, sapyʼánte ndaikatúiramo jepe jajapo heta mbaʼe iservísiope (elee Lucas 21:1-4; 2 Corintios 8:12). Ñande ningo jaikuaa ñane ermanokuéra ijedáva oñehaʼãhambaiteha oho hag̃ua rreunionhápe ha osẽ hag̃ua opredika. ¿Ñamokyreʼỹpa hína chupekuéra ha jahechauka ñamombaʼeha umi esfuérso ojapóva?

16. ¿Mbaʼéicha javépa ikatu ñamokyreʼỹ ñande rapichápe?

¹⁶ Jaaprovecha umi oportunida oñepresentáva ñaporomokyreʼỹ hag̃ua. Jahecha jave peteĩ persóna ojapo porã hague peteĩ mbaʼe, ani jaduda jaguerohory hag̃ua chupe. Apóstol Pablo ha Bernabé ohórõ guare Antioquía de Pisídiape, umi omoakãva pe sinagóga heʼi chupekuéra: “Ermanokuéra, perekóramo peteĩ marandu omokyreʼỹ vaʼerã koʼã héntepe koʼág̃a ikatu peje”. Pablo oaprovecha pe oportunida omokyreʼỹ hag̃ua umi héntepe (Hech. 13:13-16, 42-44). Ñaanimáramo ñande rapichakuérape, katuete oĩta avei ñanemokyreʼỹva (Luc. 6:38).

17. ¿Mbaʼéichapa ikatu ñamokyreʼỹ porãve ótrope?

¹⁷ Ñamensiona mbaʼe mbaʼépa la jaguerohorýva. Jesús omokyreʼỹrõ guare kongregasión de Tiatírape, heʼi chupekuéra mbaʼe mbaʼépa ojapo porã (elee Apocalipsis 2:18, 19). ¿Mbaʼéichapa ikatu jasegi Jesús ehémplo? Ikatu ñamokyreʼỹ peteĩ sy omongakuaávape haʼeño imembykuérape. Ha oiméramo nde nefamília, ikatu remokyreʼỹ chupe oñehaʼã haguére oservi porã Jehovápe. Avei emensiona chupe umi mbaʼe ojapo porãva. Jaʼéramo peteĩ persónape mbaʼérepa jaguerohory chupe, haʼe ohechakuaáta ñanesinseroha ha ikyreʼỹvéta opytávo.

18, 19. ¿Mbaʼépa ikatu jajapo ñaporoanima hag̃ua?

¹⁸ Jehová nomandái ñandéve ñamokyreʼỹ hag̃ua peteĩ persónape heʼi haguéicha Moiséspe omokyreʼỹ hag̃ua Josuépe. Upéicharõ jepe, Ñandejára omombaʼeterei ohechávo ñañehaʼãha ñaanima ótrope (Prov. 19:17; Heb. 12:12). ¿Mbaʼéichapa ikatu ñaporomokyreʼỹ? Peteĩ ermáno ojapo jave diskúrso ñane kongregasiónpe, jaʼekuaa chupe mbaʼépa ñandegustave kuri idiskúrsogui. Por ehémplo ikatu ñamombeʼu chupe ñanepytyvõha umi konsého omeʼẽ vaʼekue, térã ñantende porãve hague peteĩ téxto. Peteĩ ermána omombaʼeterei kuri peteĩ diskúrso ohendu vaʼekue asambleahápe, upévare oskrivi pe diskursántepe: “Reñeʼẽrõ guare platafórma guive ha ñañemongetávo upe rire, añemeʼẽ enkuénta Jehovánte voi chemokyreʼỹ hague. Sapyʼaiténte ñañeʼẽ kuri, péro haʼete chéve ku reikuaa porãva la che situasión, ha chemokyreʼỹeterei umi mbaʼe eréva”.

¹⁹ Apóstol Pablo heʼi vaʼekue: “Pesegíkena peñomokyreʼỹ ha peñomombarete, pejapoháicha voi peikóvo” (1 Tes. 5:11). Jasegíramo ko konsého ñamokyreʼỹta ótrope osegi hag̃ua Jehová ykére. Upéicharõ, ñañomokyreʼỹkena “káda día”, péicha katuete ñambovyʼáta Jehovápe.