Luku

21 Todin, dile e ze nukun etọn daga, e mọ adọkunnọ lẹ to nunina yetọn lẹ dlan do adọkun potin lọ lẹ mẹ. 2 To whenẹnu, e mọ asuṣiọsi wamọnọ de dlan abọgan-kuẹ flinflin awe,* he ma họakuẹ sọmọ do e mẹ, 3 e sọ dọmọ: “Nugbo wẹ yẹn dọna mì dọ, Asuṣiọsi ehe, mahopọnna dọ e yin wamọnọ, dlan do e mẹ hú lehe yemẹpo basi do. 4 Na omẹ ehe lẹpo dlan nunina lẹ do e mẹ sọn lankan yetọn lẹ mẹ, ṣigba nawe ehe sọn matindo etọn mẹ dlan nutindo gbẹ̀mẹ tọn etọn lẹpo do e mẹ.”

5 Enẹgodo, dile omẹ delẹ to hodọ gando lehe yè yí zannu dagbedagbe lẹ po onú he yin kinklandowiwe lẹ po do doaṣọ́na tẹmpli lọ do go, 6 e dọmọ: “Onú ehelẹ he mì to mimọ, azán lẹ na wá bọ zannu de ma na yin jijodo zannu de ji tofi he ma na yin hihọliai.” 7 To whenẹnu, yé kanse e dọmọ: “Mẹplọntọ, whetẹnu wẹ onú ehelẹ na jọ taun, podọ etẹwẹ na yin ohia whenue onú ehelẹ na jọ tọn?” 8 E dọmọ: “Mì payi dọ mì yin hinhẹn buali blo; na mẹsusu wẹ na wá to oyín ṣie mẹ, bo na to didọmọ, ‘Yẹn wẹ ewọ,’ podọ, ‘Ojlẹ sisọ lọ ko sẹpọ.’ Mì hodo yé blo. 9 Humọ, to whenue mì sè dogbọn awhàn po bẹwlu lẹ po dali, mì dibu blo. Na onú ehelẹ dona jọ whẹ́, ṣigba opodo lọ ma na wá to afọdopolọji.”

10 To whenẹnu, e zindonukọn nado dọna yé dọmọ: “Akọta na fọ́n do akọta ji, podọ ahọluduta do ahọluduta ji; 11 podọ aigba sisọsisọ daho lẹ na tin, podọ azọ̀nylankan lẹ po núdùdù whèdomẹ lẹ po na tin sọn fide jẹ fide; podọ nujijọ dobu lẹ na tin, ohia daho lẹ nasọ tin sọn olọn.

12 “Ṣigba, jẹnukọnna onú ehe lẹpo, alọ gbẹtọ lẹ tọn na jẹ mì go bọ yé na dohomẹkẹn mì, bo na ze mì jo na sinagọgu lẹ po gànpa lẹ po, bọ mì na yin hinhẹn yì ahọlu lẹ po ayimatẹn-gán lẹ po nukọn na oyín ṣie tọn wutu. 13 Ehe na hùn dotẹnmẹ dote na mì nado dekunnu. 14 Enẹwutu, mì magbe to ahun mìtọn mẹ jẹnukọn gando lehe mì na yiavunlọ do go blo, 15 na yẹn na na mì ohó he mì na dọ po nuyọnẹn po,* ehe nukundiọsọmẹtọ mìtọn lẹpo to pọmẹ ma na penugo nado diọnukunsọ kavi jẹagọdo. 16 Humọ, mì na yin zizejo etlẹ yin gbọn mẹjitọ lẹ, nọvisunnu lẹ, hẹnnumẹ lẹ po họntọn lẹ po dali, bọ yé na hù delẹ to mì mẹ; 17 podọ gbẹtọ lẹpo na gbẹwanna mì na oyín ṣie tọn wutu. 18 Ṣogan, dopo to oda he to ota na mì lẹ mẹ ma na dọ̀n to aliho depope mẹ. 19 Gbọn akọndonanu mìtọn dali wẹ mì na whlẹn alindọn mìtọn gán.

20 “Humọ, to whenue mì mọ awhànpa lẹ lẹdo Jelusalẹm pé, whenẹnu mì ni yọnẹn dọ vọjijẹ etọn ko dọnsẹpọ. 21 To whenẹnu, mì gbọ mẹhe to Jude lẹ ni jẹ hinhọ̀n ji yì osó lẹ ji, podọ mì gbọ mẹhe tin to e mẹ lẹ ni tọ́n, podọ mì gbọ mẹhe to gbétatò lẹ mẹ ni ma biọ e mẹ blo; 22 na azán whẹdida dodo tọn wẹ ehelẹ yin, na nuhe yin kinkàndai lẹpo nido sọgan yin hinhẹndi. 23 Dindọn hlan yọnnu he to ohò po dehe to anọ́ na ovi lẹ po to azán enẹlẹ gbè! Na yajiji sinsinyẹn na tin to aigba lọ ji podọ homẹgble do akọta ehe ji; 24 podọ yé na jai gbọn onù ohí tọn lẹ dali bo na yin hinhẹn zun kanlinmọ yì akọta lẹpo mẹ; podọ Jelusalẹm na yin afọtùn e ji gbọn akọta lẹ dali, kakajẹ whenue ojlẹ dide akọta lẹ tọn na wá.

25 “Humọ, ohia lẹ na tin to owhè, osun, po sunwhlẹvu lẹ po mẹ, bọ awufiẹsa akọta lẹ tọn na tin to aigba ji, bọ yé ma na yọ́n nuhe yé na wà na gbigbó ohù tọn po adánjijẹ etọn po wutu, 26 gbẹtọ lẹ nasọ nọ dakú na obu podọ na nukundido nuhe ja aigba ji lẹ tọn wutu; na huhlọn olọn tọn lẹ na yin whinwhàn. 27 To whenẹnu, yé nasọ mọ Visunnu gbẹtọ tọn ja to aslọ mẹ to huhlọn po gigo daho po mẹ. 28 Ṣigba, dile onú ehelẹ na jẹ jijọ ji, mì jlọ ṣite bo ze ota mìtọn daga, na whlẹngán mìtọn to sisẹpọ.”

29 Enẹwutu, e na apajlẹ de yé dọmọ: “Mì doayi ovòtin po atin he pò lẹpo po go: 30 To whenue yé ko jọ̀ amà, mì nọ yọnẹn na mìde gbọn pinpọn yé dali dọ alunlun ko sẹpọ todin. 31 Mọdopolọ, mìwlẹ ga, to whenue mì mọ onú ehelẹ to jijọ, mì ni yọnẹn dọ ahọluduta Jiwheyẹwhe tọn ko sẹpọ. 32 Nugbo wẹ yẹn dọna mì dọ, Whẹndo ehe ma na juwayi to aliho depope mẹ kaka onú ehe lẹpo nado jọ. 33 Olọn po aigba po na juwayi, ṣigba ohó ṣie lẹ ma na juwayi to aliho depope mẹ.

34 “Ṣigba, mì payi mìde go ma nado yí dùdù zẹjlẹgo, nùnù zẹjlẹgo, po magbọjẹ gbẹ̀mẹ tọn lẹ po do doagban pinpẹn na ahun mìtọn, bọ to ajiji mẹ, azán lọ na wá mì ji plaun 35 di omọ̀ de. Na e na wá mẹlẹpo he nọ nọ̀ nukunmẹ aigba tọn lẹpo ji. 36 Enẹwutu, mì nọ họ́ mìde bo nọ basi ovẹvivẹ to ojlẹ lẹpo mẹ na mì nido sọgan tindo kọdetọn dagbe to hinhọngán sọn onú ehe lẹpo he dona jọ lẹ mẹ, podọ na mì nido nọte to Visunnu gbẹtọ tọn nukọn.”

37 Enẹwutu, e nọ to mẹplọn to tẹmpli mẹ to okle, ṣigba to zánmẹ, e nọ tọ́nyi bo nọ nọ̀ osó he nọ yin Osó Olivie tọn ji. 38 Gbẹtọ lẹpo sọ nọ wá e dè to afọnnu fuu to tẹmpli mẹ nado sè ohó etọn.