Luku

4 Enẹgodo, Jesu, he gọ́ na gbigbọ wiwe, lẹkọ sọn Jọdani, bọ gbigbọ plan ẹn dánpe gbọn danfafa ji+ 2 na azán 40 bọ e to yinyin whiwhlepọn gbọn Lẹgba dali.+ E masọ dù nudepope to azán enẹlẹ gblamẹ, enẹwutu to whenue yé wá vivọnu, huvẹ hù i. 3 To whenẹnu, Lẹgba dọna ẹn dọmọ: “Eyin hiẹ yin visunnu Jiwheyẹwhe tọn de, dọna zannu ehelẹ dọ yé ni lẹzun akla.” 4 Ṣigba, Jesu gblọnna ẹn dọmọ: “E ko yin kinkan dọ, ‘Gbẹtọ ma nọ nọgbẹ̀ gbọn núdùdù kẹdẹ dali gba.’”+

5 Enẹwutu, e hẹn ẹn yì fihe yiaga de bo do ahọluduta aigba ji tọn lẹpo hia ẹ to nukunwhiwhe dopo mẹ.+ 6 Enẹgodo, Lẹgba dọna ẹn dọmọ: “Yẹn na na we aṣẹpipa ehe lẹpo po gigo yetọn po, na yé ko yin zizedo alọmẹ na mi,+ podọ mẹdepope he jlo mi wẹ yẹn na na. 7 Enẹwutu, eyin hiẹ basi sinsẹ̀n whladopo to nukọn ṣie, popolẹpo na lẹzun towe.” 8 Jesu gblọnna ẹn dọmọ: “E ko yin kinkan dọ, ‘Jehovah* Jiwheyẹwhe towe wẹ hiẹ dona nọ sẹ̀n, podọ ewọ kẹdẹ wẹ hiẹ dona nọ wà sinsẹ̀nzọn wiwe hlan.’”+

9 Enẹgodo, e plan ẹn yì Jelusalẹm bo hẹn ẹn ṣite to aga* adó tẹmpli lọ tọn bosọ dọna ẹn dọmọ: “Eyin hiẹ yin visunnu Jiwheyẹwhe tọn de, lọ́n jẹte sọn fi,+ 10 na e ko yin kinkan dọ, ‘Ewọ na degbena angẹli etọn lẹ na hiẹ tọn wutu, nado basi hihọ́na we,’ 11 bọ ‘Yewlẹ na hẹn we do alọ yetọn lẹ mẹ, na hiẹ nikaa klẹnafọ do zannu de go.’”+ 12 Jesu gblọnna ẹn dọmọ: “E ko yin kinkan dọ, ‘Hiẹ ma dona whlé Jehovah* Jiwheyẹwhe towe pọ́n.’”+ 13 Enẹwutu, na Lẹgba ko dotana whlepọn lọ lẹpo wutu, e yì sọn e dè kakajẹ dotẹnmẹ hundote dagbe devo whenu.+

14 Todin, Jesu lẹkọyi Galili to huhlọn gbigbọ lọ tọn mẹ.+ Linlin dagbe lẹ sọ gbayipe gando ewọ go to otò he lẹdo pé lẹpo mẹ. 15 Humọ, e jẹ mẹplọn ji to sinagọgu yetọn lẹ mẹ bọ mẹlẹpo nọ gbògbéna ẹn.

16 Enẹgodo, e yì Nazalẹti,+ fie yè pọ́n e go whẹ́n te, bọ dile e ko yin aṣa etọn to Gbọjẹzangbe do, e biọ sinagọgu mẹ+ bo ṣite nado hiawe. 17 Enẹwutu, owe-hihá yẹwhegán Isaia tọn yin zize na ẹn, e sọ hùn owe-hihá lọ bo mọ fie e yin kinkan do dọmọ: 18 “Gbigbọ Jehovah* tọn tin to ji e, na e ko yiamisisadode mi nado lá wẹndagbe na wamọnọ lẹ. Ewọ ko do mi hlan nado lá tundote hlan kanlinmọ lẹ podọ nukunnumimọ hlan nukuntọ́nnọ lẹ, nado tún mẹhe yin kọgbidina lẹ dote,+ 19 nado dọyẹwheho owhe alọkẹyi Jehovah* tọn.”+ 20 To whenẹnu, e há owe-hihá lọ, bo gọ̀ ẹ jo na devizọnwatọ lọ bosọ sinai; mẹhe to sinagọgu mẹ lẹpo sọ to pinpọn ẹn tlintlin. 21 Enẹwutu, e jẹ didọna yé ji dọmọ: “Egbehe wẹ adà Owe-wiwe tọn he mì ṣẹṣẹ sè ehe yin hinhẹndi.”+

22 Podọ yemẹpo jẹ kunnu dagbe de ji gando ewọ go bọ awú sọ to jiji yé gando ohó ojọmiọn tọn he to tintọ́n sọn onù etọn mẹ lẹ go,+ bọ yé to didọmọ: “Ehe wẹ visunnu Josẹfu tọn, kavi e ma yin mọ wẹ?”+ 23 Enẹwutu, e dọna yé dọmọ: “Matin ayihaawe, mìwlẹ na yí ohó ehe zan gando go e dọ, ‘Dotozọ́nwatọ, hẹnazọ̀ngbọna dewe. Nuhe mí sè bọ e yin wiwà to Kapẹlnaumi lẹ, basi yé ga to otò towe titi mẹ tofi.’”+ 24 Enẹwutu, e dọmọ: “Nugbo wẹ yẹn dọna mì dọ, yẹwhegán depope ma nọ yin alọkẹyi to otò etọn titi mẹ gba.+ 25 Di apajlẹ, nugbo wẹ yẹn dọna mì dọ: Asuṣiọsi susu wẹ tin to Islaeli to azán Elija tọn lẹ gbè, to whenue olọn yin súsú bọ jikun ma ja na owhe atọ̀n po osun ṣidopo po, bọ huvẹ daho de tọ́n to aigba lẹpo ji.+ 26 Ṣogan, Elija ma yin didohlan depope to yọnnu enẹlẹ mẹ dè gba, adavo hlan asuṣiọsi de dè to Zalefati to otò Sidoni tọn mẹ kẹdẹ.+ 27 Humọ, pòtọnọ susu wẹ tin to Islaeli to ojlẹ yẹwhegán Eliṣa tọn mẹ; ṣogan depope to yé mẹ ma yin kiklọ́we,* adavo Naamani Silianu lọ kẹdẹ.”+ 28 Todin, mẹhe to onú ehelẹ sè to sinagọgu mẹ lẹpo gblehomẹ tlala,+ 29 podọ yé fọ́n bo sisẹ́ ẹ jẹgbonu sọn tòdaho lọ mẹ, bosọ plan ẹn yì bẹbẹnu osó he ji tòdaho yetọn yin gbigbá do lọ tọn, nado sọgan sisẹ́ ẹ sọtado. 30 Ṣigba, e gbọn ṣẹnṣẹn yetọn bo yì.+

31 Enẹgodo, e jẹte yì Kapẹlnaumi, tòdaho Galili tọn de mẹ. E sọ to mẹplọn to Gbọjẹzangbe,+ 32 awú sọ ji yé gando aliho mẹpinplọn tọn etọn go,+ na e to hodọ po aṣẹ po wutu. 33 Todin, dawe de tin to sinagọgu mẹ, he tindo gbigbọ de, yèdọ gbigbọ mawé de, podọ e dawhá po ogbè lélé po dọmọ:+ 34 “Ọọ! Etẹwẹ míwlẹ tindo nado wà hẹ we, hiẹ Jesu Nazalẹti tọn?+ Be hiẹ wá nado và mí sudo wẹ? Yẹn yọ́n mẹhe hiẹ yin na taun tọn, hiẹ wẹ Omẹ Wiwe Jiwheyẹwhe tọn.”+ 35 Ṣigba, Jesu gbẹnuna gbigbọ mawé lọ dọmọ: “Nabọẹ, bo tọ́n sọn ewọ mẹ.” Enẹwutu, to whenue aovi lọ ko dlan dawe lọ do kọmẹ to ṣẹnṣẹn yetọn godo, e tọ́n sọn ewọ mẹ bo ma gbleawuna ẹn. 36 To whenẹnu, avò vò yemẹpo, bọ yé jẹ didọna ode awetọ yetọn ji dọmọ: “Ohó nankọ die? Na e nọ yí aṣẹ po huhlọn po do degbedo gbigbọ mawé lẹ, bọ yé nọ tọ́njẹgbonu!” 37 Enẹwutu, linlin he gando e go lẹ to gbigbayipe gbọn filẹpo to otò he lẹdo pé lẹpo mẹ.

38 To whenue e ko tọ́n sọn sinagọgu lọ mẹ godo, e biọ owhé Simọni tọn gbè. Todin, agbasa-hùnmiyọ́n sinsinyẹn de to tuklado asi-nọ̀ Simọni tọn, yé sọ vẹ̀ ẹ nado gọalọna yọnnu lọ.+ 39 Enẹwutu, e dẹ́ do e ji bo gbẹnuna agbasa-hùnmiyọ́n lọ, bọ e yì sọn e ji. Yọnnu lọ sọ fọ́n to afọdopolọji bo jẹ lizọnyina yé ji.

40 Ṣigba, to whenue owhè ko to họyì, mẹhe tindo awutunọ he to azọ̀n voovo jẹ lẹpo hẹn yé wá e dè. E nọ hẹnazọ̀ngbọna yé gbọn alọ etọn lẹ zizedo dopodopo yetọn ji dali.+ 41 Aovi lẹ lọsu tọ́njẹgbonu sọn mẹsusu mẹ, bo nọ to awhádo dọmọ: “Hiẹ wẹ Visunnu Jiwheyẹwhe tọn.”+ Ṣigba, ewọ nọ gbẹnuna yé, bo ma nọ dike yé ni dọho,+ na yé yọnẹn dọ ewọ wẹ Klisti wutu.+

42 Ṣigba, to whenue ai ko họ́n, e tọ́njẹgbonu bo yì fihe to olá de.+ Etomọṣo, gbẹtọgun lẹ jẹ dindin in pé ji kaka yì fihe e te, yé sọ tẹnpọn nado glọnalina ẹn ma nado yì sọn yé dè. 43 Ṣigba, e dọna yé dọmọ: “Yẹn dona yì tòdaho devo lẹ mẹ ga nado lá wẹndagbe Ahọluduta Jiwheyẹwhe tọn, na ehe wutu wẹ yẹn do yin didohlan.”+ 44 Enẹwutu, e zindonukọn nado to yẹwhehodọ to sinagọgu Jude tọn lẹ mẹ.