1 Kọlintinu lẹ

15 Todin, mẹmẹsunnu lẹ emi, yẹn flinnu mì gando wẹndagbe he yẹn lá na mì lọ go,+ he mìwlẹ sọ kẹalọyi, podọ gando ehe go mì ko do teninọ mìtọn hia. 2 Ehe gblamẹ wẹ mìwlẹ sọ to yinyin whinwhlẹngán te, eyin mì nọ tẹdo wẹndagbe he yẹn lá na mì lọ go gligli, eyin e ma yinmọ, be mì lẹzun yisenọ lẹ to ovọ́ mẹ.

3 Na dopo to onú tintan he yẹn zedo alọmẹ na mì lẹ mẹ wẹ nuhe yẹnlọsu mọyi, dọ Klisti kú na ylando mítọn lẹ dile Owe-wiwe lẹ dọ do,+ 4 dọ ewọ yin dìdì,+ mọwẹ, ewọ sọ yin finfọn+ to azán atọ̀ntọ gbè+ dile Owe-wiwe lẹ dọ do,+ 5 podọ e sọawuhia Kefa*+ enẹgodo, omẹ Wiawe lẹ.+ 6 Bọdo enẹ go, e sọawuhia nuhe hugan mẹmẹsunnu 500 to ojlẹ dopo mẹ,+ mẹhe suhugan yetọn gbẹ́ tin hẹ mí, dile etlẹ yindọ delẹ ko damlọn to okú mẹ. 7 Enẹgodo, e sọawuhia Jakọbu,+ enẹgodo apọsteli lẹpo.+ 8 Ṣigba to godo mẹ pete, e sọawuhia yẹnlọsu ga+ taidi mẹhe yin jiji azán mapemape.

9 Na yẹn wẹ yin pẹvi pete to apọsteli lẹ mẹ, podọ yẹn ma jẹ nado yin yiylọdọ apọsteli de, na yẹn dohomẹkẹn agun Jiwheyẹwhe tọn wutu.+ 10 Ṣigba, gbọn nukundagbe majẹhẹ Jiwheyẹwhe tọn dali wẹ yẹn do yin nuhe yẹn yin. Podọ nukundagbe majẹhẹ etọn he yin didohia mi ma yin to ovọ́ mẹ, ṣigba yẹn jẹtukla hú yemẹpo; ṣogan e ma yin yẹn, ṣigba nukundagbe majẹhẹ Jiwheyẹwhe tọn he tin hẹ mi lọ wẹ. 11 To whelọnu lo, vlavo yẹn kavi yewlẹ, aliho he mẹ mí to yẹwhehodọ te niyẹn, podọ lehe mìwlẹ yise do niyẹn.

12 Todin, eyin mí to yẹwhehodọ gando Klisti go dọ e ko yin finfọn sọn oṣiọ lẹ mẹ,+ naegbọn delẹ to mì mẹ do dọ dọ fọnsọnku oṣiọ lẹ tọn de ma tin? 13 Na nugbo tọn, eyin fọnsọnku oṣiọ lẹ tọn ma tin, be mọjanwẹ Klisti lọsu ma ko yin finfọn do niyẹn. 14 Ṣigba, eyin Klisti ma ko yin finfọn, na nugbo tọn, ovọ́ wẹ yẹwhehodidọ mítọn, podọ yise mìtọn lọsu yin ovọ́. 15 Mọdopolọ, eyin nugbo wẹ dọ oṣiọ lẹ ma na yin finfọn, be míwlẹ sọ yin mimọ di mẹhe to kunnu lalo de sọta Jiwheyẹwhe,+ na mí ko dekunnu sọta Jiwheyẹwhe gbọn didọ dali dọ ewọ fọ́n Klisti,+ mẹhe ewọ ma fọ́n. 16 Na eyin oṣiọ lẹ ma na yin finfọn, be Klisti lọsu ma ko yin finfọn. 17 Humọ, eyin Klisti ma ko yin finfọn, be onú tata wẹ yise mìtọn; mìwlẹ gbẹ́ pò to ylando mìtọn lẹ mẹ.+ 18 To whenẹnu, mẹhe damlọn to okú mẹ to kọndopọ mẹ hẹ Klisti lẹ lọsu ko dọ̀n.+ 19 Eyin to ogbẹ̀ ehe mẹ kẹdẹ wẹ mí tindo todido to Klisti mẹ te, be onú mítọn wẹ blawu hugan to gbẹtọ lẹpo mẹ.

20 Ṣigba todin, Klisti ko yin finfọn sọn oṣiọ lẹ mẹ, yèdọ sinsẹ́n tintan mẹhe ko damlọn to okú mẹ lẹ tọn lẹ.+ 21 Na to whenuena e yindọ mẹdopo gblamẹ wẹ okú gbọn wá,+ mẹdopo gblamẹ wẹ fọnsọnku oṣiọ lẹ tọn lọsu gbọn wá ga.+ 22 Na kẹdẹdile mẹlẹpo to kúkú to Adam mẹ,+ mọdopolọ wẹ mẹlẹpo na yin hinhẹnwa ogbẹ̀ to Klisti mẹ do ga.+ 23 Ṣigba, mẹdopodopo to aliho he to kannukannu de mẹ: Klisti sinsẹ́n tintan lẹ,+ enẹgodo mẹhe yin Klisti tọn lẹ to tintin tofi etọn whenu.+ 24 Enẹgodo, to opodo, whenuena e na ko ze Ahọluduta do alọmẹ na Jiwheyẹwhe podọ Otọ́ etọn, to whenuena ewọ na ko hẹn gandudu lẹpo, aṣẹpipa po huhlọn lẹpo po zun ovọ́.+ 25 Na ewọ dona dugán taidi ahọlu kakajẹ whenue Jiwheyẹwhe na ko hẹn kẹntọ lẹpo wá afọ etọn lẹ glọ.+ 26 Podọ kẹntọ godo tọn, yèdọ okú na yin hinhẹn zun ovọ́.+ 27 Na Jiwheyẹwhe “ko hẹn nulẹpo zun mẹmẹglọ to afọ etọn lẹ glọ.”+ Ṣigba, to whenuena e dọ dọ ‘nulẹpo ko yin hinhẹn zun mẹmẹglọ,’+ e họnwun dọ ehe ma bẹ Mẹlọ he hẹn nulẹpo zun mẹmẹglọ na ẹn hẹn gba.+ 28 Ṣigba, to whenue nulẹpo na ko yin hinhẹn zun mẹmẹglọ na ẹn godo, to whenẹnu Visunnu lọ lọsu ga na hẹn ede zun mẹmẹglọ na Mẹlọ he hẹn nulẹpo zun mẹmẹglọ na ẹn,+ na Jiwheyẹwhe nido yin nulẹpo na mẹlẹpo.+

29 Eyin e ma yinmọ, etẹwẹ mẹhe to yinyin bibaptizi na lẹndai lọ nado yin oṣiọ lẹ na wà?+ Eyin oṣiọ lẹ ma na yin finfọn paali, naegbọn yewlẹ ga do to yinyin bibaptizi na lẹndai mọnkọtọn? 30 Naegbọn mílọsu do to owù mẹ to gànhiho* lẹpo mẹ?+ 31 Mẹmẹsunnu lẹ emi, egbesọegbesọ wẹ yẹn nọ pannukọn okú, kẹdẹdile e họnwun dọ yẹn nọ jẹaglin do mì ji to Klisti Jesu Oklunọ mítọn mẹ do. 32 Eyin yẹn ko hoavùn hẹ gbekanlin lẹ to Efesu taidi mẹdevo lẹ,*+ ale tẹwẹ to e mẹ na mi? Eyin oṣiọ lẹ ma na yin finfọn, “mì gbọ mí ni dù bo nù, na osọ wẹ mí na kú.”+ 33 Yè klọ mì blo. Gbẹdido ylankan lẹ nọ hẹn walọ dagbe lẹ gble.+ 34 Mì gọ̀ biọ mìde mẹ to aliho dodo tọn mẹ, mì sọ zindonukọn to ylando mẹ blo, na mẹdelẹ ma tindo oyọnẹn Jiwheyẹwhe tọn. Yẹn to hodọ nado hẹn winyan hù mì.

35 Etomọṣo, mẹde sọgan dọmọ: “Nawẹ oṣiọ lẹ na yin finfọn gbọn? Mọwẹ, agbasa nankọ mẹ wẹ yé na lẹkọwa te?”+ 36 Hiẹ nulunọ! Nuhe hiẹ do ma nọ yin hinhẹnwa ogbẹ̀ adavo e kú whẹ́. 37 Podọ gando nuhe hiẹ do go, e ma yin agbasa he na whẹ́n wẹ hiẹ do gba, ṣigba okún he to tata de poun, vlavo likun tọn kavi okún wunmẹ devo de; 38 ṣigba Jiwheyẹwhe nọ na ẹn agbasa de kẹdẹdile ewọ jlo do, podọ e nọ na okún dopodopo sọgbe hẹ agbasa etọn titi. 39 Agbasalan lẹpo ma nọ yin agbasalan dopolọ gba, ṣigba ode nọ yin gbẹtọvi tọn, devo nọ yin agbasalan kanlin tọn, devo nọ yin agbasalan ohẹ̀ lẹ tọn, podọ devo nọ yin whèvi tọn. 40 Podọ agbasa olọn mẹ tọn lẹ tin,+ agbasa aigba ji tọn lẹ sọ tin;+ ṣigba gigo agbasa olọn mẹ tọn lẹ tọn gbọnvo, podọ dehe yin agbasa aigba ji tọn lẹ tọn sọ gbọnvo. 41 Gigo owhè tọn gbọnvo, gigo osun tọn yin devo,+ podọ gigo sunwhlẹvu lẹ tọn yin devo; na nugbo tọn, sunwhlẹvu de nọ gbọnvona sunwhlẹvu devo to gigo mẹ.

42 Mọdopolọ wẹ fọnsọnku oṣiọ lẹ tọn te ga. E yin dido to gbigble mẹ; e yin finfọn to magble mẹ.+ 43 E yin dido to madoyẹyi mẹ; e yin finfọn to gigo mẹ.+ E yin dido to madogán mẹ; e yin finfọn to huhlọn mẹ.+ 44 E yin dido to agbasalan mẹ; e yin finfọn to agbasa gbigbọnọ de mẹ. Eyin agbasalannọ de tin, be gbigbọnọ de tin ga. 45 Mọ wẹ e yin kinkandai do dọmọ: “Sunnu tintan Adam lẹzun gbẹtọ* gbẹ̀te.”+ Adam godo tọn lẹzun gbigbọ ogbẹ̀-namẹtọ.+ 46 Etomọṣo, tintan lọ ma yin dehe yin gbigbọnọ gba. Dehe yin agbasalannọ wẹ yin tintan lọ, enẹgodo enẹ he yin gbigbọnọ. 47 Sunnu tintan wá sọn aigba mẹ bo yin bibasi sọn kọ́gudu mẹ;+ sunnu awetọ wá sọn olọn.+ 48 Dile mẹhe yin bibasi sọn kọ́gudu mẹ lọ te, mọ wẹ mẹhe yin bibasi sọn kọ́gudu mẹ lẹ te ga; podọ dile mẹhe sọn olọn lọ te, mọ wẹ mẹhe yin olọn tọn lẹ te ga.+ 49 Podọ kẹdẹdile mí ko ze awusọhia mẹhe yin bibasi sọn kọ́gudu mẹ lọ tọn do dó,+ mí nasọ ze awusọhia mẹhe wá sọn olọn lọ tọn do ga.+

50 Ṣigba, mẹmẹsunnu lẹ emi, yẹn dọna mì dọ, agbasalan po ohùn po ma sọgan dugu Ahọluduta Jiwheyẹwhe tọn, mọjanwẹ gbigble ma nọ dugu magble tọn do niyẹn. 51 Mì pọ́n! Yẹn na dọ aṣli wiwe de na mì: Mímẹpo ma na damlọn to okú mẹ gba, ṣigba mímẹpo wẹ na yin didiọ,+ 52 to ojlẹ dopo mẹ, yèdọ to nukunwhiwhe dopo mẹ, to opẹ̀n godo tọn lọ whenu. Na opẹ̀n lọ na dọnú+ bọ oṣiọ lẹ na yin finfọn do magble mẹ, bọ mí nasọ yin didiọ. 53 Na dehe sọgan gble ehe dona ze magble do,+ podọ dehe nọ kú ehe dona ze ehe yin jọmaku do.+ 54 Ṣigba, to whenue dehe sọgan gble ehe na ko ze magble do bọ dehe nọ kú ehe na ko ze jọmaku do, whenẹnu wẹ nuhe yin kinkandai lọ na jọ dọmọ: “Okú yin zize mì kakadoi.”+ 55 “Okú E, fie wẹ awhàngbigba towe te? Okú E, fie wẹ adí towe te?”+ 56 Ylando wẹ adí he nọ hẹn okú wá,+ podọ Osẹ́n lọ wẹ huhlọn ylando tọn.*+ 57 Ṣigba, opẹ́ wẹ na Jiwheyẹwhe, na ewọ na mí awhàngbigba gbọn Oklunọ mítọn Jesu Klisti gblamẹ!+

58 Enẹwutu, mẹmẹsunnu mẹyiwanna ṣie lẹ emi, mì nọte gligli,+ masẹafọ bo nọ tindo nususu nado wà+ to azọ́n Oklunọ tọn mẹ to whepoponu, to yinyọnẹn mẹ dọ tuklajijẹ mìtọn ma yin ovọ́+ to Oklunọ mẹ.