“Ehe Wẹ Osẹ́n Tẹmpli lọ Tọn”

1, 2. (a) Etẹwẹ mí plọn to weta he wayi mẹ gando tẹmpli he Ezekiẹli mọ to numimọ mẹ lọ go? (b) Kanbiọ awe tẹlẹ wẹ mí na gbadopọnna to weta ehe mẹ?

TẸMPLI he Ezekiẹli mọ to numimọ mẹ lọ ma yin tẹmpli daho gbigbọmẹ tọn he apọsteli Paulu wá dọhodeji to owhe kanweko susu godo lọ. Nuhe mí plọn to weta he wayi mẹ niyẹn. Mí sọ plọn dọ lẹndai numimọ lọ tọn wẹ nado plọn omẹ Jiwheyẹwhe tọn lẹ nujọnu-yinyin nujinọtedo he Jiwheyẹwhe zedai gando sinsẹ̀n-bibasi wiwe-ṣeke go lẹ tọn. Gbẹninọ sọgbe hẹ nujinọtedo enẹlẹ kẹdẹ wẹ na zọ́n bọ yé na duvivi haṣinṣan yọyọ de tọn hẹ Jehovah. Abajọ Jehovah do zinnudo linlẹn tangan enẹ ji whla awe to wefọ dopo gee mẹ dọmọ: “Ehe wẹ osẹ́n tẹmpli lọ tọn.”—Hia Ezekiẹli 43:12.

² Todin, mí dona gbadopọnna kanbiọ awe delẹ yinukọn dogọ. Tintan: Nuplọnmẹ titengbe tẹlẹ wẹ Ju he nọgbẹ̀ to azán Ezekiẹli tọn gbè lẹ sọgan ko plọn sọn numimọ tẹmpli lọ tọn ehe mẹ gando nujinọtedo Jehovah tọn lẹ na sinsẹ̀n-bibasi wiwe-ṣeke go? Gblọndo kanbiọ enẹ tọn na gọalọna mí nado dín gblọndo na kanbiọ awetọ he dọ dọ: Etẹwẹ numimọ lọ zẹẹmẹdo na mí to azán godo tọn he gọ́ na tukla ehelẹ mẹ?

 3. Nawẹ nugbo lọ dọ numimọ Ezekiẹli tọn wá aimẹ to osó he yiaga de ji sọgan ko zọ́n bọ winyan na hù ahunjijlọnọ lẹ gbọn?

³ Nado mọ gblọndo na kanbiọ tintan lọ, mì gbọ mí ni gbadopọnna adà delẹ he dọ̀n ayidonugo to numimọ tẹmpli lọ tọn mẹ. Osó he yiaga lọ. Mẹlọ lẹ sọgan ko mọdọ kanṣiṣa de tin to lẹdo he mẹ numimọ Ezekiẹli tọn wá aimẹ te po dọdai ojlofọndotenamẹ tọn he Isaia dọ gando hẹngọwa go po ṣẹnṣẹn. (Isa. 2:2) Ṣigba, etẹwẹ ohọ̀ Jehovah tọn mimọ to osó he yiaga taun enẹ ji plọn yé? E plọn yé dọ sinsẹ̀n-bibasi wiwe-ṣeke dona yin zizedaga bosọ yin hinhẹn yiji hú sinsẹ̀n-bibasi wunmẹ devo depope. Nugbo wẹ dọ sinsẹ̀n-bibasi wiwe-ṣeke na ede ko yiaga, na Mẹlọ he “yin zizedaga pete hú yẹwhe he pò lẹpo” dè wẹ e wá sọn. (Salm. 97:9) Amọ́, gbẹtọ lọ lẹ ma to adà yetọn yiwà to whenẹnu. Na owhe kanweko susu, yé gbẹkọ sinsẹ̀n-bibasi wiwe-ṣeke go pludopludo bo dike bọ e yin zínzín do odò bosọ yin hinhẹnflu. Enẹwutu, e họnwun dọ winyan na ko hù ahunjijlọnọ lẹ nado mọ todin dọ ohọ̀ wiwe Jiwheyẹwhe tọn yin zizedaga, yèdọ do otẹn gigonọ he jẹna ẹn mẹ.

4, 5. Etẹwẹ mẹhe to todoaina Ezekiẹli lẹ sọgan ko plọn sọn jiyiyi họngbo tẹmpli lọ tọn lẹ tọn mẹ?

⁴ Họngbo he yiaga lọ lẹ. To bẹjẹeji numimọ lọ tọn, Ezekiẹli mọ bọ angẹli he to pinplan ẹn dánpe lọ to họngbo lẹ jlẹ. Họngbo lọ lẹ yiji na nudi mẹtlu 30! (Ezek. 40:14) Abò nuhọ́tọ tọn lẹ sọ tin to aga na họngbo enẹlẹ. Etẹwẹ ehe lẹpo na ko hẹnwa ayiha mẹ na mẹhe doayi yẹdide ehe go kavi gbeje e pọ́n lẹ? Jehovah dọna Ezekiẹli dọmọ: “Yí sọwhiwhe do doayi ohọ̀n tẹmpli lọ tọn lẹ . . . go.” Etẹwutu? Na gbẹtọ lọ lẹ ko plan mẹhe ma “gboadà to ahun mẹ podọ to agbasa go lẹ” biọ ohọ̀ sinsẹ̀n-bibasi wiwe tọn Jiwheyẹwhe tọn mẹ tlọlọ. Po kọdetọn tẹ po? “Yé hẹn tẹmpli ṣie flu,” wẹ Jehovah dọ.—Ezek. 44:5, 7.

⁵ Yé mẹhe “ma gboadà to . . . agbasa go lẹ” gboawupo nado setonuna gbedide he họnwun de he Jiwheyẹwhe ko na sọn azán Ablaham tọn gbè gbọ́n. (Jen. 17:9, 10; Lev. 12:1-3) Ṣigba, ninọmẹ mẹhe “ma gboadà to ahun mẹ” lọ lẹ tọn sọ ylan humọ. Yé desọn ojlo mẹ nado ṣiatẹ bo gbẹkọ anademẹ po alihiamẹ Jehovah tọn po go. Dotẹnmẹ ma dona yin nina omẹ mọnkọtọn lẹ nado biọ ohọ̀ sinsẹ̀n-bibasi wiwe tọn Jehovah tọn mẹ! Jehovah gbẹwanna yẹnuwiwa, amọ́ omẹ etọn lẹ ko dike bọ yẹnuwiwa gbayipe to ohọ̀ etọn mẹ. Họngbo po abò nuhọ́tọ tọn tẹmpli he Ezekiẹli mọ lọ tọn lẹ po to onú titengbe de plọnmẹ: Nuṣiwa mọnkọ lẹ dona doalọte! Nujinọtedo yiaga he kọ̀n yè dona jẹ whẹpo do biọ ohọ̀ Jiwheyẹwhe tọn mẹ lẹ dona yin hihodo. Whenẹnu kẹdẹ wẹ Jehovah na dona sinsẹ̀n-bibasi omẹ etọn lẹ tọn.

6, 7. (a) Nawẹ Jehovah yí adó he lẹdo tẹmpli lọ blebu pé zan nado dowẹn de omẹ etọn lẹ gbọn? (b) Nawẹ omẹ Jehovah tọn lẹ ko yinuwa hẹ ohọ̀ etọn wayi gbọn? (Pọ́n nudọnamẹ odò tọn.)

⁶ Adó he lẹdo tẹmpli lọ. Adà devo he sọ jẹna ayidego to numimọ tẹmpli lọ tọn mẹ wẹ adó he yè yí do glọn fihe tẹmpli lọ te lẹdo pé. Ezekiẹli dọ dọ adó he to awà dopodopo ji dite na ofánpò 500, kavi nudi kilomẹtlu dopo daa. (Ezek. 42:15-20) Etomọṣo, ohọ̀ tẹmpli lọ tọn po awánu etọn po to pọmẹ tindo adà voovo ẹnẹ he sọzẹn hẹ yede, podọ adà dopodopo dite sọ mẹtlu 259. Enẹwutu, tẹnmẹ tin taun lẹdo tẹmpli lọ bọ yè yí adó gbonu tọn enẹ do glọn ẹn lẹdo pé.a Na lẹndai tẹ wutu?

⁷ Jehovah dọmọ: “Todin, dike yé ni hẹn galilọ gbigbọmẹ tọn yetọn po oṣiọ ahọlu yetọn lẹ tọn po do olá na mi, yẹn nasọ nọ ṣẹnṣẹn yetọn kakadoi.” (Ezek. 43:9) “Oṣiọ ahọlu yetọn lẹ tọn” he yin nùdego tofi sọgan ko to alọdlẹndo boṣiọ-sinsẹ̀n. Gbọnmọ dali, Jehovah yí tẹnmẹ gblagada he lẹdo tẹmpli he Ezekiẹli mọ lọ zan nado dọ to aliho de mẹ dọ: “Mì hẹn onú hiọawu lẹpo dolá na mi. Mì ma tlẹ dike yé ni sẹpọ blo.” E dohia dọ eyin yé hẹn sinsẹ̀n-bibasi yetọn do wiweji, Jehovah na dona yé bo nọ ṣẹnṣẹn yetọn.

8, 9. Etẹwẹ ayinamẹ sinsinyẹn he Jehovah na sunnu he to otẹn azọngban tọn mẹ lẹ sọgan ko plọn gbẹtọ lọ lẹ?

⁸ Ayinamẹ sinsinyẹn na sunnu azọngbannọ lẹ. Jehovah sọ na ayinamẹ sinsinyẹn he sinai do owanyi ji sunnu he to azọngban titengbe lẹ hẹndi to mẹlọ lẹ ṣẹnṣẹn lẹ. E wọhẹ Levinu lẹ na yé danbú sọn e dè to whenue gbẹtọ lọ lẹ lẹhlan boṣiọ-sinsẹ̀n kọ̀n, amọ́ e na pipà visunnu Zadọki tọn lẹ “he penukundo azọngban fiwiwe [etọn] tọn lẹ go to whenue Islaelivi lẹ danbú.” E gbọn dodowiwa po lẹblanu po dali yinuwa hẹ pipli dopodopo sọgbe hẹ nuyiwa yetọn lẹ. (Ezek. 44:10, 12-16) Mọdopolọ, e wọhẹ ahọvi Islaeli tọn lẹ lọsu sinsinyẹn.—Ezek. 45:9.

⁹ Jehovah gbọnmọ dali dohia dọ sunnu he to otẹn aṣẹpipa po nukunpedonugo po tọn mẹ lẹ na dogbè na emi gando aliho he mẹ yé hẹn azọngban yetọn lẹ di te go. Otẹn he mẹ yé te ma zọ́n bọ yè ma gán sọ na yé ayinamẹ, wọhẹ yé kavi domẹplọnlọ yé go ba. To vogbingbọn mẹ, yewlẹ wẹ dona yin nukọntọ to nujinọtedo yiaga Jehovah tọn lẹ hihodo mẹ!

10, 11. Kunnudenu tẹwẹ dohia dọ delẹ to kanlinmọ he lẹkọ lọ lẹ mẹ plọnnu sọn numimọ Ezekiẹli tọn lọ mẹ?

¹⁰ Be kanlinmọ he lẹkọ lọ lẹ yinuwa sọgbe hẹ nuplọnmẹ he numimọ Ezekiẹli tọn lọ bẹhẹn lẹ ya? Nugbo wẹ dọ mí ma gán yọ́n nuhe sunnu po yọnnu nugbonọ he nọgbẹ̀ to whenẹnu lẹ po lẹn gando numimọ jiawu enẹ go taun. Ṣigba, Ohó Jiwheyẹwhe tọn dọ nususu na mí gando nuhe kanlinmọ he lẹkọ lọ lẹ wà po nukun he yé yí do pọ́n sinsẹ̀n-bibasi wiwe-ṣeke Jehovah tọn po go. Be yé hodo nunọwhinnusẹ́n he numimọ Ezekiẹli tọn lọ bẹhẹn lẹ ya? Yé wàmọ jẹ obá de mẹ—titengbe yijlẹdo tọgbo atẹṣitọ yetọn he nọgbẹ̀ jẹnukọnna kanlinmọgbenu Babilọni tọn lẹ go.

¹¹ Sunnu nugbonọ delẹ taidi yẹwhegán Hagai po Zekalia po, gọna Ẹzla he yin yẹwhenọ podọ vọkan-basitọ po ayimatẹn-gán Nẹhemia po wazọ́n sinsinyẹn nado plọnnu mẹlẹ gando nunọwhinnusẹ́n he numimọ Ezekiẹli tọn bẹhẹn lẹ nkọ go. (Ẹzla 5:1, 2) Yé plọn akọta lọ dọ sinsẹ̀n-bibasi wiwe-ṣeke dona yin zizedaga bo yin zizedo otẹn tintan mẹ hú ojlo agbasanu lẹ tọn po ojlo ṣejannabi tọn lẹ po. (Hag. 1:3, 4) Yé zinnudeji dọ nujinọtedo he kọ̀n yè dona jẹ to sinsẹ̀n-bibasi wiwe-ṣeke mẹ lẹ dona yin hihodo. Di apajlẹ, Ẹzla po Nẹhemia po na ayinamẹ sinsinyẹn gbẹtọ lọ lẹ nado yàn asi jonọ yetọn lẹ he to hinhẹn yé gbọjọ to gbigbọ-liho. (Hia Ẹzla 10:10, 11; Nẹh. 13:23-27, 30) Etẹwẹ dogbọn boṣiọ-sinsẹ̀n dali? E taidi dọ to kanlinmọgbenu-ninọ lọ godo, akọta lọ wá gbẹwanna ylando enẹ he mẹ yé ko jai jẹ pludopludo to whenuho gblamẹ. Bọ yẹwhenọ lẹ po ahọvi lẹ po lo? Dile numimọ Ezekiẹli tọn dohia do, yelọsu tin to mẹhe mọ ayinamẹ po wọhẹ po yí sọn Jehovah dè lẹ mẹ. (Nẹh. 13:22, 28) Susu to yé mẹ gbọn whiwhẹ dali kẹalọyi ayinamẹ lọ.—Ẹzla 10:7-9, 12-14; Nẹh. 9:1-3, 38.

12. Aliho tẹlẹ mẹ wẹ Jehovah dona kanlinmọ lọ lẹ te to kọlilẹ yetọn godo?

¹² Taidi kọdetọn de, Jehovah dona omẹ etọn lẹ. Akọta lọ duvivi haṣinṣan dagbe de tọn hẹ Jehovah gọna agbasalilo dagbe po jijọho he nkọ yé ma ko tindo sọn whenu dindẹn die po. (Ẹzla 6:19-22; Nẹh. 8:9-12; 12:27-30, 43) Etẹwutu? Na mẹlọ lẹ wá jẹ nujinọtedo dodo tọn he Jehovah zedai na sinsẹ̀n-bibasi wiwe-ṣeke lẹ hodo ji wutu. Nuplọnmẹ he numimọ tẹmpli lọ tọn bẹhẹn lẹ yinuwa do ahun mẹsusu tọn ji. To bladopọ mẹ, mí sọgan dọ dọ numimọ tẹmpli lọ tọn he Ezekiẹli mọ hẹn ale wá na kanlinmọ lọ lẹ to aliho titengbe awe mẹ. (1) E plọn yé onú titengbe delẹ gando nujinọtedo sinsẹ̀n-bibasi wiwe-ṣeke tọn lẹ go gọna lehe yé dona tẹdo nujinọtedo enẹlẹ go do. (2) E yinuwa taidi dọdai jidevọnamẹ tọn de. E dohia jẹnukọn dọ sinsẹ̀n-bibasi wiwe-ṣeke na wá yin hinhẹngọwa, podọ e sọ do lehe Jehovah na wá dona omẹ etọn lẹ dile e na dẹnsọ bọ yé na to mahẹ tindo to sinsẹ̀n-bibasi wiwe-ṣeke mẹ do hia. Amọ́, nuhe mí jlo na yọnẹn to egbehe wẹ yindọ: Be numimọ ehe to hẹndi mọ todin ya?

13, 14. (a) Nawẹ mí wagbọn do yọnẹn dọ tẹmpli he Ezekiẹli mọ to numimọ mẹ lọ tindo zẹẹmẹ de na mí to egbehe? (b) Aliho awe tẹlẹ mẹ wẹ mí nọ mọaleyi sọn numimọ ehe mẹ te to egbehe? (Sọ pọ́n apotin lọ 13A, “Tẹmpli Voovo, Nuplọnmẹ Voovo.”)

¹³ Be mí sọgan kudeji dọ tẹmpli he Ezekiẹli mọ to numimọ mẹ lọ gando mí go to egbehe ya? Gbau! Flindọ ohọ̀ wiwe Jiwheyẹwhe tọn he Ezekiẹli mọ to “osó he yiaga taun de ji” lọ tindo kanṣiṣa hẹ dọdai Isaia tọn he dọ dọ “osó ohọ̀ Jehovah tọn” na yin “hinhẹn lodo gligli to aga pete osó lẹ tọn.” Isaia dọna mí tlọlọ dọ dọdai emitọn na mọ hẹndi “to azán godo tọn lẹ mẹ.” (Ezek. 40:2; Isa. 2:2-4; sọ pọ́n Mika 4:1-4.) Dọdai ehelẹ gando ojlẹ he bẹjẹeji sọn 1919 to azán godo tọn lẹ mẹ go, yèdọ whenue sinsẹ̀n-bibasi wiwe-ṣeke yin zizedaga bo yin hinhẹngọwa taidi dọ e yin zizedo osó he yiaga taun de ji wẹ nkọ.b

¹⁴ Po enẹ po, e họnwun dọ numimọ Ezekiẹli tọn sọ gando sinsẹ̀n-bibasi wiwe-ṣeke go to egbehe. Kẹdẹdile numimọ ehe hẹn ale wá na kanlinmọ Ju lẹ do to hohowhenu, e sọ hẹn ale wá na mílọsu to aliho titengbe awe mẹ. (1) E plọn mí onú titengbe delẹ gando lehe mí sọgan tẹdo nujinọtedo sinsẹ̀n-bibasi wiwe-ṣeke tọn he Jehovah zedai lẹ go do. (2) E yinuwa taidi dọdai jidevọnamẹ tọn de dọ sinsẹ̀n-bibasi wiwe-ṣeke na yin hinhẹngọwa bọ Jehovah na dona omẹ etọn lẹ.

15. Etẹwẹ mí dona hẹn do ayiha mẹ dile mí to vivẹnudo nado plọnnu sọn numimọ tẹmpli tọn he Ezekiẹli mọ lọ mẹ?

¹⁵ Todin, mì gbọ mí ni gbadopọnna adà ayidego tọn delẹ sọn numimọ Ezekiẹli tọn mẹ. Mí ni dọ dọ mí topọ hẹ Ezekiẹli dile e to yìyì pé gbọn tẹmpli jiawu he e mọ to numimọ mẹ lọ mẹ. Hẹn do ayiha mẹ dọ e ma yin tẹmpli daho gbigbọmẹ tọn lọ mọ wẹ mí te; kakatimọ nuplọnmẹ he gando sinsẹ̀n-bibasi mítọn go to egbehe lẹ wẹ mí jlo na na ayidonugo. Etẹlẹ wẹ mí sọgan plọn?

16. Etẹwẹ aliho he mẹ nujlẹnu yin yiyizan pludopludo te to numimọ Ezekiẹli tọn mẹ plọn mí? (Pọ́n yẹdide he tin to bẹjẹeji hosọ ehe tọn.)

¹⁶ Naegbọn nujlẹnu do yin yiyizan sọmọ? Dile Ezekiẹli to nupọn, angẹli he tindo awusọhia gànvẹẹ tọn lọ to adà voovo tẹmpli lọ tọn lẹ jlẹ, kakajẹ adó lẹ, họngbo lẹ, abò nuhọ́tọ lẹ tọn, awánu lọ po agbà lọ po ji. Sọha nujijlẹ lọ lẹ tọn sù sọmọ bo gán húagbọ́ wehiatọ. (Ezek. 40:1–42:20; 43:13, 14) Ṣigba, lẹnnupọndo nuagokun titengbe he mí sọgan mọ sọn zẹẹmẹ gigọ́ enẹlẹ mẹ ji. Jehovah gbọnmọ dali zinnudo nujọnu-yinyin nujinọtedo etọn lẹ tọn ji. Ewọ wẹ nọ ze yé dai, e ma yin gbẹtọvi depope. Eyin mẹde lẹndọ emi gán sẹ̀n Jiwheyẹwhe to aliho depope he jlo emi mẹ, be ede klọ wẹ e te. Humọ, gbọn tẹmpli lọ jijlẹ to gigọ́ mẹ dali, Jehovah hẹnmẹ deji dọ sinsẹ̀n-bibasi wiwe-ṣeke na yin hinhẹngọwa dandan. Kẹdẹdile nujijlẹ lọ lẹpo sọgbe pẹpẹ do, mọ wẹ dọdai Jiwheyẹwhe tọn lẹ na mọ hẹndi pẹẹ do. Gbọnmọ dali, Ezekiẹli hẹn mí deji dọ hẹngọwa sinsẹ̀n-bibasi wiwe-ṣeke tọn ma na gblá to azán godo tọn lẹ mẹ!

17. Etẹwẹ adó he lẹdo tẹmpli lọ pé lẹ nọ flin mí to egbehe?

¹⁷ Adó he lẹdo tẹmpli lọ. Dile mí ko dọhodeji do, Ezekiẹli mọ adó de he lẹdo tẹmpli lọ pé. Nuflinmẹ titengbe de wẹ enẹ yin na omẹ Jiwheyẹwhe tọn lẹ to whenẹnu dọ yé dona hẹn aṣa mawé sinsẹ̀n tọn lẹpo dolá na sinsẹ̀n-bibasi wiwe-ṣeke, ma nado hẹn ohọ̀ Jiwheyẹwhe tọn flu gbede. (Hia Ezekiẹli 43:7-9.) Lehe mí tindo nuhudo ayinamẹ dopolọ tọn to egbehe do sọ! To whenue omẹ Jiwheyẹwhe tọn lẹ ko yin tuntundote sọn kanlinmọgbenu gbigbọmẹ tọn Babilọni Daho lọ tọn he dẹn na owhe kanweko susu lọ godo, Klisti de afanumẹ nugbonọ podọ nuyọnẹntọ etọn to 1919. Sọn whenẹnu, omẹ Jiwheyẹwhe tọn lẹ ko dovivẹnu vẹkuvẹku nado jo sinsẹ̀n-nuplọnmẹ lalo lẹ do gọna aṣa he tindo kanṣiṣa hẹ boṣiọ-sinsẹ̀n po nuyiwa kosi tọn lẹ po. Mí nọ tin to aṣeji nado nọla na aṣa mawé he sọgan hẹn sinsẹ̀n-bibasi wiwe-ṣeke flu lẹ. Humọ, mí ma tlẹ nọ hẹn whẹho ajọ́ tọn lẹ wá Plitẹnhọ Ahọluduta tọn mítọn lẹ mẹ, podọ gbọnmọ dali mí nọ klan whẹho paa aihọn tọn lẹ dovo na nuhe gando sinsẹ̀n-bibasi mítọn go lẹ.—Malku 11:15, 16.

18, 19. (a) Etẹwẹ họngbo he yiaga he yin nùdego to numimọ tẹmpli lọ tọn mẹ lẹ sọgan plọn mí? (b) Nawẹ mí dona nọ yinuwa gbọn to whenue mẹlẹ to tintẹnpọn nado gọ̀ nujinọtedo yiaga Jehovah tọn lẹ do odò? Na apajlẹ de.

¹⁸ Họngbo he yiaga lọ lẹ. Eyin mí lẹnnupọndo họngbo he yiaga taun he Ezekiẹli mọ lọ lẹ ji, etẹwẹ mí sọgan plọn? Matin ayihaawe, adà numimọ tẹmpli lọ tọn enẹ plọn kanlinmọ Ju lẹ dọ nujinọtedo walọ dagbe tọn Jehovah tọn lẹ yiaga taun. Eyin enẹ yin nugbo to hohowhenu, egbehe lo? Mí to sinsẹ̀n basi to tẹmpli daho gbigbọmẹ tọn Jehovah tọn mẹ. Be e masọ yin nujọnu hugan todin dọ mí ni hẹn walọ dagbe go bo dapana yẹnuwiwa mlẹnmlẹn ya? (Lom. 12:9; 1 Pita 1:14, 15) To azán godo tọn lẹ mẹ, Jehovah ko deanana omẹ etọn lẹ vudevude nado hodo nujinọtedo walọ dagbe tọn etọn lẹ pẹkipẹki.c Di apajlẹ, ylanwatọ he ma lẹnvọjọ lẹ nọ yin didesẹ sọn agun mẹ. (1 Kọl. 5:11-13) Humọ, abò nuhọ́tọ tọn he to aga na họngbo lọ lẹ sọgan flinnu mí dọ to egbehe, mẹdepope he ma tindo nukundagbe Jiwheyẹwhe tọn ma nọ yin alọkẹyi biọ sinsẹ̀n-bibasi Jehovah tọn mẹ. Di dohia, mẹhe to gbẹzan awe zan sọgan biọ Plitẹnhọ Ahọluduta tọn mẹ, amọ́ e ma sọgan tindo nukundagbe Jehovah tọn, adavo e jla ninọmẹ etọn do to Jiwheyẹwhe nukọn. (Jak. 4:8) Hihọ́ jiawu nankọ die na sinsẹ̀n-bibasi wiwe-ṣeke to ojlẹ he mẹ walọ gblezọn gbayipe te ehe!

¹⁹ Biblu dọ dọdai dọ aihọn ehe na gblezọn pete jẹnukọnna opodo. Mí hia dọ: “Mẹylankan lẹ po mẹblutọ lẹ po na to yinylan deji dogọ, yé na to mẹklọ bo nasọ to yinyin kiklọ.” (2 Tim. 3:13) Mẹsusu to egbehe wẹ nọ yin kiklọ nado lẹndọ nujinọtedo yiaga Jehovah tọn lẹ ko sinyẹn gbau kavi dọ yé ko dohó bo ma tlẹ sọgbe. Be hiẹ lọsu na yin kiklọ wẹ ya? Di apajlẹ, eyin mẹde tẹnpọn nado diọlinlẹnna we dọ nujinọtedo Jiwheyẹwhe tọn he gando zanhẹmẹ to mẹhe tindo vijinu dopolọ lẹ ṣẹnṣẹn go ma sọgbe, be a na kẹalọyi nuhe e dọ wẹ ya? Kavi a na kẹalọyi pọndohlan Jehovah Jiwheyẹwhe tọn, mẹhe dohia to Ohó etọn mẹ hezeheze dọ eyin mẹde nọ wà onú mọnkọ lẹ, “nugbigble wà” wẹ e te? Jiwheyẹwhe na mí avase sọta godoninọna walọ gblezọn lẹ. (Lom. 1:24-27, 32) To whenue mí pannukọn whẹho mọnkọ lẹ, mí na wà dagbe nado yí nukun homẹ tọn do mọ tẹmpli he Ezekiẹli mọ to numimọ mẹ lọ gọna họngbo he yiaga etọn lẹ bo flindọ: Jehovah ma nọ gọ̀ nujinọtedo dodo tọn etọn lẹ do odò, mahopọnna kọgbidinamẹ aihọn ylankan ehe tọn. Be mí nọ kọngbedopọ hẹ Otọ́ olọn mẹ tọn mítọn bo nọ yiavùnlọna nuhe sọgbe ya?

20. Nuflinmẹ he na tulimẹ tẹwẹ “gbẹtọ susugege” lọ nọ mọyi sọn numimọ Ezekiẹli tọn lọ mẹ?

²⁰ Awánu lọ lẹ. To whenue Ezekiẹli mọ obá he mẹ awánu gbonu tọn tẹmpli lọ tọn gblo jẹ, e na ko vivi na ẹn nado mọdọ sinsẹ̀n-basitọ ayajẹnọ Jehovah tọn he gán pli do finẹ lẹ na sù taun. To egbehe, Klistiani lẹ to sinsẹ̀n basi to tẹmpli he wé bosọ klo tlala humọ de mẹ. “Gbẹtọ susugege” he to sinsẹ̀n basi to awánu gbonu tọn tẹmpli gbigbọmẹ tọn Jehovah tọn mẹ lẹ nọ mọ nuflinmẹ lẹ yí sọn numimọ Ezekiẹli tọn mẹ he nọ na tuli yé. (Osọ. 7:9, 10, 14, 15) Ezekiẹli mọdọ abò núdùdù tọn lẹ tin debọdo-dego to awánu lọ lẹ mẹ, fihe sinsẹ̀n-basitọ lẹ sọgan nọ dù sọn avọ́sinsan jijọho tọn he yé hẹnwa lẹ mẹ te. (Ezek. 40:17) To linlẹn de mẹ, e nọ taidi dọ yé to núdù dopọ hẹ Jehovah Jiwheyẹwhe, ehe yin ohia họntọnjihẹmẹ po jijọho po tọn de! To egbehe, mí ma nọ basi avọ́sinsan lẹ dile Ju lẹ nọ wà do to Osẹ́n Mose tọn glọ. Kakatimọ, mí nọ basi “avọ́sinsan pipà tọn” dile mí to mahẹ tindo to sinsẹ̀n-bibasi wiwe-ṣeke mẹ, di apajlẹ gbọn gblọndo po dohia yise tọn mítọn lẹ po gblamẹ to opli lẹ ji kavi to kunnudegbe. (Heb. 13:15) Mí sọ nọ dù núdùdù gbigbọmẹ tọn he Jehovah nọ wleawuna lẹ. Abajọ mí do nọ tindo numọtolanmẹ dopolọ hẹ visunnu Kola tọn lẹ he jihàn hlan Jehovah dọmọ: “Azán dopo to awánu towe lẹ mẹ pọnte hugan fọtọ́n to fidevo!”—Salm. 84:10.

21. Etẹwẹ Klistiani yiamisisadode lẹ sọgan plọn sọn tito yẹwhenọduta tọn he tin to numimọ he Ezekiẹli mọ lọ mẹ?

²¹ Yẹwhenọduta lọ. Ezekiẹli mọdọ họngbo he nù mẹhe ma wá sọn hẹnnu yẹwhenọ tọn mẹ lẹ nọ gbọn do biọ awánu gbonu tọn lọ mẹ lẹ nkọ wẹ yẹwhenọ lẹ po Levinu lẹ po nọ gbọn biọ awánu homẹ tọn lọ mẹ. Aliho dagbe de niyẹn nado flinnu sunnu he wá sọn kúnkan yẹwhenọduta tọn mẹ lọ lẹ dọ yelọsu dona nọ tẹdo nujinọtedo sinsẹ̀n-bibasi wiwe-ṣeke tọn Jehovah tọn lẹ go. Bọ egbehe lo? Tito de ma tin nado lẹzun yẹwhenọ gbọn gududu dali to devizọnwatọ Jiwheyẹwhe tọn lẹ ṣẹnṣẹn ba, amọ́ e yin didọna Klistiani yiamisisadode lẹ dọmọ: “Mìwlẹ wẹ ‘akọ̀ dide de, yẹwhenọ he to sinsẹ̀n di ahọlu lẹ.’” (1 Pita 2:9) Yẹwhenọ Islaeli hohowhenu tọn lẹ nọ basi sinsẹ̀n to awánu he yin kinklandovo de mẹ. To egbehe, Klistiani yiamisisadode lẹ ma nọ klan yede dovo na sinsẹ̀n-basitọ hatọ yetọn lẹ to agbasa-liho, ṣigba yé tin to haṣinṣan vonọtaun de mẹ hẹ Jehovah taidi sọdodovi etọn lẹ. (Gal. 4:4-6) To ojlẹ dopolọ mẹ, mẹyiamisisadode lẹ sọgan mọ nuflinmẹ he yọ́n-na-yizan delẹ yí sọn numimọ Ezekiẹli tọn mẹ. Di apajlẹ, yé yọnẹn dọ yẹwhenọ lẹ lọsu nọ mọ ayinamẹ po mẹplọnlọ po yí. Klistiani lẹpo na wà dagbe nado nọ flindọ “lẹngbọpa dopo” wẹ mí yin bo to sinsẹ̀n to anademẹ “lẹngbọhọtọ dopo” tọn glọ.—Hia Johanu 10:16.

22, 23. (a) Etẹwẹ nuhe yin didọ gando ahọvi he to numimọ Ezekiẹli tọn mẹ lọ go lẹ sọgan plọn mẹho agun tọn lẹ? (b) Etẹwẹ sọgan jọ to sọgodo?

²² Ahọvi lọ. Otẹn nukundeji de mẹ wẹ ahọvi he yin nùdego to numimọ Ezekiẹli tọn mẹ lọ tin te. E ma wá sọn hẹnnu yẹwhenọ tọn de mẹ, podọ sọgbe hẹ tito he nọ yin hihodo to tẹmpli lọ mẹ, e dona litaina yẹwhenọ he to anadenanu lẹ. Ṣigba, e họnwun dọ e nọ yinuwa taidi nugopọntọ de to mẹlọ lẹ ṣẹnṣẹn bo nọ gọalọna yé nado wleawuna avọ́nunina lẹ. (Ezek. 44:2, 3; 45:16, 17; 46:2) Enẹwutu, apajlẹ dagbe de wẹ e yin na sunnu Klistiani he to azọngban de hẹndi to agun mẹ to egbehe lẹ. To popolẹpo mẹ, mẹhe to sinsẹ̀n taidi mẹho to agun Klistiani tọn mẹ lẹ, kakajẹ nugopọntọ lẹdo tọn lẹ ji, dona nọ litaina afanumẹ nugbonọ he yin dide lọ. (Heb. 13:17) Mẹho agun tọn lẹ nọ wazọ́n sinsinyẹn bo nọ gọalọna omẹ Jiwheyẹwhe tọn lẹ nado basi avọ́sinsan pipà tọn lẹ to opli Klistiani tọn lẹ ji podọ to lizọnyizọn lọ mẹ. (Efe. 4:11, 12) Podọ mẹho lẹ sọgan plọn nude sọn aliho he mẹ Jehovah gbẹnuna ahọvi Islaeli tọn he ṣì aṣẹpipa yetọn zan lẹ te mẹ. (Ezek. 45:9) Mẹho lẹ ma dona nọ pọ́n yede hlan taidi mẹhe ko zẹ̀ ayinamẹ po wọhẹ po go. To vogbingbọn mẹ, yé nọ yí dotẹnmẹ he hundote nado mọ mẹplọnlọ Jehovah tọn yí lẹpo zan nado sọgan hẹn azọngban yetọn taidi lẹngbọhọtọ podọ nugopọntọ di po kọdetọn dagbe po.—Hia 1 Pita 5:1-3.

²³ Jehovah na zindonukọn nado nọ de nugopọntọ owanyinọ lẹ do omẹ etọn lẹ ji to Paladisi aigba ji tọn he ja lọ mẹ. Na nugbo tọn, mẹho agun tọn susu wẹ to azọ́nplọnmẹ mọyi to egbehe nado sọgan yọ́n-na-yizan bo hẹn azọngban yetọn taidi lẹngbọhọtọ di to Paladisi mẹ. (Salm. 45:16) Be e ma yin ayajẹnu de wẹ nado lẹnnupọndo lehe sunnu enẹlẹ na yin dona de na mí to aihọn yọyọ lọ mẹ do ji ya? Kẹdẹdi dọdai hẹngọwa tọn devo lẹ, nukunnumọjẹnumẹ mítọn gando numimọ Ezekiẹli tọn go sọgan wá họnwun dogọ to ojlẹ sisọ Jehovah tọn mẹ. Vlavo adà numimọ lọ tọn delẹ gán gbẹ́ wá mọ hẹndi to aliho he jiawu de mẹ to sọgodo, yèdọ hẹndi de he mí ma tlẹ sọgan ko lẹnnupọndeji todin. Osọ wẹ na dọ.

24, 25. Nawẹ numimọ Ezekiẹli tọn do dona he Jehovah na kọ̀n do omẹ etọn lẹ ji dile yé na tẹdo sinsẹ̀n-bibasi wiwe-ṣeke go lẹ hia gbọn?

²⁴ Nado dotana, mì gbọ mí ni flin nujijọ daho hugan he wá aimẹ to numimọ Ezekiẹli tọn lọ mẹ. Jehovah wá tẹmpli he Ezekiẹli mọ lọ mẹ bo dopà na omẹ etọn lẹ dọ emi na gbọṣi finẹ dile e na dẹnsọ bọ yé na tẹdo nujinọtedo he emi zedai na sinsẹ̀n-bibasi wiwe-ṣeke lẹ go. (Ezek. 43:4-9) Nuyiwadomẹji tẹwẹ tintin to finẹ Jehovah tọn na tindo do omẹ etọn lẹ po aigba yetọn po ji?

²⁵ Numimọ lọ yí wadohia dọdai tọn he vọ́ jidenamẹ awe zan nado do dona Jiwheyẹwhe tọn lẹ hia: (1) Otọ̀ de to sisà sọn fiwiwe tẹmpli lọ tọn mẹ bo hẹn aigba lọ dojó bosọ to nuhe to e ji lẹ hẹngọwa ogbẹ̀; podọ (2) aigba lọ yin mimá do adà voovo he sọzẹn lẹ ji bọ tẹmpli lọ po lẹdo etọn po tin to ṣẹnṣẹn. Zẹẹmẹ tẹwẹ dọdai enẹlẹ tindo na mí to egbehe? Na nugbo tọn, to ojlẹ he mẹ mí to gbẹnọ te todin, Jehovah ko wá bo vọ́ nulẹ jlado bosọ kẹalọyi tito sinsẹ̀n-bibasi tọn he wé hugan de, yèdọ tẹmpli daho gbigbọmẹ tọn lọ. (Mal. 3:1-4) Mí na dọhodo wadohia dọdai tọn awe enẹlẹ ji to weta 19 jẹ 21 owe ehe tọn mẹ.