Daniel

5 Naghiwat si Hari Belsasar+ sing daku nga sinalusalo para sa iya 1,000 ka halangdon nga mga tawo, kag nag-inom sia sing alak sa ila atubangan.+ 2 Ginpakuha ni Belsasar, nga nakainom sing alak, ang mga kagamitan nga bulawan kag pilak nga ginkuha sang iya amay* nga si Nabocodonosor sa templo sa Jerusalem+ agod imnan sang hari kag sang iya halangdon nga mga tawo, sang iya mga asawa kag mga babayi. 3 Dayon, gindala nila ang mga kagamitan nga bulawan nga ginkuha nila sa templo sa balay sang Dios sa Jerusalem, kag nag-inom sa sini ang hari kag ang iya halangdon nga mga tawo, ang iya mga asawa kag mga babayi. 4 Nag-inom sila sing alak, kag gindayaw nila ang mga dios nga human sa bulawan, pilak, saway, salsalon, kahoy, kag bato.

5 Sa amo gid nga tion may mga tudlo sang tawo nga nagsulat sa palitada sang dingding sang palasyo sang hari malapit sa kandelero, kag nakita sang hari ang kamot nga nagasulat. 6 Dayon nagpalanglapsi ang hari* kag ang iya panghunahuna nagpakugmat sa iya. Nagpalangluya ang iya balikawang+ kag nagkurog ang iya mga tuhod.

7 Nagsinggit ang hari nga tawgon ang mga babaylan, ang mga Caldeanhon,* kag ang mga astrologo.+ Nagsiling ang hari sa maalamon nga mga tawo sa Babilonia: “Ang tawo nga makabasa sini nga sinulatan kag makasugid sa akon sang kahulugan sini, pabayuan sing purpura,* pakulintasan sing bulawan,+ kag mangin ikatlo sia nga manuggahom sa ginharian.”+

8 Nag-abot ang tanan nga maalamon nga tawo sang hari, apang indi nila mabasa ang nasulat kag indi nila masugid sa hari ang kahulugan sini.+ 9 Gani hinadlukan gid si Hari Belsasar kag nagpalanglapsi sia; kag naglibog man ang ulo sang iya halangdon nga mga tawo.+

10 Sang mabatian sang rayna ang ginsiling sang hari kag sang iya halangdon nga mga tawo, nagkadto sia sa sinalusalo. Nagsiling ang rayna: “O hari, kabay pa nga magkabuhi ka tubtob sa wala sing katubtuban. Indi ka magkahadlok kag indi ka magpalanglapsi. 11 May isa ka tawo* sa imo ginharian nga may espiritu sang balaan nga mga dios. Sang panahon sang imo amay, nakita nila nga may ihibalo sia kag paghangop kag kaalam nga pareho sa kaalam sang mga dios.+ Ginhimo sia ni Hari Nabocodonosor nga imo amay bilang pangulo sang madyikero nga mga saserdote, mga babaylan, mga Caldeanhon,* kag sang mga astrologo;+ ginhimo ini sang imo amay, O hari. 12 Kay si Daniel nga ginhingalanan sang hari nga Beltesasar+ may tumalagsahon nga espiritu kag ihibalo kag paghangop sa pagsugid sang kahulugan sang mga damgo, sa pagpaathag sang mga paktakon, kag sa paglubad sang mabudlay nga mga problema.*+ Gani ipatawag si Daniel agod masugid niya ang kahulugan sini.”

13 Gani gindala si Daniel sa hari. Ginpamangkot sang hari si Daniel: “Ikaw bala si Daniel nga isa sa mga bihag halin sa Juda,+ nga gindala diri sang akon amay nga hari halin sa Juda?+ 14 Nabalitaan ko nga yara sa imo ang espiritu sang mga dios+ kag may ihibalo ka kag paghangop kag tumalagsahon nga kaalam.+ 15 Gindala na sa akon ang maalamon nga mga tawo kag mga babaylan agod basahon ini nga sinulatan kag isugid sa akon ang kahulugan sini, apang indi nila masugid ang kahulugan sang mensahe.+ 16 Apang nabalitaan ko nga makasugid ka sang kahulugan sang mga tanda+ kag makalubad sang mabudlay nga mga problema.* Karon, kon mabasa mo ang nasulat kag masugid sa akon ang kahulugan sini, pabayuan ka sing purpura, pakulintasan sing bulawan, kag mangin ikatlo ka nga manuggahom sa ginharian.”+

17 Nagsabat si Daniel sa hari: “Sa imo na lang ang imo mga regalo ukon ihatag na lang ina sa iban. Apang basahon ko gihapon ang nasulat kag isugid sa hari ang kahulugan sini. 18 O hari, ginhatagan sang Labing Mataas nga Dios si Nabocodonosor nga imo amay sing ginharian, gahom, kadungganan, kag pagkahalangdon.+ 19 Bangod sang gahom nga ginhatag Niya sa iya, ang tanan nga katawhan halin sa lainlain nga mga pungsod kag mga lenguahe nagkurog sa kahadlok sa iya.+ Kon luyag niya, mahimo niya ipapatay ukon pabay-an nga mabuhi ang bisan sin-o kag mahimo niya pataason ukon kuhaan sing posisyon ang bisan sin-o.+ 20 Apang sang nangin matinaastaason sia kag nangin batinggilan kag nagpabugal,+ ginpahalin sia sa trono sang iya ginharian kag ginkuha sa iya ang iya kadungganan. 21 Gintabog sia palayo sa katawhan, kag ang iya tagipusuon nangin pareho sa tagipusuon sang sapat, kag nag-istar sia upod sa mga asno nga talunon. Nagkaon sia sing mga tanom pareho sang mga baka, kag nabasa sia sang tun-og, tubtob nahibaluan niya nga ang Labing Mataas nga Dios amo ang Manuggahom sa mga ginharian sang mga tawo kag ginahatag niya ang paggahom kay bisan sin-o nga luyag niya hatagan sini.+

22 “Apang ikaw Belsasar nga iya anak,* wala ka magpaubos bisan pa nahibaluan mo ini tanan. 23 Nagrebelde ka sa Ginuo sang langit,+ kag ginpakuha mo ang mga kagamitan sang iya balay.+ Dayon nag-inom kamo sing alak sa sini, ang imo halangdon nga mga tawo, ang imo mga asawa kag ang imo mga babayi, kag gindayaw mo ang mga dios nga human sa pilak, bulawan, saway, salsalon, kahoy, kag bato nga indi makakita kag indi makabati kag wala sing nahibaluan.+ Apang wala mo ginhimaya ang Dios nga sa iya nagadepende ang imo kabuhi+ kag ang imo tanan nga dalanon. 24 Gani nagpadala ang Dios sing kamot nga nagsulat sini nga sinulatan.+ 25 Kag amo ini ang nasulat: MENE, MENE, TEKEL, kag PARSIN.

26 “Amo ini ang kahulugan sang mga tinaga: Ang MENE nagakahulugan nga gin-isip na sang Dios ang mga adlaw sang imo ginharian kag gintapos ini.+

27 “Ang TEKEL nagakahulugan nga gintimbang ka sa timbangan kag nasapwan nga kulang ka.

28 “Ang PERES* nagakahulugan nga gintunga ang imo ginharian kag ginhatag sa mga Medianhon kag mga Persianhon.”+

29 Dayon nagsugo si Belsasar nga pabayuan si Daniel sing purpura kag pakulintasan sing bulawan; kag ginpahibalo nila nga sia ang ikatlo nga manuggahom sa ginharian.+

30 Sina mismo nga gab-i ginpatay si Belsasar nga hari sang mga Caldeanhon.+ 31 Kag ginhatag ang ginharian kay Dario+ nga Medianhon, nga nagaedad sadto sing mga 62 ka tuig.