Binuhatan

1 Sa una ko nga sulat sa imo, O Teofilo, ginsugid ko ang tanan nga butang nga ginhimo kag gintudlo ni Jesus+ 2 tubtob sa adlaw nga gindala sia sa langit,+ sa tapos sia makahatag sing mga instruksion paagi sa balaan nga espiritu sa mga apostoles nga iya ginpili.+ 3 Sa tapos sia nag-antos, madamo nga beses nga nagpakita sia sa ila paagi sa indi mapanghiwala nga mga pamatuod nga buhi sia.+ Nakita nila sia sa sulod sang 40 ka adlaw, kag ginpaathag niya sa ila ang tuhoy sa Ginharian sang Dios.+ 4 Samtang nagatinipon sila, ginsugo niya sila: “Indi kamo anay maghalin sa Jerusalem,+ kundi hulata ninyo ang ginsaad sang Amay,+ nga nabatian ninyo sa akon; 5 kay si Juan nagbawtismo sa tubig, apang bawtismuhan kamo sa balaan nga espiritu+ sa indi madugay.”

6 Gani sang nagatinipon sila, nagpamangkot sila sa iya: “Ginuo, ipasag-uli mo bala ang ginharian sa Israel sa sini nga tion?”+ 7 Nagsiling sia sa ila: “Ang Amay lamang sa langit ang may awtoridad sa pagtalana sang tion kon san-o mahanabo ang mga butang, kag indi kinahanglan nga mahibaluan ninyo ina nga mga tion.+ 8 Apang magabaton kamo sing gahom kon ang balaan nga espiritu mag-abot sa inyo,+ kag mangin saksi+ ko kamo sa Jerusalem,+ sa bug-os nga Judea kag Samaria,+ kag tubtob sa pinakamalayo nga bahin sang duta.”+ 9 Sa tapos niya masiling ini, nagpaibabaw sia padulong sa langit samtang nagatan-aw sila, kag ginlipdan sia sang panganod kag indi na nila sia makita.+ 10 Samtang ginatan-aw nila sia nga nagapaibabaw, duha ka lalaki nga napanaptan sing puti+ ang hinali nga nagtindog sa ila tupad 11 kag nagsiling: “Mga tawo sang Galilea, ngaa nagatindog kamo kag nagatangla sa langit? Ining Jesus nga nakita ninyo nga ginbaton sa langit magaabot sa inyo sa amo man sini nga paagi.”

12 Dayon nagbalik sila sa Jerusalem+ halin sa Bukid sang mga Olibo, nga mga isa ka kilometro* ang kalayuon halin sa Jerusalem. 13 Pag-abot nila, nagsaka sila sa kuarto sa ibabaw nga ila ginadayunan. Yara didto sanday Pedro, Juan, Santiago, Andres, Felipe, Tomas, Bartolome, Mateo, Santiago nga anak ni Alfeo, Simon nga makugi, kag si Judas nga anak ni Santiago.+ 14 Nahiusa sila tanan nga nagpadayon sa pagpangamuyo, upod sa pila ka babayi,+ sa mga utod nga lalaki ni Jesus kag kay Maria nga iya iloy.+

15 Sa isa sini nga mga adlaw sang nagtipon sila agod magpangamuyo, mga 120 ka kauturan ang nagtipon. Nagtindog si Pedro kag nagsiling: 16 “Mga kauturan, kinahanglan nga matuman ang ginsiling anay ni David paagi sa balaan nga espiritu tuhoy kay Judas,+ nga amo ang nagtuytoy sa mga soldado sa pagdakop kay Jesus.+ 17 Kay kaupod sia namon+ kag nag-alagad sia upod sa amon. 18 (Gingamit sini nga tawo sa pagbakal sing duta ang kuarta nga ginbayad sa iya pagkadimatarong,+ kag sang nahulog sia nga una ang ulo, nagbusaag ang iya kasudlan kag naggua ang tanan niya nga tinai.+ 19 Nahibaluan ini sang tanan nga pumuluyo sang Jerusalem, amo nga ini nga duta gintawag sa ila lenguahe nga A·kelʹda·ma, buot silingon, “Duta sang Dugo.”) 20 Kay nasulat sa libro sang mga Salmo, ‘Mangin kamingawan ang iya ginaistaran, kag indi na pag-istaran ini,’+ kag, ‘Kabay nga kuhaon sang iban ang iya katungdanan subong manugtatap.’+ 21 Gani kinahanglan nga halin sa mga lalaki nga nakaupod namon sa tanan nga tion nga ginahimo ni Ginuong Jesus ang iya mga hilikuton, 22 sugod sa pagbawtismo sa iya ni Juan+ tubtob sa adlaw nga gindala sia sa langit halin sa amon,+ ang isa sa sini nga mga lalaki dapat mangin saksi kaupod namon sa iya pagkabanhaw.”+

23 Gani duha ang ginpilian nila, si Jose nga ginatawag Barsabas, nga ginatawag man Justo, kag si Matias. 24 Dayon nagpangamuyo sila kag nagsiling: “Ikaw, O Jehova,* nga nakahibalo sang tagipusuon sang tanan,+ ipakita kon sin-o sa sining duha ka lalaki ang imo ginpili 25 nga magbulos sa sini nga ministeryo kag sa pagkaapostol, nga gintalikdan ni Judas agod himuon kon ano ang luyag niya.”+ 26 Gani ginpagabutgabutan* nila sila,+ kag si Matias ang napilian, kag gin-isip* sia upod sa 11 ka apostoles.