Mga Anghel—“Mga Espiritu Para sa Pagpangalagad sa Publiko”

“Indi bala sila tanan mga espiritu para sa pagpangalagad sa publiko, nga ginpadala agod mag-alagad sa mga magapanubli sang kaluwasan?”—HEB. 1:14.

 1. Ano ang pasalig sa aton sang Mateo 18:10 kag Hebreo 1:14?

SI Jesucristo nagpaandam sa mga nagatamay sa iya mga sumulunod: “Pat-ura nga indi ninyo pagtamayon ang isa sining mga kubos; kay nagasiling ako sa inyo nga makita pirme sang ila mga anghel sa langit ang nawong sang akon Amay nga yara sa langit.” (Mat. 18:10) Nagahambal parte sa mga matutom nga mga anghel, si apostol Pablo nagsulat: “Indi bala sila tanan mga espiritu para sa pagpangalagad sa publiko, nga ginpadala agod mag-alagad sa mga magapanubli sang kaluwasan?” (Heb. 1:14) Ini nga mga tinaga nagapasalig sa aton nga ginagamit sang Dios ang mga anghel agod buligan ang mga tawo. Ano ang ginasugid sa aton sang Biblia parte sa mga anghel? Paano nila kita ginabuligan? Ano ang matun-an naton sa ila mga halimbawa?

2, 3. Ano ang pila ka hilikuton sang espiritu nga mga tinuga sa langit?

² May minilyon ka matutom nga anghel sa langit. Tanan sila “gamhanan sa kusug, nga nagatuman sang iya polong.” (Sal. 103:20; basaha ang Bugna 5:11.) Ining espiritu nga mga anak sang Dios may lainlain nga personalidad, may kinaiya nga pareho sa Dios, kag may kahilwayan sa pagpili. Naorganisar sila sing maayo kag may mataas nga posisyon sa kahimusan sang Dios. Si Miguel (ang ngalan ni Jesus sa langit) amo ang arkanghel. (Dan. 10:13; Jud. 9) Ining “panganay sa tanan nga tinuga” amo “ang Pulong,” ukon Humalambal sang Dios nga gingamit ni Jehova sa paghimo sang iban nga butang.—Col. 1:15-17; Juan 1:1-3.

³ Sa idalom sang arkanghel amo ang mga serafin. Sila ang nagapahayag sang pagkabalaan ni Jehova kag nagabulig sa mga tawo nga tumanon ang iya mga talaksan. May mga kerubin nga nagasakdag sang pagkasoberano sang Dios. (Gen. 3:24; Isa. 6:1-3, 6, 7) Ang iban naman nga anghel ukon mga mensahero, may lainlain nga hilikuton sa pagtuman sang kabubut-on sang Dios.—Heb. 12:22, 23.

 4. (a) Ano ang ginbatyag sang mga anghel sang ginpasad ang mga sadsaran sang duta? (b) Ano kuntani ang resulta kon gingamit lang sing husto nanday Adan kag Eva ang ila kahilwayan sa pagpili?

⁴ Ang tanan nga anghel naghinugyaw sang ‘ginpasad ang mga sadsaran sang duta’ kag nagkalipay sa paghimo sang ila mga asaynment samtang ang tumalagsahon nga Duta ginahimo para puy-an sang mga tawo. (Job 38:4, 7) Gintuga ni Jehova ang mga tawo sa Iya “dagway.” Gani bisan pa ang mga tawo “kubos diutay sa mga anghel,” mapakita nila ang mga kinaiya sang Manunuga. (Gen. 1:26; Heb. 2:7) Kon gingamit lang sing husto nanday Adan kag Eva ang ila kahilwayan sa pagpili, sila kag ang ila mga kaanakan padayon kuntani nga magakabuhi sing malipayon sa isa ka paraiso subong bahin sang bug-os uniberso nga pamilya ni Jehova sang intelihente nga mga tinuga.

5, 6. Ano nga pagrebelde ang natabo sa langit, kag ano ang ginhimo sang Dios?

⁵ Pat-od nga daw indi makapati ang balaan nga mga anghel sang nasaksihan nila ang pagrebelde sa panimalay sang Dios sa langit. Luyag sang isa sa mga anghel nga sia ang simbahon sa baylo nga sia ang magdayaw kay Jehova. Ginhimo niya ang iya kaugalingon nga Satanas (buot silingon “Manugpamatok”) paagi sa paghangkat sang pagkamakatarunganon sang paggahom ni Jehova kag pagtinguha nga pamatukan ang iya pagkasoberano. Sang nagbinutig si Satanas, malalangon nga ginsulay niya ang unang mag-asawa nga buylugan sia sa iya pagrebelde sa ila mahigugmaon nga Manunuga.—Gen. 3:4, 5; Juan 8:44.

⁶ Sa gilayon, ginhukman ni Jehova si Satanas paagi sa pagsiling sa una nga tagna sa Biblia: “Butangan ko sing kaawayon sa tunga mo kag sang babayi, kag sa tunga sang imo kaliwat kag sang iya kaliwat; sia magadugmok sang imo olo, kag dugmokon mo ang iya tikod.” (Gen. 3:15) Ang kaawayon magapadayon sa tunga ni Satanas kag sang “babayi” sang Dios. Huo, ginatamod ni Jehova ang iya organisasyon sang matutom nga mga anghel sa langit subong iya hinigugma nga asawa nga nahiusa sa iya subong Bana. Ini nga tagna naghatag sing pat-od nga paglaum, bisan pa ang mga detalye sini nagapabilin nga “sagrado nga likom” kag ginapahayag sing amat-amat. Katuyuan sang Dios nga may isa halin sa iya organisasyon sa langit nga magadugmok sa tanan nga manugpamatok kag paagi sa iya “ang mga butang sa langit kag ang mga butang sa duta” tipunon.—Efe. 1:8-10.

 7. Ano ang ginhimo sang pila ka anghel sang panahon ni Noe, kag ano ang ginhimo ni Jehova sa ila?

⁷ Sang panahon ni Noe, may pila ka anghel nga “nagbiya sang ila nagakaigo nga puluy-an” kag nagmateryalisar sang ila lawas agod magpangasawa sa duta. (Jud. 6; Gen. 6:1-4) Gintagbong ni Jehova ining mga rebelde sa mangitungito nga kadudulman, gani nagbuylog sila kay Satanas kag nangin “malaut nga mga puersa nga espiritu” kag makatalagam nga mga kaaway sang mga alagad sang Dios.—Efe. 6:11-13; 2 Ped. 2:4.

Paano Kita Ginabuligan sang mga Anghel?

8, 9. Paano gingamit ni Jehova ang mga anghel sa pagbulig sa mga tawo?

⁸ Ang pila nga ginbuligan sang mga anghel amo sanday Abraham, Jacob, Moises, Josue, Isaias, Daniel, Jesus, Pedro, Juan, kag Pablo. Ang matutom nga mga anghel amo ang nagpatuman sang mga paghukom sang Dios kag nagpahayag sang mga tagna kag panuytoy, lakip ang Mosaikong Kasuguan. (2 Hari 19:35; Dan. 10:5, 11, 14; Binu. 7:53; Bug. 1:1) Sa karon, may kompleto na kita nga kopya sang Pulong sang Dios, gani indi na kinahanglan nga ipahayag pa sang mga anghel ang mensahe sang Dios. (2 Tim. 3:16, 17) Apang, bisan indi makita ang mga anghel, masako sila gihapon nga nagatuman sang kabubut-on sang Dios kag nagabulig sa iya mga alagad.

⁹ Ginapalig-on kita sang Biblia: “Ang manugtunda sang GINOO nagpahamtang sing dologan sa palibut sang mga nagakahadluk sa iya, kag nagaluwas sa ila.” (Sal. 34:7; 91:11) Bangod sang hulusayon tuhoy sa integridad, gintugutan ni Jehova si Satanas nga tilawan kita sa tanan nga paagi. (Luc. 21:16-19) Apang, nahibaluan sang Dios kon tubtob san-o kita tilawan kay nahibaluan man niya kon napamatud-an na naton ang aton katutom sa iya. (Basaha ang 1 Corinto 10:13.) Ang mga anghel alisto sa pagbulig kon kabubut-on sang Dios. Ginluwas nila sanday Sadrac, Mesac, Abednego, Daniel, kag Pedro apang wala nila ginpunggan ang mga kaaway nga patyon sanday Esteban kag Santiago. (Dan. 3:17, 18, 28; 6:22; Binu. 7:59, 60; 12:1-3, 7, 11) Sa sini nga mga hitabo, lainlain ang mga kahimtangan kag ang mga rason kon ngaa nag-atubang sila sang mga pagtilaw. Sing kaanggid, ang pila naton ka kauturan sa mga prisuhan sang Nazi ginpatay, apang ginpat-od ni Jehova nga ang kalabanan sa ila maluwas.

10. Magluwas sa bulig sang mga anghel, ano pa nga bulig ang matigayon naton?

¹⁰ Wala nagatudlo ang Kasulatan nga ang kada anghel may ginabantayan nga isa ka tawo diri sa duta. Nagapangamuyo kita nga may pagsalig nga “bisan ano ang pangayuon naton suno sa iya kabubut-on, nagapamati [ang Dios] sa aton.” (1 Juan 5:14) Siempre, si Jehova makapadala sing anghel agod buligan kita, apang mahimo buligan man niya kita sa iban pa nga paagi. Mahimo pahulagon niya ang aton masigka-Cristiano agod buligan kita kag lugpayan. Makahatag man ang Dios sa aton sing kaalam kag kabakod agod mabatas naton ang “tunok sa unod” nga nagapabudlay sa aton. Ini nga mga kabudlayan ginpaanggid sa pagtampa sang “anghel ni Satanas.”—2 Cor. 12:7-10; 1 Tes. 5:14.

Iluga si Jesus

11. Paano gingamit ang mga anghel agod buligan si Jesus, kag ano ang iya napamatud-an paagi sa pagpabilin nga matutom sa Dios?

¹¹ Binagbinaga kon paano gingamit ni Jehova ang mga anghel agod buligan si Jesus. Sila ang nagpahibalo sang iya pagkabun-ag kag pagkabanhaw kag nagbulig sa iya sang ari sia sa duta. Puede gid magpasilabot ang mga anghel agod indi pagdakpon si Jesus kag malikawan ang iya masakit nga kamatayon. Apang, ginpadala ang isa ka anghel agod palig-unon sia. (Mat. 28:5, 6; Luc. 2:8-11; 22:43) Suno sa katuyuan ni Jehova, ginhalad ni Jesus ang iya kabuhi kag ginpamatud-an nga ang isa ka himpit nga tawo makahupot sang iya integridad sa Dios bisan sa grabe nga pagtilaw. Gani, ginbanhaw ni Jehova si Jesus kag ginhatagan sia sing imortal nga kabuhi sa langit. Ginhatag man sa iya ang “bug-os nga awtoridad” kag ang mga anghel ginpasakop sa iya. (Mat. 28:18; Binu. 2:32; 1 Ped. 3:22) Sa amo, ginpamatud-an ni Jesus nga sia ang panguna nga bahin sang “binhi” sang “babayi” sang Dios.—Gen. 3:15; Gal. 3:16.

12. Paano naton mailog ang “maligdong nga hunahuna” ni Jesus?

¹² Nahibaluan ni Jesus nga sayop ang pagtilaw kay Jehova paagi sa pagbutang sang iya kaugalingon sa indi kinahanglanon nga katalagman kag magpaabot nga luwason sia sang mga anghel. (Basaha ang Mateo 4:5-7.) Gani, ilugon naton si Jesus nga magkabuhi nga may “maligdong nga hunahuna,” nga wala ginabutang ang aton kaugalingon sa di-kinahanglanon nga mga katalagman, pero ginaatubang sing maisog ang mga paghingabot.—Tito 2:12.

Kon Ano ang Matun-an Naton sa Matutom nga mga Anghel

13. Suno sa 2 Pedro 2:9-11, ano ang matun-an naton sa halimbawa sang matutom nga mga anghel?

¹³ Sang ginsaway ni apostol Pedro ang mga “nagapakalain” sa hinaplas nga mga alagad, ginpadaku niya ang maayo nga halimbawa sang matutom nga mga anghel. Bisan pa gamhanan sila, mapainubuson sila nga wala nagasumbong sing mapasipalahon “tungod sa pagtahod kay Jehova.” (Basaha ang 2 Pedro 2:9-11.) Likawan man naton ang di-nagakaigo nga paghukom kag tahuron ang mga nagadumala sa kongregasyon. Isalig naton ang mga butang kay Jehova, ang Supremo nga Hukom.—Ro. 12:18, 19; Heb. 13:17.

14. Ano ang matun-an naton sa mga anghel kon parte sa pagkamapainubuson?

¹⁴ Makatuon kita sa halimbawa sang mapainubuson nga pag-alagad sang mga anghel ni Jehova. Ang iban nga mga anghel wala magpakilala sang ila ngalan sa mga tawo. (Gen. 32:29; Huk. 13:17, 18) Bisan pa may minilyon ka anghel sa langit, si Miguel kag si Gabriel lamang ang ginpakilala sang Biblia. Makabulig ini agod indi sila pagsimbahon. (Luc. 1:26; Bug. 12:7) Sang nagluhod sa pagsimba sa isa ka anghel si apostol Juan, ginsilingan sia: “Maghalong ka! Indi ina paghimua! Masigkaulipon mo ako kag sang imo mga kauturan.” (Bug. 22:8, 9) Ang aton pagsimba, lakip ang aton mga pangamuyo dapat ipatungod lang sa Dios.—Basaha ang Mateo 4:8-10.

15. Paano nangin halimbawa sang pagpailob ang mga anghel?

¹⁵ Ang mga anghel maayo man nga halimbawa sa pagpailob. Bisan pa interesado gid sila nga mahibaluan ang sagrado nga mga likom sang Dios, indi tanan ginasugid sa ila. “Ang mga anghel nagahandum nga magtan-aw sa sini gid nga mga butang,” siling sang Biblia. (1 Ped. 1:12) Kon amo, ano ang ila ginahimo? Mapailubon sila nga nagahulat sa nagakaigo nga tion sang Dios agod ang ‘madamo nga bahin sang iya kaalam’ ipahibalo “paagi sa kongregasyon.”—Efe. 3:10, 11.

16. Ano ang epekto sang aton pagginawi sa mga anghel?

¹⁶ Ang mga Cristiano nga ginatilawan nangin “talan-awon sa teatro . . . sang mga anghel.” (1 Cor. 4:9) Nalipay gid sing daku ang mga anghel kon makita nila ang aton katutom kag kon maghinulsol ang isa ka makasasala. (Luc. 15:10) Natalupangdan man sang mga anghel ang diosnon nga paggawi sang Cristianong mga babayi. Ang Biblia nagasiling nga “ang babayi dapat may tanda sang awtoridad sa iya ulo bangod sa mga anghel.” (1 Cor. 11:3, 10) Huo, nalipay gid ang mga anghel kon makita nila ang Cristiano nga mga babayi kag ang iban pa nga alagad sang Dios sa duta nga nagatuman sa teokratikong kahimusan sang pagkaulo. Ini nga pagkamatinumanon nagakaigo gid nga pahanumdom para sa mga anak sang Dios sa langit.

Ginasakdag sang mga Anghel ang Pagbantala

17, 18. Ngaa makasiling kita nga ginasakdag sang mga anghel ang aton pagbantala?

¹⁷ Ang mga anghel may bahin sa talalupangdon nga mga butang nga nagakatabo sa “adlaw sang Ginuo.” Nalakip sa sini ang pagkabun-ag sang Ginharian sang 1914 kag ang pagtagbong ni ‘Miguel kag sang iya mga anghel’ kay Satanas kag sa iya mga demonyo halin sa langit. (Bug. 1:10; 11:15; 12:5-9) Nakita ni apostol Juan ang “anghel nga nagalupad sa tunga sang kalangitan, kag may yara sia wala katapusan nga maayong balita nga ipahayag subong makalilipay nga balita sa mga nagapuyo sa duta.” Ang anghel nagsiling: “Kahadluki ninyo ang Dios kag hatagi sia sang himaya, bangod nag-abot na ang oras sang iya paghukom, gani simbaha ninyo ang Isa nga naghimo sang langit kag sang duta kag dagat kag mga tuburan sang tubig.” (Bug. 14:6, 7) Ginapasalig sini ang mga alagad ni Jehova nga ginasakdag sila sang mga anghel bisan mapintas nga nagapamatok ang Yawa sa ila pagbantala sang maayong balita sa natukod nga Ginharian.—Bug. 12:13, 17.

¹⁸ Sa karon, wala na nagapakighambal ang mga anghel sa aton para tuytuyan kita sa bunayag sing tagipusuon nga mga tawo, pareho sang pagpakighambal sang isa ka anghel kay Felipe kag gintuytuyan sia sa Etiopianhon nga eunuco. (Binu. 8:26-29) Pero, madamo nga eksperiensia sa karon ang nagapamatuod nga ginasakdag gihapon sang mga anghel ang aton pagbantala sang Ginharian kag ginatuytuyan kita sa “husto nga nahuyog para sa kabuhi nga walay katapusan.”a (Binu. 13:48) Gani, importante gid nga regular kita nga makigbahin sa pagbantala agod mahimo naton ang aton bahin sa pagpangita sa mga maluyag ‘magsimba sa Amay sa espiritu kag kamatuoran’!—Juan 4:23, 24.

19, 20. Ano ang papel sang mga anghel sa mga hitabo “sa katapusan sang sistema sang mga butang”?

¹⁹ Nagapatuhoy sa aton adlaw, si Jesus nagsiling nga “sa katapusan sang sistema sang mga butang” ang mga anghel ang “magapain sang mga malauton gikan sa mga matarong.” (Mat. 13:37-43, 49) Ang mga anghel nagapakigbahin sa katapusan nga pagtipon kag pagpat-in sa mga hinaplas. (Basaha ang Mateo 24:31; Bug. 7:1-3) Dugang pa, kaupod ni Jesus ang mga anghel kon ‘painon niya ang mga karnero sa mga kanding.’—Mat. 25:31-33, 46.

²⁰ “Sa pagpahayag ni Ginuong Jesus gikan sa langit upod sa iya gamhanan nga mga anghel” ang tanan nga “wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus” pagalaglagon. (2 Tes. 1:6-10) Sang nakita ni Juan ang amo man nga hitabo sa palanan-awon, ginlaragway niya si Jesus kag ang iya mga kasuldadusan sa langit nga nagasakay sa puti nga mga kabayo agod magpakig-away sa pagkamatarong.—Bug. 19:11-14.

21. Ano ang himuon sang anghel nga “may yabi sang kadadalman kag daku nga kadena sa iya kamot” kay Satanas kag sa iya mga demonyo?

²¹ Nakita man ni Juan ang “isa ka anghel nga nagapanaug gikan sa langit nga may yabi sang kadadalman kag daku nga kadena sa iya kamot.” Amo ini ang arkanghel nga si Miguel, nga magagapos kag magatagbong sa Yawa kag sa iya mga demonyo sa kadadalman. Buy-an sila sa malip-ot nga tion sa katapusan sang Isa ka Libo ka Tuig nga Paghari ni Cristo sa tion nga ang himpit nga katawhan makaeksperiensia sang katapusan nga pagtilaw. Pagkatapos sini, si Satanas kag ang tanan nga rebelde pagalaglagon. (Bug. 20:1-3, 7-10; 1 Juan 3:8) Madula na ang tanan nga pagpamatok batok sa Dios.

22. Paano nadalahig ang mga anghel sa mga hitabo sa palaabuton, kag paano naton dapat tamdon ang ila asaynment?

²² Madali na lang ang kaluwasan gikan sa malaut nga kalibutan ni Satanas. Ang mga anghel may importante nga asaynment sa talalupangdon nga mga hitabo nga magabindikar sang pagkasoberano ni Jehova kag magatuman sing bug-os sang iya katuyuan sa duta kag sa katawhan. Ang matarong nga mga anghel matuod gid nga “mga espiritu para sa pagpangalagad sa publiko, nga ginpadala agod mag-alagad sa mga magapanubli sang kaluwasan.” Gani, dapat gid kita magpasalamat kay Jehova nga Dios nga gingamit niya ang mga anghel sa pagbulig sa aton nga himuon ang Iya kabubut-on kag matigayon ang kabuhi nga walay katapusan.

[Nota]

Ano ang Imo Sabat?

• Paano ginaorganisar ang mga anghel sa langit?

• Ano ang ginhimo sang iban nga anghel sang panahon ni Noe?

• Paano gingamit sang Dios ang mga anghel agod buligan kita?

• Ano ang papel sang matutom nga mga anghel subong?

[Retrato sa pahina 21]

Ang mga anghel nagakalipay sa pagtuman sang kabubut-on sang Dios

[Retrato sa pahina 23]

Pareho sa natabo kay Daniel, alisto ang mga anghel sa pagbulig kon kabubut-on sang Dios

[Retrato sa pahina 24]

Mangin maisog kay ginasakdag sang anghel ang pagbantala sang Ginharian!

[Credit Line]

Globe: NASA photo