Jan

8 Men, Jezi ale sou mòn Oliv. 2 Sepandan, kou l fè jou, li retounen nan tanp lan ankò, e tout moun yo kòmanse vin jwenn li. Li chita e li kòmanse anseye yo. 3 Kounye a, espè nan Lalwa yo ak Farizyen yo vin ak yon fi yo kenbe nan adiltè. Apre yo fin mete l kanpe nan mitan yo, 4 yo di Jezi: “Anseyan, yo kenbe fi sa a pandan l ap fè adiltè. 5 Nan Lalwa, Moyiz òdone nou pou nou touye jan de fi sa yo ak kout wòch. Ki sa w di ou menm?” 6 Anfèt, yo te di sa pou yo teste l, yon fason pou yo jwenn yon bagay pou yo akize l. Men, Jezi bese e li kòmanse ekri atè a ak dwèt li. 7 Kòm yo pa t sispann poze l kesyon, li drese kò l e li di yo: “Si gen yon moun pami NOU la a ki pa janm fè peche, se li menm an premye ki pou ba l yon kout wòch.” 8 Epi, li bese ankò e li kontinye ekri atè a. 9 Men, lè moun yo tande sa, yo kòmanse ale grenn pa grenn, kòmanse sou moun ki pi gran yo, e yo kite l poukont li ansanm ak fi ki te nan mitan yo a. 10 Jezi drese kò l, li di fi a: “Madanm, kote moun yo? Pèsonn pa kondane w?” 11 Fi a di: “Pèsonn non, mesye.” Jezi di: “Mwen menm nonplis, mwen pap kondane w. Ou mèt ale. Apati jodi a, pa pratike peche ankò.”

12 Apre sa, Jezi pale avèk yo ankò, li di: “Mwen se limyè pou monn nan. Yon moun ki suiv mwen pap janm mache nan fènwa, men l ap gen limyè k ap mennen nan lavi a.” 13 Lè sa a, Farizyen yo di l: “W ap bay temwayaj sou pwòp tèt ou. Donk, temwayaj ou a pa laverite.” 14 Jezi reponn yo, li di: “Menmsi se mwen ki bay temwayaj sou tèt mwen, temwayaj mwen bay la se laverite, paske mwen konn kote m soti ak kote m prale. Men NOU menm, NOU pa konn ni kote m soti ni kote m prale. 15 NOU jije selon sa NOU wè, mwen menm mwen pa jije pèsonn. 16 Epoutan, si m fè yon jijman, jijman m nan ap ann amoni ak laverite, paske mwen pa poukont mwen, men Papa a ki voye m nan ansanm avè m. 17 Epitou, men sa ki ekri nan pwòp Lwa NOU an: ‘Se temwayaj de moun ki laverite.’ 18 Mwen bay temwayaj sou tèt mwen, e Papa a ki voye m nan bay temwayaj sou mwen.” 19 Lè sa a, yo di l: “Kote Papa w?” Jezi reponn: “NOU pa konnen ni mwen ni Papa m. Si NOU te konnen m, NOU t ap konn Papa m tou.” 20 Li te di pawòl sa yo kote ki te gen kès yo konn met ofrann yo, etan li t ap anseye nan tanp lan. Men, pèsonn pa t met men sou li, paske lè l potko rive.

21 Apre sa, li di yo: “Mwen prale, N ap chèche m, epoutan N ap mouri nan peche NOU. NOU pa ka al kote m prale a.” 22 Lè sa a, Juif yo di: “Èske se touye l pral touye tèt li? Paske li di: ‘NOU pa ka al kote m prale a.’” 23 Epi, li di yo: “NOU se moun anba, mwen menm mwen se moun anwo. Se nan monn sa a NOU soti, mwen menm mwen pa sot nan monn sa a. 24 Se sa k fè mwen di NOU: N ap mouri nan peche NOU yo. Paske, si NOU pa kwè mwen se moun mwen di m ye a, N ap mouri nan peche NOU yo.” 25 Lè sa a, yo di l: “Kiyès ou ye?” Jezi di yo: “Poukisa menm mwen kontinye ap pale avèk NOU toujou? 26 Mwen gen anpil bagay pou m di sou NOU e mwen gen anpil bagay pou m jije. Annefè, moun ki voye m nan toujou di laverite, e bagay mwen te tande nan bouch li, se yo menm m ap di nan monn nan.” 27 Yo pa t konprann se de Papa a li t ap pale yo. 28 Donk, Jezi di: “Lè NOU fin leve Pitit lòm nan anlè, lè sa a N ap konnen mwen se moun mwen di m ye a, e N ap konnen se pa mwen poukont mwen ki deside fè anyen, men, se sa Papa a anseye m mwen di. 29 E moun ki voye m nan avè m. Li pa lage m poukont mwen, paske mwen toujou fè sa ki fè l plezi.” 30 Pandan li t ap di bagay sa yo, anpil moun te mete lafwa nan li.

31 Donk, Jezi di Juif ki te kwè nan li yo: “Si NOU rete nan pawòl mwen, NOU se disip mwen toutbonvre, 32 e N ap konnen laverite, e laverite ap libere NOU.” 33 Lòt yo reponn li: “Nou se desandan Abraram e nou pa t janm esklav pèsonn. Kòman w fè di: ‘N ap vin lib’?” 34 Jezi reponn yo: “Anverite m ap di NOU sa: Yon moun k ap pratike peche se esklav peche l ye. 35 Mete sou sa, esklav la pa rete nan kay la pou toutan, se pitit la ki rete pou toutan. 36 Se sa k fè, si Pitit la libere NOU, N ap libere toutbon. 37 Mwen konnen NOU se desandan Abraram. Men, N ap chèche touye m, paske NOU pa aksepte pawòl mwen. 38 Mwen di bagay mwen te wè lè m te avèk Papa m. E NOU menm, NOU fè sa NOU tande papa NOU di.” 39 Yo reponn, yo di l: “Se Abraram ki papa NOU.” Jezi di yo: “Si NOU se pitit Abraram, fè travay Abraram. 40 Gade kounye a, se touye N ap chèche touye m, mwen menm ki di NOU verite mwen te tande nan bouch Bondye. Abraram pa t fè sa. 41 Se travay papa NOU N ap fè.” Yo di li: “Nou pa t fèt nan fònikasyon*. Yon sèl Papa nou genyen, se Bondye.”

42 Jezi di yo: “Si se Bondye ki te Papa NOU, NOU t ap renmen m, paske se Bondye ki voye m e ki fè m la a. Epitou, se pa mwen menm poukont mwen ki te deside vini, men se Sila a ki te voye m nan ki te deside sa. 43 Ki sa k fè NOU pa konnen sa m ap di a? Paske NOU pa ka tande pawòl mwen. 44 NOU menm, NOU soti nan papa NOU, Dyab la, e NOU vle fè volonte l. Li te yon asasen depi lè li te kòmanse nan wout li pran an, e li pa t kenbe fèm nan laverite, paske li pa gen laverite nan li. Lè l ap bay manti, li pale dapre pwòp panchan pa l, paske li se yon mantè e li se papa manti. 45 Yon lòt bò, NOU pa kwè m, paske mwen menm m ap di laverite. 46 Kiyès nan NOU ki ka pwouve mwen fè peche? Si m ap di laverite, kòman NOU fè pa kwè m? 47 Moun ki soti nan Bondye koute pawòl Bondye. Sa k fè NOU menm NOU pa koute, se paske NOU pa soti nan Bondye.”

48 Juif yo reponn, yo di l: “Èske nou pa gen rezon di: Ou se yon Samariten e ou gen yon demon sou ou?” 49 Jezi reponn: “Mwen pa gen demon sou mwen, men m ap onore Papa m, e NOU menm N ap dezonore m. 50 Mwen pap chèche glwa pou tèt mwen. Gen yon Moun k ap chèche sa pou mwen, e se li ki jij. 51 Anverite m ap di NOU sa: Si yon moun obeyi pawòl mwen, li pa gendwa janm mouri.” 52 Juif yo di l: “Kounye a, nou sèten ou gen yon demon sou ou. Abraram mouri, pwofèt yo mouri tou, epi ou menm, ou di: ‘Si yon moun obeyi pawòl mwen, li pa gendwa janm mouri.’ 53 Èske w pi enpòtan pase Abraram, papa nou, ki mouri? Epitou, pwofèt yo mouri. Ki moun ou panse w ye la a?” 54 Jezi reponn: “Si m ap glorifye tèt mwen, glwa m nan pa anyen. Se Papa m k ap glorifye m, li menm NOU di ki se Bondye NOU an, 55 epoutan NOU pa konnen l. Men mwen menm, mwen konnen l. E si m ta di mwen pa konnen l, mwen t ap vin yon mantè menm jan avèk NOU. Men, mwen konnen l, e se pawòl li m ap obeyi. 56 Abraram, papa NOU, te rejwi anpil poutèt li te gen espwa l ap wè jou m nan, e li te wè l e li te rejwi.” 57 Lè sa a, Juif yo di l: “Ou poko menm gen senkant an, epi w te gentan wè Abraram?” 58 Jezi di yo: “Anverite m ap di NOU sa: Anvan Abraram te egziste, mwen te la.” 59 Lè sa a, yo pran wòch pou yo voye dèyè l, men Jezi kache e li soti nan tanp lan.