Tegapka Pengarap Nuan ba Utai ti Disadang Nuan

1, 2. (a) Baka ni utai ti disadang kitai bebida ari utai ti disadang orang bukai? (b) Nama deka dikerandauka kitai ba artikel tu?

JEHOVAH udah meri kitai utai manah ke ulih disadang. Iya udah besemaya deka nguduska nama Iya sereta ngasuh peneka Iya nyadi di serega enggau ba dunya. (Mat. 6:9, 10) Tu meh semaya ke pemadu manah ti dianti kitai. Jehovah mega udah besemaya deka meri upah pengidup meruan belama iya ngagai kitai, sekalika di serega tauka ba dunya. Naka meh pemanah semaya tu! (Jhn. 10:16; 2 Pet. 3:13) Lalu kitai deka meda chara Jehovah terus ngiring sereta nyukung nembiak Iya ba hari ti penudi tu.

² Bup Kudus madahka, pengarap nya “arapka utai ti disadang” kitai. Reti nya, orang ke arap amat pechaya, utai ti udah disemaya Jehovah deka nyadi. (Heb. 11:1) Mayuh orang kemaya hari tu ngarapka sereta dekaka siti-siti utai, tang sida enda nemu sekalika sida deka bulih utai nya. Ngambika chunto, orang engka ngarapka tikit loteri sida menang, tang sida enda nemu sekalika sida ulih menang tauka enda. Ba artikel tu, kitai deka beratika utai ke ulih dikereja kitai kena negapka pengarap kitai ba semaya Petara. Kitai mega deka berandauka baka ni pengarap ti tegap ulih nulung kitai diatu.

 3. Nama kebuah kitai pechaya semaya ari Petara deka nyadi?

³ Nadai seiku ari kitai ngembuan pengarap lebuh kitai ada. Ngambika ngembuan pengarap, kitai patut ngawakka roh kudus Petara ngiring ati kitai. (Gal. 5:22, NW) Roh kudus ulih nulung kitai ngelala Jehovah. Enti kitai nemu Iya nya pemadu bekuasa sereta bepenemu-dalam, kitai pechaya Iya ngembuan penau ulih ngereja semua utai ti disemaya Iya. Jehovah Empu ngumbai semaya Iya udah dikeamatka lebuh Iya nyebut: “Udah tembu!” (Bacha Pemandang 21:3-6.) Kitai nemu, Jehovah seruran ngamatka utai ti disemaya Iya. “Ati Iya endang tetap,” nya kebuah kitai pechayaka semua utai ti dipadah Iya ngagai kitai pasal jemah ila.—U-dat. 7:9.

 4. Nembiak Petara menya arapka utai nama?

⁴ Hebrew bab 11 madahka nama 16 iku lelaki enggau indu ke arapka semaya Jehovah. Bab nya mega nyebut pasal orang bukai ke ngelantangka ati Jehovah “ketegal pengarap sida.” (Heb. 11:39) Semua sida nganti “anak” ke udah disemaya Jehovah. Sida nemu, “anak” nya deka ngerusak semua munsuh Petara, lalu ngaga dunya nyadi paradais baru. (P-kal. 3:15) Lalu semua nembiak Petara tu mega pechaya, Iya deka ngangkatka sida idup baru. Endang amat, sida ukai nganti maya diangkatka idup baru diau di serega, laban Jesus bedau ngasuh utai tu nyadi. (Gal. 3:16) Tang, sida nganti maya idup belama iya ba dunya paradais ti ngerinduka ati.—Mas. 37:11; Isa. 26:19; 1 Kor. 15:55.

5, 6. Nama dianti Abraham enggau sida sebilik? Baka ni sida negapka pengarap sida? (Peda gambar ba pun artikel.)

⁵ Ku Hebrew 11:13 nyebut pasal nembiak Jehovah ke tetap ati nya: “Semua sida nya mengkang arap datai ke sida mati. Sida nadai nerima utai ti udah disemaya, tang sida udah meda lalu ngelaluka utai nya ari jauh.” Sida nganti dunya baru nya sereta ngambarka diri diau dia. Seiku ari sida nya, Abraham. Jesus madahka, Abraham “gaga ati” meda hari nya. (Jhn. 8:56) Sarah, Isak, Jakop enggau mayuh agi sida ke bukai mega nganti maya Perintah Petara ke ‘diperambu lalu digaga Petara’ deka merintah di serata dunya.—Heb. 11:8-11.

⁶ Baka ni Abraham enggau sida sebilik negapka pengarap sida? Sida terus belajar pasal Jehovah. Kekadang, Petara bejaku enggau sida nengah bala melikat, genera, tauka mimpi. Sida mega engka belajar ari bala orang tuai ke tetap ati maya nya tauka ari utai ditulis ke lama agi. Abraham enggau sida sebilik seruran ingatka semaya Petara, lalu sida rindu belematika semaya nya. Asil iya, sida amat pechaya, Jehovah deka ngamatka semaya Iya. Nya alai, sida mengkang taluk ngagai Iya taja pan sida napi penanggul tauka pemerinsa.

 7. Nama udah diberi Jehovah kena negapka pengarap kitai, lalu nama patut dikereja kitai?

⁷ Nama ulih nulung kitai negapka pengarap? Jehovah udah meri kitai Bup Kudus kena ngajar kitai pasal semaya Iya ke jemah ila. Ba Bup Kudus, Iya nunjukka ngagai kitai utai ke patut dikereja ngambika tau lantang. Nya kebuah endang manah kitai macha Bup Kudus ninting hari sereta nitihka iring ari Bup Kudus. (Mas. 1:1-3; bacha Kereja Rasul 17:11.) Jehovah mega meri kitai “pemakai ba maya ti patut” nengah “ulun ke tetap ati sereta bepenemu-dalam.” (Mat. 24:45) Sama baka nembiak Petara menya, kitai patut enggau tetap macha sereta belematika semaya Petara. Tu deka nulung kitai mengkang taluk ngagai Petara sereta mengkang nganti maya Perintah Petara deka merintah di serata dunya.

 8. Baka ni sampi ulih negapka pengarap kitai?

⁸ Nama agi utai ke nulung nembiak Jehovah menya negapka pengarap sida? Sida besampi minta tulung ari Jehovah, lalu lebuh sida beratika Iya nyaut sampi sida, pengarap sida deka tegap agi. (Neh. 1:4, 11; Mas. 34:4, 15, 17; Dan. 9:19-21) Baka nya mega, lebuh kitai nemu Jehovah udah ningaka sampi kitai, lalu udah meri utai ke amat diguna kitai ba maya ti patut, pengarap kitai ngagai Iya deka tegap agi. (Bacha 1 John 5:14, 15.) Kitai mega patut terus ‘minta’ Jehovah meri kitai roh kudus Iya ngambika pengarap kitai majak nambah.—Luk. 11:9, 13.

 9. Nama sekeda utai ke patut disampika kitai?

⁹ Lebuh kitai besampi ngagai Jehovah, kitai ukai semina minta Iya meri utai ti diguna kitai. Kitai mega patut beterima kasih sereta muji Iya ninting hari. Agi mega, Iya udah ngereja mayuh utai ti manah! (Mas. 40:5) Nembiak Jehovah mega besampi ke bala menyadi Kristian sida di serata dunya. Ngambika chunto, kitai ‘ingatka orang ke dalam jil.’ Kitai mega besampika “bala tuai.” Lebuh kitai beratika chara Jehovah nyaut sampi kitai, pengarap kitai ngagai Iya deka tegap agi, lalu kitai deka semak agi ngagai Iya.—Heb. 13:3, 7.

10. Nama udah nulung mayuh nembiak Petara berani sereta mengkang taluk ngagai Iya?

¹⁰ Ba Hebrew bab 11, rasul Paul madahka: “Sida ke indu nerima kaban belayan sida ke udah mati, ke diangkatka idup baru. Sekeda sida ti bukai kena perinsa lalu enggai dilepaska, laban sida ngarapka diri deka bulih pengangkat ari mati ti menyana agi.” (Heb. 11:35) Mayuh nembiak Jehovah tan natka penguji sereta mengkang taluk ngagai Iya laban sida arapka semaya Iya ke deka ngangkatka orang mati idup baru. Sida nemu jemah ila, Jehovah deka ngangkatka sida idup baru, lalu sida deka idup belama iya ba dunya. Pikirka pasal Nabot enggau Sekariah. Seduai iya dituku enggau batu nyentukka mati laban ngasika Petara. (1 Raj. 21:3, 15; 2 Ban. 24:20, 21) Daniel ditikau ngagai lubang ke bisi singa ti lapar, lalu bala kawan iya ditikau ngagai api ti mau. Sida sanggup mati ari ke enda taluk ngagai Jehovah. Sida pechaya, Jehovah deka meri sida roh kudus Iya sereta nulung sida tan natka pemerinsa nya.—Dan. 3:16-18, 20, 28; 6:13, 16, 21-23; Heb. 11:33, 34.

11. Nama penguji ke ditatka sekeda bala nabi ketegal pengarap sida?

¹¹ Mayuh nabi, baka Mikaiah enggau Jeremiah, dikeduan tauka dijil. Sida ke bukai, baka Elijah, “bejalai segau-segau ba sebelah menua puang enggau ba sebelah bukit, diau dalam lubang gua, enggau dalam lubang tanah.” Semua sida ulih tan natka penguji sereta mengkang taluk ngagai Petara laban sida “arapka utai ti disadang.”—Heb. 11:1, 36-38; 1 Raj. 18:13; 22:24-27; Jer. 20:1, 2; 28:10, 11; 32:2.

12. Teladan sapa ke pemadu manah dititihka kitai? Nama udah nulung iya tan natka penguji?

¹² Jesus Kristus natka penguji ti pemadu besai sereta mengkang taluk ngagai Jehovah. Nama udah nulung iya tan? Paul madahka: ‘Iya enda malu natka diri [ba tiang, NW] ketegal pengaga ti deka diasaika iya, lalu diatu iya duduk muak ari kanan kerusi diraja Petara.’ (Heb. 12:2) Udah nya, Paul meransang orang Kristian nguji “ngira” teladan Jesus. (Bacha Hebrew 12:3.) Baka Jesus, mayuh orang Kristian ba kurun keterubah mati ketegal sida taluk ngagai Jehovah. Seiku ari sida nya, Antipas. (Pem. 2:13) Sida tu udah nerima upah sida, enda baka nembiak Petara ke sebedau sida ke nganti peluang idup belama iya ba dunya. (Heb. 11:35) Enda lama pengudah Jesus nyadi Raja ba taun 1914, orang Kristian ke diiri ngena roh kudus ke udah diangkatka idup baru deka bulih pengidup ke enda ulih mati di serega, lalu sida deka merintah atas mensia enggau Jesus.—Pem. 20:4.

13, 14. Nama penusah ke ditatka Rudolf Graichen, lalu nama udah nulung iya mengkang taluk ngagai Petara?

¹³ Bejuta iku nembiak Petara nitihka teladan Jesus. Sida belematika semaya Petara sereta mengkang taluk ngagai Iya lebuh diuji. Perundingka Rudolf Graichen, ke ada di Jerman ba taun 1925. Lebuh iya agi biak, apai indai iya ngantung gambar ke bekaul enggau cherita ke bisi ba Bup Kudus dalam rumah sida. Ku iya madahka: “Siti gambar mandangka ukui kampung enggau bedus, engkuli enggau anak kambin, anak sapi enggau anak singa—semua begulai manah lalu diibun seiku anak mit lelaki.” (Isa. 11:6-9) Tu nulung Rudolf suah berunding pasal paradais ba dunya sereta negapka pengarap iya ba semaya nya. Asil iya, iya mengkang taluk ngagai Jehovah taja pan iya betaun balat diperinsa Nazi Gestapo, lalu udah nya diperinsa Komunis Stasi ari Jerman Timur.

¹⁴ Rudolf ulih tan natka mayuh penguji ke bukai. Indai iya mati ketegal penyakit typhus maya dikurung ba kim Ravensbrück. Apai iya nyain dokumen ke madahka, iya ukai agi Saksi-Saksi Jehovah. Tang Rudolf mengkang negapka pengarap iya. Pengudah iya dilepaska ari rumah jil, iya nyadi tuai ti ngabas. Udah nya iya dikangauka masuk Sekula Gilead, lalu dianjung ke menua Chile, ke alai iya nyadi tuai ti ngabas baru. Dia iya jadi enggau Patsy, seiku pengerintis seberai tasik. Tang setaun udah nya, anak indu seduai iya ke agi mit mati. Enda lama udah nya, Patsy mega mati. Iya semina beumur 43 taun. Taja pan napi semua penusah tu, Rudolf terus nyembah Jehovah. Taja pan iya nyau tuai sereta enda entu bepengerai, iya nyadi pengerintis biasa sereta tuai gempuru.

15. Beri sekeda chunto pasal bala menyadi Kristian kitai kemaya hari tu ke nyembah Jehovah enggau gaga ati taja pan sida diperinsa.

¹⁵ Kemaya hari tu, mayuh bala menyadi Kristian kitai nyembah Jehovah enggau gaga ati taja pan sida balat diperinsa. Beratus iku ari sida dijil di menua Eritrea, Singapura, enggau Korea Selatan ketegal sida enggai “ngena pedang.” (Mat. 26:52) Ngambika chunto, Isaac, Negede, enggau Paulos udah dijil lebih 20 taun di menua Eritrea! Dia sida balat diperinsa. Lalu sepemanjai timpuh nya, sida enda ulih berumah-tangga, tauka ngibun apai indai sida. Tang, sida taluk ngagai Jehovah, lalu pengarap sida tegap. Indah bala jejaga ba jil diatu bebasaka sida. Gambar sida bisi ba laman web jw.org. Sida tuchum, taja pan sida merinsa.

16. Pengarap ti tegap ulih nulung nuan ngereja nama?

¹⁶ Mayuh ari nembiak Jehovah enda kala dijil tauka balat diperinsa baka bala menyadi Kristian ke baru disebut tadi. Tang mayuh ke udah merinsa ketegal penyuntuk, penusah ke datai ari kuasa alam, tauka perang entara raban bansa. Bisi mega nitihka teladan Abraham, Isak, Jakop enggau Moses, lalu ninggalka nama ti tebilang tauka pengaya ngambika ulih ngenuluka sembah ngagai Jehovah. Nama nulung bala menyadi Kristian kitai mengkang lantang ati nyembah Jehovah? Sida rinduka Iya sereta arapka semaya Iya. Sida nemu, Iya deka meri upah pengidup belama iya ngagai nembiak Iya ke tetap ati ba dunya baru, ke penuh enggau pengelurus.—Bacha Masmur 37:5, 7, 9, 29.

17. Baka ni nuan deka negapka pengarap nuan, lalu nama deka dikerandauka kitai ba artikel pengudah tu?

¹⁷ Ba artikel tu, kitai udah belajarka baka ni pengarap nya “arapka utai ti disadang.” Ngambika ulih ngembuan pengarap ke baka nya, kitai patut besampi ngagai Jehovah sereta terus belematika semaya Iya. Udah nya, kitai ulih tan natka semua penusah. Artikel pengudah tu deka berandau mayuh agi pasal reti ngembuan pengarap.