Lucas

20 Iti maysa kadagiti aldaw bayat nga isursurona idi dagiti umili idiay templo ken idekdeklarana ti naimbag a damag, immasideg ti panguluen a papadi ken dagiti eskriba agraman dagiti lallakay,+ 2 ket nagsaoda, a kunkunada kenkuana: “Ibagam kadakami no babaen iti ania nga autoridad nga aramidem dagitoy a banag, wenno siasino daydiay nangted kenka itoy nga autoridad.”+ 3 Kas sungbat kinunana kadakuada: “Imtuodek met kadakayo ti maysa a saludsod, ket ibagayo kaniak:+ 4 Ti kadi pammautisar ni Juan nagtaud idiay langit wenno nagtaud kadagiti tattao?”+ 5 Idin nangbukelda kadakuada a mismo kadagiti panangipapan, a kunkunada: “No kunaentayo, ‘Nagtaud idiay langit,’ kunaennanto, ‘Apay a saankayo a namati kenkuana?’+ 6 Ngem no kunaentayo, ‘Nagtaud kadagiti tattao,’ amin dagiti umili uborendatayto,+ ta naallukoyda a ni Juan+ maysa a mammadto.”+ 7 Gapuna simmungbatda a saanda nga ammo ti naggubuayanna. 8 Ket kinuna kadakuada ni Jesus: “Uray siak diak met ibaga kadakayo no babaen iti ania nga autoridad nga aramidek dagitoy a banag.”+

9 Idin rinugianna nga ibaga kadagiti tattao daytoy a pangngarig: “Maysa a tao nagmula iti kaubasan+ ket impaabangna kadagiti agtaltalon, ket nagdaliasat iti sabali a daga iti nawatiwat a tiempo.+ 10 Ngem iti naikeddeng a panawen nangibaon iti adipen+ a mapan kadagiti agtaltalon,+ tapno ikkanda koma iti sumagmamano a bunga ti kaubasan.+ Nupay kasta, dagiti agtaltalon pinapanawda nga ima-ima,+ kalpasan ti panangmalmaloda kenkuana. 11 Ngem inulitna ket nangibaon kadakuada iti sabali nga adipen. Minalmaloda ken pinabainanda met dayta a tao ket pinapanawda nga ima-ima.+ 12 Kaskasdi nangibaon manen iti maikatlo;+ sinugatanda ken pinaruarda met daytoy a tao. 13 Gapu itoy kinuna ti makinkukua iti kaubasan, ‘Ania ti aramidek? Ibaonkonto ti anakko a dungdungnguen.+ Mabalin a raemendanto daytoy.’ 14 Idi isu nakita dagiti agtaltalon nagririnnasonda, a kunkunada, ‘Daytoy ti agtawid; papatayentayo, tapno ti tawid agbalin a kukuatayo.’+ 15 Gapu iti dayta impuruakda iti ruar+ ti kaubasan ket pinapatayda.+ Anianto, ngarud, ti aramiden kadakuada ti makinkukua iti kaubasan?+ 16 Umayto ket dadaelenna dagitoy nga agtaltalon ket itednanto ti kaubasan iti sabsabali.”+

Idi mangngegda daytoy kinunada: “Saan koma a pulos mapasamak dayta!” 17 Ngem minatmatanna ida ket kinunana: “Ania, ngarud, ti kaipapanan daytoy adda a naisurat, ‘Ti bato a linaksid dagiti managibangon,+ daytoy ket nagbalin a kangrunaan a bato a pasuli’?+ 18 Tunggal maysa a matnag iti dayta a bato maburakto.+ No maipapan iti asinoman a pagtinnaganna,+ isu tumekento dayta.”+

19 Dagiti eskriba ken ti panguluen a papadi inkagumaanda itan nga iyunnat kenkuana dagiti imada iti dayta met laeng nga oras, ngem nagbutengda kadagiti tattao; ta naawatanda a sinaona daytoy a pangngarig nga isuda ti adda iti panunotna.+ 20 Ket, kalpasan ti panangsipsiputda kenkuana, nangibaonda kadagiti lallaki a sililimed a natangdanan tapno aginkukunada a nalintegda, tapno isu matiliwda+ iti panagsasaona, tapno iyawatda iti gobierno ken iti autoridad ti gobernador.+ 21 Ket nagsaludsodda kenkuana, a kunkunada: “Mannursuro, ammomi nga agsao ken mangisuroka a siuumiso ket saanka a mangipakita ti panangidumduma, no di ket isurom ti dalan ti Dios maitunos iti kinapudno:+ 22 Nainkalintegan kadi nga agbayadkami iti buis ken Cesar wenno saan?”+ 23 Ngem nadlawna ti kinasikapda ket kinunana kadakuada:+ 24 “Ipakitaandak iti denario. Makinladawan ken surat ti adda iti dayta?” Kinunada: “Ni Cesar.”+ 25 Kinunana kadakuada: “No kasta, ngarud, ibayadyo ken Cesar ti bambanag ni Cesar,+ ngem iti Dios ti bambanag ti Dios.”+ 26 Ala ket, saanda a nabalinan a tiliwen iti daytoy a sasao iti sanguanan dagiti tattao, no di ket, iti panagsiddaawda iti sungbatna, awan ti naisaoda.+

27 Nupay kasta, immay ti sumagmamano kadagiti Saduceo, dagidiay agkunkuna nga awan panagungar, ket nagsaludsodda kenkuana,+ 28 a kunkunada: “Mannursuro, insurat kadakami ni Moises,+ ‘No ti kabsat a lalaki ti maysa a tao matay nga addaan asawa, ngem nagtalinaed daytoy nga awanan putot, ti kabsatna a lalaki+ rebbeng nga alaenna ti asawa ket mangpatanor iti putot manipud kenkuana maipaay iti kabsatna.’+ 29 Ngarud adda idi pito nga agkakabsat a lallaki; ket ti umuna nangala iti asawa ket natay nga awanan putot.+ 30 Kasta met ti maikadua, 31 ken ti maikatlo ti nangala kenkuana. Kasta met laeng uray pay dagiti pito: saanda a nakaibati iti annak, no di ket natayda.+ 32 Kamaudiananna, natay met ti babai.+ 33 Iti kasta, inton panagungar, siasino kadakuada ti pagbalinannanto nga asawa? Ta isu innala dagiti pito kas asawa.”+

34 Kinuna kadakuada ni Jesus: “Ti annak daytoy a sistema ti bambanag mangasawada+ ken mayasawada, 35 ngem dagidiay naibilang a maikari+ a makagun-od iti dayta a sistema ti bambanag+ ken iti panagungar kadagiti natay+ saanda a mangasawa wenno uray mayasawa. 36 Iti kinapudnona, saanda a matayen+ iti uray kaanoman, ta kaslada kadagiti anghel, ket annak ida ti Dios babaen ti panagbalinda nga annak ti panagungar.+ 37 Ngem uray ni Moises imbutaktakna a maibangon dagiti natay, iti salaysay maipapan iti siitan a bassit a kayo,+ idi awaganna ni Jehova a ‘ti Dios ni Abraham ken Dios ni Isaac ken Dios ni Jacob.’+ 38 Isu ket Dios, saan a dagiti natay, no di ket dagiti sibibiag, ta sibibiagda amin kenkuana.”+ 39 Kas sungbat kinuna ti sumagmamano kadagiti eskriba: “Mannursuro, naimbag ti panagsaom.” 40 Ta awanen turedda a mangyimtuod kenkuana iti uray maysa a saludsod.

41 Kalpasanna kinunana kadakuada: “Kasano a kunada a ti Kristo ket anak ni David?+ 42 Ta ni David a mismo kunana iti libro dagiti Salmo, ‘Kinuna ni Jehova iti Apok: “Agtugawka iti makannawanko 43 agingga nga ikabilko dagiti kabusormo a pagbatayan dagiti sakam.”’+ 44 Ngarud, isu awagan ni David iti ‘Apo’; gapuna kasano nga isu ket anakna?”

45 Idin, bayat nga amin dagiti tattao agim-imdengda kinunana kadagiti adalan:+ 46 “Siputanyo dagiti eskriba a tarigagayanda ti agpagnapagna a nagpagan-anay iti nagayad ket kaykayatda dagiti kablaaw kadagiti plasa ken dagiti makinsango a pagtugawan kadagiti sinagoga ken dagiti katan-okan a puesto kadagiti pangrabii,+ 47 ken isuda a mangalun-on iti balbalay dagiti balo a babbai+ ket kas pambar agkararagda iti atiddog. Awatento dagitoy ti nadagdagsen a pannakaukom.”+