Galacia

4 Ita kunaek a bayat a ti agtawid ubing pay laeng isu saan a pulos naiduma iti maysa nga adipen,+ nupay isu ket apo ti amin a bambanag, 2 no di ket adda iti babaen dagiti tattao nga agay-aywan+ ken iti babaen dagiti mayordomo agingga iti aldaw nga intuding a nasaksakbay ti amana. 3 Kasta met a datayo, idi ubbingtayo pay, nagtultuloy a naadipentayo iti pagdamdamuan+ a bambanag a kukua ti lubong. 4 Ngem idi dimteng ti naan-anay a pagpatinggaan ti tiempo,+ ti Dios imbaonna ti Anakna,+ a nagtaud iti maysa a babai+ ken naipasidong iti linteg,+ 5 tapno dagidiay adda iti sidong ti linteg+ maluk-atanna babaen ti pananggatang,+ tapno datayo, kalpasanna, awatentay koma ti pannakaampon kas annak.+

6 Ita agsipud ta dakayo ket annak, ti Dios imbaonna kadagiti pusotayo ti espiritu+ ti Anakna ket ipukkawna: “Abba, Ama!”+ 7 No kasta, ngarud, saankan nga adipen no di ket anak; ket no anak, maysa met nga agtawid babaen ti Dios.+

8 Nupay kasta, idi saanyo nga am-ammo ti Dios,+ iti kasta nagpaadipenkayo kadagidiay nga iti nakaisigudan saan a didios.+ 9 Ngem ita ta am-ammoyon ti Dios, wenno imbes ketdi ita ta am-ammonakayon ti Dios,+ kasano nga agsubsublikayo manen iti nakapuy+ ken nanumo a pagdamdamuan+ a bambanag ket kayatyo ti agpaadipen manen kadakuada?+ 10 Siaannad a ngilngilinenyo ti al-aldaw+ ken bulbulan+ ken pampanawen ken tawtawen. 11 Maamakak maipaay kadakayo, di la ket ta nagbannogak nga awanan panggep+ maipapan kadakayo.

12 Kakabsat, ipakaasik kadakayo, Agbalinkayo a kas kaniak,+ agsipud ta kaslaak met kadakayo idi.+ Awan ti dakes nga inaramidyo kaniak.+ 13 Ngem ammoyo a maigapu iti maysa a sakit iti lasagko indeklarak ti naimbag a damag kadakayo iti umuna a gundaway.+ 14 Ket no ania idi ti pakasuotan kadakayo iti lasagko, saanyo nga inumsi wenno tinupraan gapu iti pannakarimon; no di ket inawatdak a kas iti maysa nga anghel+ ti Dios, kas ken Kristo Jesus.+ 15 Sadino, ngarud, ti ayan dayta kinaragsak nga adda kadakayo idi?+ Ta saksaksiankayo a, no laeng mabalin, sinuatyo koma dagiti matayo ket intedyo ida kaniak.+ 16 Ay ket, ngarud, nagbalinak aya a kabusoryo+ agsipud ta ibagak kadakayo ti kinapudno?+ 17 Sireregtada a mangessem kadakayo,+ saan nga iti nasayaat a wagas, no di ket kayatdakayo nga isina kaniak, tapno sireregta a maessemanyo ida.+ 18 Nupay kasta, nasayaat a sireregta a maessemankayo iti nasayaat a pakaigapuan+ iti amin a tiempo, ket saan laeng a no addaak+ a kaduayo, 19 babassit nga annakko,+ a kadakayo agpaspasikalak manen agingga a mabukel kadakayo ni Kristo.+ 20 Ngem tarigagayak koma nga addaak a kaduayo ita met laeng+ ken agsaoak iti naiduma a wagas, agsipud ta mariribukanak+ kadakayo.

21 Ibagayo kaniak, dakayo nga agtarigagay a maipasidong iti linteg,+ Dikay aya mangngeg ti Linteg?+ 22 Kas pagarigan, adda a naisurat a ni Abraham nakagun-od iti dua nga annak, maysa babaen iti adipen a babai+ ken maysa babaen iti siwayawaya a babai;+ 23 ngem daydiay babaen iti adipen a babai ket iti kinapudnona nayanak a kas iti lasag,+ daydiay babaen iti siwayawaya a babai ket babaen iti kari.+ 24 Dagitoy a banag agpaayda a kas mangiladawan a drama;+ ta dagitoy a babbai kaipapananda ti dua a tulag,+ ti maysa ket manipud Bantay Sinai,+ a mangipasngay iti annak a maipaay iti pannakaadipen, ket isu ni Agar. 25 Ita daytoy nga Agar kaipapananna ti Sinai,+ maysa a bantay idiay Arabia, ket katupagna ti Jerusalem ita nga aldaw, ta isu adda iti pannakaadipen+ agraman ti annakna. 26 Ngem ti Jerusalem+ sadi ngato siwayawaya, ken isu ti inatayo.+

27 Ta adda a naisurat: “Agragsakka, sika a lupes a babai a di agpasngay; agriaw ken agikkiska iti napigsa, sika a babai nga awanan kadagiti panagpasikal; ta ti annak ti nabaybay-an a babai ad-aduda ngem ti annak ti addaan asawa.”+ 28 Ita datayo, kakabsat, ket annak nga adda pakainaiganna iti kari a kas ken Isaac idi.+ 29 Ngem no kasano idi a daydiay nayanak a kas iti lasag rinugianna nga indadanes+ daydiay nayanak a kas iti espiritu, kasta met ita.+ 30 Nupay kasta, ania ti kuna ti Kasuratan? “Pagtalawem ti adipen a babai ken ti anakna, ta ti anak ti adipen a babai saanto a pulos makipagtawid iti anak ti siwayawaya a babai.”+ 31 Gapuna, kakabsat, annaknatayo, saan a ti adipen a babai,+ no di ket ti siwayawaya a babai.+