Deuteronomio
12 “Dagitoy ti al-alagaden+ ken dagiti hudisial a pangngeddeng+ a rebbeng nga annadanyo nga itungpal+ iti daga a sigurado nga ipalubosto ni Jehova a Dios dagidi ammam a tagikuaem, iti amin nga al-aldaw a sibibiagkayo iti rabaw ti daga.+ 2 Rebbeng a dadaelenyo a naan-anay+ dagiti amin a disso a sadiay dagiti nasion nga ikkatanyo iti sanikua nagserbida iti didiosda, kadagiti natayag a bantay ken kadagiti turod ken iti sirok ti tunggal nabaludbod a kayo.+ 3 Ket masapul a rugpuenyo dagiti altarda+ ken burakenyo dagiti sagrado a munmonda,+ ket rebbeng nga ipuoryo iti apuy dagiti sagrado a teddekda+ ken pukanenyo dagiti kinitikitan a ladawan+ ti didiosda, ket masapul a dadaelenyo ti nagnaganda manipud iti dayta a disso.+
4 “Dikay aramiden ti kasta ken Jehova a Diosyo,+ 5 no di ket iti disso a piliento ni Jehova a Diosyo manipud kadagiti amin a tribuyo tapno isaadna sadiay ti naganna, tapno pagtaengenna, sapulenyonto, ket sadiay masapul a mapanka.+ 6 Ket sadiay masapul nga ipanyo dagiti datonyo a mapuoran+ ken dagiti sakripisioyo ken dagiti apagkapulloyo+ ken ti kontribusion ti imayo+ ken dagiti kari a datonyo+ ken dagiti boluntario a datonyo+ ken dagidiay inauna ti pangenyo ken ti arbanyo.+ 7 Ket sadiay masapul a mangankayo iti sango ni Jehova a Diosyo+ ket agrag-okayo iti tunggal gapuananyo,+ dakayo ken dagiti sangakabbalayanyo, agsipud ta ni Jehova a Diosmo binendisionannaka.
8 “Dikay aramiden ti maitunos iti amin nga ar-aramidentayo ditoy ita nga aldaw, tunggal maysa aniaman ti umiso iti bukodna a matmata,+ 9 agsipud ta saankayo pay a nakagteng iti lugar a paginanaan+ ken iti tawid nga ited kenka ni Jehova a Diosmo. 10 Ket masapul a ballasiwenyo ti Jordan+ ket agnaedkayo iti daga nga ited kadakayo ni Jehova a Diosyo kas sanikua,+ ket sigurado nga ipaayannakayto iti inana kadagiti amin a kabusoryo iti aglikmut, ket pudno nga agnaedkayto a sitatalged.+ 11 Ket mapasamakto a ti disso+ a piliento ni Jehova a Diosyo a pangipataenganna iti naganna, sadiay ti pangipananyonto iti isuamin a maipapan kadagita bilbilinenkayo, dagiti datonyo a mapuoran+ ken dagiti sakripisioyo, dagiti apagkapulloyo+ ken ti kontribusion+ ti imayo ken ti tunggal napili kadagiti kari+ a datonyo nga ikariyonto ken Jehova. 12 Ket agrag-okayto iti sango ni Jehova a Diosyo,+ dakayo ken ti annakyo a lallaki ken ti annakyo a babbai ken dagiti adipenyo a lallaki ken dagiti adipenyo a babbai ken ti Levita nga adda iti uneg dagiti ruanganyo, agsipud ta awan binglayna wenno tawidna a mairaman kadakayo.+ 13 Agaluadka ta amangan no maidatonmo ti datdatonmo a mapuoran iti aniaman a sabali a disso a makitam.+ 14 No di ket iti disso a piliento ni Jehova iti maysa kadagiti tribum isu ti rebbeng a pangidatonam kadagiti datonmo a mapuoran, ket rebbeng nga aramidem sadiay ti isuamin nga ibilbilinko kenka.+
15 “No laeng garteman dayta ti kararuam mabalinmo ti agparti,+ ket mangankanto iti karne sigun iti pamendision ni Jehova a Diosmo nga intedna kenka, iti uneg ti amin a ruruanganmo. Daydiay narugit+ ken daydiay nadalus mabalinda ti mangan iti dayta, kas iti gasela ken kas iti kalakian nga ugsa.+ 16 Isuna laeng ta dikay kanen ti dara.+ Rebbeng nga iparukpokmo dayta iti daga a kasla danum.+ 17 Saanto a maipalubos a kanem iti uneg ti ruruanganmo ti apagkapullo ti bukbukelmo+ wenno ti baro nga arakmo wenno ti lanam wenno dagidiay inauna ti pangenmo ken ti arbanmo+ wenno ti aniaman kadagiti kari a datonmo nga ikarimto wenno dagiti boluntario a datonmo+ wenno ti kontribusion ti imam.+ 18 No di ket kanemto dayta iti sango ni Jehova a Diosmo, iti disso a piliento ni Jehova a Diosmo,+ sika ken ti anakmo a lalaki ken ti anakmo a babai ken ti adipenmo a lalaki ken ti adipenmo a babai ken ti Levita nga adda iti uneg dagiti ruanganmo; ket agrag-okanto+ iti sango ni Jehova a Diosmo iti tunggal gapuanam. 19 Agaluadka tapno saanmo a mabaybay-an ti Levita+ iti amin nga al-aldawmo iti dagam.
20 “Inton palawaen ni Jehova a Diosmo ti teritoriam,+ kas iti inkarina kenka,+ ket sigurado a kunaemto, ‘Manganak iti karne,’ agsipud ta aggartem ti kararuam a mangan iti karne, kaanoman a garteman dayta ti kararuam mabalinmo ti mangan iti karne.+ 21 No kas pagarigan adayo kenka ti disso a piliento ni Jehova a Diosmo a pangikabilanna iti naganna,+ masapul ngarud a mangpartika iti sumagmamano iti pangenmo wenno sumagmamano iti arbanmo nga inted kenka ni Jehova, kas iti imbilinko kenka, ket mangankanto iti uneg dagiti ruanganmo kaanoman a garteman ti kararuam.+ 22 Isuna laeng ta iti wagas a pannangan iti gasela ken iti kalakian nga ugsa,+ kasta ti pannanganmo iti dayta: mabalin a kanen dayta a sangsangkamaysa daydiay narugit+ ken daydiay nadalus. 23 Isuna laeng ta sititibker nga ikeddengmo a saanmo a kanen ti dara,+ agsipud ta ti dara isu ti kararua+ ket dika kanen ti kararua a mairaman iti lasag. 24 Dika kanen dayta. Rebbeng nga iparukpokmo iti daga a kasla danum.+ 25 Dika kanen dayta, tapno naimbag ti lak-ammo+ ken ti annakmo a sumaruno kenka, agsipud ta aramidemto ti umiso kadagiti mata ni Jehova.+ 26 Ti laeng nasantuan a bambanagmo+ nga agbalinto a kukuam, ken dagiti kari a datonmo+ ti rebbeng nga awitem, ket masapul nga umayka iti disso a piliento ni Jehova.+ 27 Ket masapul nga idatagmo ti datdatonmo a mapuoran,+ ti lasag ken ti dara,+ iti rabaw ti altar ni Jehova a Diosmo; ket ti dara dagiti sakripisiom rebbeng a maiparukpok iti altar ni Jehova+ a Diosmo, ngem ti lasag mabalinmo a kanen.
28 “Aluadam, ken masapul nga agtulnogka kadagitoy amin a sasao nga ibilbilinko kenka,+ tapno naimbag ti lak-ammo+ ken ti annakmo a sumaruno kenka agingga iti tiempo a di nakedngan, agsipud ta aramidemto ti naimbag ken umiso kadagiti mata ni Jehova a Diosmo.+
29 “Inton gessaten ni Jehova a Diosmo iti sanguanam dagiti nasion a papanam tapno ikkatam ida iti sanikua,+ masapul met nga ikkatam ida iti sanikua ket agnaedka iti dagada.+ 30 Agaluadka ta amangan no masiluanka a sumurot kadakuada,+ kalpasan ti pannakatalipuposda iti sanguanam, ken amangan no agimtuodka maipapan iti didiosda, a kunaem, ‘Kasano ti panagserbi idi dagitoy a nasion iti didiosda? Ket siak, wen, siak, kasta met laeng ti aramidekto.’ 31 Dika aramiden ti kasta ken Jehova a Diosmo,+ ta ti isuamin a nakarimrimon ken Jehova a kagurana inaramidda iti didiosda, ta uray ti annakda a lallaki ken ti annakda a babbai kankanayon nga ipuorda iti apuy kadagiti didiosda.+ 32 Tunggal sao nga ibilbilinko kadakayo isu ti rebbeng nga annadanyo nga aramiden.+ Dikay nayonan wenno kissayan.+