Ti Umuna nga Ar-ari

7 Imbangon ni Solomon ti balayna*+ a naileppasna iti 13 a tawen.+

2 Ti imbangonna a Balay iti Bakir ti Lebanon+ ket 100 a kasiko* ti kaatiddogna, 50 a kasiko ti kaakabana, ken 30 a kasiko ti kangatona. Uppat nga intar dagiti adigina a sedro ken sedro met dagiti biga+ iti rabaw dagiti adigi. 3 Tabla a sedro ti bobida iti ngatuen dagiti busoran iti rabaw dagiti adigi; 45 ti bilangda, 15 iti kada intar. 4 Adda tallo nga intar ti agbabatog a tawa, a tunggal tawa ket adda kabatogna a tawa a tallo a katuon. 5 Kuadrado* ti amin a pagserkan ken hamba ti ridaw, a kapada ti sango dagiti agkabatog a tawa a tallo a katuon.

6 Imbangonna met ti Salas* Dagiti Adigi a 50 a kasiko ti kaatiddogna ken 30 a kasiko ti kaakabana, a ti sangona ket beranda nga addaan iti linong a naiparabaw kadagiti adigi.

7 Binangonna met ti Salas* ti Trono+ a pangukomanna—ti Salas a Pangukoman.+ Tabla a sedro ti inusarda manipud suelo agingga iti bobida.

8 Ti balay* a pagnaedanna, nga adda iti sabali a paraangan,+ ket adda iti likud ti Salas,* ken kapada ti estruktura ti Salas. Umasping met laeng iti Salas ti estruktura ti balay nga inaramid ni Solomon para iti asawana nga anak ni Faraon.+

9 Naaramid amin dagitoy iti nangina a batbato+ a natikap sigun iti rukodda, a natabas ti amin a sikiganna babaen ti ragadi ti bato. Kasta ti naaramat manipud pundasion agingga iti rabawna agraman ti ruarna agingga iti dakkel a paraangan.+ 10 Nagdadakkel ken nagngingina a bato ti pundasionna. Adda dagiti bato a 10 wenno 8 a kasiko ti kadadakkelda. 11 Nadidingan dagita iti sedro ken nangingina a batbato a natabas sigun iti rukodda. 12 Iti aglawlaw ti dakkel a paraangan, adda tallo nga intar ti natikap a batbato ken maysa nga intar dagiti biga a sedro, a kas iti makin-uneg a paraangan+ ti balay ni Jehova ken ti beranda ti balay.+

13 Pinaayaban ni Ari Solomon ni Hiram+ a taga-Tiro. 14 Balo ti inana manipud iti tribu ni Neftali ken taga-Tiro ti amana, a mammanday iti gambang.+ Nalaing ken adu ti ammona+ ken kapadasanna iti trabaho mainaig iti gambang.* Pinatganna ti awis ni Ari Solomon ket inaramidna ti amin a naipatrabaho kenkuana.

15 Sinukogna ti dua nga adigi a gambang;+ 18 a kasiko ti kangato ti tunggal adigi, ket kasapulan ti pagrukod a 12 a kasiko ti kaatiddogna tapno mapalawlawan ti tunggal maysa kadagiti dua nga adigi.*+ 16 Nangaramid met iti dua a pannakaulo a gambang a maiparabaw kadagiti adigi. Agpada a lima a kasiko ti kadakkel dagita. 17 Nadekorasionan ti tunggal pannakaulo iti iket a naaramid iti natiritir a babassit a kawar;+ sagpipito iti tunggal pannakaulo. 18 Nangaramid pay iti dua nga intar dagiti sinanprutas a granada iti aglikmut ti nalaga a dekorasion tapno maabbongan ti pannakaulo dagiti adigi; kasta ti inaramidna iti dua a pannakaulo. 19 Kasla lirio nga uppat a kasiko ti katayagna ti disenio ti pannakaulo dagiti adigi. 20 Naikabil dagiti pannakaulo ti dua nga adigi, iti mismo a ngatuen ti adigi nga ayan ti nalaga a dekorasion. Adda naintar a 200 a sinanprutas a granada iti aglawlaw ti tunggal pannakaulo.+

21 Impatakderna dagiti adigi iti beranda ti templo.*+ Pinanagananna iti Jakin* ti kannawan* nga adigi ken pinanagananna iti Boaz* ti kannigid* nga adigi.+ 22 Kasla lirio ti disenio ti ngato dagiti adigi. Iti kasta, nalpas ti pannakaaramid dagiti adigi.

23 Kalpasanna, nangaramid iti nagtimbukel a metal a palanggana a maawagan iti Baybay,*+ a 10 a kasiko ti diametro ti ngarabna, 5 a kasiko ti kaunegna, ket kasapulan ti pagrukod a 30 a kasiko ti kaatiddogna tapno mapalawlawan dayta.*+ 24 Adda dagiti sinantabungaw a dekorasion+ iti baba ti ngarabna, a naipalawlaw iti palanggana, 10 iti kada kasiko iti aglikmut ti Baybay. Dua nga intar dagiti sinantabungaw a naigiddan a naaramid idi napanday ti palanggana. 25 Naiparabaw ti Baybay iti 12 a sinanbaka,+ 3 ti nakasango iti amianan, 3 ti nakasango iti laud, 3 ti nakasango iti abagatan, ken 3 ti nakasango iti daya. Nagtitinnallikudda amin iti sirok ti Baybay. 26 Sangadakulap* ti kapuskol ti palanggana. Kasla ngarab ti kopa ti itsura ti ngarabna a kasla sabong a lirio. Makalaon dayta iti 2,000 a bat.*

27 Nangaramid met iti 10 a gambang a kareton.*+ Ti tunggal kareton ket uppat a kasiko ti kaatiddogna, uppat a kasiko ti kaakabana, ken tallo a kasiko ti kangatona. 28 Kastoy ti pannakaaramid dagiti kareton: Nadidingan ti amin a sikigan, ket naikapet dagiti diding kadagiti sagiped.* 29 Dagiti diding iti nagbaetan dagiti sagiped ket addaan iti ladawan dagiti leon,+ baka, ken kerubin,+ ket kasta met laeng dagiti ladawan kadagiti sagiped. Adda nagtitimbukel a dekorasion iti ngato ken baba dagiti leon ken baka. 30 Tunggal kareton ket addaan iti uppat a pilid a gambang ken ehe a gambang, ken ti uppat a pasulina ti pangsuporta kadagita ken iti palanggana. Addaan dagita a suporta iti nagtitimbukel a dekorasion iti agsumbangir a sikigan. 31 Iti rabaw ti kareton, adda pagikargaan iti palanggana a maysa a kasiko ti kangatona. Nagbukel ti ngarabna ken maysa ket kagudua a kasiko ti kaunegna ken nakitikitan ti sikigan ti ngarabna. Kuadrado ti ngarab ti kareton, saan a nagtimbukel. 32 Adda uppat a pilid a naikonektar iti kareton. Maysa ket kagudua a kasiko ti kadakkel ti tunggal pilid. 33 Kasla pilid ti karuahe dagiti pilidna. Naaramid iti metal ti amin a batay, basikaw, rayos, ken palaupoda. 34 Adda uppat a batay iti uppat a suli ti tunggal kareton; namolde dagita kas paset* ti kareton. 35 Iti ngarab ti kareton, adda nagtimbukel a pannakasagapa a kagudua a kasiko ti kangatona. Namolde ti ngarab, dagiti diding, ken sikigan kas paset* ti kareton. 36 Ti ngarab ken dagiti diding ken sikigan ti kareton ket nakitikitan kadagiti kerubin, leon, ken kayo a palma sigun iti pakaanayanda. Adda met nagtitimbukel a dekorasion iti aglawlawna.+ 37 Kasta ti panangaramidna iti 10 a kareton.+ Agpapada ti sukog,+ rukod, ken pormada.

38 Nangaramid iti 10 a palanggana a gambang.+ Uppat a kasiko* ti tunggal palanggana ken 40 a bat ti malaon ti tunggal maysa. Adda maysa a palanggana iti tunggal kareton. 39 Inkabilna ti lima a kareton iti kannawan a sikigan ti balay ken ti lima iti kannigid a sikigan ti balay, sa impuestona ti Baybay iti kannawan a sikigan ti balay, iti abagatan a daya.+

40 Inaramid met ni Hiram+ dagiti palanggana, pala,+ ken malukong.+

Iti kasta, nalpasna amin nga impatrabaho ni Ari Solomon iti balay ni Jehova:+ 41 ti dua nga adigi+ ken dagiti sinanmalukong a pannakaulo dagita; ti dua a nalaga a dekorasion+ ti dua a sinanmalukong a pannakaulo dagiti adigi; 42 ti 400 a sinanprutas a granada+ para iti dua a nalaga a dekorasion, dua nga intar a sinanprutas a granada para iti tunggal nalaga a dekorasion, a nangabbong iti dua a sinanmalukong a pannakaulo ti dua nga adigi; 43 ti 10 a kareton+ ken ti 10 a palanggana+ iti rabaw dagiti kareton; 44 ti Baybay+ ken ti 12 a sinanbaka iti sirok ti Baybay; 45 ken dagiti gambang a timba, pala, malukong, ken amin nga alikamen nga inaramid ni Hiram para ken Ari Solomon para iti balay ni Jehova. 46 Sinukog dagita ti ari iti pagmoldean a pila idiay Jordan, iti nagbaetan ti Succot ken Zaretan.

47 Saanen a tinimbang ni Solomon ti amin nga alikamen ta nakaad-adu dagita. Saandan nga inammo ti timbang ti gambang.+ 48 Inaramid ni Solomon ti amin nga alikamen iti balay ni Jehova: ti balitok nga altar;+ ti balitok a lamisaan+ a pakaiparabawan ti pamarang a tinapay; 49 dagiti kandelero+ a puro a balitok, lima iti kannawan ken lima iti kannigid iti asideg ti pagserkan iti kaunegan a siled; ken dagiti balitok a sabong, lampara, ken sipit;+ 50 dagiti puro a balitok a palanggana, pagiddep iti apuy,+ malukong, kopa,+ pagikkan iti insienso;+ ken dagiti balitok a pannakabisagra dagiti ridaw ti makin-uneg a balay,+ kayatna a sawen, ti Kasasantuan, ken dagiti ridaw ti balay ti templo.+

51 Gapuna, naileppas ni Ari Solomon ti amin a trabaho a masapul nga aramidenna para iti balay ni Jehova. Iti kasta, inserrekna dagiti banag a pinagbalin a nasantuan ni amana a David.+ Inkabilna dagiti pirak, balitok, ken dagiti alikamen kadagiti pagidulinan iti gameng iti balay ni Jehova.+