Ebanghelio ni Marcos

6 Pimmanaw sadiay ket napan iti ilina+ a kaduana dagiti adalanna. 2 Iti aldaw ti Sabbath, nangisuro iti sinagoga ket nasdaaw ti kaaduan kadagiti dumdumngeg kenkuana ken kinunada: “Nangalaan daytoy a tao kadagitoy a banag?+ Apay a naikkan iti kasta a sirib, ken apay a makaaramid kadagiti milagro?+ 3 Saan kadi a daytoy ti karpintero+ nga anak ni Maria+ ken kabsat da Santiago,+ Jose, Judas, ken Simon?+ Ken saan kadi a kaduatay ditoy dagiti kakabsatna a babbai?” Gapuna, naitibkolda gapu kenkuana. 4 Ngem kinuna ni Jesus kadakuada: “Mapadayawan ti maysa a propeta iti sadinoman ngem saan nga iti ilina, kadagiti kabagianna, ken iti pamiliana.”+ 5 Isu a saan a nangaramid iti aniaman a milagro sadiay malaksid iti panangiparabawna kadagiti imana iti sumagmamano a masakit ket pinaimbagna ida. 6 Nasdaaw iti kinaawan pammatida. Ket linikmutna dagiti purok iti dayta a lugar a nangisursuro.+

7 Inayabanna ti Sangapulo ket Dua ken imbaonna ida a sagdudua.+ Inikkanna met ida iti autoridad a mangparuar kadagiti dakes nga espiritu.+ 8 Binilinna pay ida a dida mangitugot iti uray ania iti panagdaliasatda malaksid iti sarukod. Dida met mangitugot iti taraon, pagkargaan iti taraon, ken kuarta* iti sinturonda.+ 9 Ngem agsandaliasda ken maysa laeng a bado ti isuotda.* 10 Innayonna pay: “No sumrekkayo iti maysa a balay, agyankayo sadiay agingga a pumanawkayo iti dayta a lugar.+ 11 No saandakayo nga awaten wenno denggen iti maysa a lugar, pumanawkayo ket pampagenyo ti rugit kadagiti sakayo kas pangsaksi kadakuada.”+ 12 Isu a napanda ket inkaskasabada a masapul nga agbabawi dagiti tattao.+ 13 Pinaruarda met ti adu a demonio+ ken sinapsapuanda iti lana ti adu a masakit ket pinaimbagda ida.

14 Naammuan daytoy ni Ari Herodes, ta agdindinamag ti nagan ni Jesus, ken ibagbaga dagiti tattao: “Napagungaren ni Juan a Mammautisar isu a makaaramid kadagiti milagro.”+ 15 Ngem kinuna ti dadduma: “Ni Elias dayta.” Adda met dagidiay mangibagbaga: “Kasla maysa kadagiti propeta idi un-unana.”+ 16 Ngem idi nangngeg daytoy ni Herodes, kinunana: “Isu daytan ni Juan a pinapugotak. Nagungaren!” 17 Ta ni Juan ket impaaresto ken impaibalud ni Herodes gapu ta inasawana ni Herodias nga asawa ni Felipe a kabsatna.+ 18 Ta namin-adu nga imbaga ni Juan ken Herodes: “Saan a rumbeng nga asawaem ti asawa ti kabsatmo.”+ 19 Isu a kagurgura unay ni Herodias ni Juan ket kayatna a patayen, ngem saanna a maaramid. 20 Mabuteng ngamin ni Herodes ken Juan ta ammona nga isu ket nalinteg ken nasantuan a tao,+ isu a salsalaknibanna. Kada mangngegna nga agsao ni Juan, dina ammo ti aramidenna, ngem magusgustuanna a denggen.

21 Ngem dimteng ti gundaway idi sinelebraran ni Herodes ti aldaw ti pannakayanakna+ ken nagsagana iti pangrabii para kadagiti nangato nga opisialna, komander ti militar, ken prominente unay a tattao iti Galilea.+ 22 Immay ti balasang ni Herodias ket nagsala isu a naragsakan ni Herodes ken dagiti kakaduana a mangmangan.* Kinuna ti ari iti balasang: “Ibagam ti aniaman a kayatmo, ket itedkonto kenka.” 23 Inkarina: “Itedko ti aniaman a dawatem, uray pay ti kagudua ti pagariak.” 24 Isu a rimmuar ket dinamagna iti inana: “Ania ti dawatek?” Insungbatna: “Ti ulo ni Juan a Mammautisar.” 25 Nagdardaras a nagsubli iti ari sana imbaga ti dawatna: “Kayatko nga itedmo a dagus kaniak ti ulo ni Juan a Mammautisar a naikabil iti bandehado.”+ 26 Nupay nalidayan unay ti ari, dina kayat a paayen ti balasang gapu kadagiti inkarina ken kadagiti bisitana.* 27 Binilin ngarud a dagus ti ari ti maysa a guardia nga iyegna ti ulo ni Juan. Isu a napanna pinugotan ni Juan iti pagbaludan, 28 sana inyeg ti ulo a nakabandehado. Intedna dayta iti balasang, sa inted met ti balasang iti inana. 29 Idi nadamag dayta dagiti adalan ni Juan, napanda innala ti bangkayna ket inkabilda iti tanem.*

30 Nagsubli dagiti apostol iti ayan ni Jesus ket impadamagda kenkuana ti amin nga inaramidda ken insuroda.+ 31 Kinunana kadakuada: “Intayo iti awan matataona a lugar ta aginanatayo biit.”+ Saan ngamin a maib-ibus ti um-umay a tattao ket dida payen masango ti mangan. 32 Isu a nagbangkada nga is-isuda a napan iti awan matataona a lugar.+ 33 Ngem nakita dagiti tattao ti ipapanawda ken adu ti nakadamag. Isu a nagtataray dagiti tattao iti amin a siudad a napan ken immun-unada pay a nakadanon. 34 Idi dimsaag, nakitana ti nakaad-adu a tattao. Naasian kadakuada+ ta kasda la karnero nga awanan pastor.+ Isu nga insurona ida iti adu a banag.+

35 Idi mumalemen, inasitgan dagiti adalanna ket imbagada: “Awan ti matatao ditoy ken mumalmalemen.+ 36 Ibagam a mapandan tapno makagatangda iti kanenda kadagiti away ken purok iti aglawlaw.”+ 37 Kinunana: “Pakanenyo ida.” Dinamagda kenkuana: “Mapankami kadi gumatang iti tinapay nga aggatad iti 200 a denario* nga iwarasmi a kanen dagiti tattao?”+ 38 Insaludsodna: “Mano a tinapay ti adda kadakayo? Inkay kitaen!” Idi makitada, kinunada: “Lima, ken adda dua nga ikan.”+ 39 Ket binilinna ti amin a tattao nga aggugrupoda nga agtugaw iti nalangto a karuotan.+ 40 Isu a naggugrupoda a nagtugaw iti sagsasangagasut ken saglilimapulo. 41 Innalana ti lima a tinapay ken dua nga ikan, ket timmangad iti langit sa dimmawat iti pamendision.+ Kalpasanna, pinispisina dagiti tinapay sa intedna kadagiti adalan tapno iwarasda kadagiti tattao. Biningbingayna met ti dua nga ikan tapno mawarasan ti amin. 42 Nanganda amin ket nabsogda. 43 Nakaurnongda iti 12 a basket a napno iti natedda, malaksid pay kadagiti ikan.+ 44 Dagidiay nangan iti tinapay ket 5,000 a lallaki.

45 Kalpasanna, dagus a pinaluganna dagiti adalanna iti bangka tapno umun-unada a bumallasiw nga agturong idiay Betsaida, bayat a pinagawidna dagiti tattao.+ 46 Kalpasan a nakapagpakada, napan iti bantay tapno agkararag.+ 47 Idi rumabiin, addan ti bangka iti tengnga ti baybay, ngem agmaymaysa ni Jesus iti sang-at.+ 48 Iti agarup maikapat a panagbantay iti rabii,* nakitana ida a marigrigatan nga aggaud ta sumuba kadakuada ti angin, isu a napan kadakuada a nagna iti rabaw ti baybay. Ngem kasla* labsanna ida. 49 Idi nakitada a magmagna iti rabaw ti baybay, kinunada: “Agtagtagaineptayo kadi?” Ket nagikkisda. 50 Ta nakitada amin isuna ket nagdanagda. Ngem dagus a kinunana: “Patibkerenyo ti pakinakemyo! Siak daytoy; dikay agbuteng.”+ 51 Idi nakilugan kadakuada iti bangka, timmalna ti angin. Kasta unay ti siddaawda, 52 ta saanda a naawatan ti kaipapanan dagiti tinapay, ken marigatanda pay laeng a mangtarus iti dayta.

53 Idi nakasangladdan iti Genesaret, inyangklada ti bangka iti asideg.+ 54 Ngem apagdissaagda iti bangka, nailasin dagiti tattao ni Jesus. 55 Nagtatarayda a nangipakaammo iti intero a rehion isu nga impanda dagiti nakaidda a masakit iti nadamagda nga ayanna. 56 Sadinoman a papananna a purok wenno siudad wenno away, ipanda dagiti masakit kadagiti pagtagilakuan ken ipakpakaasi dagiti masakit nga uray masagidda la koma ti gayadan ti makinruar a badona.+ Ket immimbag ti amin a nangsagid iti dayta.