Apay Agbalin a Managyaman?
KITAENYO ti abbong daytoy a magasin. Pudno unay, ipalagip dayta kadatayo nga adu dagiti napipintas a banag a mangator iti kinalaad ken kinarugit a makitkita iti aglawlaw.
Apresiarenyo aya dagiti banag a napipintas? Panunotenyo ti maysa a bullalayaw agraman iti natalinaay, makaay-ayo a panagtutunos dagiti marisna kalpasan ti kinasipnget ti maysa a bagio. Panunotenyo ti maysa a dissuor. Wenno padasenyo ti kasla mangmatmatmat kadagiti an-animal nga agtartaray a kadua dagiti urbonda. Iladawanyo ti maysa a nakaay-ayat a minuyongan dagiti sabong wenno ti aglaplapusanan nga apit ti trigo. Wen, dagitoy ti gagangay a buya iti adu a tao. Ngem aniat’ epektoda kadakayo?
Nalaka a Laglag-anen Laeng
Gagangay, no ad-adda a mapaspasaran ti maysa a banag, daytat’ agbalin nga ad-adda a gagangay laengen—ket daytat’ nalaka nga agbalin a laglag-anen. Daytoy a pagkurkurangan ti kasla ad-adda a nalatak iti napartak panagtigtignayna a maika-20 a siglo. Ngem ti di panangiwaya iti tiempo nga agmennamenna wenno panagbilang kadagiti bendision ken dagiti rason iti panagyaman ti kanayon maysa kadagiti biddut ti imperpekto a sangatauan.
Iti kasumbangirna, ni salmista David, babaen iti paltiing, masansan inyebkasna ti panagyaman iti kanta. Dagitoy a sao a naiturong iti Dios ket maysa kadagiti kanta ni David a kangrunaan a pangarigan ti kinamanagyaman:
“No imutektekak dagiti langlangitmo, ti aramid dagita ramaymo,
Ti bulan ken dagiti bitbituen isuda nga insaadmo,
Ania ti tao tapno sipapanunotka kenkuana,
Ket ti anak ti tao tapno sumarungkarka kenkuana?
Inaramidmo nga adda turayna kadagiti ar-aramid dagita im-imam;
Insaadmo amin a bambanag iti babaen dagiti saksakana:
Amin a karkarnero ken bakbaka,
Wen, ken dagiti an-animal ti away,
Dagiti tumatayab kadagiti tangatang ken dagiti ikan iti taaw,
Uray ania man nga aglasat iti liplippit dagiti taaw.
O Jehova nga Apomi, amangan a nagtan-ok ta naganmo iti amin a daga!—Salmo 8:3, 4, 6-9.
Ti Kinamanagyaman Maparmekna ti Kinaliday
Ti kinamanagyaman ti salmista kadagiti napintas a banag nakatulong a nangtimbeng ti aniaman a liday nga inyeg dagiti di makaay-ayo a makitkita wenno narigat a kasasaad. Uray dakayo mabalin a maaddaan ti isu met laeng a kapadasan. Kasano? Babaen ti panagreggetyo a mangapresiar nga ad-adda pay kadagiti adu a makaay-ayo a bambanag iti aglawlawtayo. Iti daytoy a pamay-an, mapadakkelyo ti ragsakyo ken dagiti adda iti aglawlawyo.
Gapuna apay a diyo palubosan ti inaldaw-aldaw a makitkita a kinapintas ken pagsidsiddaawan a mangtignay ti naimpusoan a panagyaman iti manangipaay a Namarsuatayo? Ita usigen dagiti kanayonan pay a rason iti panagbalin a managyaman.