Nakasaganaka Kadin Kadagiti Problema Kalpasan ti Bautismom?

1-2. Ania dagiti makatulong kadatayo tapno agtalinaedtayo latta a nasinged ken Jehova uray no adda dagiti problema? Mangted iti pagarigan.

NAMNAMAENTAYO nga adda nga adda dagiti problema iti daytoy a lubong ni Satanas. Impakdaar ni Jesus kadagiti pasurotna: “Talaga nga adda dagiti tattao a mangitibkol iti sabsabali.” (Mat. 18:7) Isu a posible nga addanto dagiti tumaud a problema iti relasiontayo kadagiti kakabsat. Masapul ngarud a saganaantayo dagita.

² Panunotem daytoy. Kanayon a maipalpalagip iti ili ni Jehova a saganaantayo dagiti natural a didigra. Kasano? Ammuentayo nga umuna dagiti didigra a posible a mapasamak iti lugartayo. Ad-adda a kasapulan nga aramidentayo dayta lalo no nabiittayo pay iti lugartayo. No ammotayon dagiti didigra a posible a mapasamak, masapulen nga iplanotayo dagiti aramidentayo tapno natalgedtayo. (Prov. 21:5) Kasta met laeng ti aramidentayo kalpasan a nagpabautisartayo. Ammuentayo dagiti problema a posible a tumaud tapno masaganaantayo dagita. Iti kasta, nalaklakatayo a makapagibtur ken agtalinaedtayo latta a nasinged ken Jehova. (Sal. 17:5) Pagsasaritaantayo ti tallo a posible a problema ken no kasanotayo a masaganaan ti tunggal maysa kadagita.a

NO MASAKTAN TI KABSATMO TI RIKNAM

3. Kalpasan a nagpabautisarka, ania ti maysa a problema a posible a tumaud iti kongregasion?

³ Malagipmo pay kadi idi damom ti nakigimong? Baka ti kangrunaan a malagipmo ket ti panagiinnayat dagiti kakabsat. Gapu iti dayta, kombinsidokan a nasarakamon ti pudno a relihion. (Juan 13:35; Col. 3:12) Kasta ti narikna ni Blanca.b Nupay kasta, di nagbayag kalpasan a nagpabautisar, adda napasamak a dina ninamnama. Imbagana: “Adda sister a saan a nasayaat ti panangtratona kaniak. Negatibo pay ketdi ti ibagbagana maipapan kadagiti kakongregasionmi. Nakigtotak! Ngamin, nasursurok nga ikagkagumaan dagiti Saksi ni Jehova ti agbalin a mannakikappia ken naayat.” Agpayso nga ar-aramiden dagiti kapammatiam ti amin a kabaelanda tapno matuladda dagiti kualidad ni Jehova. Ngem laglagipem koma nga imperpektoda. (Efe. 4:​23, 24; 1 Juan 1:8) Gapu iti dayta, mabalin nga addanto latta maibaga wenno maaramidda a mangsair iti riknam. (Sant. 3:8) Makapaladingit ta gapu kadagita a problema, simmardeng ti dadduma nga agserbi ken Jehova.

4. Ania ti makatulong tapno makapagsaganatayo no bilang ta masaktannatayo dagiti kapammatiantayo? (Efeso 4:32)

⁴ Ania ti aramidem itan tapno makapagsaganaka no bilang ta masaktannakanto ti kapammatiam? Iruammo nga iyaplikar ti balakad ti Efeso 4:32. (Basaen.) No aramidem ti amin a kabaelam nga agtalinaed a naimbag ken mannakipagrikna iti sabsabali, sigurado a maliklikam dagiti di panagkikinnaawatan. No adda met maibaga wenno maaramid ti kabsatmo a pakasaktam, dagus a pakawanem. Ania ti makatulong tapno maaramidmo dayta? Panunotem no kasano kasansan nga agkidkiddawka ken Jehova iti pammakawanna ken no kasano kasansan a pakpakawanennaka. (Mat. 6:12) No kanayon a laglagipem a namin-adun a pinakawannaka ni Jehova, nalaklakam met a pakawanen ti sabsabali.

5. Ania a prinsipio ti Biblia ti makatulong kadatayo no adda nangsair iti riknatayo? (Proverbio 19:11) (Kitaen met dagiti ladawan.)

⁵ Basaen ti Proverbio 19:11. Ibaga ti Biblia a no masair ti riknatayo, ti pannakatarusc ti mangpabannayat iti pungtottayo. Dayta ti nakatulong ken Rima a sumagmamano pay la a tawen a nabautisaran. Kunana: “No saanko a nagustuan ti imbaga wenno inaramid dagiti kakabsat, lagipek no kua ti Proverbio 19:11. Ikabilangak ti kasasaad ti biagda ken ti napalabasda. Sa ikagumaak a panunoten no apay a kasta ti imbaga wenno inaramidda. Aw-awisek met ida a makikadua kaniak a mangasaba. Gapu iti dayta, mas am-ammok idan.” Nagsayaat dayta a balakad. Am-ammuem ngarud itan dagiti kakabsat. No ad-adda a maawatam ida, nalaklakamto ida a pakawanen no bilang ta masairda ti riknam.

6. Ania ti makatulong tapno nasayaat ti relasiontayo kadagiti kakongregasiontayo?

⁶ Ania ti mabalinmo nga aramiden tapno nasayaat ti relasionmo kadagiti kakongregasionmo? Bayat nga am-ammuem dagiti kakabsat, ti koma mas pagpokusam ket dagiti nasayaat a kababalinda. (Idilig ti Proverbio 10:12; Roma 12:10; Fil. 2:​2, 3) Kitaem ti nakatulong iti kababautisar a brother a ni Mark. Bayat nga ad-adun ti tiempona a makikadua kadagiti kakongregasionna, nakitana met ti dadduma nga ugalida a dina magustuan. Ania ti nakatulong ken Mark tapno saan a maitibkol ken maupay? Imbagana: “Naamirisko a nakabasbassit la gayam dagiti pagkamkamalian dagiti kakabsat no ikomparak kadagiti agkakadakes nga ar-aramiden dagiti tattao iti lubong. Determinadoak itan a saan a dagiti pagkamkamalian dagiti kapammatiak ti pagpokusak, no di ket dagiti nagsayaat a kababalinda.” No kasta met ti aramidem, matagiragsakmo ti nasayaat a relasion kadagiti kakongregasionmo.

NO KAILIWMO DAGITI INSAKRIPISIOM

7. Apay a kailiwtayo no dadduma dagiti insakripisiotayo?

⁷ Idi nagbalinkan a Saksi ni Jehova, sigurado a nakaragragsakka ta saankan a paset ti dakes a lubong ni Satanas. Baka naibagam iti bagim, ‘Diak kayaten a sublian dayta!’ Ngem no adda narigat a situasion, baka malagipmo—ken kailiwmo pay ketdi—ti dadduma nga insakripisiom wenno tinallikudam tapno laeng makapagserbika ken Jehova. (Idilig ti Numeros 11:​4-6.) Kas pagarigan, nagdesision ti dadduma a kakabsat nga umikkatdan iti napintas a trabahoda a mangibus iti tiempoda. Baka dadduma ti addaan met idi kadagiti nasinged a gagayyem. Ngem idi nangrugidan nga agadal iti Biblia, pinanawan idan dagita a gagayyemda. Adda met dagidiay nangisardeng kadagiti magusgustuanda a bisio ta naammuanda a kagura dagita ni Jehova. Anian a makapaladingit no umadayo ti maysa a Kristiano ken Jehova gapu ta sinublianna dagiti tinallikudannan! Ania ti mabalinmo nga aramiden itan tapno saan a pulos a mapasamak dayta kenka?

8. Ania ti masursurotayo iti ulidan da Abraham ken Sara?

⁸ Iti Biblia, adu ti mabasatayo a matalek a lallaki ken babbai a mabalin a kailiwda met idi dagiti tinallikudanda. Kas pagarigan, pinanawan da Abraham ken Sara ti napintas a siudad ti Ur sa nagnaedda kadagiti tolda. Inaramidda dayta gapu ta nagtulnogda ken Jehova. (Heb. 11:​8, 9) Siempre, posible nga adda met idi dagiti tiempo a malaglagipda ti nanam-ay a biagda idiay Ur. Ngem “no kanayon a pinampanunotda” dayta, baka nagsublida koma sadiay. Ngem saanda nga inaramid dayta. Nagpokusda ketdi kadagiti inkari ni Jehova.—Heb. 11:​15, 16.

9. Ania ti nangibilangan ni apostol Pablo kadagiti bambanag a tinallikudanna? (Filipos 3:​7, 8, 13)

⁹ Dakkel ti binalbaliwan ni apostol Pablo iti biagna tapno makapagserbi ken Jehova iti umiso a pamay-an. Sakbay a nagbalin a Kristiano, inadalna ti Linteg dagiti Judio babaen ti panangisuro ti mabigbigbig a ni Gamaliel. (Ara. 22:3) Posible nga agbalin idin ni Pablo a nakapromprominente a lider ti relihion dagiti Judio. (Gal. 1:​13, 14) Ngem idi inawatna ti naimbag a damag maipapan ken Kristo, tinallikudanna amin dagita. Kanayon kadi a nalaka ti biagna kas Kristiano? Saan. Apay? Nakabkabil, naibalud, ken ginura dagiti mismo a kailianna. (2 Cor. 11:​23-26) No dagita la a rigat ti pinampanunotna, sa inkomparana dagita iti nanam-ay idi a biagna sakbay a nagbalin a Kristiano, baka napanunotna a saan la koman a nagbalin a pasurot ni Jesus. Ngem nagpokus ni Pablo iti nagsayaat a pribilehiona nga agbalin a pasurot ni Kristo Jesus ken pannakipagturaynanto kenkuana. Kombinsido ni Pablo nga adayo a nasaysayaat dagiti bendision ngem iti aniaman nga insakripisiona!—Basaen ti Filipos 3:​7, 8, 13.

10. Ania koma ti kanayon a pampanunotentayo? (Marcos 10:​29, 30) (Kitaen met dagiti ladawan.)

¹⁰ Ania ti masursurotayo? No mangrugin a mapanunotmo dagiti insakripisiom wenno tinallikudam tapno agbalinka a Kristiano, siguraduem a panunotem met koma no apay nga insakripisiom dagita. (Ecl. 7:10) Ikomparam dagiti tinallikudam kadagiti bendision a matagtagiragsakmo itan gapu ta agserserbika ken Jehova. Kas pagarigan, nasinged a gayyemmo ti Kangatuan iti uniberso. (Prov. 3:32) Adu ti kakabsatmo iti kongregasion ken iti intero a lubong a mangay-ayat unay kenka. (Basaen ti Marcos 10:​29, 30.) Malaksid iti dayta, agur-uray kenka ti nagsayaat a masakbayan nga inkari ni Jehova! (Isa. 65:​21-23) No dagita ti kanayon a pampanunotem, saanmonto unayen a mapanunot wenno kailiw dagiti tinallikudam wenno insakripisiom.

11. Ania ti masursurotayo ken Rosemary?

¹¹ Nabautisaran ni Rosemary idi agarup 50 ti tawenna. Ania ti nakatulong kenkuana tapno dina kailiw dagiti tinallikudanna? Imbagana: “Idi damo, nalidayak kada dumteng ti Christmas. Ngamin, kanayon a nakaragragsakkami no kua nga agkakadua a sangapamiliaan. Kaykayatko met a regaluan dagiti ay-ayatek. Maragragsakanak idi no makitkitak dagiti annakko ken appokok iti aglawlaw ti Christmas tree ken nakaragragsakda a mangluklukat kadagiti regaloda.” Ania ti nakatulong ken Rosemary? Imbagana: “Nangpanunotak iti sabali a petsa kada tawen nga agkakaduakami a sangapamiliaan. Awisek ida, regaluak ida, ken ibagak ti rason no apay nga ay-ayatek ti tunggal maysa kadakuada.” Ngem adda pay sabali a problema ni Rosemary. Intuloyna: “Idi nabautisaranakon, pinanawandak metten dagiti saan a Saksi a gagayyemko. No dadduma, nalidayak ta mailiwak kadakuada.”d Ania ti nakatulong kenkuana? Nangawis iti agduduma a sister a kaduana a mangasaba. Imbagana: “Gapu iti dayta, naam-ammok a naimbag dagiti sister isu a nagbalinkamin a nasinged nga aggagayyem. Ita, adun ti baro a gagayyemko nga ay-ayatek ken ipatpategko unay.” Ania ti nasursurom ken Rosemary? Baka kailiwmo met dagiti mangparparagsak idi kenka sakbay a nagbalinka a Saksi ni Jehova. Ngem mangpanunotka kadagiti isukatmo kadagita. Makitamto nga adayo a nasaysayaat dagita ken pudpudno a mangparagsak kenka. (Fil. 4:​8, 9) Ken laglagipem koma daytoy: No agserbika ken Jehova, kanayon nga ad-adu ti magun-odmo ngem iti mapukawmo.

NO SAANEN A KAYAT TI MAYSA TI AGSERBI KEN JEHOVA

12. Ania a pasamak iti kongregasion ti posible a nagrigat nga akseptaren?

¹² Idi nagbalinkan a Saksi ni Jehova, sigurado a nabang-aranka ta nakapanawkan iti nagdakes a lubong. Nakastrekkan iti kakaisuna nga organisasion a mangisursuro iti kinapudno ken mangikagkagumaan a mangaramid iti umiso. (Isa. 65:14) Ngem baka dumtengto ti tiempo a madamagmo nga adda nakaaramid iti nadagsen a basol iti kongregasion. Baka adda pay ketdi naikkat iti kongregasion. (1 Cor. 5:13) Ania ti epekto iti sister a ni Samar idi adda kasta a napasamak? Imbagana: “Idi nabiitak pay la a nabautisaran, nakaaramid ti maysa a panglakayen iti nakaro a basol isu a naikkat iti kongregasion. Dandaniak naitibkol. Diak man la impagarup a ti maysa a panglakayen ket makabasol ken Jehova ken iti kongregasion.” Siempre, masapul nga agtalektayo a dagiti kapammatiantayo ket ay-ayatenda unay ni Jehova, ken kayatda ti agbalin a matalek kenkuana. (1 Cor. 13:​4, 7) Ngem makapaladingit ta kada tawen, adda sumagmamano a maikkat iti kongregasion. Baka narigrigat nga akseptaren dayta lalo no ti naikkat ket gayyemmo, kapamiliam, wenno maysa a resrespetuem.

13. Ania ti aramidentayo tapno uray no adda ay-ayatentayo a mangpanaw ken Jehova, agtultuloytayo latta nga agserbi?

¹³ Ania ti makatulong tapno uray adda ay-ayatem a mangpanaw ken Jehova, agtultuloyka latta nga agserbi? Itultuloymo a pabilgen ti pannakigayyemmo ken Jehova. (Sant. 4:8) Laglagipem a sika a mismo ti nagdesision nga agserbi kenkuana, aniaman ti ar-aramiden ti dadduma. Isu nga uray no masansan nga agkarkararag ken ad-adalentayo ti Biblia a kadua ti pamilia ken ti kongregasion, masapul latta nga adda bukodtayo nga eskediul nga agkararag ken agbasa iti Biblia.—Sal. 1:2; 62:8.

14. Ania ti masursurotayo iti ulidan ni apostol Pedro? (Juan 6:​66-68)

¹⁴ Adda pay sabali a masursurotayo iti inaramid ni apostol Pedro idi simmardeng ti adu nga adalan a sumurot ken Jesus. Posible a saan met idi a naawatan ni Pedro ti imbaga ni Jesus. Ngem kitaentayo ti imbagana iti Juan 6:​66-68. (Basaen.) Imbes a tuladenna ti inaramid dagiti tattao, ad-adda a pinanunotna ti kinapudno nga insuro kenkuana ni Jesus. Kas resultana, saan a naitibkol ni Pedro. Iti umasping a pamay-an, uray no agsardeng ti dadduma nga agserbi ken Jehova, laglagipem a daytoy ti kakaisuna nga organisasion a mangisursuro iti kinapudno maipapan kenkuana. Itultuloymo nga ipateg dagiti nagsayaat a nasursurom ken agtalinaedka a matalek ken Jehova! Imbaga ni Samar a nadakamaten: “Kanayon a tantandaanak a saan a gapu ta adda maysa a nakaaramid iti basol, kasta metten ti amin a kakabsat iti kongregasion wenno iti organisasion. Ken uray aniaman a kinadakes ti ar-aramiden ti dadduma, saan a pulos konsintiren ken anamongan dagita ni Jehova.”

15. Ania ti nasursurom iti kapadasan ni Emily?

¹⁵ Kitaentayo daytoy a kapadasan. Makalawas laeng kalpasan a nabautisaran ni Emily, naikkat ni nanangna iti kongregasion sa pinanawanna ida a sangapamiliaan. Imbaga ni Emily: “Diak man la pulos ninamnama a mapasamak dayta. Dayta pay laeng ti karirigatan a napasamak kaniak. Mail-iliwak met unayen ken Nanang.” Ania ti nakatulong ken Emily? Imbagana: “Ammok a diak agmaymaysa. Ay-ayatennak unay ni Tatang ken ay-aywanannak a naimbag. Adda met dagiti kakongregasionmi a mangibilbilang kadakami kas kapamiliada. Adda amin problematayo isu a masapul nga ayatentayo dagiti kapammatiantayo ken agpipinnaregtatayo.” (1 Ped. 5:9) Ngem saanen a kasapulan nga urayem pay nga adda mapasamak a problema sakbay a patibkerem ti relasionmo kadagiti kakabsat. Itultuloymo nga aramiden dayta. Iti kasta, anianto man ti mapasamak, saanmo a marikna nga agmaymaysa wenno kakaasika.

16. Ania ti masapul a laglagipentayo? (Kitaen met ti ladawan.)

¹⁶ Laglagipem met koma a disiplinaen ni Jehova dagidiay ay-ayatenna. (Heb. 12:6) Kayatna nga agsubli kenkuana ti amin a naikkat iti kongregasion. (2 Ped. 3:9) Isu a no adda ipatpategmo a naikkat, makapagtalekka nga ar-aramiden dagiti panglakayen ti amin a kabaelanda a tumulong kenkuana nga agsubli ken Jehova.—2 Tim. 2:​24, 25.

17. Ania ti masiguradotayo?

¹⁷ Napagsasaritaantayon ti sumagmamano laeng a problema a mabalin a pakaipasanguam kalpasan ti bautismom. Agpayso a dadduma kadagita ket adda rigrigatna. Ngem awan ti rumbeng a pagbutngam. Adu ti maaramidam tapno makapagsaganaka. Dimo met koma liplipatan a kanayon a nakasagana a tumulong kenka ti Mannakabalin-amin a Dios: Ni Jehova. Tultulongannakan sipud pay idi ken kayatnaka a tulongan iti agnanayon! (1 Ped. 5:10) Kanayon a pabilgen ken tulongannaka nga agibtur tapno makayam ti aniaman a pakasuotan. No itultuloymo nga awaten ti tulong ni Jehova, awan ti problema a makaisina kenka kenkuana!—Sal. 119:165; Roma 8:​38, 39.