Agporsegika nga Agpabautisar

1. (a) Ania ti dadduma a bendision no agpabautisarka? (b) Ania ti pagsasaritaantayo iti daytoy nga artikulo?

INDEDIKARMO kadin ti biagmo ken Jehova ken nagpabautisarkan kas simbolo ti dedikasionmo? No wen, nagkiddawkan iti Dios iti nasayaat a konsiensia. (1 Ped. 3:21) Sipud ngarud idi nabautisarankan, nangipakitakan iti nasayaat nga ulidan kadagiti agtutubo ken kabbaro a saan pay a nabautisaran iti kongregasionyo. Dayta pay laeng ti kasayaatan a desision nga inaramidmo! Ngem kasanon no saanka pay a nabautisaran? Ay-ayatem met ketdin ni Jehova ken kayatmo nga aramiden ti pagayatanna. Ammom a nakapatpateg ti panagpabautisarmo tapno mapakawan dagiti basolmo ken agbalinka a nasinged a gayyem ni Jehova. (Ara. 2:​38-40) Ngem baka agpangaduaka latta. Ania ti makatulong kenka? Iti daytoy nga artikulo, pagsasaritaantayo (1) no apay nga agpangadua ti dadduma nga agpabautisar, (2) no apay a napateg a laglagipentayo nga asidegen ti panungpalan, ken (3) no ania dagiti bendision a masagrapmo no agporsegika ken dimo itantan ti agpabautisar.

NO APAY A SAAN PAY A NAGPABAUTISAR TI DADDUMA

2. Apay a saan pay a nagpabautisar ti dadduma?

² Saan pay a nagpabautisar ti dadduma gapu iti buteng. Kas pagarigan, kayat ti dadduma ti agserbi ken Jehova ngem mabutengda baka saandanto met laeng a maparagsak isuna. No kasta ti marikriknam, makatulong no basaem dagiti bersikulo ti Biblia tapno makitam a saan a namnamaen ni Jehova nga agbalinka a perpekto. Maparagsakmo isuna basta ar-aramidem ti kasayaatam para kenkuana. (Sal. 103:​13, 14; Col. 3:23) No mabutengka amangan no addanto mangbusor kenka, kiddawem ken Jehova a mariknam met koma ti narikna idi ti salmista. Insuratna: “Adda ni Jehova iti abayko; saanakto nga agbuteng. Ania ti maaramidan kaniak ti tao?”—Sal. 118:6.

3. Ania pay ti mabalin a manglapped iti dadduma nga agpabautisar? (Kitaen met ti ladawan.)

³ Itantan ti dadduma a mangay-ayat ken Jehova ti agpabautisar gapu ta pampanunotenda a kurang pay ti pannakaammoda. Ngem kasano ngamin aya kaadu ti masapul nga ammom? Kitaentayo ti maysa a pagarigan iti Biblia. Maysa a rabii, pinagginggined ni Jehova ti pagbaludan nga ayan da apostol Pablo ken Silas isu a nawayawayaanda. Gapu iti dayta, naaddaanda iti gundaway a mangasaba iti guardia ken iti sangakabbalayanna. Naamiris ti lalaki ken ti pamiliana a ti Dios ti nangaramid iti dayta a milagro. Kasta met, adda dagiti nagpapateg a nasursuroda maipapan kada Jehova ken Jesus iti dayta a rabii. Immanayen dagita a naammuanda isu a ‘dagus a nagpabautisarda.’ (Ara. 16:​25-33) No am-ammomon ni Jehova, ay-ayatemon isuna iti amin a pusom, naawatamon dagiti kangrunaan a pannursuro ti Biblia, nagbabawyam metten dagiti basolmo, ken determinadokan a kanayon nga agtulnog kadagiti pagalagadanna, mabalinmon ti agpabautisar.—Mar. 12:30.

4. Ania dagiti pakaseknan unay ti dadduma isu a saanda pay a nagpabautisar? (Kitaen met ti ladawan.)

⁴ Kayat met ketdi ti dadduma nga agbalbaliw tapno maparagsakda ti Dios ken tapno mabautisaranda. Ngem marigatanda a mangaramid iti dayta ta adda dagiti masapul nga isakripisioda. Siempre, masapul a panunotem a naimbag dagiti epektonto iti biagmo ti aniaman a desisionmo. (Luc. 14:​27-30) Madanagan met ti dadduma ta adda dagiti masapul nga isardengda nga aramiden tapno makapagserbida iti Dios. Kasta idi ti narikna ni Candace. Idi ubing pay, naisuro kenkuana dagiti masapul nga aramidenna tapno maparagsakna ni Jehova. Ngem dina inyaplikar dagita. Idi adulton, nagpayadal manen iti Biblia. Imbagana: “Ammok dagiti masapul idi nga aramidek para ken Jehova. Ngem marigatanak a mangaramid kadagita ta magusgustuak idi ti biag ti lubong. Nagrigat ti agbalbaliw.” Adda met dagiti madanagan ta baka saandanto met laeng a masurot dagiti nangato a pagalagadan ti Dios inton bautisadodan. Maamakda pay ketdi amangan no kalpasan ti bautismoda, makaaramidda iti nadagsen a basol ket maikkatda iti kongregasion. No kasta met ti marikriknam isu a saanka pay a nagpabautisar, ania ti makatulong kenka?

5. Ania koma ti ad-adda a panunotem no marigatanka pay laeng nga agdesision nga agpabautisar? (Mateo 13:​44-46)

⁵ No adda kayattayo a gatangen, saantayo laeng a kitaen ti presiona no di ket panunotentayo pay ti pategna. No makitatayo nga adunto ti pangusarantayo, gatangentayo a dagus dayta uray nangina. Iti umasping a pamay-an, no marigatantayo nga agdesision nga agpabautisar, saantayo la koma a panunoten no kasano karigat dagiti panagbalbaliw nga aramidentayo. Imbes ketdi, ti ad-adda a panunotentayo ket no kasanonto kasayaat ti biagtayo no addaantayon iti nasinged a relasion ken Jehova. Nangusar ni Jesus iti dua nga ilustrasion tapno isurona dayta a punto. (Basaen ti Mateo 13:​44-46.) Iti tunggal ilustrasion, naragsakan ti lalaki a nangilako iti amin nga adda kenkuana tapno magatangna ti nakapatpateg a banag a nabirokanna. Nabirokam metten ti nakapatpateg a banag—ti kinapudno maipapan iti Pagarian. Isu a no pampanunotem no sulit met laeng dagiti aramidem a panagbalbaliw tapno makapagbautisarka, panunotem a naimbag dagiti ilustrasion nga imbaga ni Jesus. Mabalinmo nga isaludsod iti bagim: ‘Talaga kadi a kombinsidoak a nakapatpateg ti nabirokak? Ipatpategko kadi unay ti pannakigayyemko ken Jehova, ti namnama nga agbiag nga agnanayon, ken ti nakaay-ayat a pamilia nga intedna kaniak?’ Makatulong ti sungbatmo kadagita a saludsod tapno makitam dagiti masapul nga aramidem tapno makapagdesisionka nga agpabautisar.

6. Kasanotayo a maaddaan iti nasayaat a kasasaad ti puso?

⁶ Iti ilustrasion ni Jesus maipapan iti agmulmula, imbagana ti agduduma a kasasaad ti puso a mabalin a manglapped iti maysa a mangyaplikar kadagiti nasursurona iti Biblia. Ngem imbaga met ni Jesus a ti dadduma ket “addaan iti napasnek ken nasayaat a puso” a mayat a mangyaplikar kadagiti nasursuroda. (Luc. 8:​5-15) Isu a no madanaganka a baka saanmonto a mayaplikar dagiti nasursurom, dika sumuksuko. Tulongannaka ti Dios a ‘mangpataud iti baro a puso,’ tapno makapagtulnogka kenkuana. Ikararagmo ken Jehova nga ikkannaka iti puso a nalaka nga agpaiwanwan kenkuana tapno mayaplikarmo dagiti nasursurom iti Biblia.—Ezek. 18:31; 36:26.

7-8. Apay a saan pay a nagpabautisar ti dadduma nga agtutubo? (Kitaen met ti ladawan.)

⁷ Gapu iti impluensia ti dadduma, saan pay a nagpabautisar ti dadduma nga agtutubo uray no ay-ayatendan ni Jehova. Kas pagarigan, mabalin nga ibalakad ti dadduma a titser kadagiti estudianteda nga “akseptarenda dagiti aramid wenno ugali” a maikontra kadagiti pagalagadan ti Dios iti moral. No denggem dagiti kasta a balakad, sigurado nga agproblemakanto laeng iti nakaro. (Sal. 1:​1, 2; Prov. 7:​1-5) Maliklikam dayta no tuladem ti ulidan ti salmista idi imbagana ken Jehova: “Naun-uneg ti pannakaawatko ngem iti amin a mannursurok, gapu ta pampanunotek a naimbag dagiti pammalagipmo.”—Sal. 119:99.

⁸ Ipakita dagiti report a laplapdan ti dadduma a Saksi a nagannak dagiti annakda nga agpabautisar. Ngamin, sobra ti panangiparegta dagiti nagannak kadagiti annakda a makaturposda iti panageskuelada tapno napintasto ti trabahoda. Wenno baka malipatanda payen nga iparegta kadagiti annakda dagiti naespirituan a kalat a mangpasinged kadakuada ken Jehova. Ania ti aramidem no mariknam a saan unay nga iparparegta kenka dagiti nagannakmo nga agpabautisarkan? Ibagam a mismo kadakuada a kayatmon ti agpabautisar. Masiguradom nga uray no ubingka pay laeng, posiblen nga agbalinka a nasinged a gayyem ni Jehova.—Prov. 20:11.

9. Apay nga itantan ti dadduma ti agpabautisar?

⁹ Itantan ti dadduma ti agpabautisar uray no kualipikadoda metten a mabautisaran. Apay? Baka ngamin kayatda nga addanto kagiddanda nga agpabautisar. Kas pagarigan, kayatda a kagiddandanto nga agpabautisar ti maysa a gayyem wenno kapamiliada. Siempre, mabalinmo latta met a kagiddan nga agpabautisar dagiti ipatpategmo. Ngem dayta la kadi ti rason tapno itantanmo ti agpabautisar? Laglagipem nga idi nagdedikarka, sika a mismo ti nagkari ken Jehova. Saan koma ngarud a nakadepende iti siasinoman a tao ti panagpabautisarmo.—Roma 14:12.

NO APAY A NAPATEG A LAGLAGIPENTAYO NGA ASIDEGEN TI PANUNGPALAN

10. Ania pay ti mabalin a rason nga itantan ti dadduma ti agpabautisar?

¹⁰ Malaksid kadagiti rason a napagsasaritaantayon, baka itantan ti dadduma ti agpabautisar gapu ta pampanunotenda a mabayag pay ti panungpalan. Ngem umiso kadi dayta a panagrasrason? Impakdaar ni Jesus kadagiti adalanna: ‘Masapul a kanayon a nakasaganakayo, ta umay ti Anak ti tao iti oras a saanyo nga ipagarup.’—Luc. 12:40.

11. Bayat a mas maam-ammotayo ni Jehova, ania ti ad-adda a kayattayo nga aramiden, ken apay? (Salmo 119:60)

¹¹ Apay a nagdedikartayo ken Jehova ken nagpabautisartayo? Gapu ta ay-ayatentayo isuna ken kayattayo ti agtulnog kadagiti bilinna. Bayat a mas maam-ammotayo ti naayat a Diostayo, ad-adda met a kayattayo nga ipateg dagiti bilinna ken agtulnog a dagus kadagita. (Basaen ti Salmo 119:60.) Adda sabali pay a rason dinakamat ni adalan a Santiago no apay a nakapatpateg a dagus nga agtulnogtayo kadagiti bilin ni Jehova: Awan kadatayo ti makaammo no anianto ti biagtayo inton bigat. Ditay ammo, baka daytoyen ti maudi nga aldawtayo nga “agaramid iti umiso.” Isu a masapul nga aramidentayo itan dagiti kayat ni Jehova nga aramidentayo.—Sant. 4:​13-17.

12. Ania ti masursurotayo iti ilustrasion ni Jesus maipapan iti kaubasan?

¹² Kitaentayo ti ilustrasion ni Jesus maipapan iti kaubasan. Saan kadi nga insurona nga agpada laeng ti tangdan dagidiay nagtrabaho iti maysa laeng nga oras ken dagidiay nagtrabaho iti nagmalmalem? Ngem ania ti rason no apay a naladaw dagidiay nagtrabaho iti maysa la nga oras? Imbagada: “Awan met ngamin ti nangayab kadakami nga agtrabaho.” Saan met ketdi a nasadut dagidiay a trabahador. Kayatda met koma ti agmalmalem nga agtrabaho. Awan la ngamin ti nangayab kadakuada. Ngem idi adda nangayab kadakuadan, napanda a dagus. (Mat. 20:​1-16) Ita, inayabannatayo ni Jesus nga agbalin a adalanna ken tumulong iti trabaho a panangasaba maipapan iti Pagarian. Masapul a patgantayo a dagus ti awisna apaman a mangngegtayo dayta.

13. Ania ti masursurotayo iti asawa ni Lot?

¹³ Itantantan ti dadduma ti mangaramid kadagiti panagbalbaliw tapno makapagserbida ken Jehova gapu ta pampanunotenda a nalaklakadanto a maaramid dayta sakbay la unay ti panungpalan. Ngem no ibaybayagmo ti agtignay, lallalo a marigatankanton nga agserbi ken Jehova. Ammo dayta ni Jesus isu a pinakdaaranna dagiti adalanna: “Laglagipenyo ti asawa ni Lot.” (Luc. 17:​31-35) Ammo idi ti asawa ni Lot nga asidegen a dadaelen ni Jehova ti Sodoma ken Gomorra. Ngem masayangan kadagiti sanikua nga imbatina. (Gen. 19:​23-26) Ania ti ipalagip kadatayo dayta a pasamak? Saan nga agnanayon a nakalukat ti ridaw ti pannakaisalakan. Iti inkeddeng ti Dios nga oras, maiserra dayta a ridaw ken permanenten a makandaduan.—Luc. 13:​24, 25.

14. Ania koma ti epekto kenka dagiti padto ti Biblia maipapan iti panungpalan?

¹⁴ Ipakita dagiti pasamak iti daytoy a lubong a matungtungpalen dagiti padto ti Biblia maipapan iti panungpalan daytoy a sistema. Mabalin a saan a mapaspasamak dagita a padto iti lugaryo. Ngem gapu ta makitkitamon a mapaspasamak dagita iti agduduma a paset ti lubong, lallalo koma nga aramidem ti amin tapno mabautisaranka iti kabiitan a tiempo. Kitaentayo ti napasamak idi umuna a siglo. Imparegta ni apostol Pedro kadagiti Kristiano nga agbalinda nga “alerto,” wenno “siririing,” ta “asidegen ti panungpalan ti amin a banag.” (1 Ped. 4:7; ftn.) Iti daytoy a bersikulo, “ti panungpalan” ket nalawag a tumukoy iti pannakadadael idi ti Jerusalem ken ti templona. Adayo ti Jerusalem iti paggigianan dagiti sinuratan ni apostol Pedro isu a saanda a direkta a naapektaran iti pannakadadael dayta a siudad. (1 Ped. 1:1) Nupay kasta, idi nakitada ti kaitungpalan dayta a padto, bimmileg ti panagtalekda a tungpalento ni Jehova ti amin a karina. Kasta met laeng ita. Gapu ta makitkitam a matungtungpalen dagiti padto maipapan iti panungpalan, lallalo met koma nga agporsegika a mangaramid iti amin tapno mabautisarankan.

15. Ania koma ti mariknatayo gapu ta asidegen ti aldaw ni Jehova? (2 Pedro 3:​10-13)

¹⁵ Iti maikadua a surat ni Pedro, inlawlawagna no ania ti masapul a mariknatayo gapu ta asidegen ti aldaw ti panangukom ni Jehova. Para kadagiti Kristiano idi umuna a siglo, nakabaybayag pay a mapasamak dayta nga aldaw. Ngem inyunay-unay ni Pedro a ‘laglagipenda’ wenno ‘tarigagayanda’ dayta nga aldaw. (Basaen ti 2 Pedro 3:​10-13; ftn.) Maipakitatayo met a silalagiptayo iti dayta nga aldaw no kanayon a nakasaganatayo ken magagarantayo nga umay koman dayta. Ipakpakitayo met a magagarantayo no ‘nasantuan dagiti kababalintayo ken ipakitatayo kadagiti aramidtayo ti debosiontayo iti Dios.’ Maragsakan la ketdi ni Jehova no ipakpakitam kadagiti ‘aramidmo ti debosionmo kenkuana’! Ngem lallalo manen a maragsakan no idedikarmo ti biagmo kenkuana ken agpabautisarka.

DAGITI BENDISION NO AGPABAUTISARKA ITAN

16. Kaano ti kasayaatan nga agdesisionka nga agpabautisar? (2 Corinto 6:​1, 2) (Kitaen met ti ladawan.)

¹⁶ Itan ti kasayaatan a tiempo nga agdesisionka nga agpabautisar. (Basaen ti 2 Corinto 6:​1, 2.) Nabigbig ti eunuko nga Etiope a naam-ammo ni Felipe a masapul nga agpabautisaren a dagus. Idi naawatanna ti naimbag a damag ken nakakita iti danum a pagbautisaranna, dina imbaga iti bagina: ‘Adu pay ti masapul a sursuruek. Sabagay, adda pay met siguro sabali a danum a malabsanmi.’ Ngem awan ti mabasatayo a kasta. Imbes ketdi, insaludsodna ken Felipe, “Ania ti makalapped kaniak a mabautisaran?” (Ara. 8:​26, 27, 35-39) Nagsayaat a tuladen ti eunuko! Idi nabautisaranen, “nakaragragsak a nagtultuloy iti dalanna.”

17. Ania ti masiguradotayo?

¹⁷ No saanka pay a nakapagdesision nga agpabautisar, masiguradom a kayatnaka a tulongan ni Jehova nga agbalin a nasinged a gayyemna. (Roma 2:4) Matulongannaka no mabutengka, no marigatanka, wenno uray no awan ti mangparparegta kenka nga agpabautisar. No nabautisarankan, perminto ti ragsakmo ta ammom a maparparagsakmo ni Jehova. Ibilangmonto pay ketdin nga awan serserbi ‘dagiti bambanag iti likudam.’ (Fil. 3:​8, 13) Padpadaanamton ‘dagiti bambanag iti sanguanam.’ Kayatna a sawen, ti kaitungpalan dagiti kari ni Jehova para kadagidiay nangidedikar iti biagda kenkuana ken nagpabautisar.—Ara. 3:19.