Kasanom a Mayun-una ni Jehova iti Biagmo?

1-2. Kaano nga agbalinen a pakasingaan ti maysa a napateg a banag?

IMADYINEM nga agmanmanehoka. Idi kuan, adda timmawag. Baka pampanunotem a kasapulanna ti tulongmo. Ngem iti dayta a kanito, ania ti napatpateg: ti tawag wenno ti panag-drive-mo? Siempre, napateg dayta a tawag. Ngem iti dayta a gundaway, baka daytan ti mangistorbo wenno mangsinga iti panag-drive-mo.

² Adu ti napateg nga ar-aramidentayo iti inaldaw. Ngem ammotayo a ti kapatgan ket ti panangyun-una kadagiti naespirituan a bambanag.a (Mat. 6:33) Datayo nga agserserbi ken Jehova ket kas iti naannad a drayber. Ikagkagumaantayo nga ilasin dagiti mabalin a mangsinga kadatayo nga agpokus iti dalan iti sanguanantayo, kayatna a sawen, ti panagserbitayo ken Jehova.—Prov. 4:25; Mat. 6:22.

3. Kasano a makatulong kadatayo daytoy nga artikulo?

³ Kayattayo amin nga iyun-una dagiti naespirituan a banag iti biagtayo. Ngem ti realidad, nagadu ti mabalin a mangsinga wenno mangagaw iti atensiontayo. (Luc. 21:​34-36) Makatulong daytoy nga artikulo tapno mayun-unatayo dagiti naespirituan a banag iti biagtayo. Tumulong met daytoy tapno makitatayo (1) dagiti mabalin a mangsinga kadatayo, (2) dagiti inaramid ni Jesus tapno saan a masinga, ken (3) dagiti aramidentayo tapno saantayo a masinga.

DAGITI MABALIN A MANGSINGA KADATAYO

4-6. Ania dagiti banag a naglaka a mangsinga kadatayo?

⁴ Nagadu ti masapul nga asikasuentayo iti personal a biagtayo, kas ti salun-attayo, pamiliatayo, ken ti mismo a bagitayo. Siempre, napateg amin dagita ken talaga a masapul nga asikasuentayo. Ngem mabalin kadi met a dagita ti mangsinga kadatayo? Posible. No dagitan ti sangkapanunottayo ken mangibusen iti amin a tiempo ken pigsatayo.

⁵ Adu met kadatayo ti apektado iti gulo iti politika, rumigrigat a panagbiag, agwarwaras a sakit, ken dadduma pay a kinaranggas a pagilasinan nga agbibiagtayon iti maudi nga al-aldaw. (2 Tim. 3:1) Gapu kadagita, mabalin a madanagantayo unay no dadduma isu a posible a dagita laengen ti sangkapanunottayo.

⁶ Baka adda am-ammom nga interamente a nagbaliw ti biagda gapu kadagita a pasamak. Siempre, normal laeng a permi a ma-stress-da gapu kadagita a napadasanda. Saan ngamin a dinisenio ni Jehova dagiti tattao nga agrigat ken kanayon a madanagan. Isu a no maipasango ti dadduma kadagiti nakarigrigat a situasion, mabalin a mariknada a kasla napaidamanda iti normal a biag. Isu nga adda dagiti makitkitatayo a tattao a mangib-ibus iti tiempoda iti panagragragsak tapno kano marelaksda. Ngem no datayo ngay ti adda kadagiti kasta a situasion, ania ti aramidentayo? Adda masursurotayo iti inaramid ni Jesus tapno saan a masinga ti panagdaydayawna ken Jehova.

DAGITI INARAMID NI JESUS TAPNO SAAN A MASINGA

7. Ania koma dagiti mabalin a nangsinga ken Jesus?

⁷ Mabalin koma met a nasinga ni Jesus iti agduduma nga isyu maipapan kadagiti problema dagiti tattao ken iti politika. Adu idi ti marigrigat ken masaksakit. (Mat. 14:14; Mar. 14:7) Agrigrigat met dagiti tattao gapu iti saan a nasayaat a panangtrato dagiti Romano ken uray dagiti padada a Judio. Idi nakita dagiti tattao nga adda pannakabalin ni Jesus a mangaramid kadagiti milagro, kayatda a pagbalinen nga ari. (Juan 6:​14, 15) Malaksid iti dayta, pinuntiria met ni Satanas ni Jesus. Pinadasna a sulisogen nga agbalin kas agturay iti daytoy a lubong. Mabalin koma a napanunot ni Jesus a nagmayat no isunan ti agturay. (Mat. 4:​8, 9) Ken uray ngarud ni apostol Pedro a maysa kadagiti kasingedan a gayyem ni Jesus, pinaregtana met a saanna a parigaten ti bagina. Imbagana: “Kaasiam ta bagim, Apo.”—Mat. 16:​21, 22.

8. Ania ti inaramid ni Jesus tapno saan a masinga?

⁸ Ania ti inaramid ni Jesus tapno saan a masinga? Adda tallo nga inaramidna. Umuna, tinuladna ti panagpampanunot ni Jehova. (Juan 8:28; 14:9) Maikadua, nagbalin a busy kadagiti naespirituan a banag. (Mat. 9:35) Ken maikatlo, nagpokus iti talaga a napateg. (Juan 4:34) Isu a dagus nga inlaksidna ti pannulisog ni Satanas. Saan met a nagpaapekto kadagiti imbaga ni Pedro ta uray no umiso met ti motibona, maikontra dayta iti pagayatan ni Jehova. (Mat. 4:10; 16:23) Nalawag a saan nga impalubos ni Jesus a dagiti kapanunotan, imbaga, wenno inar-aramid dagiti tattao ti mangsinga kenkuana a mangitungpal iti pagayatan ti Dios. Ita, mabalin a dagiti pakaipaspasanguantayo a situasion ket naiduma iti napadasan ni Jesus. Ngem no tuladentayo ti tallo nga inaramidna, mayun-unatayo ni Jehova iti biagtayo.

TI ARAMIDENTAYO TAPNO SAANTAYO A MASINGA

9. Kasanotayo a ‘maitultuloy a tarusan ti pagayatan ni Jehova?’ (Efeso 5:17)

⁹ Tuladentayo ti panagpampanunot ni Jehova. No aramidentayo dayta, ‘maitultuloytayo a tarusan ti pagayatan ni Jehova.’ (Basaen ti Efeso 5:17.) Maammuantayo no ania ti mangparagsak ken Jehova no basaentayo ti Saona ken no utobentayo dayta. Uray no awan ti espesipiko nga ibaga ti Biblia maipapan iti agdama a situasionmo, maammuam latta no ania ti kayat ni Jehova nga aramidem. Kasano? Ad-adda nga ammuem ti panagpampanunot ni Jehova ken situtulokka nga agpaiwanwan kenkuana.

10. Kasanotayo a maammuan ti panagpampanunot ni Jehova?

¹⁰ Maammuantayo ti panagpampanunot ni Jehova no adalentayo ti Biblia ken no usigentayo ti panangtratona kadagiti tattao. (Jer. 45:5) Bayat a basbasaentayo dagita a salaysay, mabalintayo nga isaludsod dagitoy: ‘Ania ti isuro kaniak daytoy maipapan ken Jehova? Kasanok a mausar daytoy tapno matuladko ti panangmatmat ni Jehova kadagiti bambanag?’ Siempre, adayo a nasirsirib ni Jehova ngem datayo. (Isa. 55:9) Gapu iti dayta, isuna laeng ti rumbeng a pagpatulongantayo tapno maaramidtayo ti pagayatanna. (Sal. 143:10) Ikararagtayo met a tulongannatayo a mangtarus iti panagpampanunotna tapno matuladtayo dayta.—1 Juan 5:14.

11. Ania ti kayat ni Jehova para kadatayo?

¹¹ Kayat ni Jehova a nakasaganatayo iti iyaay ti panungpalan. Dayta ti rason a dina kayat a masingatayo. (Mat. 24:44) Saanna a kayat a madagsenantayo kadagiti problematayo. (Mat. 6:​31, 32) Isu a no madanagantayo iti salun-at, trabaho, pagyanan, pamilia, wenno iti personal a biagtayo, nakasagana ni Jehova a tumulong kadatayo. Kinapudnona, aw-awisennatayo pay ketdi nga agkiddaw kenkuana iti sirib ken bileg tapno makayatayo dagita.—Sal. 55:22; Prov. 3:​5-7.

12. Ania ti maysa a makatulong tapno ditay unay madanagan kadagiti agdama a mapaspasamak iti lubong? (Mateo 5:3)

¹² Agbalintayo a busy kadagiti naespirituan a banag. Nagadu ita ti mapaspasamak a ditay kontrolado. Normal laeng a madanagantayo no dadduma. Tapno ngarud ditay unay masinga kadagiti banag a ditay kontrolado, agpokustayo kadagiti naespirituan nga aktibidad. Naragsaktayo no mapennektayo ti naespirituan a kasapulantayo. Apay? Pinarsuanatayo ngamin ni Jehova nga addaan iti kasta a panagkasapulan. (Basaen ti Mateo 5:3.) Mapennektayo laeng dayta no am-ammuentayo ni Jehova babaen ti panagadaltayo iti Saona, ti Biblia. Maaramidtayo met dayta no ikagumaantayo ti makipaset iti aniaman a kita ti sagrado a panagserbi. Iti kasta, maparagsaktayo ni Jehova ta us-usarentayo a naimbag ti tiempotayo.—Prov. 23:15.

13. Kasanotayo a mausar a naimbag ti tiempotayo?

¹³ Kas Kristiano, kayattayo nga ‘usaren ti tiempotayo iti kasayaatan a pamay-an.’ (Efe. 5:​15, 16; kitaen ti study note a “making the best use of your time.”) Bigbigentayo a saan la a basta mangmangted ti Biblia iti suhestion no kasanotayo nga usaren ti tiempotayo iti inaldaw. Imbes ketdi, balbalakadannatayo a panunotentayo a naimbag no kasano ti panangusartayo iti tiempotayo sakbay a pagpatinggaen ni Jehova daytoy dakes a sistema. Kasanotayo nga usaren a naimbag ti tiempotayo? No ngamin adu nga oras ti busbosentayo a mangpadaan kadagiti kabaruan a damag tapno saantayo a maudi, baka masinga, maupay, ken bumaaw pay ketdi ti regtatayo. Nasaysayaat ngarud no limitarantayo ti kaadu ti buyaen wenno basaentayo a damdamag! Iti kasta, ad-adu ti tiempo ken pigsatayo a mangaramid kadagiti naespirituan a banag. Ad-adu pay ketdi ti maaramidantayo iti ministerio, kas iti panagsarungkar. Ammotayo met a nakapatpateg a gundawayantayo ti tunggal oportunidad tapno ‘maisalakan ti amin a kita ti tattao ken maaddaanda iti umiso a pannakaammo iti kinapudno.’—1 Tim. 2:4.

14. Ania ti pagsayaatanna no busy-tayo kadagiti naespirituan a banag? (Kitaen met ti ladawan.)

¹⁴ No busy-tayo kadagiti naespirituan a banag, saantayo unay a maseknan kadagiti mapaspasamak ita. Saantayo a permi a madanagan uray no rumigrigat ti panagbiag, adu ti agwarwaras a sakit, ken kumarkaro ti gulo iti politika. Ammotayo ngamin a dagita ket ebidensia a matungtungpalen dagiti padto ti Biblia. Isu nga imbes nga ipalubostayo a ti buteng ti mangsinga kadatayo, agtalektayo ketdi a tungpalento ni Jehova dagiti karina iti masanguanan. Ngem bayat nga ur-urayentayo a mapasamak dayta, agtalektayo a tulongannatayo ni Jehova nga agibtur ken agtalinaed a kalmado.—Sal. 16:8; 112:​1, 6-8.

15. Sigun iti 1 Pedro 4:​7, ania ti masapul nga aramidentayo, ken apay?

¹⁵ Agpokustayo iti talaga a napateg. Adu a tattao ita ti nakasentro ti biagda iti panagragragsak. Saanda man la a pakaseknan nga asidegen ti panungpalan. Agpayso a kasapulantayo met ti agrelaks no dadduma. Ngem masapul a ‘nasimbeng ti panunottayo’ tapno ditay maimpluensiaan iti panangmatmat ti lubong. (Basaen ti 1 Pedro 4:7.) Ania ti kayatna a sawen? Kaipapananna a nasayaat koma ti panagdesdesisiontayo ken balansetayo maipapan iti panagragragsak wenno panagrelaks. Ipakita koma dagiti desisiontayo a tultuladentayo ti panagpampanunot ni Jehova ken ammotayo ti talaga ti napateg.—2 Tim. 1:7.

16. Ania ti nagpokusan ni Jesus idi dandanin matay?

¹⁶ Nagpokus ni Jesus iti kapatgan. Agingga iti maudi a kanito ti biagna ditoy daga, nagpokus iti panagtalinaedna a matalek ken iti panangitungpalna iti pagayatan ti Dios. Nakapagtalinaed nga alerto gapu ta impasnekna ti nagkararag. Ngem saan a naaramid dayta dagiti adalanna. Apay? Imbes nga agkararagda, ‘nakaturogda gapu ta nabannog ken maladladingitanda.’—Luc. 22:​39-46; Juan 19:30.

17. Apay nga adu ti agus-usar iti social media, ngem kasano a posible nga agbalin a pakasingaan dayta? (Kitaen met ti ladawan.)

¹⁷ Kas kadagiti adalan ni Jesus, mabalin met a permi a malidayan wenno madanagantayo no dadduma. Apay? Agbibiagtayo ngaminen iti maudi nga al-aldaw. Isu nga adu ita ti agus-usar iti social media tapno kano malipatanda ti problemada. Kas pagarigan, usarenda dayta tapno agi-send-da iti piktiur kadagiti gagayyem ken kapamiliada ken tapno i-share-da ti mapaspasamak iti biagda. Usarenda met dayta nga agbuya iti adu a video wenno agay-ayam kadagiti video game. Adu nga oras ken pigsa ti busbusbosen dagiti tattao iti social media tapno laeng saanda a maudi. Ania ti makatulong tapno saantayo a maimpluensiaan? Mabalin nga isaludsodtayo daytoy, ‘Sumayaat kadi ti riknak no agusarak iti social media wenno lallalo a malipatak no ania a talaga ti napateg?’

18. Apay a nasayaat koma ti panagdesdesisiontayo no agpilpilitayo iti aramidentayo no agrelakstayo?

¹⁸ Nasayaat met ti agrelaks no dadduma tapno maksayan bassit ti stress ken bannogtayo. Ngem masapul a pilientayo a naimbag ti klase ken kaadu ti ay-ayamentayo a video game wenno buyaentayo a pelikula, teleserye, telenobela, ken video iti TV wenno Internet. Kas pagarigan, no nalpasmon a binuya ti maysa a video, adda manen baro nga agparang isu a baka kayatmonto manen a buyaen. Naglaon pay met ngarud ti dadduma a video iti kinaranggas ken immoralidad. Kasta ti napasamak iti maysa a brother iti Asia. Idi damo, ti laeng buybuyaenna ket dagiti video clip a mangitampok iti linaon ti maysa a pelikula. Ngem idi intultuloyna a buyaen dagiti agparang a video clip, dina napupuotan nga agbuybuya metten kadagiti immoral nga eksena. Idi kuan, nagbuyan iti pornograpia. Imbag laengen ta tinulongan dagiti papanglakayen ken nasinged a gagayyemna. In-delete-nan dagiti app a pagbuybuyaanna ken inkeddengna metten no mano la nga oras nga agselpon. Ipakita dayta a kapadasan a nakapatpateg ti panagdesision a naimbag no maipapan iti pangusarantayo iti orastayo.

19. Ania ti mapasamak no ibusentayo ti tiempotayo iti panagrelaks?

¹⁹ Kasapulantayo met ti agrelaks wenno agbakasion tapno makainanatayo biit manipud iti nag-busy a biagtayo. Makatulong dayta tapno agtalinaedtayo a nasalun-at. Ngem masapul latta a nasayaat ti panagdesdesisiontayo maipapan kadagita a banag. Apay? No ngamin adu unay ti usarentayo a tiempo para kadagita, saantayo no kuan a balanse ken agawennan ti orastayo a para koma kadagiti napatpateg a banag. (Fil. 1:10) Isu a masapul a panunotentayo a naimbag no ania ti pangusarantayo iti tiempotayo ken no kasano kaadu nga oras ti busbosentayo iti dayta. Makatulong no isaludsodtayo dagitoy: ‘Ti kadi kaadu ti oras a busbosek nga agrelaks ken agbakasion ipakitana a nasayaat ti panagdesdesisionko? Ipakpakitak kadi a sipapanunotak kadagiti talaga a napateg? Ipakpakitak kadi a nakasaganaak iti iyaay “ti panungpalan ti amin a banag”?’

20. Apay a pagsayaatantayo no ditay ipalubos a masingatayo?

²⁰ Pagsayaatantayo no ditay ipalubos nga adda mangsinga iti panangyun-unatayo kadagiti naespirituan a banag. (Isa. 48:17) Apay? Nalaklakatayo ngamin a maibturan dagiti problema iti biag iti tulong ni Jehova. Saantayo met unay a madanagan kadagiti mapaspasamak iti lubong. Ken saan a maibus ti panawentayo iti panagragragsak laeng. Isu nga itultuloytayo ngarud koma a tuladen ti panagpampanunot ni Jehova, agbalin a busy kadagiti naespirituan a banag, ken agpokustayo iti talaga a napateg. No aramidentayo dagita, saantayo a masinga, no di ket mayun-unatayo ni Jehova iti biagtayo, ken ‘mapetpetantayo ti pudpudno a biag.’—1 Tim. 6:19.