Tulongam ti Dadduma a Mangam-ammo ken Jehova

1. Ania ti mariknam no makitam a rumangrang-ay ti maysa a mayad-adalan iti Biblia?

ANIA ti mariknam no mangrugin a makigimong, agkomento, mangasaba, ken idedikaren ti maysa a mayad-adalan iti Biblia ti biagna ken Jehova? Sigurado a nakaragragsakka! Siempre, ni Jehova ti nangtulong kenkuana a rumang-ay iti naespirituan isu nga isuna ti maikari nga idaydayawtayo.—1 Cor. 3:​5-9; 3 Juan 3, 4.

2. Ania ti kayat ni Jehova para kadagiti mayad-adalan iti Biblia? (1 Timoteo 2:​3, 4)

² Pagayatan ti Dios a “maisalakan koma ti amin a kita ti tattao ken maaddaanda iti umiso a pannakaammo iti kinapudno.” (Basaen ti 1 Timoteo 2:​3, 4.) Kayat ni Jehova a maam-ammo isuna dagiti tattao ken maammuanda dagiti nagsasayaat nga inaramidna ken dagiti aramidennanto pay. (Jer. 9:24) Masapul a maaddaanda iti umiso a pannakaammo. Ania ti umiso a pannakaammo? Saan a tumukoy dayta iti basta panangammo kadagiti impormasion maipapan iti Dios. Ibaga ti maysa nga eskolar ti Biblia a tumukoy dayta iti panagbalbaliw nga aramiden ti maysa gapu kadagiti naammuanna. Isu a no maam-ammo a naimbag ti mayad-adalan iti Biblia ni Jehova, dayta ti mangtignay kenkuana a mangbalbaliw iti biagna. Ket no aramidenna dayta, maaddaan iti namnama a “biag nga agnanayon.”—Juan 17:3.

3. Ania ti pagsasaritaantayo iti daytoy nga artikulo?

³ Inikkannatayo ni Jehova iti nagsayaat a pribilehio a tumulong kadagiti tattao a mangam-ammo kenkuana. Isu nga iti daytoy nga artikulo, pagsasaritaantayo dagitoy a saludsod: Apay a masapul a maam-ammo a naimbag dagiti mayad-adalan iti Biblia ni Jehova? Kasanotayo a matulongan ida tapno maammuanda dagiti kualidad ni Jehova? Ken kasanotayo a matulongan ida a mangyaplikar iti biagda kadagiti nasursuroda maipapan ken Jehova?

TULONGAM TI IYAD-ADALAM A MANGAM-AMMO A NAIMBAG KEN JEHOVA

4. Sigun iti Marcos 12:​30, ania ti kangrunaan a panggeptayo no mangyad-adaltayo iti Biblia?

⁴ Imbaga ni Jesus a ti kapatgan a bilin ket masapul nga ayatem ni Jehova iti amin a pusom, kararuam, panunotmo, ken pigsam. (Basaen ti Marcos 12:30.) Isu a masapul a maam-ammo a naimbag ti mayad-adalan iti Biblia ni Jehova tapno maayatna. Kayattayo nga agpabautisar gapu ta ay-ayatenna ni Jehova, saan a gapu kadatayo, kadagiti patpatientayo, wenno gapu ta kayatna ti makigayyem kadagiti padatayo a Saksi. Isu a ti kangrunaan koma a panggeptayo no mangyad-adaltayo iti Biblia ket tulongantayo ti iyad-adalantayo tapno maam-ammo ken maayatna ni Jehova.

5. No ay-ayaten ti iyad-adalam iti Biblia ni Jehova, ania ti aramidenna?

⁵ Adda koneksion ti ayat iti panagtulnog. Ania? No maam-ammo ken maayat ti iyad-adalam ni Jehova, nalaklakanto para kenkuana ti agtulnog ken Jehova. Imbaga ni Jesus: “Tapno maammuan ti lubong nga ay-ayatek ti Ama, tungtungpalek ti imbilin kaniak ti Ama.” (Juan 14:31) Isu a kas ken Jesus, no talaga nga ay-ayaten ti mayad-adalan iti Biblia ni Jehova, dayta ti mangtignay kenkuana nga agtulnog ken agtalinaed a matalek ken Jehova.—1 Juan 5:3.

6. No maam-ammo a naimbag ti iyad-adalam ni Jehova, kasano a makatulong dayta tapno makaaramid iti nasayaat a desision? Mangted iti pagarigan.

⁶ No maam-ammo a naimbag ti iyad-adalam iti Biblia ni Jehova, dakdakkel ti posibilidadna a makaaramid iti nasayaat a desision. Panunotem daytoy: Saan a makasursuro ti maysa a piloto nga agpatayab iti eroplano no basta adalenna laeng no kasano ti agpatayab wenno basta ag-exam laeng. Ania ti masapul nga aramidenna? Masapul a mamin-adu nga aktual a patayabenna ti eroplano. Inton agangay, masursuronan a kontrolen dayta aniaman ti paniempo ken situasion. Makaaramidto met kadagiti nasayaat a desision bayat ti panagpatayabna. Kasta met iti iyad-adalam iti Biblia. Saanna a maam-ammo ni Jehova no basta agadal laeng. Masapul nga aktual a mapaneknekanna iti bagina a pagsayaatanna no ibatayna dagiti desisionna kadagiti prinsipio iti Biblia. No mas maam-ammona ni Jehova ken makitana no kasano a tultulongan isuna ti Nailangitan nga Amana, masursuronanto ti agaramid kadagiti nasayaat a desision aniaman a situasion ti pakaipasanguanna.

7. Ania ti nakatulong ken Jose tapno makaaramid iti nasayaat a desision?

⁷ Am-ammo a naimbag ni Jose ni Jehova. Dayta ti nakatulong kenkuana a situtured nga agsaan idi ginargari ti asawa ni Potifar. Idi ubing pay, sigurado a naammuanna ti maipapan kada Adan ken Eva ken kada Abraham ken Sara. (Gen. 2:24; 20:​3, 6) Gapu kadagita a salaysay, naawatanna no ania ti panangmatmat ni Jehova iti panagasawa ken panagdenna. Gapu ta am-ammona a naimbag ni Jehova, saan a timmulok iti pananggargari ti asawa ni Potifar. Imbagana: “Apay koma nga aramidek daytoy nakaro a kinadakes ket agbasolak iti Dios?” (Gen. 39:​7-9) Ammo ni Jose no ania ti ibilang ni Jehova a naimbag ken dakes. Naawatanna no ania ti pakasaktan ti Diosna. Gapu iti dayta, nakaaramid ni Jose iti nasayaat a desision. Ania ti masursurotayo? Tulongantayo dagiti iyad-adalantayo a mangam-ammo a naimbag ken Jehova. Tulongantayo met ida tapno makitada dagiti nagsasayaat a kualidadna. Iti kasta, makaaramidda met kadagiti nasayaat a desision a mangparagsak kenkuana.

TULONGAM A MANGAMMO KADAGITI KUALIDAD NI JEHOVA

8. Kasanom a mausar ti libro nga Agbiagka a Naragsak iti Agnanayon! tapno matulongam ti iyad-adalam a mangam-ammo ken Jehova?

⁸ Kasanom a matulongan ti iyad-adalam a mangam-ammo ken Jehova? Adda ti masursurotayo iti inaramid ni Jehova ken Job. Nangusar isuna iti nasurok a 50 a saludsod tapno maam-ammo ni Job isuna. (Job 38:1–41:34) Mabalintayo met a tuladen dayta. Adda dagiti saludsod iti libro nga Agbiagka a Naragsak iti Agnanayon! a nadisenio a mangtulong iti iyad-adalantayo a mas mangam-ammo ken Jehova. (Kitaen ti kahon a “Salsaludsod a Makatulong Kadatayo a Mangisuro.”) Isu nga usarem dagita a saludsod a mangtulong iti iyad-adalam a mangam-ammo ken Jehova.

9-10. (a) Ania ti makatulong iti mayad-adalan tapno mas maam-ammona ni Jehova no agbasbasa iti Biblia? (Santiago 5:11) (b) No basbasaen ti mayad-adalan ti salaysay maipapan ken Daniel, ania dagiti saludsod a mabalinna nga usigen tapno maammuanna dagiti mangparagsak ken mangpaliday ken Jehova?

⁹ Uray no karugrugitayo pay laeng nga iyadalan ti maysa, paregtaentayon a basaenna ti Biblia iti inaldaw.a Kasanotayo a matulongan a mas mangam-ammo ken Jehova? Mabalintayo nga ibaga a no agbasbasa, panunotenna no apay nga impaisurat ni Jehova dagita a bersikulo ken no ania dagiti kualidad ni Jehova a masursurona kadagita. Kas pagarigan, kitaentayo ti nasursuro ni adalan a Santiago maipapan ken Job. Saan la a nagpokus iti kualidad ni Job a kas iti panagibtur. Nasursurona met dagiti kualidad ni Jehova a kas iti kinadungngo ken asi.—Basaen ti Santiago 5:11.

¹⁰ No basbasaen ti iyad-adalantayo ti maysa a salaysay iti Biblia, kayattayo a maawatanna no ania dagiti mangparagsak ken mangpaliday ken Jehova. Kas pagarigan, baka kinitana ti tsart a “Basaem ti Biblia” iti libro nga Agbiagka a Naragsak iti Agnanayon! Imbagana a kayatna a basaen ti salaysay maipapan ken Daniel iti abut dagiti leon. Ania ti aramidentayo tapno matulongantayo ti iyad-adalantayo? Mabalintay a paregtaen nga utobenna dagitoy a saludsod: ‘Apay nga insalakan ni Jehova ni Daniel? Ania ti masursurok ditoy a mangparagsak ken Jehova?’ (Dan. 6:​10, 22) Mabalinna pay nga isaludsod: ‘Ania ti napasamak kadagiti lallaki a nangakusar ken Daniel? Ania ti naammuak ditoy a mabalin a mangpaliday ken Jehova?’ (Dan. 6:​4, 5, 24) Kalpasanna, mabalinmo nga ibaga a panunotenna ti dadduma pay a kualidad ni Jehova a masursurona iti dayta a salaysay.—Dan. 6:​26, 27.

11. Kasanotayo a matulongan ti iyad-adalantayo tapno makitana a ni Jehova a mismo ti mangisursuro kenkuana?

¹¹ Maragsakantayo no makitkitatayo ti iyad-adalantayo a dakkel ti maitultulong kenkuana ti panagadalna. Mabalin pay ketdi nga agyaman kadatayo gapu kadagiti masursurona ken padayawannatayo gapu ta nalaingtayo a mangisuro. Saan met ketdi a dakes dayta. Ngem ania ti aramidentayo? Masapul a tulongantayo tapno makitana a ti mismo a mangisursuro kenkuana ket ni Jehova, ti Naindaklan nga Instruktortayo. (Isa. 30:​20, 21) Isu a masapul a kanayon nga ipalagiptayo kenkuana a ni Jehova ti masapul a pagyamananna ken padayawanna.

TULONGAM A MANGYAPLIKAR KADAGITI NASURSURONA MAIPAPAN KEN JEHOVA

12-13. No narigat a maawatan ti iyad-adalam ti maysa a salaysay iti Biblia, kasano a makatulong kenkuana no am-ammona a naimbag ni Jehova? (Kitaen met ti ladawan.)

¹² Masapul nga usaren ti iyad-adalantayo dagiti naammuanna maipapan ken Jehova tapno naan-anay a magunggonaan. Kasanom a matulongan a mangaramid iti dayta? Umuna, no adda basbasaenna a salaysay iti Biblia a narigatna a maawatan, isurom kenkuana a lagipenna dagiti naammuannan maipapan ken Jehova. Kas pagarigan, no basbasaenna dagiti panangukom ni Jehova, baka mapanunotna no apay a dinadaelna ti dadduma a tattao ngem pinalubosanna nga agbiag ti dadduma. Kasanom a matulongan ti iyad-adalam a maaddaan iti umiso a pannakaawat?

¹³ Mabalinmo a paregtaen nga utobenna dagiti nasursurona maipapan ken Jehova. Kas pagarigan, mabalinna nga isaludsod dagitoy: Ania ti kayat ni Jehova para kadagiti tattao? (2 Ped. 3:9) Ania ti insakripisiona tapno maisalakantayo uray no managbasoltayo? (Efe. 2:​4, 5) Dusaen kadi ni Jehova dagiti saan met a maikari a madusa? Ngem no maikari met a madusa, saanna kadi a dusaen? (Ex. 34:​6, 7) No dadduma, saan nga ibaga ti maysa a salaysay iti Biblia ti amin a detalye no apay nga inaramid ni Jehova ti maysa a banag. Ngem saantayon a kasapulan dagita a detalye tapno maawatantayo ti inaramidna. Apay? Am-ammotayo ngamin ti Diostayo, ket agtalektayo a kanayon nga aramidenna ti umiso.

14. Kasanom a matulongan ti iyad-adalam no marigatan a makilangen iti maysa a kabsat?

¹⁴ Panunotem ti sabali pay a situasion a matulongam ti iyad-adalam a mangusar kadagiti naammuannan maipapan ken Jehova. Kas pagarigan, makigimgimongen ngem marigatan a makilangen iti maysa a kabsat gapu ta mabalin a napasaktan isuna ti kabsat. Ania ti aramidem? Paregtaem a panunotenna ti panangkita ni Jehova kadagiti kakabsat. Mabalinna nga isaludsod dagitoy: Ania ti insakripisio ni Jehova tapno maipakitana ti ayatna kadakuada? (Juan 3:16) Kasano kapateg ken Jehova ti panagkaykaysa dagiti adipenna? (Sal. 133:1) Ania ti mariknana no tumultulongtayo tapno agtalinaed ti talna iti kongregasion? (2 Cor. 13:11) Tulongam ti iyad-adalam tapno maawatanna a maparagsakna ni Jehova no agpokus kadagiti nasayaat a kualidad dagiti kakabsat imbes a kadagiti kamalida.

15-16. (a) Kasano a matulad ti mayad-adalan iti Biblia ni Jesus no masapul a mangaramid iti napateg a desision? (Juan 8:29) (b) Kasano a tinulongan ni Marianne ti iyad-adalanna tapno makaaramid iti nasayaat a desision? (Kitaen met ti ladawan.)

¹⁵ Ania pay ti sabali a pamay-an a mausar ti iyad-adalam dagiti naammuanna maipapan ken Jehova? No agaramid kadagiti napateg a desision. Kasanom a matulongan isuna? Mabalinmo nga ipakita kenkuana ti leksion 35 iti libro nga Agbiagka a Naragsak iti Agnanayon! a napauluan “No Kasanotayo a Makaaramid iti Umiso a Desision.” Ngem kasano ngay no nagkararagen ken nag-research-en kadagiti publikasiontayo ngem saanna latta nga ammo ti aramidenna? Mabalin a mariknana a saanna nga ammo no ania a prinsipio ti Biblia ti kasayaatan nga agaplikar iti situasionna. Mabalinmo nga ibaga nga utobenna ti inaramid ni Jesus. Kasano kadi a nagdesision ni Jesus? Imbagana: “Kanayon nga ar-aramidek ti makaay-ayo [ken Amak].” (Basaen ti Juan 8:29.) Mabalinmo nga ibaga iti iyad-adalam nga isaludsodna iti bagina, ‘Base kadagiti na-research-kon ken naammuakon maipapan ken Jehova, ania a desision ti mangparagsak kenkuana?’ Tulongam ti iyad-adalam tapno maawatanna daytoy: ti nasayaat a desision ket ti desision a mangparagsak ken Jehova.

¹⁶ Adda babai a taga-Chile a mayad-adalan iti Biblia. Pilpiliten dagiti kapamiliana a mangawat iti trabaho a nangato ti sueldona ngem saan a makagimong. Isu a masapul nga agdesision. Ania ti inaramid ti mangyad-adal kenkuana a ni Marianne? Imbagana: “Pinaregtak a panunotenna no maragsakanto ni Jehova wenno saan iti desisionna. Imbagak met nga espesipiko nga ikararagna dayta ken Jehova ken siputanna no kasanona a sungbatan.” Ania ti inaramid ti mayad-adalan? Innayon ni Marianne: “Saanna nga inawat ti trabaho. Ngem di nagbayag, nakabirok met laeng iti trabaho a mayat ti eskediulna ken saan a mangapektar iti pannakigimongna.” Ania ti masursurotayo iti inaramid ni Marianne? Saanna a diniktaran ti iyad-adalanna no ania ti aramidenna. Tinulonganna ketdi a mangpanunot no ania dagiti ammonan maipapan ken Jehova. Kas resultana, lallalo a simminged ti mayad-adalan ken ni Marianne. Ngem saan la a dayta. Simminged met ti relasionna ken Jehova. Imbaga ni Marianne maipapan iti iyad-adalanna: “Nasursuro ti study-k a no iyun-unatayo ni Jehova iti biagtayo, aywanannatayo.”

BENDISIONAN NI JEHOVA DAGIDIAY MANGAM-AMMO A NAIMBAG KENKUANA

17. Ania ti kayattayo a kapatgan a masursuro ti iyad-adalantayo?

¹⁷ Bayat ti panagadal iti Biblia ti iyad-adalantayo, adu a napateg a kinapudno ti masursurona. Kas pagarigan, masursurona ti maipapan iti subbot, kasasaad dagiti natay, ken iti Pagarian. Masursurona met no kasano a maor-organisar ti kongregasion. Kas pagarigan, maammuanna no ania ti mapaspasamak kadagiti gimong, no ania dagiti ar-aramiden dagiti panglakayen, ken no asino ti Bagi a Manarawidwid. Ngem saan la a dagita ti kayattayo a masursurona. Ti kayattayo a kapatgan a masursurona ket ti maipapan ken Jehova.

18. Ania dagiti bendision nga agur-uray kadagidiay mangam-ammo ken Jehova?

¹⁸ Ibilangtayo a nagdakkel a pribilehio nga isuro dagiti tattao a mangam-ammo ken Jehova. Apay? Ngamin, dagidiay mangam-ammo ken agdaydayaw ken Jehova ti kararagsakan a tattao nga agbibiag iti lubong ita. (Sal. 25:​12-15) Ket iti masanguanan, agbiagto iti agnanayon ti amin a ‘mangam-ammo iti daydiay pudno,’ ni Jehova. (1 Juan 5:20) Ngem saan la a dagita ti bendision a maawattayo. Ibagbaga met ti Biblia a dagidiay mangikagkagumaan a mangammo ken mangayat ken Jehova ket “am-ammo ti Dios.” (1 Cor. 8:3) Talaga a makitkitanatayo ti Mannakabalin-amin a Dios ken ibilbilangnatayo kas gagayyemna. Nakasaysayaat dayta a bendision para kadagidiay mangam-ammo iti maymaysa a pudno a Dios!