Maysa a Pakaasi Maibatay iti Ayat

1. Ania ti responsabilidadtayo amin?

AGYAMYAMANTAYO ta agkaykaysatayo ken adda talna a tagtagiragsakentayo iti nagbabaetantayo nga agkakabsat. Gapu iti dayta, mariknatayo a kasla addatayon iti Paraiso. (Isa. 32:​17, 18) Posible dayta gapu ken Jehova. Ngem adda met kadi responsabilidad ti tunggal maysa kadatayo? Adda. Masapul a taginayonen ken protektarantayo dayta. (Roma 12:18) Kasanotayo ngarud a tratuen ti dadduma tapno mataginayontayo ti talna iti kongregasion? No kas pagarigan ta nasaktantayo ti dadduma wenno datayo ti nasaktanda, ania ti aramidentayo? Makitatayo ti sungbat kadagita a saludsod iti maysa a pakaasi maibatay iti ayat. Pagsasaritaantayo ti tallo a karakter iti Biblia: ni apostol Pablo, Filemon, ken Onesimo.

TI PAKAASI

2. Iyestoriam ti napasamak kada Filemon ken Onesimo. (Filemon 8, 9, 17)

² Basaen ti Filemon 8, 9, 17. Iti surat ni Pablo ken Filemon, agpakpakaasi nga awatenna manen ti adipenna a ni Onesimo. Imbagana nga aramidenna dayta maibatay iti ayatna ken Kristo ken kadagiti kakabsat. Baka malagipmo ti maipapan iti daytoy a salaysay. Ni Filemon ket maysa a kabsat iti kongregasion idiay Colosas. Pagaammo isuna a nakaay-ayat ken nabileg ti pammatina. Adda adipenna nga agnagan iti Onesimo. Saan isuna a manamati, sa idi kuan, linibasanna ti amona ket napan idiay Roma. Ngem sakbay a naglibas, posible a tinakawanna pay ni Filemon. (Flm. 18; kitaen ti study note.) Idi addan idiay Roma ni Onesimo, naam-ammona ni Pablo ken nagbalinda a nasinged nga aggayyem. Idi agangay, nagbalin a Kristiano. (Col. 4:9) Ngem sigun iti linteg ti Roma, dagiti naglibas nga adipen ket masapul nga agsubli iti amoda. Ammo dayta ni Pablo, isu nga imbaonna ni Onesimo nga agsubli ken Filemon.—Flm. 12, 13; kitaen ti study note nga “I am sending him back to you.”

3. Ania idi ti posible a pagdandanagan ni Pablo no agsubli ni Onesimo ken Filemon? (Kitaen met ti ladawan.)

³ Anianto ngata ti reaksion ni Filemon iti panagsubli ni Onesimo? Iti linteg ti Roma, adda karbenganna a mangdusa iti nakaro ken Onesimo. Aramidenna ngata dayta? Anianto ngata ti reaksion ti kongregasion? Komusta met ngay ti dadduma nga amo ken adipen? Agdudumanto ngatan ti opinionda? Mabalin ngata a daytanto ti mangdadael iti panagkaykaysa ti kongregasion? Posible a napanunot dagita ni Pablo. Isu nga ania ti inaramidna? Nagaramid iti surat para ken Filemon ken impatulodna dayta babaen ken Tiquico. (Efe. 6:​21, 22; Col. 4:​7-9; kitaen ti study note iti Colosas 4:7.) Saan la a dayta. Nagaramid met iti surat para iti kongregasion ti Colosas. Kadagita a dua a suratna, kitaentayo ti masursurotayo iti ulidan ni Pablo, Onesimo, ken Filemon.

DAGITI MASURSUROTAYO KEN PABLO

4-5. Ania ti mabalin nga aramiden dagiti panglakayen tapno agkaykaysa ti kongregasion?

⁴ Ania ti masursurotayo ken Pablo? Nasayaat ti panangtratona kadagiti kakabsat. Nakatulong dayta tapno agkaykaysa ti kongregasion. Kasanotayo a matulad ni Pablo?

⁵ Imbilang ni Pablo ni Filemon kas gayyemna. (Flm. 17) Saan man la a pinanunot ni Pablo a mabalinna lattan a diktaran ni Filemon a kas man la isuna ti amo. (2 Cor. 1:24) Imbilang ni Pablo ni Filemon kas katrabahuanna ken impalagipna pay nga aggayyemda. Sigurado a nakatulong dayta ken Filemon tapno nasayaatto ti panangtratona ken Onesimo. Ibilangnanto isunan kas kabsatna, saan ket nga adipen. Datayo met ngay? Ania ti masursurotayo, lalo iti biang dagiti panglakayen? Masapul nga ibilangda dagiti kakabsat kas gagayyemda. Makatulong dayta tapno adda talna iti kongregasion. Laglagipentayo a dagiti panglakayen ket naayat a papastor, isu a ‘saanda nga iturayan’ ti arban. (1 Ped. 5:​1-3) Ania ngarud ti ar-aramidenda para kadatayo? Ik-ikkandatayo iti tiempo, dumdumngegda kadatayo, ken ipatpategdatayo. Daytoy pay. No adda problematayo, kanayon nga addada iti sibaytayo. Tultuladenda ni Pablo. Ibilbilangda dagiti kakabsat kas gagayyemda. Ket no itultuloy nga aramiden dayta dagiti panglakayen, tuladen ida dagiti kakabsat. Ti resultana? Agkaykaysa ti kongregasion.

6. Apay a napateg ti komendasion?

⁶ Kinomendaran ni Pablo ni Filemon. (Flm. 4, 5, 7) Kasapulantayo amin ti komendasion. Apay? Ngamin, adu kadatayo ti makarikna no dadduma a kasla awan serserbitayo. Mabalin pay ketdi a maseknantayo iti itsuratayo wenno no ania ti makuna ti dadduma kadatayo. Posible met a madanagantayo ta baka mapukawtayo ti ipatpategtayo a pribilehio. No kasta ti marikriknam, normal laeng dayta. Ngem no dadduma, baka sobran ti panagdandanagtayo wenno nalakatayon a masaksaktan. Iti sabali a bangir, baka kanayontayon nga idepdepensa ti bagitayo wenno kayattayo a kanayon a paneknekan a nalalaingtayo ngem iti dadduma. No kasta ti aramidentayo, madadael ti panagkaykaysa iti kongregasion. Ngem adda makatulong. Ania dayta? Komendasion. No komendarantayo ngamin ti dadduma, mariknada nga adda pategda. (Prov. 12:25) Maipasigurado kadakuada nga adda mangay-ayat ken mangap-apresiar kadakuada. Ket sigurado la ketdi a kayatmo nga iparikna dayta iti dadduma. Ania ngarud ti mabalinmo nga aramiden? Mangbirokka kadagiti pangkomendaram iti dadduma. Ngem laglagipem koma nga aramidem dayta a naimpusuan, saan laeng a tapno sumayaat ti riknada. Ken daytoy pay. Komendaram ti dadduma saan laeng a gapu ta adda ti nasayaat a naaramidanda. Komendaram met koma uray ti kabassitan a panagsakripisio ken panagregget nga ar-aramidenda. Daytoy ti punto: No adda makitam a positibo iti dadduma, ibagam dayta kadakuada.

7. Apay a masapul a panunotentayo a naimbag no ania ti ibagbagatayo maipapan iti dadduma? (Filemon 10-12)

⁷ Positibo ti imbagbaga ni Pablo maipapan ken Onesimo. (Basaen ti Filemon 10-12.) Ania ngata ti posible a narikna ni Filemon idi nabasana ti nadungngo a sasao ni Pablo maipapan ken Onesimo? Posible ngata a nagbalbaliw ti marikriknana ken Onesimo, a pakairamanan ti panagsao ken panangtratona kenkuana? Sigurado! Datayo met ngay? Laglagipentayo nga aniaman nga ibagatayo maipapan iti maysa a kabsat ket addanto epektona iti panangkita ken panangtratonto kenkuana ti dadduma. Kas pagarigan, no positibo ti ibagbagatayo maipapan iti maysa a kabsat, posible a positibonto met ti panangtrato kenkuana ti dadduma. Ngem kasano ngay no negatibo ti ibagbagatayo maipapan kenkuana? Baka negatibonto metten ti panangmatmat kenkuana dagiti kakabsat ken saanton a nasayaat ti panangtratoda kenkuana. Isu nga ania ti masursurotayo? Tapno positibo ti maibagatayo iti dadduma, masapul a panunotentayo nga umuna ti positibo maipapan kadakuada. Ania ti makatulong kadatayo? Kitaentayo ti nakaugalian nga aramiden ni Pablo.

8. Ania ti makatulong tapno positibo ti panangmatmat ken maibagatayo maipapan kadagiti kakabsat? (Kitaen met dagiti ladawan.)

⁸ Kanayon a nagyamyaman ni Pablo ken Jehova gapu kadagiti nagsasayaat a kualidad ni Filemon. (Flm. 4, 5) Ket kasta met laeng ti inaramidna iti adu pay a kakabsat. (1 Cor. 1:​4-7; Fil. 1:​3-5; Col. 1:​3, 4; 1 Tes. 1:​2, 3) Siempre, makitkita latta met ni Pablo dagiti negatibo a kababalin dagiti kakabsat. Ngem ania ti nagpokusanna? Nagpokus isuna kadagiti positibo a kualidadda. Ken inyugalina ti agyaman ken Jehova gapu kadagita a gagayyemna. Sika met ngay? Marigatanka kadi nga agsao iti positibo maipapan iti dadduma? No wen, makatulong daytoy: Sanayem ti bagim a kanayon nga agpanunot iti positibo maipapan iti dadduma. Ken no agkararagka, iyugalim a dakamaten ti tunggal maysa kadakuada ken dawatem ken Jehova a bendisionanna ida. No aramidem dayta, makitamto a naglakan para kenka ti agsao iti positibo maipapan kadagiti kakabsat.

9. Apay a makaparegta ti positibo a surat ni Pablo ken Filemon?

⁹ Uray narigat ti situasion ni Pablo, nasayaat latta ti imbagbagana iti suratna ken Filemon. Adda kadi malagipmo a tiempo a gapu ta nabannog wenno mais-stress-ka ket nabugkawam wenno nakusilapam ti maysa a kabsat? No ngamin adda problematayo, naglaka laeng a maibus ti aanusantayo. Isu a ti tendensiatayo ket naglakatayo laeng a maipakita ti surontayo kadagiti kakabsat. Ngem adda ti makatulong. Panunotentayo ti situasion ni Pablo iti tiempo a sinuratanna ni Filemon. Sumagmamano a tawen sakbayna, siraranggas nga inatakar dagiti tattao. Kalpasanna, saan a nainkalintegan a naaresto. Naipupok idiay Jerusalem, sa idiay Cesarea. Kalpasanna, naipan idiay Roma. Ngem bayat ti biaheda, narba ti barko a naglugananda. Ket iti tiempo a sursuratan ni Pablo ni Filemon, isu ket ‘maysa latta a balud’ iti dagusna idiay Roma. (Flm. 1) Ngem impalubos kadi ni Pablo a dagiti narigat a situasionna ti mangapektar iti linaon ti suratna ken Filemon? Saan. Nadayaw ken nasingpet latta ni Pablo. Ken pinagpanunotanna a naimbag dagiti insuratna ken Filemon. Ania ti masursurotayo? No kasdiay a nabannogtayo, mais-stress-tayo, wenno adda problematayo, ikagumaantayo latta a tratuen ti dadduma iti nasayaat. Makatulong dayta tapno mataginayon ti talna iti kongregasion. Ken uray sika a mismo, nalaklakam a sanguen dagiti problemam.

DAGITI MASURSUROTAYO KEN ONESIMO

10. Ania ti masursurotayo ken Onesimo?

¹⁰ Adda amin maibaga wenno maaramidtayo a pakasaktan ti dadduma. No mapasamak dayta, makasursurotayo iti ulidan ni Onesimo tapno mataginayon ti talna iti kongregasion. Adda inaramidna a simple laeng, ngem nagrigat nga aramiden no dadduma. Ania dayta? Inaminna ti kamalina ken pinagreggetanna ti makikappia ken Filemon. Sigurado la ketdi nga ammo ni Onesimo ti linteg ti Roma a masapul nga agsubli isuna iti amona. Isu nga uray no nakanginngina ken makabannog ti biahe nga agsubli ken Filemon, inaramidna latta dayta. Nagbiahe isuna iti nasurok a 1,400 a kilometro (900 a milia). Masapul idi nga isaganana ti bagina nga agbalin manen nga adipen, ken posible a lak-amenna dagiti resulta ti inaramidna. Narigat la ketdi dayta. Ken posible ngata met a nariknana a husto laeng ti inaramidna a libasanna ni Filemon? No man bilang nariknana dayta, saanna nga impalubos a dayta ti manglapped kenkuana nga agsubli iti amona. Inaramidna ketdi ti amin a kabaelanna tapno agkappiada ken Filemon nga iti dayta a kanito, agkabsatdan iti naespirituan.

11. No adda napasaktantayo, ania ti mabalintayo nga aramiden tapno maisublitayo ti nasayaat a relasiontayo kenkuana? (Kitaen met dagiti ladawan.)

¹¹ No adda napasaktam, sika koma ti umuna nga agtignay tapno maisubli ti nasayaat a relasionyo. (Mat. 5:​23-25) Agpayso a mabalin a narigat dayta. Ngem saan a sayang ti panagreggetmo tapno agkappiakayo. Ania ngarud ti umuna nga aramidem? Naimpusuan a dumawatka iti pammakawan. Nakasaganaka met koma a dumngeg iti ibagana ken tarusam no apay a kasta ti marikriknana. Aminem ti kamalim. Saanmo nga ikalintegan ti bagim wenno pabasolen ti dadduma. No ngamin aramidem dayta, baka mariknana a saan a naimpusuan ti panagpakawanmo wenno baka dumakkel laeng ti diyo nagkinnaawatan. Laglagipem a nagpateg ti panagpakumbaba no dumawdawattayo iti pammakawan. Mabalin a narigat nga aramiden dayta. Ngem kaaduanna a dayta ti kalakaan a pamay-an tapno maisubli ti talna.—Roma 14:19.

DAGITI MASURSUROTAYO KEN FILEMON

12. Apay a sigurado ni Pablo a pakawanen ni Filemon ni Onesimo?

¹² Kasano ngay no napasaktannatayo ti maysa a kabsat? Adda ti masursurotayo ken Filemon. Pinakawan kadi ni Filemon ni Onesimo ken siaayat nga inawatna manen? Saan nga ibaga ti Kasuratan. Ngem sigurado ni Pablo nga aramiden dayta ni Filemon. (Flm. 17, 21) Ammona ngamin dagiti nagsasayaat a kualidad ni Filemon a makatulong kenkuana tapno nalaklakana a mapakawan ni Onesimo. Ania dagita a kualidad?

13. Apay a makatulong ti ayat tapno agtalinaed ti talna? (Colosas 3:14)

¹³ Ay-ayaten ni Filemon dagiti kapammatianna. (Flm. 5) Ti kaipapanan ti nagan ni Filemon ket “Managayat.” Talaga a kasta isuna ken ammo dayta ti intero a kongregasion. Ket dayta a kababalin ti kasapulanna tapno mapakawanna ni Onesimo. Kinaagpaysuanna, iti surat ni Pablo iti Colosas a kongregasion ni Filemon, imbagana a ti ayat ti “perpekto a singgalut ti panagkaykaysa.” (Basaen ti Colosas 3:14.) Iti sabali a pannao, ibagbaga ni Pablo a tapno adda ti talna ken panagkaykaysa, kasapulan ti ayat. No ngamin mas ay-ayatentayo ti dadduma, nalaklakatayo a pakawanen ken tratuen ida iti nasayaat. (1 Cor. 13:​4-7) Kitaentayo no ania pay ti inaramid ni Filemon tapno mas maipakitana ti ayat.

14. Apay a maibagatayo a managpadagus ni Filemon?

¹⁴ Managpadagus ni Filemon, isu a nalaklakana nga impakita ti ayat iti dadduma. Impausarna ti balayna a paggigimongan ti kongregasionda. (Flm. 2) Ammo met ni Pablo a managpadagus ni Filemon. Kiniddawna pay ketdi a mangisagana iti pagdagusanna. (Flm. 22) Masiguradotayo a gapu iti kinamanagpadagus ni Filemon, naparegta ken nabang-aran dagiti kakabsat.—Flm. 7.

15. Apay a nalaklakatayo nga ayaten ti dadduma no padagusentayo ida? (Kitaen met dagiti ladawan.)

¹⁵ Apay a nalaklakatayo nga ayaten ti dadduma no managpadagustayo kas ken Filemon? Mas maam-ammotayo ngamin no kua dagiti kakabsat. Isu a mangiwayatayo iti tiempo uray kadagiti saantayo unay a makadkadua wenno ka-close, ken uray kadagidiay panagkunatayo a saantayo unay a kaalaan wenno kapada iti paginteresan. Apay a napateg dayta? Maapresiartayo ti agduduma a personalidad dagiti adipen ni Jehova ken makitatayo a dayta ti mangpappapintas iti organisasionna. Nalaklakatayo met nga ayaten ken respetuen dagiti kakabsat no mas am-ammuentayo ida, kas koma iti pamilia a naggapuanda, no kasanoda a nagbalin a Saksi, ken no kasano a tinulongan ida ni Jehova kadagiti problemada. Maawatantayo no apay nga inyasideg ken pinili ida ni Jehova nga agbalin a paset ti pamiliana. (Juan 6:44) Isu a no padagusentayo dagiti kakabsat, nalaklakatayo nga ayaten ida, agbalin a positibo ti panangmatmattayo kadakuada, ken nalaklakatayo a pakawanen ida no agkamalida.

16. Kasano a posible nga inyaplikar ni Filemon ti balakad ni Pablo iti Colosas 3:13?

¹⁶ Adda kadi ti kayatmo a pakawanen ita ngem marigrigatanka? Agpayso nga ay-ayatentayo dagiti kakabsat. Ngem no dadduma, marigatantayo a mangpakawan kadakuada. Ania ti makatulong? Kitaentayo ti surat ni Pablo iti Colosas a kongregasion ni Filemon iti Colosas 3:13. (Basaen.) Ania ngata ti reaksion ni Filemon idi mangngegna a maibasbasa ti surat iti mismo a balayna? Asino ngata ti mabalin a pampanunotenna? Nasakit pay la ngata idi ti nakemna ken Onesimo? No man bilang kasta, ammona no ania ti masapul nga aramidenna. Ania dayta? Masapul nga itultuloyna nga anusan ni Onesimo, ken situtulok a pakawanenna. Kasano a makatulong kadatayo ti balakad ni Pablo no marigatantayo a mangpakawan iti maysa a kabsat?

17. Ania ti kayat a sawen ti “itultuloyyo ti agiinnanus”?

¹⁷ Ania ti kayat a sawen ni Pablo idi imbagana nga “itultuloyyo ti agiinnanus”? Parparegtaennatayo nga an-anusantayo dagiti kakabsat ken naimbagtayo latta kadakuada uray no mapasaktan wenno madismayadatayo. Iti dayta met la a teksto, intampok ni Pablo ti nagsayaat nga ulidan ni Jehova. Rasonable isuna. Saan a nalabes ti ekspektarenna kadagiti adipenna. Ammona ngamin dagiti limitasion ken pagkapkapuyantayo. Ngem dagiti nagsasayaat a kualidadtayo ti pagpokpokusanna. (Sal. 103:​13, 14; 130:3) Isu nga itultuloynatayo nga ayaten ken saan nga agpatingga ti asina kadatayo. (Un. 3:​22, 23) No ikagumaantayo a tuladen ti panangkita ni Jehova kadagiti kakabsat, nalaklakatayo nga anusan dagiti makapasuron nga ugalida ken dagiti pagkamkamalianda. An-anusantayo ida, ta ti agpayso, an-anusandatayo met. Panunotem daytoy: No malagiptayo a nakapimpintasto ti maysa a mulatayo inton agsabong, mas kayattayo nga aywanan ken sibugan. Kasta met laeng no maipapan kadagiti kakabsat. No malagiptayo dagiti arig sabong a nagpipintas a kualidadda, nalaklakatayo a mapakawan ken tratuen ida iti nasayaat uray no madismayadatayo.

18. Ania ti determinasionmo?

¹⁸ Makitkita ken ap-apresiaren ni Jehova ti amin nga ar-aramidem tapno agtalinaed ti talna iti kongregasionyo. Isu nga inaldaw a mangbirokka kadagiti gundaway a maaramidmo dayta. Itultuloymo ti agsao iti positibo maipapan iti dadduma. Nasayaat met koma ti pannakisaritam kadakuada. Dumawatka iti pammakawan. Ket no adda ti nasaktam, ikagumaam nga isubli ti nasayaat a relasionyo. Paunegem met ti ayatmo kadagiti kakabsat tapno nalaklakamto ida a mapakawan. No aramidem amin dagita, makatulongka tapno agtalinaed ti talna iti kongregasionyo. Daytoy pay. Maysakanto kadagiti naemma a ‘mangtagikua iti daga’ ken ‘maragsakankanto unay iti naruay a talna’ iti agnanayon!—Sal. 37:11.