Ipategmo ti Pribilehiom a “Mangipaay iti Sagrado a Panagserbi”

1. Maipapan iti ania ti impadto ni Zacarias?

LAKAY ken baket idin da Zacarias ken Elisabet idi simimilagro nga inikkan ida ni Jehova iti anak a lalaki a ni Juan. Nakaskasdaaw dayta ta lupes ni Elisabet. Isu nga idi nadamag dayta dagiti tattao, imbagada: “Anianto ngata ti pagbalinan daytoy nga ubing?” (Luc. 1:​57-66) Inusar ni Jehova ni Zacarias a mangsungbat iti dayta a saludsod. Inlawlawagna a dandanin dumteng ti nabayagen nga ur-urayenda a Mesias. Imbagana met a ni Juan ti tumulongto kadagiti tattao nga agbabawi tapno nakasaganadanto a mangsurot iti Mesias. (Amos 3:7; Luc. 1:​67-79) Ngem saan la nga imbaga ni Zacarias ti aramidento ti anakna a ni Juan.a Kas makitatayto iti daytoy nga artikulo, ti mensahe ni Zacarias ket maysa a padto nga agaplikar pay laeng kadatayo agingga ita. Ammuentayo iti mensahena ti maipapan iti tallo a banag a masapul nga ipategtayo: (1) ti regalo a pannakaisalakan, (2) ti pribilehio a mangipaay iti sagrado a panagserbi, ken (3) ti responsabilidadtayo a mangasaba.

TI REGALO A PANNAKAISALAKAN

2. (a) Sigun iti Lucas 1:​67-73, ania a regalo ti inkari ti Dios iti ilina? (b) Asino ti “nabileg a manangisalakan”? (Lucas 1:​69, footnote)

² Basaen ti Lucas 1:​67-73. Inkari ti Dios nga ikkanna ti ilina iti nagsayaat a sagut: ti pannakaisalakan. Ngem asino ti usarenna a mangisalakan kadakuada? Imbaga ni Zacarias: “Nangpataud [ni Jehova] iti nabileg a manangisalakan para kadatayo a sangakabbalayan ni David.” (Luc. 1:​69, ftn.; kitaen ti study note.) Daytoy a “nabileg a manangisalakan” ket ti Mesias. Idi kaaldawan ni Zacarias, ur-urayen idin dagiti Judio ti naikari a Mesias. Ammoda met nga aggapu iti kaputotan ni Abraham ken agtaud iti linia ni Ari David. (Gen. 22:​17, 18; Mat. 22:42) Apay ngarud nga impaibaga pay laeng ni Jehova ken Zacarias ti iyaay daytoy a “nabileg a manangisalakan”? Ngamin, dandani idin dumteng ti Mesias! Innem laengen a bulan, iyanakton ti babai nga agnagan iti Maria ni Jesus. Imbaga ni anghel Gabriel kenkuana a ti iyanakna a ni Jesus ket maawaganto iti “Anak ti Dios” ken agturay kas Ari iti “trono ni David nga amana.” (Luc. 1:​30-35) Idi agtawen ni Jesus iti 30, nabautisaran isuna. Iti dayta a tiempo, imbukbok kenkuana ni Jehova ti nasantuan nga espiritu ket nagbalin a Mesias. (Mat. 3:​16, 17) Talaga a makapagagar dagita a pasamak!

3. Apay a masapul a maisalakan dagiti Judio idi umuna a siglo?

³ Kasapulan idi a maisalakan dagiti Judio idi umuna a siglo. Manipud iti asino wenno ania? Insungbat ni Zacarias: “Isalakannatayo kadagiti kabusortayo ken kadagiti manggurgura kadatayo.” (Luc. 1:71) Kayat kadi a sawen dayta a masapul nga isalakan ida ni Jesus kadagiti naulpit nga agtuturay a Romano? Saan. Masapul ketdi a maisalakanda iti kangrunaan a mangparparigat kadakuada, ni Satanas. (Heb. 2:​14, 15) Isuna ngamin ti makagapu a naadipen ti amin a tattao iti basol ken ipapatay, a pakairamanan dagidiay a Judio. Ngem masapul a maisalakanda iti sabali pay a rason. Gapu ta saanda a naan-anay a nasurot ti Mosaiko a Linteg, ibaga ti Biblia a nailunodda. (Roma 3:20; Gal. 3:​10, 13) Talaga a kasapulanda ngarud ti inkari ni Jehova babaen ken Zacarias: “Isalakan ida ti Dios babaen ti panangpakawanna kadagiti basolda.”—Luc. 1:77.

4. Apay a masapul met a maisalakantayo ita?

⁴ Kasapulantayo met kadi ti maisalakan ita? Wen. Ngamin, kas kadagiti Judio idi panawen ni Jesus, naadipentayo met iti basol ken ipapatay. (Roma 5:12) Kasta met, parparigatennatayo ni Satanas ken dagiti demoniona. Padpadasendatayo nga impluensiaan nga agsukir ken Jehova tapno agsardengtayo nga agserbi kenkuana. Ania pay? Im-impluensiaanda met dagiti indibidual ken organisasion a “manggurgura kadatayo” tapno busorenda ti panagdaydayawtayo. Isu a talaga a kasapulantayo met ti maisalakan.

5. Kasanonatayo nga isalsalakan ni Jesus manipud iti basol?

⁵ Kasanonatayo nga isalsalakan ni Jesus manipud iti basol? Idi adda ni Jesus ditoy daga, insurona kadagiti pasurotna ti pamay-an ti panagdaydayaw nga awaten ni Jehova. Intedna met ti biagna kas subbot “tapno saan a madadael ti asinoman a mangipakita iti pammati kenkuana no di ket maaddaan iti biag nga agnanayon.” (Juan 3:16; Mat. 20:28) Ket ita, ikagkagumaantayo a suroten ti insuro ni Jesus a pamay-an ti panagdaydayaw nga awaten ni Jehova. Ngem imperpektotayo pay laeng, isu a dumawdawattayo iti pammakawan ken Jehova no agbasoltayo. Ket gapu iti subbot, pakpakawanenna dagiti basoltayo isu nga ak-akseptarenna ti panagdaydayawtayo. (1 Juan 2:​1, 2) Dagita ti pamay-an nga isalsalakannatayo ni Jesus manipud iti basol.

6. Anianto ti aramiden ni Jesus kas Ari? (Kitaen met ti ladawan.)

⁶ Kasanonatayo a naan-anay nga isalakan ni Jesus manipud iti basol ken ipapatay, manipud ken Satanas ken kadagiti demoniona, ken manipud kadagiti “manggurgura kadatayo”? Sipud idi 1914, agturturayen ni Jesus idiay langit iti “trono ni David nga amana.” (Luc. 1:​32, 33) Inton Armagedon, kaduananto ti 144,000 ken dagiti anghel a mangdadael iti amin a tattao a bumusbusor iti Dios. Ket bayat ti Sangaribu a Tawen a Turay, pagungarento ni Jesus dagiti natay. Kaduananto met ti 144,000 a mangtulong kadagiti tattao nga in-inut nga agbalin a perpekto. (Juan 5:28; Apoc. 22:​1, 2) Iti ngudo ti sangaribu a tawen, naan-anayton a naikkatda ti natawidtayo a basol ken ipapatay. (1 Cor. 15:​26, 55-57) Kalpasanna, dadaelendanton ni Satanas, dagiti demoniona, ken ti amin a tattao a mangsuporta kadakuada iti maudi a pannubok. (Apoc. 20:​7-10) Makapagdaydayawto met laengen ken Jehova dagiti matalek nga agserserbi kenkuana nga awanen ti basol, ipapatay, wenno asinoman a bumusbusor a manglapped kadakuada! Agnanayonton a maidaydayaw ken agyamantayo iti Diostayo gapu iti “di mailadawan ken awan bayadna a sagutna,” a pakairamanan ti panangisalakan kadatayo ni Kristo Jesus.—2 Cor. 9:15.

TI PRIBILEHIO A MANGIPAAY ITI SAGRADO A PANAGSERBI

7. Sigun iti Lucas 1:​74, 75, ania a pribilehio ti inted ni Jehova iti ilina?

⁷ Basaen ti Lucas 1:​74, 75. Gapu iti regalo ni Jehova a subbot, inikkannatayo iti espesial a pribilehio. Ania dayta? Ti pribilehio a ‘mangipaay iti sagrado a panagserbi nga awan pagbutngantayo,’ kas iti imbaga ni Zacarias. Ania ti karaman iti panangipaay iti “sagrado a panagserbi” ken Jehova? Karaman iti dayta ti panangasaba, panagkararag, panangadal iti Saona, ken panagdaydayawtayo kadagiti gimong, asamblea, ken kombension. Karaman met iti dayta ti panagboluntario iti Bethel, panagipatakder ken panagmantener kadagiti Kingdom Hall ken Assembly Hall, ken dadduma pay a naespirituan nga aktibidad.

8. Ania ti saantayo a pagbutngan?

⁸ Ania ti kayat a sawen ti panangipaay iti sagrado a panagserbi ken Jehova nga ‘awan pagbutngantayo’? Umuna, saantayo a mabuteng a matay. Gapu ta ammotayo nga agbiagtayto iti agnanayon, saantayo nga ipapas ti agbiag iti ababa a biagtayo iti daytoy a sistema. Saantayo nga usaren ti amin nga oras ken pigsatayo a mangaramid laeng iti kaykayattayo. Imbes ketdi, agpokustayo nga agserbi ken Jehova. Saantayo met nga ipalubos a ti panagbuteng ti mangpasardeng kadatayo nga agserbi ken Jehova uray no pangtaandatayo dagiti mangidaddadanes kadatayo a patayendatayo. Makapagtalinaedtayo a matalek ken Jehova gapu ta ammotayo nga uray man bilang mataytayo, pagungarennatayto ni Jesus. (Juan 6:​39, 40) Maikadua, saantayo a mabuteng a baka tallikudannatayo ni Jehova gapu laeng ta managbasoltayo. Kombinsidotayo nga ay-ayatennatayo, maparparagsaktayo isuna, ken pakawanennatayo gapu iti daton ni Jesus.—1 Juan 4:​9, 10.

9. Ania ti narigat a patien ti dadduma a Kristiano?

⁹ Ngem adda ti dadduma a Kristiano a marigatan latta a mamati nga ak-akseptaren ni Jehova ti panagdaydayawda. Panagriknada ngamin ket kasla saanda a maikari iti ayat ni Jehova. Posible a gapu dayta iti saan a nasayaat a napasamak idi kadakuada. Wenno baka makonkonsiensia pay laeng ti dadduma gapu kadagiti naaramidda a basol, uray no dimmawatda metten iti pammakawan ni Jehova ken natulongan idan dagiti panglakayen. No bilang kasta ti marikriknam, ania ti mabalinmo nga aramiden?

10-11. Ania ti mabalintayo nga aramiden no mariknatayo a kasla saantayon a makabangon gapu iti naaramidtayo a basol? Mangted iti pagarigan.

¹⁰ Imadyinem daytoy: Natukkol ti saka ti maysa a lalaki isu a napan nagpadoktor. Idi kuan, insimpa dayta ti doktor. Inrekomendana met nga agpa-therapy ti pasiente tapno maisubli ti pigsa ti sakana ket makapagnanto manen. Ngem kasano ngay no pampanunoten ti lalaki a kasla imposiblen a makapagnanto manen? Masapul nga agtalek isuna iti doktorna ken an-anusanna ti agpa-therapy. Intono kuan, in-inutto met laeng nga umimbag agingga a makapagnan wenno makatarayto pay ketdin.

¹¹ No dadduma, baka mariknam met ti kasta. Diay rikna a kasla natukkotukkolka gapu iti basol wenno kasla saankan a makabangon tapno maitultuloymo ti agserbi ken Jehova. No kasta ti marikriknam, agtalekka ken Jehova. Patiem a gapu iti nagpaiduma a kinaimbag ken asina, umimbagkanto iti naespirituan. Ay-ayatennaka unay ni Jehova ken pakawanennaka gapu ta natay ti Anakna para kenka. (Juan 1:​16, 17; Roma 3:​23, 24; 1 Juan 3:​19, 20) Isu nga ania ti aramidem? Surotem ti “inrekomendana a therapy.” Agkararagka, agadalka, ken itultuloymo dagiti naespirituan nga aktibidad. (Sal. 1:2; 1 Tes. 5:17; Heb. 10:25) Ngem iti damo, baka mariknam a kasla nagbayagka a makabangon. No mariknam ti kasta, laglagipem a kas iti panagimbag ti natukkol a tulang, kasapulan met ti panawen tapno umimbagka iti naespirituan ken aglunit ti nasugat a pusom. Saanka koma a sumuksuko. Agtalekka ken Jehova ken an-anusam ti bagim. Itultuloymo dagiti naespirituan nga aktibidadmo. (Fil. 3:16) Daytoy pay. Agyamanka ken Jehova ta inaldaw a pappapigsaennaka tapno maitultuloymo ti simamatalek a panagserbim kenkuana. Anian a yamantayo iti Dios ken iti Kristo ta impaayannatayo iti nagsayaat a pribilehio a makaipaay iti sagrado a panagserbi nga awan pagbutngantayo!

TI RESPONSABILIDAD A MANGASABA

12. Kasano nga insagana ni Juan a Mammautisar dagiti dalan ni Jehova? (Lucas 1:​76-79)

¹² Basaen ti Lucas 1:​76-79. Dagiti simmaruno nga imbaga ni Zacarias ket para met iti kayyanak idi nga anakna. Imbagana: “Ibaonnakanto ni Jehova a nasaksakbay tapno isaganam dagiti dalanna.” Kasano a tinungpal dayta ni Juan a Mammautisar? Idi adulto isunan, nagbalin a naregta a manangaskasaba. Pinaregtana dagiti Judio a pagbabawyanda dagiti basolda, agpabautisarda, ken awatenda ti umay a Mesias. Idi nabautisarannan ni Jesus, inyam-ammona kadagiti tattao nga isu ti pannakabagi ni Jehova. Imbagana: “Kitaenyo, ti Kordero ti Dios a mangikkat iti basol ti lubong!” Kalpasanna, pinaregtana dagiti adalanna a surotenda ni Jesus, ti Mesias.—Juan 1:​29, 34-36, 40, 41.

13. Ania ti kayat a sawen ti imbaga ni Zacarias a ti iyaay ti Mesias ket kas iti “panagsingising ti init”?

¹³ Uray no impakaammo metten ni Juan a ni Jesus ti Mesias, kasapulan latta ti ad-adu pay a mangsaksi maipapan iti dayta. Apay? Imbaga ngamin ni Zacarias a ti iyaay ti Mesias ket kas iti “panagsingising ti init.” Ania ti kayat a sawen dayta? Ti iyaay ti Mesias ti mangbalbaliw iti biag ti amin a tattao. Nakasaysayaat dayta a damag ken regalo a masapul a maipakaammo iti amin a tattao. Ngem siempre, saan a kaya nga aramiden dayta ti maymaysa laeng a tao. Isu a malaksid ken Juan, siasino pay ngarud ti tumulong tapno maipakaammo dayta a nagpateg a mensahe ti pannakaisalakan?

14. Ania ti nagpateg a trabaho nga inaramid ni Jesus ken dagiti adalanna? (Isaias 61:​1, 2)

¹⁴ Sipipinget nga inkasaba ni Jesus ti naimbag a damag. Tinungpalna ti imbaga ni Zacarias nga isu ti “mangsilaw kadagiti agtugtugaw iti kasipngetan ken iti anniniwan ni patay.” Talaga a naasian ni Jesus kadagiti mailupitlupit a tattao ken kayatna ida a tulongan. Ket tapno maliwliwana ida, imbagana kadakuada ti makaparegta a mensahe maipapan iti “tawen ti kinaimbag ni Jehova.” (Basaen ti Isaias 61:​1, 2; Luc. 4:​16-21) Sireregta nga impakaammona: “Asidegen ti Pagarian ti langit.” Ngem ammo ni Jesus a kasapulan ti ad-adu pay a mangasaba. Isu a sinanayna dagiti adalanna tapno ikasabada ti isu met laeng a mensahe.—Mat. 4:​16, 17; 10:7; 28:​19, 20.

15. Apay nga adayo a napatpateg ita ti trabaho a panangasaba?

¹⁵ Kas pasurot ni Kristo ita, ipatpategtayo ti responsabilidadtayo a mangitultuloy a mangipakaammo iti mensahe ni Jehova iti pannakaisalakan. Ti agpayso, adayo a napatpateg ita nga ikasabatayo ti subbot ni Jesus ken ti Pagarian ti Dios. Apay? Kitaentayo ti dandanin mapasamak. Mapadasanto dagiti tattao ti “dakkel a rigat a saan pay a napaspasamak manipud idi panangrugi ti lubong.” (Mat. 24:21) Iti dayta a tiempo, posible nga ad-adunto pay ti mangawat iti naimbag a damag ken agserbi ken Jehova gapu ta malagipdanto dagiti inkasabatayo kadakuada. Kalpasanna, idauluanto ni Jesus ti 144,000 ken dagiti anghel a makilaban iti amin a bumusbusor iti Dios ditoy daga. Isalakannanto met dagiti agserserbi ken Jehova tapno agbiagdanto iti baro a lubong. (Mat. 25:34; Apoc. 16:16; 19:19) Isu a nakapatpateg nga ikasabatayo itan ti naimbag a damag!—Mat. 24:14; Mar. 13:10.

16. Ania ti determinasionmo? (Kitaen met dagiti ladawan.)

¹⁶ Ipalagip kadatayo ti sasao ni Zacarias iti Lucas 1:​68-79 ti tallo a banag a masapul nga ipategtayo: ti awan kapadana a regalo ni Jehova a pannakaisalakan, ti pribilehiotayo nga agserbi kenkuana nga awan pagbutngantayo, ken ti responsabilidadtayo a mangikasaba iti makaliwliwa a mensahena. Ngem dagitoy ti saludsod: Inawatmo kadin ti regalo ni Jehova babaen ti panamatim iti subbot ken panangidedikarmo iti bagim kenkuana? Ipatpategmo kadi ti pribilehiom nga agserbi kenkuana? No wen, sireregta koma ngarud nga aramidem ti amin a kabaelam a mangikasaba iti “tawen ti kinaimbag ni Jehova.” Ipakaammom ti naimbag a damag nga um-umayen ti “aldaw a panagibales” ni Jehova, ti aldaw inton ti Pagarian ti Dios ikkatennan ti amin a bumusbusor ket agbalinen a Paraiso ti daga. Awisentayo ngarud ti amin a mangay-ayat iti Dios a makikadua kadatayo a ‘mangipaay iti sagrado a panagserbi kenkuana nga awan pagbutngantayo tapno agbalintayo a napudno ken maaramidtayo ti umiso iti intero a panagbiagtayo.’—Luc. 1:​74, 75.