Inturong ti Naindaklan a Namarsua ti Atensionna Kaniak

Dimmakkelak iti Paris, France. Ateista dagiti nagannakko ken ti adu nga am-ammok, isu a diak met mamati iti Dios. Pinatik ketdi ti teoria ti ebolusion. Insuroda dayta kadakami idiay eskuelaanmi. Ket kas iti adu a tattao, panagkunak idi ket dayta ti husto. Ngamin, kasla husto met dagiti nakaibatayanna. Isu a saanakon a naginteres a mangammo no kasano a talaga a nangrugi ti biag.

Saan a maawatan dagiti nagannakko no apay a mamati dagiti tattao iti Dios. Imbagada a no adda a talaga ti Dios, apay ngarud a nakaad-adu ti dakes a mapaspasamak ken nakaad-adu a tattao ti agrigrigat? Makitkitak met idi nga uray dagiti tattao a mamati iti Dios, agar-aramidda met iti dakes. Isu nga uray siak, patiek nga awan met lang ti serserbina no mamatika nga adda naayat a Dios. Kinankantiawak pay ketdi a, dagidiay mamati idi iti Dios.

Ngem ita, mamatiakon nga adda Namarsua. Mamatiak met nga ipatpategnak uray no adda dagiti pagkapkapuyak. Iyestoriak kadakayo no apay a daytan ti patpatiek ken no kasano a binalbaliwanna ti biagko.

Idi agtawenak iti 19, naayabanak nga agsoldado. Imbaonnak ti gobierno a masanay iti makatawen iti French Guiana iti South America. Uray nakaad-adayo daytoy a lugar, nakapimpintas. Ken diak idi napanunot a dakkelto gayam ti papelna iti biagko.

Idi agtawenak iti 20, nagsubliak iti Paris. Rutina laeng idin ti biagko. Manipud Lunes agingga iti Biernes, igaedko ti agtrabaho. Ngem iti Sabado ken Domingo, kaduak dagiti barkadak. Agragragsak ken agiinumkami. Ngem saanak a talaga a naragsak ta awan ti direksion ti biagko. Nadismayaak met gapu iti makitkitak a korapsion, panangidumduma, ken kinarigat ti biag. Ken agrigrigat dagiti nasingpet a tattao ken madaddadael ti daga. Kayatko a mabalbaliwan amin dagita. Ngem diak ammo no kasano. Isu a napanunotko ti agsubli iti South America.

PINADASKO A BIROKEN TI NASAYSAYAAT A BIAG ITI KABAKIRAN

Nagsubliak iti French Guiana, iti maysa a bassit a lugar iti tengnga ti kabakiran. Ditaak a nag-training kas soldado. Kunak idi no naragragsak ti biagko no agyanak iti kasta a lugar, ag-marijuana, ken lipatek dagiti problema a nakitak idiay Paris. Ngem idi kuan, nagsubli manen ti dati a kabibiagko. Agtrabahoak manipud Lunes agingga iti Biernes. Sa iti Sabado ken Domingo, aramidek ti kaykayatko.

Idi addaak idiay, adda nangted kaniak iti Biblia. Binasak ti dadduma a pasetna bareng makakitaak iti makatulong kaniak tapno sumayaat ti biagko. Ngem diak idi maaw-awatan ti basbasaek.

Adda met dagiti gagayyemko a mayat a mangammo no ania ti panggep ti biag. Inawisdak a makipagyan kadakuada iti bassit a komunidadda iti kabakiran. Inawaganda dayta a lugar kas Unity wenno Panagkaykaysa.

Kaykayatko idiay. Simple ti biagmi ken awan unay ti problemami. Maaramidmi ti kaykayatmi nga awan ti mangmanmandar kadakami. Agriingkami no sumingisingen ti init ken maturogkami no lumneken dayta. Agmulmulakami met iti kanenmi, agtoktokarkami iti musika, ken agmar-marijuana-kami. Inaywananmi ti lugar nga ayanmi ken agririnnanudkami iti aniaman nga adda kadakami. Nateng ken prutas laeng ti kankanenmi ta saanmi a kayat ti pumatay iti animal. Awan unay ti bibiangmi kadagiti linteg ti gobierno. Ken adda idi dagiti tiempo a sukirenmi ti linteg no panagkunami ket dayta ti pagsayaatanmi ken awan met ti maagrabiadomi.

Kayatmi nga agbalin koma ti lubong a kas iti panagbiagmi iti bassit a komunidadmi. Awan ti lidermi. Agpapadakami lang. Resrespetuenmi ti maysa ken maysa uray sadinoman ti naggappuanna. Ngem idi agangay, nakitak a ti laeng bagimi ti pampanunotenmi ken adda met dagiti pagkapkapuyanmi. Sa idi kuan, mapadpadasanmi metten dagiti problema a mapadpadasan ti amin a tattao. Isu nga adda dagiti makapagbayag iti komunidadmi iti sumagmamano laeng nga aldaw. Dadduma met ket sumagmamano a lawas wenno bulbulan. Ngem siak, nasurok a dua a tawen.

Idi addaak iti kabakiran, nakitak a nakaparparabur ti daga. Ipapaayna ti amin a kasapulanmi. Naminsan, pinadasko a bilangen ti bukel ti papaya. Nakaad-adu isu a simmukoakon! Naibagak idi: ‘Nakaad-adu ti ipapaay ti daga. Kas man la iti maysa a balay a naisagana a naimbag sakbay a sumangpet ti bisita.’ Siempre, adda nangaramid iti dayta. Ngem asino? Napanunotko idi nga adda la ketdi Namarsua. Ngem diak am-ammo.

Isu nga intultuloyko a binasa ti Biblia. Ngem ti panggepkon ket ammuek ti kayat ti Dios nga aramidek. Inrugik metten ti agkararag ken ag-sign of the cross uray no diak ammo ti kaipapanan dayta. Pinampanunotko met idi no ti nagan ti Namarsua ket Jah ta dayta ti ibagbagami no agkankantakami idi iti komunidadmi.

NAAM-AMMOK TI NAPARABUR NGA AMAK

Idi nangrugiak nga agkararag, nariknak a naammuan ti Namarsua a kayatko a maam-ammo pay isuna. Apay a naibagak dayta? Adda maysa a gayyemko iti komunidadmi. Naam-ammona dagiti Saksi ni Jehova ken nangala iti libro a Mabalinyo ti Agbiag nga Agnanayon iti Paraiso a Daga.a Idi basbasaek dayta, nasdaawak iti naammuak! Nagustuak ti imbagana a mabalinko ti agbiag nga agnanayon ken agbalinto a paraiso ti daga. Dayta ti arapaapko, diay agnanayon a makaduak dagiti ay-ayatek iti nakapimpintas a lugar nga awanen ti problema. Isu nga iti dayta a tiempo, kayatko ti agbalin a gayyem ti nakaparparabur a Namarsua a nangisagana iti dayta a nakasaysayaat a masakbayan.

Ammok nga adda dagiti masapul a balbaliwak iti biagko. Ket kasapulak ti tulong. Isu nga imbagak iti sabali pay a gayyemko nga iyam-ammonak iti Saksi a misionero a mangyad-adal kenkuana a ni Michel.

Idi naam-ammok ni Michel, inawisnak a makikombension iti Matoury nga asideg ti kapital a Cayenne. Nasurok a 240 a kilometro (agarup 155 a milia) ti kaadayona. Nakaat-atiddog idi ti buokko ken nakawarwara ti barbasko. Violet ken pink ti pantalonko ken nakalawlawlaw ti badok. Ngem uray no kasta ti itsurak, saan a dayta ti nagpokusan dagiti kakabsat. Imbes ketdi, inlugandak a mapan iti kombension, pinakandak, ken pinadagusdak. Nakaay-ayat ken nakaparparaburda isu a nakombinsirak a nasarakakon ti kinapudno.

Iti dayta a kombension, nailawlawag ti 1 Timoteo 5:8. Ibagbaga dayta a teksto a masapul nga ipaay ti maysa nga ama ti kasapulan ti pamiliana. Nasursurok nga ar-aramiden a mismo dayta ni Jehova. Kas maysa nga ama, ay-aywananna dagiti adda iti poderna. Isu a napanunotko, ‘No iyun-unak iti biagko ni Jehova, apay koma nga agdanagak? Isunan ti makaammo kaniak.’ Lallalo pay a nakombinsirak nga agpaypayso dayta idi nakitak no kasano nga ay-aywanan ni Jehova ni Michel. Nakapokus isuna iti naespirituan ngem saan man la a nagkurang iti aniaman ken nakaragragsak pay.

Idi umad-adun ti maam-ammuak iti Biblia, nangrugiak metten a mangaramid kadagiti panagbalbaliw. Nagdesisionak nga isardengkon ti agsigarilio ken ag-marijuana. Isu nga imbellengkon dagita sa pinuorak ken diakon pulos sinubsublianan. Nakigimongak metten. Malagipko pay ngarud ti maysa a gimong. Imbagak iti maysa a brother a pukisannak. Ket iti dayta met la a gimong, pinukisannak a mismo iti Kingdom Hall.

Kalpasan ti sumagmamano a lawas, pimmanawakon iti French Guiana sa nagsubliak iti France. Adda nabirokak a Kingdom Hall ken intultuloyko ti nagadal. Nakita dagiti nagannakko a nagdakkel ti nagbalbaliwakon. Saanakon nga agsigsigarilio, agbarbartek, ken insardengkon ti mapan kadagiti party. Naragsakanda met ketdi ta nagbalbaliwakon. Ngem daydiay lang ta no direkta a kasabaak ida, kaguradak. Isu a sinursurok ti makisarita iti nasingpet ken narespeto a pamay-an tapno maibagak ti maipapan ken Jehova.

Nabautisaranak idi 1996. Imbagak ken Jehova a kayatko met ti agbalin a misionero a kas ken Michel. Para kaniak, dayta ti kasayaatan a pamay-an a maipakitak ti panagyamanko ken Jehova.

DAGITI BENDISION NGA INTED KANIAK TI NAILANGITAN NGA AMAK

Iti kongregasionko, adda naam-ammok a nagpintas a sister a ni Claudine. Nakaregregta iti ministerio. Ken makita kadagiti komentona nga ay-ayatenna unay ni Jehova. Kayatko idi nga armen. Ngem inammok nga umuna no kayatna met ti agbalin a misionero. Ket makaparagsak ta kayatna met. Isu nga idi Abril 2000, nagkasarkami.

Iti simmaruno a tawen, nangrugikamin nga agpayunir. Idi kuan, nagdesisionkami nga agsursuro iti Mandarin tapno masuportaranmi ti maysa a Chinese group nga asideg iti kongregasionmi. Nagrigat gayam ti ag-Mandarin. Siempre, masapul a sursuruem no kasano nga agpanunot dagiti Chinese ken no kasanom a maala ti interesda. Aminek a saanko a pulos nasursuro ti diretso nga agsao iti Mandarin. Ngem inkagumaak met. Nagadu dagiti diak malipatan a panagkakaduami kadagiti kakabsat a Chinese iti adu a tawen. Ibilbilangko dayta a nagdakkel a bendision ken training para kadagiti simmaruno nga asaynmentko.

DAGITI PROBLEMA A NAKAIPASANGUAK

Adda dagiti nakaipasanguak a problema. Kas pagarigan, uray no ar-aramidek ti amin a kabaelak nga agserbi ken Jehova ken kadagiti kakabsat, panagriknak idi ket kasla kurang latta. Isu a no adda ti palawagko, isaganak a naimbag dayta, uray no diak maturogen. Kayatko ngamin nga awan ti kamalik. Ngem kanayon a madismayaak ta diak maabut ti eks-ekspektarek iti bagik. (Ecl. 7:16) Ngem adda nasursurok. Nakaay-ayat nga Ama ni Jehova. Saanna a dawdawaten a perpekto ti amin nga aramidentayo. Ti napateg Kenkuana ket itedtayo ti kasayaatantayo.

Idi kuan, naibaonak nga agserbi kas sub-CO idiay Paris. Panagriknak idi, nakaub-ubingak ken awan pay kapadasak. Ngem nasursurok a tulongannatayo ti nasantuan nga espiritu ni Jehova a mangaramid iti ad-adu ngem iti kayatayo nga aramiden a bukbukodtayo.

Adda pay ti sabali a problemak. Ubingak pay laeng, addan hyperhidrosis-ko. Sakit dayta a sobra ti panagling-etmo. Lalo iti imak. Ngem kumaro dayta no mais-stress-ak. Kas koma no agpalpalawagak iti asamblea wenno kombension. Ngem adda makatultulong kaniak. Saan a kumaro dayta no ikararagko ken Jehova nga ikkannak iti talna iti panunot. Saan pay met latta a naawan dayta a sakitko. Ngem no mas agtalekak ken Jehova, mas kalmadoak met. Isu a saanak no kua unayen nga agling-et.

Idi 2011, sinungbatan met laengen ni Jehova ti nabayagen nga ar-arapaapen ti pusomi, diay agkaduakami nga agmisionero. Nangrugikami nga agmisionero idiay New Caledonia, maysa nga isla iti southwest Pacific. Nasurok a 16,000 a kilometro (10,000 a milia) ti kaadayona manipud iti Paris. Ngem idi addakami iti dayta nga asaynmentmi, adda latta met dagiti problema a nakaipasanguanmi. Kas pagarigan, masapul nga ag-adjust-kami kadagiti baro a makan a kas iti bagas ti kahoy, aba, ken kamote. Ken siempre, masapul met nga iruammi dagiti lapayagmi iti panagtaraok ti kawitan ken panagtaol dagiti aso. No dadduma ngarud ket mangistorboda iti turogmi. Isudan ti mangririing kadakami kada agsapa. Masapul met nga ag-adjust-kami iti pannakikomunikar kadagiti tattao sadiay. Ngamin, no sumungbatda, kaaduanna a saanda nga agsao. Agkiddayda laeng.

Tinulongannakami met ni Jehova tapno maka-adjust-kami kadagiti baro nga asaynmentmi. Tinulongannakami idi nagmisionerokami ken idi nagbalinkami a Bethelite iti sumagmamano a tawen. Nageskuelakami met iti School for Kingdom Evangelizers. Ket ita, agserserbikamin iti sirkito. Talaga a makitkitami no kasano nga us-usaren ni Jehova ti nasantuan nga espirituna a tumulong kadakami iti tunggal asaynmentmi. Insurona kaniak a saan a gapu ta adda pagkapuyak ket bimmassiten ti pategko kenkuana. Ti agpayso, us-usarennak latta isu a kanayon nga ikarkararagko a tulongannak tapno maaramidko ti kayatna nga aramidek. No dadduma, saanak latta a komportable nga agsao iti sanguanan ti adu a tattao. Ngem tultulongannak ni Jehova tapno maparegtak dagiti kakabsat ken maipaayko ti instruksion a kasapulan dagiti kongregasion.

Uray no adda dagiti panagbalbaliw, kanayon a supsuportarannak ni Claudine. An-anusanna dagiti pagkapuyak. Nakaragragsak isuna iti panagserbina ken Jehova. Ken kanayon a nakasagana a mangisarsarita iti maipapan ken Jehova kadagiti tattao. Saanko man la a nangngeg a nagreklamo isuna uray no napudot ti panawen ken no adda man pakarigatanmi bayat ti panagbisitami.

Idi damok ti makikombension, nasursurok a ti Naindaklan a Namarsua kadatayo a ni Jehova ket kanayon nga ay-aywananna dagiti agserserbi kenkuana. Ket napadasak a mismo dayta. Naaddaanak iti nakaad-adu a bendision. Tinulongannak ni Jehova a maaddaan iti umiso a panangmatmat kadagiti autoridad ken agbalin a napakumbaba. Insardengkon ti makikadua kadagiti gagayyemko idi iti daytoy a lubong tapno masurotko ti pagalagadan ni Jehova. Ngem sulit dayta a desisionko ta naaddaanak iti nakaad-adu a gagayyem. Ken saan la a dayta. Nabirokak met ti ipatpategko unay nga asawak. Padpadaanakon ti tiempo inton matagiragsaktayon dagiti nagadu a bendision ni Jehova iti masanguanan idiay baro a lubong.—Mar. 10:​29, 30.