‘Dagiti Pastor a Talaga a Mangipastor’

1-2. (a) Kasanodatayo a tultulongan dagiti panglakayen? (b) Kasano a sinigurado ni Jehova a maipaay ti naespirituan a tulong a kasapulantayo? (Kitaen met ti kahon a “Dagiti Pastor idi Tiempo ti Biblia.”)

MALAGIPMO pay kadi idi tinulongannaka ti maysa a naayat a panglakayen? Baka imbasaannaka iti teksto a nakatulong tapno makaaramidka iti nasayaat a desision. Mabalin met a liniwliwanaka idi natayanka iti ipatpateg iti biag. Wenno mabalin nga impalagipna kenka a talaga nga ay-ayatennaka ni Jehova idi marikriknam a saanka a maikari iti ayatna. Imbaga ti sister a ni Maríaa a taga-Spain: “No ishep-shepherding-dak dagiti panglakayen, marikriknak a talaga nga ipatpategdak. Ipakita ti panangbisbisitada kaniak a talaga a kayatdak a maam-ammo ken tulongan.”

² Ammo ni Jehova a kasapulantayo ti tulong dagiti panglakayen, isu nga inkarina a mangdutok kadagiti ‘pastor a talaga a mangipastor.’ Isuda dagiti lallaki a ‘mangaramid iti pagayatanna’ ken mangaywan kadagiti adipenna nga addaan pannakaammo ken pannakatarus. (Jer. 3:15; 23:4) Tinungpal ni Jehova dayta a karina iti kasayaatan a pamay-an idi imbaonna ni Jesus ditoy daga. Idi agangay, inyurnos ni Jesus a dagiti panglakayen ti mangipastor iti kongregasion. (Efe. 4:​7, 8, 11) Iti daytoy nga artikulo, usigentayo nga umuna no kasano a nagbalin a nasayaat a pastor ni Jesus. Sumaruno, ammuentayo ti dadduma nga abilidad ken kualidad a makatulong kadagiti panglakayen nga agbalin a nasaysayaat a pastor. Ken maudi, pagsasaritaantayo dagiti bendision a maawat dagiti naespirituan a pastor no sidudungngo nga aywananda ti arban.

AGSURSURO ITI “NASAYAAT A PASTOR”

3. Apay a “nasayaat a pastor” ni Jesus? (Juan 10:​11, 14)

³ Imbaga ni Jesus nga isu “ti nasayaat a pastor.” (Basaen ti Juan 10:​11, 14.) Apay? Ngamin, ay-ayatenna unay dagiti adalanna nga uray la ‘intedna ti biagna para kadakuada.’ Imbagana: “Am-ammok dagiti karnerok ket am-ammodak met dagiti karnerok.” Naawatanna met ti kasapulan ti tunggal adalanna ket imbagana a bang-aranna ida. (Mat. 11:​28, 29) Kas resultana, simmingedda ken nagtalekda kenkuana.

4-5. (a) Apay a nagpatulong da Marta ken Maria ken Jesus? (b) Ania dagiti panagsakripisio nga inaramid ni Jesus tapno matulonganna ida?

⁴ Iti Juan kapitulo 11, makita dagiti kualidad ti nasayaat a pastor idi binisita ni Jesus ni Marta ken ti kabsatna a ni Maria idiay Betania. Natay ti kabsatda a ni Lazaro sumagmamano pay la nga aldaw ti napalabas, isu a kasapulanda ti tulong ni Jesus. Ay-ayaten ni Jesus dagitoy nga agkakabsat. (Juan 11:5) Kanayon a makipagdagdagus kadakuada, am-ammona unay ida, ken nadekketda nga aggagayyem. Agpayso a nadismaya da Marta ken Maria idi saan a linapdan ni Jesus ti ipapatay ni Lazaro, ngem sigurado a nagtalekda a liwliwaen ida ni Jesus bayat ti panagladingitda. Ania ti masursuro dagiti panglakayen ken Jesus? No agbalinda a nadekket kadagiti kakabsat, nalaklakada ida a maipaayan iti naespirituan a tulong.

⁵ Tapno makadanon ni Jesus idiay Betania, masapul a magna iti agarup dua nga aldaw. Mabalin met nga agpeggad ti biagna. Ngamin, pinadas idin dagiti tattao idiay a patayen isuna. (Juan 11:8) Ngem sisasagana ni Jesus nga agsakripisio tapno matulonganna dagiti kakabsatna. Ket kasta ti aramiden ti amin a nasayaat a pastor.

6. Kasano a liniwliwa ni Jesus ni Marta?

⁶ Idi nakasangpet ni Jesus iti asideg ti Betania, uppat nga aldawen a natay ni Lazaro. Gapu iti dayta, saan idi a malapdan ni Marta a panunoten no apay a saan a nasapsapa nga immay ni Jesus tapno napaimbagna koma ti kabsatna. (Juan 11:21) Isu nga ania ti inaramid ni Jesus? Siaayat a tinulonganna ni Marta nga agpokus iti masanguanan, saan ket nga iti napalabas. Impasiguradona kenkuana: “Agbiagto ti kabsatmo.” (Juan 11:23) Kalpasanna, dimngeg a naimbag ni Jesus kadagiti simmaruno nga imbaga ni Marta. Pinabilegna ti pammati ni Marta idi impalagipna kenkuana nga inikkan isuna ti Dios iti pannakabalin a mangpagungar kadagiti natay. (Juan 11:​24, 25) Ania ti masursuro dagiti panglakayen? Maparegtada dagiti kakabsat no siaanus a dumngegda kadakuada ken pabilgenda ti pammatida kadagiti kari ti Dios.

7. Ania ti reaksion ni Jesus idi makitana nga agladladingit dagiti kapamilia ken gagayyem ni Lazaro? (Kitaen met ti ladawan.)

⁷ Sakbay a pagungaren ni Jesus ni Lazaro, kinitana dagiti tattao iti asideg ti tanem. Nakitana nga agsangsangit ni Maria a kabsat ni Lazaro ken ti dadduma pay nga adda sadiay. Ania ti narikna ni Jesus idi makitana dayta? “Nagasug ti pusona ket naladingitan.” Sa idi kuan, “nagsangit.” (Juan 11:​33, 35) Talaga a mannakipagrikna ni Jesus! Nariknana ti saem a marikriknada ket natukay ti puso dagiti tattao idi nakitada nga ipatpateg ida ni Jesus. (Juan 11:36) Ania ti masursuro dagiti panglakayen? Ikagumaan ti maysa a nasayaat a pastor a tarusan ti marikrikna dagiti kakabsat.—Roma 12:15.

8. Kasano a sinigurado ni Jesus nga agtultuloy ti trabaho a panangipastor uray no addanton isuna idiay langit?

⁸ Inyulidan ni Jesus ti panagbalin a nadungngo a naespirituan a pastor. Ket pinaregtana dagiti pasurotna a mangaramid iti dayta. Kalpasan ti panagungar ni Jesus, imbagana ken apostol Pedro ken iti dadduma pay nga apostol nga itultuloyda nga aywanan dagiti karnerona. Inggunamgunamna a masapul a maipastoran dagiti “urbon,” wenno ‘babassit a karnerona.’b (Juan 21:​15-17) Saan a pulos linipatan ni Pedro dayta a pammaregta ni Jesus. Ngamin, uray adu a tawenen ti napalabas, impakpakaasina kadagiti padana a panglakayen nga itultuloyda nga aywanan dagiti babassit a karnero nga ipatpateg ni Jesus.—1 Ped. 5:​1, 2.

DAGITI ABILIDAD KEN KUALIDAD TAPNO AGBALIN A NASAYSAYAAT A PASTOR

9. Apay a maibagatayo a nadagsen ti responsabilidad dagiti papastor? (Aramid 20:28)

⁹ Imparegta ni apostol Pablo kadagiti panglakayen iti Efeso a seriosuenda wenno igaedda ti trabaho a panangipastor. (Basaen ti Aramid 20:28.) Ket kasta met laeng ti ar-aramiden ita dagiti panglakayen a nangitalkan ni Jesus iti dayta a sagrado a trabaho. Imbaga ti panglakayen a ni David: “Kas man la personal nga ibagbaga ni Jesus kaniak, ‘Makitkitam dagita a babassit a karnerok? Kukuak ida, ngem kasapulak ti tulongmo tapno maaywanak ida.’” Nagdagsen la ketdi dayta a responsabilidad! Isu a no dadduma, mabalin nga agduadua ti maysa a panglakayen no kabaelanna a liwliwaen dagiti natayan, patibkeren dagiti nakapuy, ken paregtaen dagiti maup-upay. (1 Tes. 5:14) Ngem bigbigen dagiti panglakayen a maitungpalda laeng dayta a responsabilidadda gapu ken Jehova a mangpabpabileg kadakuada. (Fil. 4:13) Ngem siempre, adda ti maaramidan ti tunggal panglakayen a mangpasayaat kadagiti abilidad ken kualidadna tapno lallalo pay nga agbalin a nasayaat a pastor. Ania ngay ti dadduma kadagita nga abilidad ken kualidad?

10. Ania ti masapul nga aramiden ti maysa a panglakayen tapno agbalin a nasayaat a pastor, ken apay? (Proverbio 27:23 ken footnote)

¹⁰ Am-ammuem a naimbag dagiti karnero. (Basaen ti Proverbio 27:23 ken footnote.) Kastoy ti kuna ti maysa a patarus iti daytoy a bersikulo: “Ammuem ti amin a mabalinmo a maammuan maipapan kadagiti karnerom.”c Siempre, respetuentayo ti personal a biag dagiti kakabsat. (1 Ped. 4:15) Ngem kuna ni David a nadakamaten: “Satayo laeng makaipaay iti epektibo a balakad a naggapu iti Biblia no maawatantay nga umuna dagiti problema dagiti kakabsat.”

11. Kasano a magunggonaan dagiti kakabsat no dumngeg a naimbag ken makipagrikna ti maysa a panglakayen?

¹¹ Dumngegka a naimbag ken makipagriknaka. Maammuan dagiti panglakayen ti talaga a kasapulan dagiti kakabsat no dumngegda a naimbag kadakuada. (Sant. 1:19) Kitaentayo no kasano a tinulongan dagiti panglakayen ti sister a ni Catherine. Adda tallo a babbalasangna, ngem pinanawan ida ni lakayna. Imbagana: “Idi kinomustadak dagiti panglakayen, dimngegda a naimbag iti tunggal sao nga imbagak. No man adda saludsodda, nakaan-annadda tapno saanak a masaktan. Isu a nariknak a maipatpategak, maseknanda kaniak, ken ay-ayatendak. Nariknak a talaga a kayatda a matarusan ti rigat a mapaspasarak ken ti saem a marikriknak. Diak pulos maliplipatan dayta a panagsasaritami ta impalagipda nga uray no pinanawannakami ni lakayko, saannakami pulos pinanawan ni Jehova.”

12. Kasano a sieepektibo a mausar dagiti panglakayen ti Biblia no ag-shepherding-da?

¹² Agusarka kadagiti teksto a maibagay iti kasapulan ti tunggal karnero. (Tito 1:​7, 9) No ammo ti maysa a panglakayen dagiti problema a pakaipaspasanguan dagiti kakabsat, nalaklakana ida a matulongan.d Imbaga ti maysa a panglakayen a ni Andrew: “Ikagkagumaak ti mangbirok kadagiti prinsipio ken salaysay iti Biblia a maibagay iti kasapulan dagiti kakabsat. Ket adda makatultulong kaniak. Kitkitaek ti publikasion a Dagiti Teksto Para iti Panagbiag kas Kristiano.” Dayta met laeng a publikasion ti us-usaren ti eksperiensiadon a panglakayen a ni Elihú. Imbagana: “No kasdiay nga agsagsaganaak a mapan ag-shepherding, kanayon a kitkitaek dagiti seksion a ‘Panagdandanag,’ ‘Pannakadismaya,’ ken ‘Pannakaupay.’ Dagita ngamin ti dadduma kadagiti inaldaw a marikrikna dagiti kakabsat ket adda dagiti makaparegta a teksto kadagita a seksion a makatulong kadakuada.” Imbaga ni Catherine a nadakamat iti napalabas a parapo: “Adda ti teksto nga imbasa kaniak ti maysa a panglakayen, ti Isaias 26:3. Dayta ti maulit-ulit a binasami nga agiina. Dayta a teksto ti nangliwliwa kadakami kadagiti aldaw a saanmin nga ammo ti aramidenmi.”

13. Kasano nga agbalin ti maysa a panglakayen a nalaka a maas-asitgan? (Kitaen met dagiti ladawan ken ti kahon nga “Agkakabsatkayo Amin.”)

¹³ Agbalinka a nalaka a maas-asitgan. Uray no nakabis-busy idi ni Jesus, kanayon latta nga adda tiempona para kadagiti tattao, agraman dagiti ubbing. (Luc. 18:​15, 16) Ania ti masursurotayo? Ti maysa a nasayaat a pastor ket daydiay mangiwaywaya iti panawenna para iti amin, ubing man wenno nataengan. Mabalin a makisarita dagiti panglakayen kadagiti kakabsat sakbay ken kalpasan dagiti gimong, uray apagbiit laeng. Iti kasta, maiparikna dagiti panglakayen a posible nga agbalin a gagayyem ida dagiti kakabsat. Imbaga ti maysa a sister a ni Lauren: “Nalaklakak a maasitgan daydiay panglakayen a kanayon a mangkomkomusta kaniak ken mangibagbaga iti, ‘Bagaannak lang a no adda kasapulam.’ Isu nga inton adda nadagsen a problemak, mas komportablen diay riknak nga agpatulong kenkuana ta ammok nga ipatpategnak ken kanayon a nakasagana a tumulong kaniak.”

14. Ania ti masursurom iti kapadasan ni Juan?

¹⁴ Ipakitam ti ayat. Imbaga ni Jesus a ti pakabigbigan dagiti pudno nga adalanna ket ti ayatda iti maysa ken maysa. (Juan 13:35) Ket daydiay met laeng ti pakabigbigan ti maysa a pudno a pastor—ti ayatna kadagiti karnero ni Jehova. Inyestoria ni Juan a maysa a panglakayen itan no kasano a tinulongan idi ti maysa a naayat a pastor. Inaminna: “Idi agad-adalak iti Biblia, adda idi dagiti tiempo a nakababbaba ti emosionko ken kasla nakakapkapuy ti espiritualidadko. Ngem gapu iti ayat ti maysa a panglakayen, naitultuloyko latta ti agadal ken makigimong. Tinulongannak tapno diak pulos pampanawan ni Jehova. Imbag laengen ta inan-anusannak dayta a panglakayen ken impariknana ti ayatna kaniak. Gapu iti dayta, nakitak ti bagik a kas iti panangkita ni Jehova kaniak ken napabilegak a di pulos sumuksuko.”

APAY A MAKAPARAGSAK TI TRABAHO A PANAGIPASTOR?

15. Apay a makaparagsak ti trabaho a panagipastor? (Aramid 20:​31, 35)

¹⁵ Saan a kanayon a nalaka ti trabaho a panagipastor. Inamin ngarud ni Pablo a gapu iti ayat ken pannakaseknanna kadagiti karnero ni Jehova, adda dagiti tiempo a madandanagan ken uray la saan a makaturog iti rabii. (2 Cor. 11:​27, 28) Ngem idi linagipna ti amin a sakripisiona a mangipastor iti kongregasion, nalagipna ti imbaga ti nasayaat a pastor a ni Jesu-Kristo: “Naragragsak ti mangted ngem ti umawat.” (Basaen ti Aramid 20:​31, 35.) Kasta met laeng ti narikna ni Javier a maysa a panglakayen iti nasuroken a 30 a tawen. Imbagana: “No i-shepherding-ko dagiti kakabsat, lallalo nga umun-uneg ti pammatik ken ayatko ken Jehova. Ngamin, kanayon a maipalpalagip kaniak no kasano kainteresado ni Jehova iti tunggal maysa nga adipenna a mangay-ayat ken agserserbi kenkuana.”

16. Apay nga imbaga ni Pablo a ti trabaho a panagipastor ket kas iti sakripisio ti maysa nga ina?

¹⁶ Iti adu a pamay-an, ti ayat ti maysa a nasayaat a pastor ket kas iti managsakripisio nga ayat ti maysa nga ina. Impada ni Pablo ti bagina iti maysa nga ina idi linagipna dagiti sakripisiona para kadagiti kakabsat idiay Tesalonica. (1 Tes. 2:​7, 8) Nakaad-adu ti isaksakripisio ti maysa nga ina para iti anakna, ngem kakuykuyog met dayta ti adu a ragsak. No makitkita ti maysa nga ina a dumakdakkelen ti anakna, nakaragragsak la ketdi isuna. Ket kasta met laeng ti narikna ni Pablo idi makitkitanan ti panagrang-ay dagiti kakabsat idiay Tesalonica. (2 Tes. 1:​3, 4) Ita, nakaragragsak met dagiti managsakripisio a panglakayen no tultulonganda ti dadduma ken no makitkitada a rumangrang-ayen dagiti tultulonganda. Imbaga ni Miguel, ti panglakayen a timmulong ken Juan, a nadakamat itay: “Nagdakkel a pribilehio a matulongan ni Juan a maaddaan kadagiti Nakristianuan a kualidad. Ket ita, nakaragragsakak ta maysa isunan a panglakayen.”

17. Ania ti maap-apresiarmo kadagiti papastor a dinutokan ni Jehova?

¹⁷ Agyamyamantayo ta adda dagiti matalek a papastor a dinutokan ni Jehova kadagitoy maudi nga al-aldaw. Makitkitatayo nga ar-aramidenda ti amin a kabaelanda a mangtulad iti ulidan ni Jesus, ti nasayaat a pastor. Ap-apresiarentayo met ti panagreggetda a mangpasayaat kadagiti kualidad ken abilidad a kasapulanda a mangbalakad, mangpabileg, ken mangliwliwa kadatayo. Ipatpategtayo ida, ngem nangnangruna nga ipatpateg ida ni Jehova!—1 Tes. 5:​12, 13.