Itultuloymo ti Makigayyem Kada Jehova ken Jesus

1. Ania ti mangipakita a talaga a kayat ni Jehova nga am-ammuen ken ayaten isuna dagiti tattao?

PINARSUANATAYO ni Jehova nga addaan iti tarigagay a makigayyem kenkuana.a Kayatna nga am-ammuen ken ayaten isuna dagiti tattao. Ti agpayso, am-ammo ken ay-ayatenna ti amin a mayat a makigayyem kenkuana. Dengdenggenna dagiti kararagda ken ipapaayna ti tulong ken panangiwanwan a kasapulan ti tunggal maysa kadakuada. (Sal. 139:​1-4) Talaga a makaparagsak a maammuan a magayyemtayo ti Namarsua kadatayo ken kayatna ti makigayyem iti tunggal maysa kadatayo!

2. Apay a masiguradotayo a posible a magayyemtayo ni Jehova uray no imperpektotayo?

² Idi nagbasol da Adan ken Eva, nadadael ti pannakigayyemda ken Jehova. Kas resultana, nayanaktayo amin a saanen a gayyem ti Dios. (Roma 5:10) Isu a baka mapanunottayo nga imposiblen a magayyemtayo ni Jehova. Ngem laglagipentayo ti imbaga ni Jesus: “Amin a banag ket posible iti Dios.” (Mar. 10:27) Ania ngarud ti inaramid ni Jehova tapno posible a magayyemtayo isuna? Insakripisiona ti mismo nga Anakna. Ipakita dayta a talaga a kayatna nga agbalintayo a gayyemna. (1 Juan 4:​9, 10) Agyamyamantayo unay iti inaramid da Jehova ken Jesus ta posiblen a magayyemtayo ida.—Juan 15:​9, 10.

3. Kasano a naiduma ti pannakigayyemtayo ken Jehova iti pannakigayyemtayo iti padatayo a tao?

³ Ti pannakigayyemtayo iti mannakabalin-amin a Dios ket naiduma iti pannakigayyemtayo iti padatayo a tao. Kas Namarsua kadatayo, adayo a nangatngato ni Jehova ngem kadatayo. Isu a nagdakkel ken naidumduma a pribilehio ti makigayyem kenkuana. (Sal. 15:1) Iti daytoy nga artikulo, ammuentayo nga umuna no apay a masiguradotayo a kayat ni Jehova nga agbalintayo a gayyemna. Kalpasanna, adalentayo no apay a ni Jehova ti kasayaatan pay laeng nga agbalin a Gayyem ti maysa. Ken maudi, pagsasaritaantayo no kasanotayo a magayyem da Jehova ken Jesus.

KAYAT NI JEHOVA NGA AGBALINTAYO A GAYYEMNA

4. Ania ti mabalin a mapanunottayo no dadduma?

⁴ Ammotayo nga iyaw-awis kadatayo ni Jehova ti biag nga agnanayon. (Roma 6:23) Ngem gapu ta imperpektotayo, makaaramidtayo iti adu a kamali. Isu a no dadduma, baka mapanunotmo: ‘Talaga kadi a kayat ni Jehova nga agbalinak a Gayyemna?’ Kitaentayo itan no ania ti makatulong kadatayo tapno masiguradotayo dayta.

5. Apay a masiguradotayo a talaga a kayat ni Jehova nga agbalintayo a Gayyemna? (Kitaen met ti ladawan.)

⁵ Nagdakkel ti imbayad ni Jehova tapno maisalakantayo—ti biag ti bugbugtong nga Anakna. (Juan 3:16) Isu a masiguradotayo a talaga a kayat ni Jehova nga agbalintayo a Gayyemna. Inaramid dayta ni Jehova kalpasan la unay a nagbasol da Adan ken Eva. (Gen. 3:15) Ngem uray no nagbasolda ken natawidtayo dayta a basol, saan a dayta ti nangpasardeng ken Jehova nga agbalin a naayat nga Ama. (Jer. 31:3) Isu nga uray no managbasoltayo, nalawag a makitatayo kadagiti inaramidna a talaga a kayatna nga agbalintayo a Gayyemna.

6. Ania ti ar-aramiden ni Jehova tapno tulongannatayo nga umasideg kenkuana? (Santiago 4:8)

⁶ Saan la a basta kayat ni Jehova a magayyemtayo isuna. Parparegtaennatayo met nga agbalin a nadekket kenkuana. (Basaen ti Santiago 4:8.) Ammona nga imperpektotayo. Ngem ay-ayatennatayo latta ken tultulonganna ti tunggal maysa kadatayo a mangam-ammo a naimbag kenkuana. (Juan 6:44) Parparegtaennatayo a kanayon a makisarita kenkuana. Kayatna nga ibagatayo dagiti pampanunoten ken marikriknatayo, uray dagiti bambanag a mabalin a saantayo a maibaga iti dadduma. (Un. 2:19; Fil. 4:​6, 7) Saanna laeng a denggen dagiti kararagtayo. Sungsungbatanna met dagita. (Mat. 7:​7, 8) Isu a nagadu ti rason tapno mamatitayo a talaga a kayat ni Jehova nga agbalintayo a gayyemna. Ammuentayo itan no apay a ni Jehova ti kasayaatan pay laeng nga agbalin a Gayyem ti maysa.

NO APAY A NI JEHOVA TI KASAYAATAN PAY LAENG NGA AGBALIN A GAYYEM TI MAYSA

7. Ania a kualidad ti ipakpakita ni Jehova kadagiti gagayyemna, ken ania ti kaipapanan dayta para kadatayo? (Exodo 34:6)

⁷ Ipakpakita ni Jehova ti napudno nga ayatna. Ay-ayaten ni Jehova ti amin a tattao. Ngem espesial ti panangtratona kadagiti gagayyemna. Ipakpakitana kadakuada ti napudno nga ayatna. (Sal. 4:3) Apay a nagpateg dayta? Ti ngamin napudno nga ayat ket ti ayat a naibatay iti debosion ken kinasinged. (Kitaen ti Glosario, “Napudno nga ayat.”) Nasurok a mamin-20 nga ibaga ti Biblia kadatayo a ti napudno nga ayat ni Jehova ket aglaplapusanan, wenno dakkel. (Basaen ti Exodo 34:6.) Ania ti kayat a sawen dayta para kadatayo? No agbalintayo a gayyem ni Jehova, saannatayto pulos panawan. Itultuloynatayo nga ayaten uray no ammona nga imperpekto ken agkamalitayo. Ket gapu iti napudno nga ayatna, pakawanen ken tulongannatayo.—Sal. 103:​11, 12.

8. Kasano nga impakita ni Jehova a saanna a pulos linipatan dagiti gagayyemna a da Abraham ken David? (Kitaen met ti ladawan.)

⁸ Saan a pulos lipaten ni Jehova dagiti gagayyemna. Kasanotayo nga ammo? Panunotentayo daytoy. Ginasut a tawen idin a natay ni Abraham. Ngem inawagan latta ni Jehova iti “gayyemko.” (Isa. 41:8) Ni met ngay Ari David? Inkari ni Jehova a pagtalinaedenna ti tronona iti agnanayon. (1 Cron. 17:​11-17) Linipatan kadi ni Jehova dayta a karina? Saan a pulos. Ngamin, uray no ginasuten a tawen ti napalabas idi inkarina dayta, imbaga ni Jehova nga itedna ken Jesus “ti trono ni David nga amana.” (Luc. 1:​32, 33) Ket idi 1914, tinungpal ni Jehova ti karina idi insaadna ni Jesus kas ti Mesianiko nga Ari iti trono ni David.

9. Ania ti masursurom ken Hanna? (Kitaen met ti ladawan.)

⁹ Ngem baka mapampanunotmo: ‘Siempre, espesial da Abraham ken David. Ngem siak ngay? Ordinarioak lang nga adipen ni Jehova ken bassit lang ti maar-aramidak.’ No kasta ti marikriknam, adda masursurom no usigem no kasano a tinulongan ni Jehova ni Hanna. Adda asawa ni Hanna, ni Elkana. Ngem ti rigatna, adda pay sabali nga asawa ni lakayna, ni Penina. Lupes la ngaruden ni Hanna, kanayon pay nga in-insultuen ni Penina. (1 Sam. 1:​4-7) Baka napanunot ni Hanna a linipatan isunan ni Jehova. Ngem ania ti inaramidna? Inyanug-ogna ti amin a problemana ken Jehova babaen ti kararag. (1 Sam. 1:​11, 15) Kas sungbat, pinaneknekan ni Jehova a nasayaat isuna a Gayyem para ken Hanna. Dinengngegna ti kararag ni Hanna. Ngem adda pay inaramidna. Pinagsikognab ni Hanna, ket nangipasngay iti anak a lalaki a pinanagananna iti Samuel. (1 Sam. 1:20) Idi agangay, binendisionan ni Jehova ni Hanna iti tallo pay nga annak a lallaki ken dua nga annak a babbai. (1 Sam. 2:21) Talaga nga ipakpakita ni Jehova ti napudno nga ayatna iti amin a gagayyemna, uray kadagidiay makarikrikna a saanda a napateg wenno bassit ti maar-aramidanda.—Jer. 31:3.

10. Apay nga adayo a nasaysayaat ti panangiwanwan ni Jehova ngem ti tao? (Salmo 119:​98-100)

¹⁰ Perpekto ti panangiwanwan ni Jehova. Iwanwanwannatayo ni Jehova ken ipapaayannatayo iti balakad ken sirib. Isuna ti kasayaatan pay laeng a pagpabalakadantayo! (Basaen ti Salmo 119:​98-100.) Ammona ti amin, ken ti kayatna ket daydiay kasayaatan para kadatayo. (Isa. 48:​17, 18) Kitaentayo dagiti tattao ita. Okey laeng kadakuada uray agbayadda iti dakkel tapno laeng makapagpabalakadda kadagiti “eksperto” no kasano ti agbalin a naballigi. Ngem saan kadi nga adayo a nasaysayaat kadatayo? Ngamin, ti pagpabpabalakadantayo ket daydiay mannakabalin-amin a Dios iti uniberso, ni Jehova. Perpekto ti panangiwanwanna ken kanayon a nakasagana a tumulong kadatayo. Ken daytoy pay. Saantayo a kasapulan ti agbayad. Dinto pulos maturog ni Jehova wenno mabannog, ken kanayon a dengdenggennatayo no agkararagtayo. (Sal. 121:​1-4) Isu a no denggentayo dagiti balakad ni Jehova, kanayon a pagsayaatantayo dayta.—Sal. 1:​2, 3.

11. Ania ti mangipakita a naparabur a Gayyem ni Jehova?

¹¹ Naparabur ni Jehova. Ipakpakitana dayta a kualidadna iti amin nga ar-aramidenna. Kas pagarigan, impaayna ti biagtayo ken ti amin a kasapulantayo tapno maganastayo ti agbiag. (Sal. 145:16; Ara. 14:17) Sipaparabur met nga ipapaayannatayo iti sirib tapno makaaramidtayo kadagiti nasayaat a desision no adda problematayo. (Sant. 1:5) Sisasagana met a mangpakawan kadatayo no makabasoltayo. Ngem saan la a dayta. Uray no imperpektotayo, kanayon nga iparpariknana a napategtayo kenkuana, maikaritayo a maayat, ken marespeto. Impaayna met ti kasayaatan a regalona kadatayo, ti biag ti ipatpategna nga Anak, tapno agbiagtayto iti agnanayon. Talaga a nakaparparabur a Gayyem ni Jehova! Ngem kasanotayo ngarud nga agbalin a gayyemna iti agnanayon?

KASANOTAYO A MAGAYYEM NI JEHOVA?

12. Ania ti masursurom iti Hebreo 11:6 no maipapan iti pannakigayyem ken Jehova?

¹² Ekspektaren ni Jehova nga aramidentayo ti pasettayo tapno maitultuloytayo ti makigayyem kenkuana. (Basaen ti Hebreo 11:6.) Tapno agbalintayo a gayyem ni Jehova, masapul a mamatitayo a kayatnatayo a gunggonaan. Ngem adda pay ti tallo a banag a masapul nga aramidentayo.

13. Ania ti kayat a sawen ti panagbuteng iti Dios?

¹³ Masapul nga agbutengtayo ken Jehova. Ibagbaga ti Salmo 25:14: “Nasinged a gagayyem ni Jehova dagidiay agbuteng kenkuana.” Ania ti kayat a sawen ti panagbuteng iti Dios? Kayat a sawen dayta nga ay-ayatentayo unay isuna isu a saantayo a kayat a masaktan. Isu a no agaramidtayo iti desision, kanayontayo nga ikabilangan ti ibagbaga ti Saona. (Prov. 3:​5, 6) Ket no aramidentayo ti ibagbaga ti napudno a Gayyemtayo, makaaramidtayo iti nasayaat a desision ken agballigitayo. Isu met la gayam nga ibagbaga ti Proverbio 9:10 a ti panagbuteng iti Dios “ti pangrugian ti sirib.”

14. Ania ti dadduma a pamay-an a maipakitatayo a napudnotayo ken Jehova?

¹⁴ Masapul a napudnotayo ken Jehova. Napudno ni Jehova kadagiti gagayyemna, isu nga ekspektarenna nga agbalintayo met a napudno kenkuana. (2 Sam. 22:26; Prov. 3:32) Ania ti dadduma a pamay-an a maipakitatayo a napudnotayo ken Jehova? Pagbalinentayo isuna a numero uno iti biagtayo. Ibagatayo met iti dadduma ti maipapan kenkuana ken dagiti nagsasayaat a kualidadna, kas iti inaramid ni Jesus. (Mat. 28:​19, 20) Ken agtalinaedtayo a matalek ken Jehova aniaman ti aramiden dagiti bumusbusor kadatayo. Ditay koma ipalubos nga adda aniaman a mangdadael iti pannakigayyemtayo iti napudno a Gayyemtayo, ni Jehova.

15. Kasanotayo a maipakita ti napudno nga ayat iti dadduma?

¹⁵ Masapul nga ipakitatayo ti napudno nga ayat iti dadduma. Kayat ni Jehova a tuladentayo isuna. Isu nga ipakitatayo ti napudno nga ayat kadagiti kakabsat, dagiti gagayyem ni Jehova. Saantayo met a liplipatan dagiti nasayaat nga ar-aramiden ti dadduma para kadatayo. Ken aniaman ti mapasamak, ditay pulos pampanawan ida. Mangbiroktayo met iti pamay-an tapno agbalintayo a naimbag ken naparabur kadakuada. Kayat ni Jehova nga ipakitatayo ti ‘napudno nga ayat ken ayatentayo’ dayta. (Mik. 6:​8, ftn.) Iti sumaruno nga artikulo, ammuentayo dagiti espesipiko a pamay-an no kasanotayo a maipakita ti ayat iti dadduma. Ngem ita, ammuentayo pay nga umuna no kasanotayo a magayyem ni Jesus.

KASANOTAYO A MAGAYYEM NI JESUS?

16-17. (a) Kasanotayo nga ammo a kayat ni Jesus nga agbalintayo a gayyemna? (b) Kasano a naiduma ti pannakigayyemtayo ken Jesus iti pannakigayyemtayo ken Jehova?

¹⁶ Kasanotayo nga ammo a kayat ni Jesus nga agbalintayo a gayyemna? Sakbay pay a nayanaktayo, intednan ti biagna para kadatayo. Imbagana: “Awan ti dakdakkel nga ayat ngem iti daytoy, nga ited ti maysa ti biagna para kadagiti gagayyemna.” (Juan 15:13) Talaga a nagdakkel a pammaneknek dayta a kayatnatayo nga agbalin a gayyemna!

¹⁷ Kayat ni Jesus nga agbalin ti tunggal maysa kadatayo a nadekket a gayyemna. (Mat. 11:​28-30; Juan 15:15) Ngem naiduma ti pannakigayyemtayo ken Jesus iti pannakigayyemtayo ken Jehova. Kasano? Saantayo nga agkarkararag wenno agdaydayaw ken Jesus. (Mat. 4:10; 6:9) Ngem no panunotentayo ti amin nga inaramid ni Jesus para kadatayo, matignaytayo nga agyaman kenkuana ken agbalin a nadekket a gayyemna.

18. Ania ti ar-aramiden ni Jesus para kadatayo?

¹⁸ Kas gayyemtayo, nakaad-adu dagiti ar-aramiden ni Jesus para kadatayo. Kasanotayo nga ammo? Impakpakauna ni propeta Isaias a ni Jesus ti agbalin a “Masirib a Mamalbalakad,” “Agnanayon nga Ama,” ken ti “Prinsipe ti Kappia.” (Isa. 9:6) Kas ti “Masirib a Mamalbalakad,” ipapaayannatayo kadagiti praktikal ken makaispal-biag a balakad. Inikkan met ni Jehova ni Jesus iti gundaway nga agbalin nga “Agnanayon nga Ama” para kadagiti addaan iti namnama nga agbiag nga agnanayon ditoy daga. (Juan 11:​25, 26) Maawatanna met dagiti pagkapuyantayo ta “nasuboken iti amin a banag.” (Heb. 4:15) Ken kas ti “Prinsipe ti Kappia,” tultulongannatayo a maaddaan iti natalna a relasion iti Amatayo a ni Jehova. Talaga a maibagatayo a nakasaysayaat a gayyem ni Jesus!

19. Kasanotayo a magayyem ni Jesus? (Juan 15:14) (Kitaen met ti ladawan.)

¹⁹ Kasanotayo a magayyem ni Jesus? (1 Ped. 1:8) Adalentayo a naimbag dagiti imbaga ken inaramidna a masarakan kadagiti Ebanghelio. Ken no agaramidtayo iti desision, surotentayo ti balakad ken ulidanna. Raementayo met ti autoridadna ken agtulnogtayo iti panangiwanwanna. (Basaen ti Juan 15:14.) Kasanotayo a maaramid dayta? Maragsakantayo a mangsuporta kadagiti urnos ti kongregasion. Agpasakuptayo met kadagiti us-usaren ni Jesus a mangaywan kadatayo. (Efe. 4:8; Heb. 13:17) Ket no adda ti italek ni Jesus nga asaynment iti kongregasion, ipaaytayo ti kasayaatantayo. Laglagipentayo a makitkita ken ap-apresiaren ni Jesus ti amin a sakripisiotayo tapno agbalintayo a gayyemna.

20. Ania ti mariknam ta gayyemmo da Jehova ken Jesus?

²⁰ Talaga a nagdakkel a pribilehio ti makigayyem iti mannakabalin-amin a Dios ken iti Anakna, ni Jesu-Kristo! Ni Jehova ti kasayaatan a gayyem wenno best Friend-tayo. Ay-ayatennatayo isu a dengdenggen ken sungsungbatanna dagiti kararagtayo. Agtultuloy nga ipapaayna ken ti Anakna dagiti naespirituan a kasapulantayo. (Mat. 5:3) Talaga nga ipatpategtayo ti pannakigayyemtayo kadakuada! Isu a sapay koma ta itultuloytayo ti agbalin a napudno a gayyemda iti agnanayon.