No Kasanotayo a Makigayyem ken Agbalin a Nasayaat a Gayyem

1-2. Ania ti pakarigatan ti adu no maipapan iti pannakigayyem?

KASAPULANTAYO amin ti nasayaat a gagayyem, dagidiay mangayat ken tumulong kadatayo iti man nasayaat ken narigat a kasasaad. Ket saan kadi a nakaragragsakka no agbalinka a kasta a klase ti gayyem iti dadduma? (Ara. 20:35) Kasapulantayo met dagiti gagayyem tapno agtultuloytayo nga agserbi ken Jehova ken agbalintayo a naragsak. Ania ngarud ti aramidentayo? Makigayyemtayo kadagiti gagayyem da Jehova ken Jesus. (Sal. 119:63) Ngem adu itatta ti marigatan a makigayyem ken maaddaan kadagiti gagayyem nga agpaut iti agnanayon. Sika ngay? Kasta kadi met ti marikriknam?

² Baka marigatanka a makigayyem kadagiti kakabsat iti kongregasion. No kasta, ania ti mabalinmo nga aramiden? Ti maysa ket iyaplikarmo dagiti prinsipio a naadaltayo iti napalabas nga artikulo maipapan iti pannakigayyem kada Jehova ken Jesus. Ket iti daytoy nga artikulo, ammuentayo ti lima a makatulong kenka no kasanoka a makigayyem ken maaddaan kadagiti gagayyem nga agpaut iti agnanayon. Ngem usigentayo nga umuna dagiti mabalin a manglaplapped kadatayo a maaddaan kadagiti nadekket a gagayyem. Ammuentayo met no kasanotayo nga agbalin a kasta a gayyem.

DAGITI LAPPED ITI PANNAKIGAYYEM

3. Ania ti maysa a rason a marigatantayo a maaddaan iti nadekket a gagayyem, ken kasanotayo a malabanan dayta?

³ Bagim laeng ti pampanunotem. Adu a tattao ita ti bagida laeng ti kanayon nga iyun-unada. (2 Tim. 3:​1, 2) Ngem saan a nasayaat nga ugali dayta ti maysa a gayyem. Tapno maaddaantayo kadagiti nadekket a gagayyem, masapul a saan laeng a ti bagitayo ti iyun-unatayo. Imbes ketdi, sursuruentayo nga iyun-una ti pagimbagan dagiti kakabsat. Tinignay ti Dios ni apostol Pablo a mangparegta kadatayo a ‘sapulentayo dagiti pagimbagan ti dadduma, saan la a dagiti bukodtayo a pagimbagan.’—Fil. 2:​3, 4.

4. Apay a liklikantayo koma nga isinsina ti bagitayo? (2 Juan 12) (Kitaen met dagiti ladawan.)

⁴ Isinsinam ti bagim. No isinsinatayo ti bagitayo, baka agbalintayo a managdandanag ken saantayton a kayat a makadua ti dadduma. Intono kuan, baka malidlidaytayton ken madadael pay ketdi ti pannakigayyemtayo ken Jehova. (Prov. 18:1) Agpayso a no dadduma, kasapulantay met ti agmaymaysa. Ngem pagdaksantayo no kanayontayo nga isinsina ti bagitayo. Kas pagarigan, baka puro social media laengen ti ar-aramidentayo. Apay a delikado dayta? Ngamin, agpayso nga adu ti mabalin a magayyemtayo online. Ngem manmano laeng ti agbalin a pudno a gagayyemtayo. Ania ngarud ti solusion? Mangiwayatayo iti tiempo a personal a makaduatayo dagiti kakabsat. (Basaen ti 2 Juan 12.) Ket no personal a kaduatayo ida, maparegtatayo ti maysa ken maysa.—Heb. 10:​24, 25.

5. Apay a napateg nga ibagam ti pampanunotem ken marikriknam iti dadduma?

⁵ Saan a kayat ti dadduma nga ibaga ti pampanunoten ken marikriknada. Para kadakuada, maymayat a bukbukodanda lattan. Saan met ketdi nga ibagbaga ti Biblia a kanayon nga ibagatayo ti pampanunoten ken marikriknatayo iti dadduma. (Prov. 13:3; Ecl. 3:7) Ngem pinarsuanatayo ni Jehova a kasapulantayo met nga iruar ti marikriknatayo. Isu a no saantayo a pulos a kayat nga ibaga ti pampanunoten ken marikriknatayo iti dadduma, baka marigatantayo a maaddaan kadagiti nasayaat a gagayyem. Ngem no agibagaka iti maysa a gayyemmo, apresiarenna dayta ta ipakitana nga agtaltalekka kenkuana. Agbalinkayto pay a nadekdekket. Kasta ti inaramid ni Jesus. Saanna a binukbukodan ti marikriknana. Imbagana dayta kadagiti adalanna. (Luc. 19:41; Juan 11:35) Dayta ti nakatulong kenkuana a maaddaan iti adu a nadekket a gagayyem.—Juan 15:15.

6. Kasanotayo a malabanan ti kinamanagbabaintayo? (Kitaen met ti kahon a “Dagiti Aramidem Tapno Malabanam ti Kinamanagbabainmo.”)

⁶ Managbabainka. Dadduma ti managbabain wenno sobra a madandanagan iti mabalin a pampanunoten wenno maibaga ti dadduma kadakuada. No kasta ti marikriknam, agkararagka ken Jehova ket ibagam a tulongannaka a saan a mabuteng a makisarita iti dadduma. Kalpasanna, aramidem ti inkararagmo. (Fil. 2:13) Ania pay? Panunotem no apay nga ay-ayatem dagiti kakabsat, ken ikagumaam nga ipakita dayta. (Juan 15:12) Kasanom a maaramid dayta? Kadagiti gimong, mabalinmo nga iseman daydiay saanmo pay unay nga am-ammo, sa damagem no komusta ti aldawna. Kalpasanna, dumngegka a naimbag iti ibagana.

7. Ania ti mabalin a mariknatayo no dadduma, ngem ania ti nasayaat nga aramidentayo?

⁷ Mariknam a nabambannogkan isu a saanmo a kayan ti makisarita wenno makikadua iti dadduma. No dayta ti marikriknam sa adu pay ti masapul nga aramidem iti kada aldaw, talaga a mabannogka. Isu a baka mariknam nga awanen ti pigsam wenno orasmo a makigayyem. Agpayso a no dadduma, kasapulam ti agmaymaysa ken aginana. (Ecl. 4:6) Ngem dimo liplipatan a kasapulam met dagiti gagayyem. Ket siempre, tapno maaddaanka kadagiti gagayyem, masapul a mangiwayaka iti tiempo a makikadua iti dadduma. Isu nga uray no mariknam a nabambannogkan ken kaykayatmo laengen ti agmaymaysa, ikagumaam ti mangiwaya iti tiempo a makikadua kadagiti kakabsat. Makatulong dayta tapno maaddaanka kadagiti gagayyem a mangparegta ken tumulong kenka nga agtultuloy nga agserbi ken Jehova. (Prov. 11:25) Dimo la ammo, isuda gayam ti kasapulam tapno mabang-aranka!

8. (a) Apay a masapul a makigayyemtayo iti agduduma a tattao? (b) Ania ti masursurotayo iti imbaga ni apostol Pablo iti gayyemna a ni Timoteo? (Filipos 2:​19-22)

⁸ Pampanunotem a manmano laeng ti magayyemmo. Baka awan ti kaedadmo wenno kapadpadam iti paginteresan iti kongregasionyo. Ngem panunotem daytoy. Saan nga agtultuloy a dumakkel ti maysa a mula no naikabil iti bassit a paso wenno masetera ta malapdan nga agkarayam dagiti ramutna. Kasta met laeng kadatayo. No dagiti laeng kaedadtayo wenno kapadpadatayo iti nalikudan wenno paginteresan ti pilpilientayo a pakigayyeman, laplapdantayo ti panagmataengantayo kas Kristiano. Saantayo nga arig dumakkel wenno makasursuro iti baro a bambanag, saantayo a mapasayaat ti personalidadtayo, ken dadduma pay. Adda masursurotayo ken apostol Pablo ken iti gayyemna a ni Timoteo. Nagdakkel ti nagdumaanda. Ngem nagbalinda a nadekket nga aggayyem. Kasta met, no makigayyemtayo iti agduduma a kakabsat, naragragsak ken sumayaat ti biagtayo. (Basaen ti Filipos 2:​19-22.) Iti tulong ni Jehova, mapagballigiantayo dagiti lapped tapno maaddaantayo kadagiti nasayaat a gagayyem.

NO KASANO TI AGBALIN A NASAYAAT A GAYYEM

9. Ania dagiti makatulong kenka tapno maaddaanka kadagiti gagayyem?

⁹ Kaaduanna a maibagbaga a tapno maaddaanka iti gayyem, masapul nga agbalinka nga umuna a nasayaat a gayyem. Siempre, masapul nga adda aramidem tapno agbalinka a kasta. Pagsasaritaantayo itan ti lima a makatulong tapno magayyemtayo ti dadduma ken agbalintayo a nasayaat a gayyem: (1) agbalinka a napudno, (2) agbalinka a managyaman, (3) ipakitam ti ayat, (4) agbalinka a manangpakawan, ken (5) agbalinka a naparabur.

10. Apay a masapul nga ipakitatayo ti napudno nga ayat kadagiti gagayyemtayo, ken kasanotayo a maaramid dayta?

¹⁰ Agbalinka a napudno. ‘Dakkel ti napudno nga ayat’ ni Jehova. (Ex. 34:6) Uray no agkamali dagiti gagayyemna, saanna ida a pampanawan. Isu a tapno maparagsakmo ni Jehova, masapul met nga agbalinka a napudno kadagiti gagayyemmo. (Mik. 6:​8, ftn.) Kayatna a sawen, saanmo a pampanawan dagiti gagayyemmo uray no agproblemada. (Prov. 18:24; Roma 12:15) Saanmo met a perperdian ida iti dadduma. Ibagam ketdi dagiti nagsasayaat nga ugalida. (Sal. 15:3) No napudnotayo kadagiti gagayyemtayo, agbalinda met a napudno kadatayo. Ket posible nga addanto aldaw nga uray la ‘irisgoda ti biagda’ para kadatayo!—Roma 16:​3, 4.

11. (a) Apay a nagpateg nga agbalintayo a managyaman kadagiti gagayyemtayo? (b) Ania ti masursurotayo iti imbaga ni Jesus idi nagyaman kenkuana ti maysa a lalaki? (Lucas 17:​11-18) (Kitaen met dagiti ladawan.)

¹¹ Agbalinka a managyaman. Nagpateg nga agbalinka a managyaman tapno maaddaanka iti gayyem ken agbalinka a nasayaat a gayyem. Apay? Ngamin, saandaka a kayat a gayyem no saanka a managyaman. Ngem no managyamanka, kaykayatdaka ta ammom ken ap-apresiarem dagiti maar-aramidanda para kenka. Saanmo met a tagtagibassiten wenno lipaten lattan dagita. Alistoka met nga agyaman. (Basaen ti Lucas 17:​11-18; Col. 3:15) No kanayonka nga agyaman kadagiti gagayyemmo, umuneg ti ayatyo iti maysa ken maysa ken lallalo pay nga agbalinkayo a nadekdekket nga aggagayyem.

12. Ania ti masursurotayo kada Jehova ken Jesus no maipapan iti panangipakita iti ayat? (Juan 11:​3, 5, 33-36; 13:1)

¹² Ipakitam nga ay-ayatem ida. Tapno agbalinka a nadekdekket kadagiti gagayyemmo, masapul nga ay-ayatem ida. (2 Cor. 6:​12, 13 ken ti study note iti bersikulo 13; 1 Ped. 4:8) Adda masursurotayo kada Jehova ken Jesus maipapan iti panangipakita iti ayat. Ammo ni Jesus nga ay-ayaten isuna ni Amana. Ngem idi inawagan isuna ni Jehova iti “dungdungnguek,” permi la ketdi ti ragsakna. (Luc. 3:22) Ibagbaga ken ipakpakita met ni Jehova nga ay-ayatennatayo. Gapu iti dayta, lallalo met nga ayatentayo isuna. (Jer. 31:3) Impakita met ni Jesus nga ay-ayatenna dagiti gagayyemna. Ti agpayso, “inayatna ida agingga iti panagpatingga ti biagna.” (Basaen ti Juan 11:​3, 5, 33-36; 13:1.) Ket ania ti epekto dayta kadagiti adalanna? Natignayda met a mangtulad kenkuana. Kas pagarigan, imbaga ni apostol Pedro nga ay-ayatenna ni Jesus.—Juan 21:​15-17.

13. Kasanotayo a maipakita ti ayat kadagiti gagayyemtayo?

¹³ Matuladtayo da Jehova ken Jesus no ipakitatayo nga ay-ayatentayo dagiti gagayyemtayo. (Roma 12:10; 1 Ped. 1:22) Kasano? Saantayo a mabain a mangibaga nga ay-ayatentayo ida. Ibagatayo met dagiti maap-apresiartayo a nagsayaat a kualidadda. Nakasaganatayo met a tumulong kadakuada. No adda makitatayo nga ar-aramiden ti gayyemtayo a mabalin a pakaisagmakan wenno pakasaktanna, maipakitatayo nga ay-ayatentayo isuna no balakadantayo. (Prov. 27:9) Talaga a nagpateg nga ipakitatayo ti ayat tapno maaddaantayo iti nasayaat a gayyem ken agbalintayo a kasta.

14. Apay a nagpateg a pakawanentayo dagiti gagayyemtayo no mapasaktandatayo?

¹⁴ Agbalinka a manangpakawan. No marigatantayo a mangpakawan, awanto ti agbayag a gayyemtayo. Laglagipentayo a saan nga eks-ekspektaren ni Jehova a perpekto ti amin a maaramidantayo. Isu nga apay koma nga ekspektarentayo dayta kadagiti gagayyemtayo? Ngamin, ti agpayso, uray dagiti nadekket a gagayyemtayo ket masaktandatayo no dadduma. (Ecl. 7:​21, 22) No mapasamak dayta, agpilika: Tuladem kadi ni Jehova a nakasagana a mangpakawan kadagiti gagayyemna wenno saan? No saantayo a ‘suroten dagiti bambanag a mamataud iti talna,’ baka marba laeng ti panaggayyem a pinagrigrigatantayo nga imbangon. (Roma 14:19) Isu a no saantayo a mangpakawan, baka agbalintayo a managpungpungtot, nalaka nga agipempen iti sakit ti nakem, wenno baka awanto payen ti mayat a makigayyem kadatayo. Isu a maymayat a sursuruentayo ti mangpakawan. Ngamin, makatulong dayta tapno maaddaantayo kadagiti nadekket a gagayyem a mangayat kadatayo.—Prov. 17:9.

15. Ania ti maitulongna no naparaburka kadagiti gagayyemmo?

¹⁵ Agbalinka a naparabur. Tapno agbalinka a nasayaat a gayyem, masapul nga agbalinka a naparabur. Iwayaam a makadua dagiti gagayyemmo, ken iranudmo dagiti adda kenka. (Prov. 11:25; Luc. 6:38) Saan a kasapulan a dakkel ti maitedmo wenno maaramidam. Uray awisem lang iti simple a pannangan, awisem a makilugan, ken uray dumngegka laeng iti ibagana ket nagdakkelen a banag tapno agbalinkayo a nadekdekket nga aggayyem. Isu a no nakasaganaka a mangaramid kadagita, saankanto a pulos maawanan kadagiti nasayaat a gagayyem.

ITULTULOYMO TI MAKIGAYYEM KEN AGBALIN A NASAYAAT A GAYYEM

16. Apay a kasapulantayo dagiti nasayaat a gagayyem?

¹⁶ Kasapulantayo dagiti nasayaat a gagayyem. Apay? Ngamin, matulongandatayo nga agbalin a naragsak, agmatalek ken Jehova, ken liwliwaendatayo met iti “amin a tiempo,” uray “no adda rigat.”—Prov. 17:17; 2 Cor. 7:​5-7.

17. Apay a kombinsidotayo a posible a maaddaantayo kadagiti gagayyem nga agpaut iti agnanayon? (Kitaen ti kahon a “Nagbalinda a Napudno nga Aggayyem.”)

¹⁷ No marigatanka a maaddaan kadagiti gagayyem, saanka koma a sumuksuko. Laglagipem dagiti napagsasaritaantayo no kasanoka a maaddaan kadagiti pudno a gagayyem. Ket no addaanka itan kadagiti nasayaat a gagayyem, itultuloymo ida nga ipateg. Agyamyamantayo ta addaantayo iti nagsayaat nga abilidad a makigayyem. Ket ammom, regalo dayta ni Jehova! Isu a no dagiti gagayyemmo ket dagiti mangay-ayat ken Jehova, masiguradom nga agpaut dayta iti agnanayon.