მოციქულთა საქმეები

13 ანტიოქიის კრებაში იყვნენ წინასწარმეტყველები და მასწავლებლები:+ ბარნაბა, სიმონი, რომელსაც ნიგერსაც ეძახდნენ, კირენელი ლუციუსი, მანაენი, რომელსაც განათლება გამგებელ ჰეროდესთან* ერთად ჰქონდა მიღებული, და სავლე. 2 როცა ისინი თაყვანს სცემდნენ იეჰოვას* და მარხულობდნენ, წმინდა სულმა უთხრა მათ: „ბარნაბას და სავლეს+ ის საქმე დაავალეთ, რისთვისაც ამოვირჩიე“.+ 3 მარხვისა და ლოცვის შემდეგ ხელები დაადეს მათ და გაუშვეს.

4 ისინი, წმინდა სულის მიერ გაგზავნილნი, სელევკიაში ჩავიდნენ და იქიდან კვიპროსისკენ გაცურეს. 5 სალამინში რომ ჩავიდნენ, იუდეველთა სინაგოგებში დაიწყეს ღვთის სიტყვის ქადაგება. იოანეც მათთან იყო დამხმარედ.+

6 მთელი კუნძული შემოიარეს; ბოლოს პაფოსში ჩავიდნენ, სადაც შეხვდნენ ერთ იუდეველ ჯადოქარსა და ცრუწინასწარმეტყველს, სახელად ბარიესოს. 7 იგი ერთ ჭკვიან კაცთან, პროკონსულ* სერგიუს პავლუსთან, იყო. პროკონსულმა ბარნაბა და სავლე დაიბარა, რადგან ძალიან უნდოდა ღვთის სიტყვის მოსმენა. 8 ეს ჯადოქარი, რომელსაც ელიმასაც ეძახდნენ („ელიმა“ „ჯადოქარს“ ნიშნავს), შეეწინააღმდეგა მათ და ცდილობდა, პროკონსულისთვის რწმენა შეერყია. 9 სავლე, რომელსაც პავლესაც ეძახდნენ, წმინდა სულით აღივსო, შეხედა მას 10 და უთხრა: „ეშმაკის ნაშიერო, ყოველგვარი მზაკვრობითა და ბოროტებით სავსევ,+ ყოველივე მართლის მტერო, არ მოეშვები იეჰოვას* სწორი გზების გამრუდებას? 11 ხელს აღმართავს შენზე იეჰოვა*, დაბრმავდები და დროებით ვეღარ დაინახავ დღის სინათლეს“. მას მაშინვე თვალთ დაუბნელდა, ხელის ცეცებით დაიწყო სიარული, რომ ვინმესთვის ხელი ჩაეკიდა და გაჰყოლოდა. 12 როცა პროკონსულმა დაინახა, რაც მოხდა, ირწმუნა; განცვიფრებული იყო იგი იეჰოვას* სწავლებით.

13 შემდეგ პავლემ და მისმა თანამგზავრებმა პაფოსიდან გაცურეს და პერგეში ჩავიდნენ, რომელიც პამფილიაში მდებარეობს. იოანე+ ჩამოშორდა მათ და იერუსალიმში დაბრუნდა.+ 14 მათ პერგედან გზა განაგრძეს და პისიდიის ანტიოქიაში ჩავიდნენ. შაბათს სინაგოგაში+ შევიდნენ და დასხდნენ. 15 სინაგოგის წინამძღვრებმა ხალხისთვის კანონისა+ და წინასწარმეტყველთა წიგნების წაკითხვის შემდეგ მათ სთხოვეს: „ძმებო, თუ რამე გამამხნევებელი გაქვთ სათქმელი, თქვით“. 16 პავლე წამოდგა, ხელით ანიშნა, რომ გაჩუმებულიყვნენ, და დაიწყო:

«ისრაელებო და თქვენ, ვინც ღვთისმოშიშები ხართ, მომისმინეთ! 17 ამ ხალხის, ისრაელის, ღმერთმა ჩვენი მამა-პაპა აირჩია, ძლიერ ერად აქცია ეგვიპტეში ხიზნობის დროს და აღმართული მკლავით გამოიყვანა იქიდან.+ 18 უდაბნოში მათ 40 წელი უთმენდა.+ 19 ქანაანის მიწაზე შვიდი ერი ამოწყვიტა და მათი მიწები ისრაელს დაუნაწილა.+ 20 ეს ყოველივე დაახლოებით 450 წელი გაგრძელდა.

ამის შემდეგ დაუნიშნა მათ მსაჯულები, რომლებიც სამუელ წინასწარმეტყველამდე წინამძღოლობდნენ ხალხს.+ 21 მერე მეფე მოითხოვეს+ და ღმერთმა საული გაამეფა, კიშის ძე, ბენიამინის+ ტომიდან, რომელმაც 40 წელი იმეფა. 22 მერე ღმერთმა მის ნაცვლად დავითი გაამეფა,+ რომლის შესახებაც თქვა: „ამოვირჩიე დავითი, იესეს ძე,+ რომელიც მოვიწონე;+ იგი ყველაფერს ჩემი ნებისამებრ გააკეთებს“. 23 მისი შთამომავლობიდან ღმერთმა თავისი დანაპირების თანახმად ისრაელს მხსნელად იესო მოუვლინა.+ 24 მის მოსვლამდე იოანე მთელ ისრაელს უქადაგებდა, რომ მოენანიებინათ და მონათლულიყვნენ.+ 25 თავისი მსახურების დასასრულს იოანე ამბობდა: „ვინ გგონივართ? ვინც თქვენ გგონივართ, ის არა ვარ. ის ჩემ შემდეგ მოდის და მე იმის ღირსიც კი არ ვარ, რომ მას სანდლები გავხადო“.+

26 ძმებო, აბრაამის შთამომავალნო, და თქვენ, ვინც ღვთისმოშიშები ხართ, ხსნის შესახებ ცნობა ჩვენ გვეუწყა.+ 27 იერუსალიმის მკვიდრებმა და მათმა მმართველებმა არ ცნეს ის, არამედ გაასამართლეს, რითაც შეასრულეს წინასწარმეტყველთა წიგნებში ჩაწერილი სიტყვები,+ რომლებიც ყოველ შაბათს ხმამაღლა იკითხება. 28 სიკვდილით დასჯის მიზეზი ვერ უპოვეს,+ მაგრამ პილატეს მაინც მოსთხოვეს, რომ სიკვდილით დაესაჯა იგი.+ 29 როცა შესრულდა ყველაფერი, რაც მასზე იყო დაწერილი, ძელიდან ჩამოხსნეს იგი და სამარხში დაასვენეს.+ 30 მაგრამ ღმერთმა მკვდრეთით აღადგინა იესო;+ 31 ის მრავალი დღის განმავლობაში ეცხადებოდა მათ, ვინც მასთან ერთად წავიდნენ გალილეიდან იერუსალიმში. ახლა ისინი მის შესახებ უქადაგებენ ხალხს.+

32 ამიტომ გაუწყებთ სასიხარულო ცნობას ჩვენი მამა-პაპისთვის მიცემული დანაპირების შესახებ. 33 ღმერთმა ის ბოლომდე შეგვისრულა ჩვენ, მათ შვილებს, და აღადგინა იესო,+ როგორც მეორე ფსალმუნში წერია: „შენ ჩემი ძე ხარ, მე დღეს გავხდი შენი მამა“.+ 34 მკვდრეთით რომ აღადგინა იესო, რომელსაც აღარასოდეს ექნებოდა ხრწნადი სხეული, ამაზე ღვთის ნათქვამიც მოწმობს: „ურყევი იქნება ჩემი თქვენდამი სიყვარული, რაც დავითს აღვუთქვი, რადგან სანდოა ეს აღთქმა“.+ 35 სხვა ფსალმუნშიც წერია: „არ გაიმეტებ შენს ერთგულს გასახრწნელად“.+ 36 დავითი ღმერთს ემსახურებოდა მთელი სიცოცხლე. იგი მოკვდა, თავის მამა-პაპასთან დაასვენეს და გაიხრწნა;+ 37 ის კი, ვინც ღმერთმა აღადგინა, არ გახრწნილა.+

38 ამიტომ, ძმებო, გაუწყებთ, რომ მისი მეშვეობით გეპატიებათ ცოდვები.+ 39 რაშიც მოსეს კანონით+ ვერ ჩაითვალეთ უდანაშაულოდ, მისი მეშვეობით ჩაითვლება უდანაშაულოდ ყველა მორწმუნე.+ 40 ამიტომ ფრთხილად იყავით, რომ თქვენზე არ შესრულდეს წინასწარმეტყველთა მიერ ნათქვამი: 41 „შეხედეთ, დამცინავნო, გაოცდებით და გაუჩინარდებით, რადგან ისეთ რამეს მოვიმოქმედებ თქვენს დღეებში, დაწვრილებითაც რომ გიამბონ, არ დაიჯერებთ“».+

42 სინაგოგიდან რომ გადიოდნენ, ხალხი ეხვეწებოდა, ამ საკითხებზე მომდევნო შაბათსაც გველაპარაკეთო. 43 როცა სინაგოგაში შეკრებილი ხალხი დაიშალა, მრავალი იუდეველი და ღვთის თაყვანისმცემელი პროზელიტი გაჰყვა პავლესა და ბარნაბას, რომლებიც ესაუბრებოდნენ მათ და მოუწოდებდნენ, კვლავაც ისე მოქცეულიყვნენ, რომ ღმერთს მათთვის წყალობა არ დაეკავებინა.+

44 მომდევნო შაბათს თითქმის მთელი ქალაქი შეიკრიბა იეჰოვას* სიტყვის მოსასმენად. 45 როცა იუდეველებმა ამდენი ხალხი დაინახეს, შურით აღივსნენ; ისინი პავლეს უპირისპირდებოდნენ და თავიანთი ლაპარაკით ღმერთს გმობდნენ.+ 46 პავლემ და ბარნაბამ მათ მტკიცედ განუცხადეს: «ღვთის სიტყვა პირველად თქვენ უნდა გაგეგოთ,+ მაგრამ, რაკი უარყოფთ მას და საკუთარ თავს მარადიული სიცოცხლის ღირსად არ თვლით, ჩვენ უცხოტომელებთან წავალთ.+ 47 იეჰოვამ* გვამცნო: „ერების სინათლედ გაქციე, რათა იხსნა ხალხი დედამიწის კიდით კიდემდე“».+

48 როცა ეს უცხოტომელებმა გაიგეს, გაუხარდათ; ამბობდნენ, რა საოცარიაო იეჰოვას* სიტყვა. ყველამ, ვისი გულიც მარადიული სიცოცხლის მისაღებად იყო განწყობილი, ირწმუნა. 49 იეჰოვას* სიტყვა მთელ იმ მხარეში ვრცელდებოდა. 50 ამიტომ იუდეველებმა წააქეზეს ღვთისმოშიში და პატივდებული ქალები და ქალაქის გავლენიანი კაცები; დაიწყეს მათ პავლესა და ბარნაბას დევნა+ და ქალაქიდან გააძევეს. 51 პავლემ და ბარნაბამ კი ფეხებიდან მტვერი დაიბერტყეს* და იკონიონში+ წავიდნენ. 52 მოწაფეები ხარობდნენ+ და კვლავ წმინდა სულით ივსებოდნენ.