ಮತ್ತಾಯ

4 ತದನಂತರ ಪಿಶಾಚನಿಂದ ಪ್ರಲೋಭಿಸಲ್ಪಡಲಿಕ್ಕಾಗಿ ಪವಿತ್ರಾತ್ಮವು ಯೇಸು​ವನ್ನು ಅರಣ್ಯಕ್ಕೆ ನಡೆಸಿತು. 2 ಅವನು ನಲವತ್ತು ದಿವಸ ಹಗಲಿರುಳು ಉಪವಾಸಮಾಡಿದ ಬಳಿಕ ಅವನಿಗೆ ಹಸಿವಾಯಿತು. 3 ಮತ್ತು ಪ್ರಲೋಭಕನು ಬಂದು ಅವನಿಗೆ, “ನೀನು ದೇವರ ಮಗನಾಗಿರುವಲ್ಲಿ ಈ ಕಲ್ಲುಗಳಿಗೆ ರೊಟ್ಟಿಗಳಾಗುವಂತೆ ಹೇಳು” ಅಂದನು. 4 ಇದಕ್ಕೆ ಪ್ರತ್ಯುತ್ತರವಾಗಿ ಅವನು, “ ‘ಮನುಷ್ಯನು ರೊಟ್ಟಿ ತಿಂದಮಾತ್ರದಿಂದಲ್ಲ, ಯೆಹೋವನ ಬಾಯಿಂದ ಹೊರಡುವ ಪ್ರತಿಯೊಂದು ಮಾತಿನಿಂದ ಬದುಕಬೇಕು’ ಎಂದು ಬರೆದಿದೆ” ಎಂದು ಹೇಳಿದನು.

5 ಆ ಬಳಿಕ ಪಿಶಾಚನು ಅವನನ್ನು ಪವಿತ್ರ ಪಟ್ಟಣಕ್ಕೆ ಕರೆದುಕೊಂಡು ಹೋಗಿ ದೇವಾಲಯದ ಕೈಪಿಡಿ ಗೋಡೆಯ ಮೇಲೆ ನಿಲ್ಲಿಸಿ 6 ಅವನಿಗೆ, “ನೀನು ದೇವರ ಮಗನಾಗಿರುವಲ್ಲಿ ಕೆಳಕ್ಕೆ ಧುಮುಕು; ಏಕೆಂದರೆ ‘ಆತನು ನಿನ್ನ ವಿಷಯವಾಗಿ ತನ್ನ ದೂತರಿಗೆ ಅಪ್ಪಣೆಕೊಡುವನು ಮತ್ತು ನಿನ್ನ ಪಾದವು ಎಂದೂ ಕಲ್ಲಿಗೆ ಬಡಿಯದಂತೆ ಅವರು ನಿನ್ನನ್ನು ತಮ್ಮ ಕೈಗಳಲ್ಲಿ ಎತ್ತಿಕೊಳ್ಳುವರು’ ಎಂದು ಬರೆದಿದೆ” ಅಂದನು. 7 ಆಗ ಯೇಸು ಅವನಿಗೆ, “ ‘ನಿನ್ನ ದೇವರಾಗಿರುವ ಯೆಹೋವನನ್ನು ಪರೀಕ್ಷಿಸ​ಬಾರದು’ ಎಂದು ಸಹ ಬರೆದಿದೆ” ಎಂದು ಹೇಳಿದನು.

8 ಪುನಃ ಪಿಶಾಚನು ಅವನನ್ನು ​ಅಸಾಮಾನ್ಯವಾಗಿ ಎತ್ತರವಾಗಿದ್ದ ಒಂದು ಬೆಟ್ಟಕ್ಕೆ ಕರೆದುಕೊಂಡು ಹೋಗಿ ಲೋಕದ ಎಲ್ಲ ರಾಜ್ಯಗಳನ್ನೂ ಅವುಗಳ ವೈಭವವನ್ನೂ ಅವನಿಗೆ ತೋರಿಸುತ್ತಾ, 9 “ನೀನು ಅಡ್ಡಬಿದ್ದು ನನಗೆ ಒಂದು ಆರಾಧನಾ ಕ್ರಿಯೆಯನ್ನು ಮಾಡಿದರೆ ನಾನು ಇವೆಲ್ಲವನ್ನೂ ನಿನಗೆ ಕೊಡುವೆನು” ಎಂದು ಹೇಳಿದನು. 10 ಅದಕ್ಕೆ ಯೇಸು ಅವನಿಗೆ, “ಸೈತಾನನೇ ತೊಲಗಿಹೋಗು! ‘ನಿನ್ನ ದೇವರಾಗಿರುವ ಯೆಹೋವನನ್ನೇ ನೀನು ಆರಾಧಿಸ​ಬೇಕು ಮತ್ತು ಆತನೊಬ್ಬನಿಗೇ ನೀನು ಪವಿತ್ರ ಸೇವೆಯನ್ನು ಸಲ್ಲಿಸಬೇಕು’ ಎಂದು ಬರೆದಿದೆ” ಅಂದನು. 11 ಆಗ ಪಿಶಾಚನು ಅವನನ್ನು ಬಿಟ್ಟುಹೋದನು ಮತ್ತು ದೇವದೂತರು ಬಂದು ಅವನಿಗೆ ಉಪಚಾರಮಾಡಲು ಆರಂಭಿಸಿದರು.

12 ಯೋಹಾನನು ಬಂಧಿಸಲ್ಪಟ್ಟಿದ್ದಾನೆ ಎಂಬುದನ್ನು ಕೇಳಿಸಿಕೊಂಡಾಗ ಯೇಸು ಗಲಿಲಾಯಕ್ಕೆ ಹೊರಟು​ಹೋದನು. 13 ಅಲ್ಲದೆ ನಜರೇತನ್ನು ಬಿಟ್ಟ ಬಳಿಕ, ಅವನು ಜೆಬುಲೂನ್‌ ಮತ್ತು ನಫ್ತಾಲಿ ಪ್ರಾಂತಗಳ ಸಮುದ್ರದ ಬಳಿಯಿದ್ದ ಕಪೆರ್ನೌಮಿನಲ್ಲಿ ವಾಸಿಸಿದನು. 14 ಇದರಿಂದಾಗಿ ಪ್ರವಾದಿಯಾದ ಯೆಶಾಯನ ಮೂಲಕ ತಿಳಿಸಲ್ಪಟ್ಟ ಮಾತು ನೆರವೇರುವಂತಾಯಿತು; ಅದೇನೆಂದರೆ, 15 “ಯೋರ್ದ​ನಿನ ಆಚೆ, ಸಮುದ್ರದ ಉದ್ದಕ್ಕೂ ಇರುವ ಜೆಬುಲೂನ್‌ ನಫ್ತಾಲಿ ನಾಡುಗಳೇ ಮತ್ತು ಅನ್ಯಜನಾಂಗಗಳ ಗಲಿಲಾಯವೇ! 16 ಕತ್ತಲಲ್ಲಿ ಕುಳಿತಿದ್ದ ಜನರು ದೊಡ್ಡ ಬೆಳಕನ್ನು ಕಂಡರು, ಮತ್ತು ಮರಣಕಾರಕ ಛಾಯೆಯ ಪ್ರದೇಶದಲ್ಲಿದ್ದವರ ಮೇಲೆ ಬೆಳಕು ಬಂತು.” 17 ಆ ಸಮಯದಿಂದ ಯೇಸು, “ಜನರೇ ಪಶ್ಚಾತ್ತಾಪ​ಪಡಿರಿ, ಸ್ವರ್ಗದ ರಾಜ್ಯವು ಸಮೀಪಿಸಿದೆ” ಎಂದು ಸಾರಿಹೇಳಲು ಆರಂಭಿಸಿದನು.

18 ಬಳಿಕ ಅವನು ಗಲಿಲಾಯ ಸಮುದ್ರ ತೀರದಲ್ಲಿ ನಡೆಯುತ್ತಿದ್ದಾಗ ಇಬ್ಬರು ಅಣ್ಣತಮ್ಮಂದಿರನ್ನು ಕಂಡನು; ಅವರು ಪೇತ್ರನೆಂದು ಕರೆಯಲ್ಪಡುವ ಸೀಮೋನ ಮತ್ತು ಅವನ ತಮ್ಮನಾದ ಅಂದ್ರೆಯರಾಗಿದ್ದರು. ಅವರು ಬೆಸ್ತರಾಗಿದ್ದು ಸಮುದ್ರದಲ್ಲಿ ಮೀನಿನ ಬಲೆ ಇಳಿಸುತ್ತಿದ್ದರು. 19 ಆಗ ಅವನು ಅವರಿಗೆ, “ನನ್ನನ್ನು ಹಿಂಬಾಲಿಸಿರಿ, ನಾನು ನಿಮ್ಮನ್ನು ಮನುಷ್ಯರನ್ನು ಹಿಡಿಯುವ ಬೆಸ್ತರನ್ನಾಗಿ ಮಾಡುವೆನು” ಎಂದು ಹೇಳಿದನು. 20 ಆ ಕೂಡಲೆ ಅವರು ಬಲೆಗಳನ್ನು ಬಿಟ್ಟು ಅವನನ್ನು ಹಿಂಬಾಲಿಸಿದರು. 21 ಅಲ್ಲಿಂದ ಮುಂದೆ ಹೋಗುತ್ತಿರುವಾಗ ಅವನು ಇನ್ನಿಬ್ಬರು ಅಣ್ಣತಮ್ಮಂದಿರನ್ನು, ಜೆಬೆದಾಯನ ಮಗನಾದ ಯಾಕೋಬನನ್ನೂ ಅವನ ತಮ್ಮನಾದ ಯೋಹಾನನನ್ನೂ ಕಂಡನು; ಅವರು ತಮ್ಮ ತಂದೆಯಾದ ಜೆಬೆದಾಯನೊಂದಿಗೆ ದೋಣಿಯಲ್ಲಿದ್ದು ತಮ್ಮ ಬಲೆಗಳನ್ನು ಸರಿಮಾಡುತ್ತಿದ್ದಾಗ ಅವನು ಅವರನ್ನು ಕರೆದನು. 22 ತಕ್ಷಣವೇ ಅವರು ದೋಣಿಯನ್ನೂ ತಮ್ಮ ತಂದೆಯನ್ನೂ ಬಿಟ್ಟು ಅವನನ್ನು ಹಿಂಬಾಲಿಸಿದರು.

23 ಬಳಿಕ ಅವನು ಗಲಿಲಾಯದಾದ್ಯಂತ ಸಂಚರಿಸಿ ಅವರ ಸಭಾಮಂದಿರಗಳಲ್ಲಿ * ಬೋಧಿಸುತ್ತಾ ರಾಜ್ಯದ ಸುವಾರ್ತೆಯನ್ನು ಸಾರುತ್ತಾ ಜನರ ಎಲ್ಲ ರೀತಿಯ ರೋಗಗಳನ್ನೂ ದೇಹದೌರ್ಬಲ್ಯಗಳನ್ನೂ ಗುಣಪಡಿಸುತ್ತಾ ಬಂದನು. 24 ಅವನ ಕುರಿತಾದ ಸುದ್ದಿಯು ಸಿರಿಯದಾದ್ಯಂತ ಹಬ್ಬಿತು; ಜನರು ಎಲ್ಲ ಅಸ್ವಸ್ಥರನ್ನು ಅಂದರೆ ಬೇರೆ ಬೇರೆ ರೋಗಗಳಿಂದ ಮತ್ತು ಯಾತನೆಗಳಿಂದ ಬಾಧೆಪಡುತ್ತಿದ್ದವರನ್ನೂ ದೆವ್ವಹಿಡಿದವರನ್ನೂ ಮೂರ್ಛೆ​ರೋಗಿಗಳನ್ನೂ ಪಾರ್ಶ್ವವಾಯು ರೋಗಿಗಳನ್ನೂ ಅವನ ಬಳಿಗೆ ತಂದರು ಮತ್ತು ಅವನು ಅವರನ್ನು ಗುಣಪಡಿಸಿದನು. 25 ಇದರ ಪರಿಣಾಮವಾಗಿ ಗಲಿಲಾಯದಿಂದಲೂ ದೆಕಪೊಲಿ​ಯಿಂದಲೂ ಯೆರೂಸಲೇಮಿನಿಂದಲೂ ಯೂದಾಯದಿಂದಲೂ ಯೋರ್ದನ್‌ ನದಿಯ ಆಚೇ ಕಡೆಯಿಂದಲೂ ಜನರ ದೊಡ್ಡ ಗುಂಪು ಅವನನ್ನು ಹಿಂಬಾಲಿಸಿತು.