Ibruz

6 Naw we wi dɔn biliv di tichin dɛn we wi fɔs lan bɔt Krays, lɛ wi tray tranga wan fɔ machɔ, lɛ wi nɔ de le fawndeshɔn igen, dat na, fɔ ripɛnt ɛn pul an pan tin dɛn we nɔ gɛt wan bɛnifit ɛn fɔ gɛt fet pan Gɔd, 2 di tichin bɔt baptizim ɛn fɔ le an pan pɔsin, di tichin fɔ se di wan dɛn we dɔn day go gɛt layf bak ɛn jɔjmɛnt we go de sote go. 3 Ɛn na dat wi go du, if na in Gɔd want.

4 As fɔ di wan dɛn we Gɔd dɔn sho layt ɛn we dɔn tes di fri gift we kɔmɔt na ɛvin ɛn we dɔn gɛt oli spirit 5 ɛn we dɔn tes Gɔd in fayn wɔd ɛn di pawaful tin dɛn we go de tumara bambay,* 6 bɔt we dɔn lɛf fɔ biliv di tin dɛn we wi biliv, i nɔ pɔsibul fɔ ɛp dɛn fɔ ripɛnt igen, bikɔs dɛn dɔn nel Gɔd in Pikin na di tik bak fɔ dɛnsɛf ɛn mek i shem na pɔblik. 7 Gɔd de blɛs di grɔn bay we i de mek ren de kam pan am fast fast ɛn plant dɛn de gro we de bɛnifit di wan dɛn we plant. 8 Bɔt if i bia chukchuk, i nɔ de gɛt yus igen, ɛn i nɔ go te igen dɛn go swɛ am, ɛn dɛn go ɛnd-ɔp fɔ bɔn am.

9 Bɔt as fɔ una we wi lɛk, wi rili biliv se una de du bɛtɛ tin dɛn, tin dɛn we go mek una sev, pan ɔl we wi de tɔk dis kayn we. 10 Gɔd nɔ de du wetin nɔ rayt, so i nɔ go fɔgɛt una wok ɛn di we aw una dɔn sho se una lɛk in nem bay we una de wok ɛn kɔntinyu fɔ wok fɔ di oli wan dɛn. 11 Bɔt wi want mek una ɔl kɔntinyu fɔ sho se una de wok tranga wan so dat una go gɛt op ɛn nɔ gɛt wan dawt te di ɛnd, 12 so dat una nɔ go lezi, bɔt una go de falamakata di wan dɛn we bin bɛnifit frɔm di prɔmis dɛn bikɔs dɛn gɛt fet ɛn dɛn peshɛnt.

13 We Gɔd prɔmis Ebraam, i swɛ to insɛf bikɔs nɔbɔdi nɔ de we pas am we i go swɛ to. 14 I se: “A go mɔs blɛs yu, ɛn a go mɔs mek yu pikin dɛn bɔku.” 15 Afta Ebraam dɔn peshɛnt, dis tin we Gɔd prɔmis am apin. 16 Pipul dɛn kin swɛ to pɔsin we pas dɛn, ɛn di swɛ we dɛn kin swɛ kin sɛtul ɔltin, bikɔs na rial garanti to dɛn. 17 Semweso, we Gɔd disayd fɔ sho klia wan to di wan dɛn we go gɛt di prɔmis se wetin i want fɔ du nɔ go chenj, i gi garanti bay we i swɛ, 18 so dat tru tu tin dɛn we nɔ de chenj ɛn we i nɔ pɔsibul fɔ mek Gɔd lay we i kam pan dɛn tin dɛn de, wi we dɔn rɔn go ayd to Gɔd go ol di op we de bifo wi wit tu an bikɔs i dɔn rili ɛnkɔrej wi. 19 Dis op we wi gɛt tan lɛk ankɔ fɔ wi layf* we de ɛp wi fɔ tinap tranga wan ɛn nɔ gɛt wan dawt, ɛn i de kɛr wi go biɛn di kɔtin, 20 usay pɔsin bin dɔn go bifo wi fɔ opin di we fɔ wi, dat na, Jizɔs, we dɔn bi ay prist sote go jɔs lɛk Mɛlkizidɛk.