Jiova De Kɔrej Wi Pan Ɔl Wi Prɔblɛm Dɛn

1, 2. Aw Jiova de kɔrej wi we wi gɛt prɔblɛm dɛn? Us prɔmis de insay di Baybul?

WAN yɔŋ brɔda we nɔ bin dɔn mared yet bin de tink bɔt wetin de na Fɔs Lɛta Fɔ Kɔrint 7:​28 we se dɛn wan dɛn we de mared go gɛt “trɔbul” na dɛn mared-os. Di brɔda bin tɔk to wan machɔ ɛlda we dɔn mared ɛn aks am se: “Wetin na dis ‘trɔbul’ ɛn aw a go sɔlv am if a mared?” Bifo di ɛlda ansa di yɔŋ brɔda in kwɛstyɔn, i tɛl am fɔ tink bɔt wan ɔda tin we apɔsul Pɔl bin rayt we i se, Jiova na “di Gɔd we de kɔrej wi ɔltɛm, di wan we de kɔrej wi pan ɔl wi prɔblɛm dɛn.”—Sɛkɔn Lɛta Fɔ Kɔrint 1:​3, 4, NW.

² Wi no se Jiova we na wi Papa, lɛk wi, ɛn i de kɔrej wi we wi gɛt tin dɛn we de mɔna wi. Tink bɔt sɔm tɛm dɛn we Jiova bin dɔn yuz in Wɔd fɔ sɔpɔt ɛn gayd yu. Wi shɔ se i want wetin gud fɔ wi, jɔs lɛk aw i bin de du fɔ in savant dɛn we bin de trade trade.—Rid Jɛrimaya 29:​11, 12.

 3. Us kwɛstyɔn dɛn wi go ansa insay dis atikul?

³ Bɔku tɛm, i kin izi fɔ bia wit prɔblɛm dɛn we wi no wetin mek dɛn de mit wi. So wetin mek wi kin gɛt prɔblɛm dɛn na wi mared-os ɛn na wi famili? Us ɛgzampul dɛn we de insay di Baybul ɛn insay dis wi yon tɛm we go ɛp wi fɔ gɛt di kɔrej we wi nid? Lɛ wi ansa dɛn kwɛstyɔn dɛn ya ɛn si aw wi go bia we wi gɛt prɔblɛm dɛn.

4, 5. Us prɔblɛm dɛn maredman ɛn in wɛf kin gɛt?

⁴ Afta Jiova mek di fɔs uman, i briŋ am kam to di man, ɛn i bin in wɛf. Dɔn Jiova se: “Man go lɛf in mama ɛn papa ɛn go de wit in wɛf, ɛn dɛn tu go bi wan.” (Jɛnɛsis 2:​24) Na tru se tide, wi ɔl nɔ pafɛkt. (Lɛta Fɔ Rom 3:​23) Dis dɔn mek we man ɛn uman mared, dɛn fɔ no se dɛn go gɛt prɔblɛm dɛn. Fɔ ɛgzampul, bifo di uman mared, i go mɔs bi se na in mama ɛn papa i bin de obe. Bɔt Gɔd in Wɔd se we man ɛn uman mared, na di man de oba in wɛf. (Fɔs Lɛta Fɔ Kɔrint 11:​3) Fɔs, i nɔ go izi fɔ mek di man tɛl in wɛf wetin fɔ du. Ɛn di uman sɛf go si se i nɔ izi fɔ mek i du wetin in man de tɛl am fɔ du; bifo dat na wetin in mama ɛn papa tɛl am na in i go want fɔ du. Sɔntɛnde, we pɔsin jɔs mared, i go de gɛt af-af prɔblɛm dɛn wit in in-lɔ dɛn, ɛn dis sɛf nɔ go izi fɔ am.

⁵ Tink bak bɔt aw maredman ɛn in wɛf kin fil we dɛn no se dɛn de kam bɔn pikin. Pan ɔl we dɛn kin gladi pasmak, dɛn kin stil de wɔri. Dɛn go de wɔnda if ɔltin go fayn wit di bɛlɛ, ɛn dɛn go de wɔri bak bɔt di pikin in wɛlbɔdi. Dɛn no bak se dɛn gɛt fɔ spɛn bɔku mɔni. Afta dɛn dɔn bɔn di pikin, dɛn go nid fɔ ajɔst ɔda tin dɛn na dɛn layf. Di mama go nid fɔ yuz bɔku pan in tɛm fɔ kia fɔ di bebi. So di man ɛn in wɛf nɔ go ebul fɔ pe bɛtɛ atɛnshɔn to dɛnsɛf lɛk aw dɛn bin de du trade. Di papa sɛf go gɛt mɔ wok fɔ du. I gɛt fɔ mek shɔ se in wɛf ɛn in pikin gɛt wetin dɛn nid.

6-8. Aw maredman ɛn mareduman kin fil we dɛn nɔ ebul fɔ bɔn pikin?

⁶ Sɔm pipul dɛn we dɔn mared kin gɛt difrɛn kayn prɔblɛm dɛn. Dɛn kin rili want fɔ bɔn pikin, bɔt dɛn nɔ kin ebul. We uman nɔ kin ebul fɔ gɛt bɛlɛ, dis kin rili mek in at rili pwɛl. (Prɔvabs 13:​12) Insay di tɛm we dɛn bin de rayt di Baybul, i bin rili impɔtant fɔ mek uman dɛn mared ɛn bɔn pikin dɛn. Na dat mek Jekɔb in wɛf we nem Rechɛl in at bin rili pwɛl we in nɔ ebul fɔ bɔn pikin pan ɔl we in sista bin de bɔn pikin dɛn. (Jɛnɛsis 30:​1, 2) Na sɔm kɔntri dɛn tide, plɛnti pipul dɛn biliv se i rili impɔtant fɔ bɔn bɔku pikin dɛn. Bɔku tɛm pipul dɛn kin aks mishɔnari dɛn we de na dɛn kɔntri wetin mek dɛn nɔ gɛt pikin. Pan ɔl we di mishɔnari dɛn kin ɛksplen di rizin klia wan to dɛn, sɔm kin stil se, “E ya, wi go pre fɔ una so dat wan de una go bɔn pikin dɛn!”

⁷ Tink bɔt dis ɔda ɛgzampul. Wan sista na Ingland bin rili want fɔ bɔn pikin. We i si se i nɔ go ebul bɔn pikin na dis wɔl, in at bin pwɛl pasmak. So in ɛn in man bin disayd fɔ adɔpt pikin. Bɔt in at bin stil pwɛl fɔ sɔm tɛm. I bin se, “A no se fɔ adɔpt pikin ɛn fɔ bɔn mi yon pikin nɔto di sem tin.”

⁸ Di Baybul se uman ‘go sev we i de bɔn pikin dɛn.’ (Fɔs Lɛta To Timoti 2:​15) Bɔt dat nɔ min se i go gɛt layf we go de sote go jɔs bikɔs i bɔn pikin dɛn. So wetin dis vas min? Mama kin bizi ɔltɛm we i de kia fɔ in pikin dɛn ɛn di os. Dat kin ɛp am fɔ avɔyd tin dɛn lɛk fɔ kongosa ɔ fɔ put an pan tin dɛn we nɔto in biznɛs. (Fɔs Lɛta To Timoti 5:​13) Bɔt pan ɔl dat, i kin stil gɛt prɔblɛm dɛn na in mared-os ɛn in famili.

 9. Us ɔda prɔblɛm mared pipul dɛn kin gɛt?

⁹ Wan pan di prɔblɛm dɛn we sɔm mared pipul dɛn kin gɛt na we wan pan dɛn kin day. Pan ɔl we dɛn go de tink se dis kayn tin nɔ go ɛva apin to dɛn, bɔku pan dɛn dɔn bia we dis bad bad tin kin apin. Kristian dɛn rili biliv di prɔmis fɔ se di wan dɛn we dɔn day go gɛt layf bak, ɛn dis kin rili ɛnkɔrej dɛn. (Jɔn 5:​28, 29) Insay di Baybul, wi Papa, Jiova dɔn mek bɔku prɔmis dɛn we kin ɛnkɔrej wi di tɛm we bad tin dɛn kin apin to wi. Naw mek wi si aw dis dɔn ɛnkɔrej sɔm pan Jiova in savant dɛn ɛn aw dis dɔn ɛp dɛn.

10. Wetin bin gi Ana kɔrej? (Luk di pikchɔ nia dis atikul in taytul.)

¹⁰ Tink bɔt wetin bin apin to Ana, we na Ɛlkena in wɛf we i lɛk. I bin want fɔ bɔn pikin bɔt i nɔ bin ebul. Bɔt in man in ɔda wɛf we nem Pɛnina bin bɔn bɔku pikin dɛn. (Rid Fɔs Samiɛl 1:​4-7.) Fɔ mek tin wɔs, Pɛnina bin de provok Ana “ɔltɛm.” Dat bin de mek Ana in at pwɛl bad bad wan. Wetin i bin du fɔ gɛt kɔrej? I bin pre to Jiova. Dɔn Ana bin go na di ples usay dɛn bin de wɔship Jiova ɛn pre fɔ lɔng tɛm. I beg Jiova fɔ gi am bɔy pikin ɛn i bin biliv se Jiova go ɛp am. Afta i dɔn fɔ pre, i bin fil fayn ɛn i “nɔ twis in fes igen.” (Fɔs Samiɛl 1:​12, 17, 18) I bin no se Jiova go mek i bɔn bɔy pikin ɔ i go fɛn ɔda we fɔ kɔrej am.

11. Aw prea kin kɔrej wi?

¹¹ Bikɔs wi nɔ pafɛkt ɛn wi de na Setan in wɔl, wi go kɔntinyu fɔ gɛt prɔblɛm dɛn. (Jɔn In Fɔs Lɛta 5:​19) Bɔt sɔntin de we go ɛp wi. Wi kin pre to Jiova, “di Gɔd we de kɔrej wi ɔltɛm.” Na dat Ana bin du. I bin tɛl Jiova aw i bin de rili fil ɛn beg am fɔ ɛp am. Semweso, we wi de sɔfa, wi nɔ fɔ jɔs tɛl Jiova wi prɔblɛm. Wi fɔ beg am fɔ ɛp wi ɛn tɛl am aw wi de fil.—Lɛta Fɔ Filipay 4:​6, 7.

12. Wetin bin ɛp Ana fɔ gɛt gladi at pan ɔl we i bin gɛt prɔblɛm dɛn?

¹² Wi at kin rili pwɛl bikɔs wi nɔ ebul fɔ bɔn pikin dɛn ɔ bikɔs sɔmbɔdi we wi lɛk day. Bɔt wi kin stil gɛt kɔrej. Tink bɔt wan ol mami we nem Ana, we bin de insay Jizɔs in tɛm. Afta i dɔn mared fɔ sɛvin ia, in man bin day. Ɛn i tan lɛk se i nɔ bɔn pikin dɛn. Bɔt wetin bin ɛp am? Di Baybul se: “De ɛn nɛt Ana bin de na Gɔd in Os.” Pan ɔl we Ana bin ol 84 ia, i bin stil de go na di tɛmpul fɔ pre ɛn fɔ wɔship Jiova. (Lyuk 2:​37) Na dat bin kɔrej am ɛn ɛp am fɔ gɛt gladi at pan ɔl we i bin gɛt prɔblɛm dɛn.

13. Aw tru tru padi dɛn kin ɛnkɔrej wi if wi fambul dɛn mek wi at pwɛl?

¹³ Wi kin gɛt kɔrej bak frɔm di tru tru padi dɛn we wi gɛt na di kɔngrigeshɔn. (Prɔvabs 18:​24) Wan titi we nem Pɔla bin ol fayv ia we in mama stɔp fɔ sav Jiova. Pɔla in at bin rili pwɛl, ɛn tin nɔ bin izi fɔ am. Bɔt wan payɔnia sista we nem An bin ɛnkɔrej am ɛn i bin sho se i lɛk am ɛn bisin bɔt am. Pɔla ɛksplen se: “Pan ɔl we mi ɛn An nɔ fambul, di we aw i sho se i lɛk mi ɛn bisin bɔt mi bin rili ɛp mi. I ɛp mi fɔ kɔntinyu fɔ sav Jiova.” Pɔla in mama bin dɔn kam bak na di kɔngrigeshɔn ɛn dis bin mek Pɔla gladi pasmak. An sɛf bin gladi we i ebul ɛp Pɔla fɔ kɔntinyu fɔ sav Jiova.

14. Aw wi kin bɛnifit we wi ɛnkɔrej ɔda pipul dɛn?

¹⁴ We wi de du gud tin fɔ ɔda pipul dɛn, bɔku tɛm wi kin fɔgɛt bɔt wi yon prɔblɛm dɛn. Fɔ ɛgzampul, bɔku sista dɛn, wɛda dɛn mared ɔ dɛn nɔ mared, no se we dɛn de prich di gud nyuz bɔt di Kiŋdɔm to ɔda pipul dɛn, dɛn de wok wit Jiova ɛn dɛn de du wetin i want. Dis kin mek dɛn gladi. Infakt, wi ɔl kin sho se wi bisin bɔt ɔda pipul dɛn we wi prich di gud nyuz to dɛn. We wi du gud tin fɔ wi brɔda ɛn sista dɛn, wi kin go nia dɛn mɔ ɛn mɔ. (Lɛta Fɔ Filipay 2:​4) Na dat di apɔsul Pɔl bin du. I bin kia fɔ ɔda pipul dɛn jɔs lɛk “aw kombra kin bayo bayo in pikin dɛn.” Pɔl bin de ɛnkɔrej in brɔda dɛn bak lɛk “aw dadi kin trit in pikin dɛn.”—Rid Fɔs Lɛta Fɔ Tɛsalonayka 2:​7, 11, 12.

15. Udat dɛn gɛt di wok fɔ tich pikin dɛn bɔt Jiova?

¹⁵ Aw wi go ɛnkɔrej famili dɛn we de insay di kɔngrigeshɔn? Sɔntɛnde, nyu wan dɛn kin aks wi fɔ ɛp dɛn fɔ tich dɛn pikin dɛn bɔt Jiova ɔ fɔ ivin stɔdi di Baybul wit dɛn pikin dɛn. Di Baybul sho se na mama ɛn papa Jiova gi di wok fɔ tich ɛn tren dɛn pikin dɛn. (Prɔvabs 23:​22; Lɛta Fɔ Ɛfisɔs 6:​1-4) Pan ɔl we sɔntɛnde ɔda pipul dɛn kin ɛp, i rili impɔtant fɔ mek mama ɛn papa dɛnsɛf tich dɛn pikin dɛn. Mama ɛn papa dɛn nid fɔ tɔk wit dɛn pikin dɛn ɔltɛm.

16. Wetin wi fɔ mɛmba we wi de ɛp pikin dɛn?

¹⁶ We mama ɔ papa tɛl wi fɔ stɔdi di Baybul wit in pikin, i go fayn fɔ mek wi mɛmba se wi nɔ gɛt di sem rayt we di mama ɔ papa gɛt. Sɔntɛnde, wi kin ivin stɔdi pikin we in mama ɛn papa nɔ de sav Jiova. We wi de stɔdi wit ɔda pɔsin in pikin, i go fayn fɔ mek wi stɔdi dɛn na dɛn os usay dɛn mama ɛn papa ɔ ɔda machɔ brɔda ɔ sista de, ɔ fɔ stɔdi dɛn na ples usay ɔda pipul dɛn de. If wi du so, wi nɔ go mek ɛnibɔdi tink di rɔng we bɔt wi. Ɛn sɔntɛm as tɛm de go, di mama ɔ papa go ebul fɔ tich in pikin bɔt Jiova.

17. Aw pikin dɛn go ɛnkɔrej dɛn fambul dɛn?

¹⁷ Yɔŋ wan dɛn we dɔn lan fɔ lɛk Jiova go ɛnkɔrej dɛn fambul dɛn. Aw dɛn kin du dat? Na bay we dɛn rɛspɛkt dɛn mama ɛn papa dɛn ɛn wok tranga wan fɔ ɛp dɛn fɔ du sɔntin. Dɔn we pikin dɛn kɔntinyu bak fɔ fetful to Jiova, dis kin ɛnkɔrej di wan ol famili. Bifo di Ebi Ebi Ren kam insay Noa in tɛm, Lamɛk bin de wɔship Jiova. Na dis i bin se bɔt in pikin Noa: “PAPA GƆD [“Jiova,” NW] bin dɔn swɛ dis grɔn se i nɔ go bɛtɛ. Dis pikin ya so go ɛp pul wi pan di traŋa wok we wi bin dɔn de du.” Da prɔfɛsi de bin kam tru afta di Ebi Ebi Ren, we Jiova bin pul di swɛ we i bin swɛ di grɔn. (Jɛnɛsis 5:​29; 8:​21) Tide bak, pikin dɛn we fetful to Jiova kin ɛnkɔrej dɛn famili. Dɛn kin ɛp ɔlman na di famili fɔ bia wit di prɔblɛm dɛn we de apin to dɛn naw ɛn tumara bambay.

18. Wetin go ɛp wi fɔ bia wit ɛni prɔblɛm we wi go gɛt?

¹⁸ Tide, Jiova in pipul dɛn de gɛt kɔrej we dɛn pre to am, we dɛn tink gud gud wan bɔt ɛgzampul dɛn we de na di Baybul, ɛn we dɛn gɛt tayt padi biznɛs wit dɛn brɔda ɛn sista dɛn na di kɔngrigeshɔn. (Rid Sam 145:​18, 19.) Wi no se Jiova rɛdi ɔltɛm fɔ ɛnkɔrej wi, ɛn i go mɔs ɛp wi fɔ bia wit ɛni prɔblɛm we wi go gɛt!