Zabbuli

103 Ka ntendereze Yakuwa;

Ka byonna ebiri mu nze bitendereze erinnya lye ettukuvu.

 2 Ka ntendereze Yakuwa;

Ka nneme kwerabira byonna by’akoze.+

 3 Akusonyiwa ensobi zo zonna,+

Era akuwonya endwadde zo zonna;+

 4 Aggya obulamu bwo mu kinnya,*+

Akulaga okwagala okutajjulukuka era akusaasira.+

 5 Akuwa ebintu ebirungi+ obulamu bwo bwonna,

N’osigala ng’oli muvubuka era ng’oli wa maanyi ng’empungu.+

 6 Abo bonna abanyigirizibwa+

Yakuwa abakolera eby’obutuukirivu+ n’eby’obwenkanya.

 7 Yamanyisa Musa amakubo ge,+

Era yamanyisa abaana ba Isirayiri ebikolwa bye.+

 8 Yakuwa musaasizi era wa kisa,+

Alwawo okusunguwala era alina okwagala kungi okutajjulukuka.+

 9 Taatunoonyengamu nsobi,+

Era taasibenga kiruyi mirembe na mirembe.+

10 Tatubonerezza nga bwe tugwanidde okubonerezebwa olw’ebibi byaffe,+

Era tatusasudde ekyo kye tugwanira olw’ensobi zaffe.+

11 Kubanga ng’eggulu bwe liri ewala ennyo okuva ku nsi,

Bwe kutyo n’okwagala kwe okutajjulukuka bwe kuli okungi ennyo eri abo abamutya.+

12 Ng’ebuvanjuba bwe wali ewala ennyo okuva ebugwanjuba,

Bw’atyo bw’atadde ebibi byaffe ewala ennyo okuva we tuli.+

13 Nga kitaawe w’abaana bw’asaasira abaana be,

Bw’atyo Yakuwa bw’asaasidde abo abamutya.+

14 Kubanga amanyi bulungi bwe twakolebwa,+

Ajjukira nti tuli nfuufu.+

15 Ennaku z’omuntu ziringa ez’omuddo;+

Ayanya ng’ekimuli ky’oku ttale.+

16 Naye empewo bw’ekunta, nga kiggwaawo,

Nga kiba ng’ekitabangawo.*

17 Kyokka emirembe n’emirembe* Yakuwa alaga okwagala kwe okutajjulukuka

Eri abo abamutya,+

Era alaga obutuukirivu bwe eri abaana b’abaana baabwe,+

18 Eri abo abakuuma endagaano ye,+

N’eri abo abafuba okukwata ebiragiro bye.

19 Yakuwa yanyweza entebe ye mu ggulu;+

Era obwakabaka bwe bufuga ebintu byonna.+

20 Mutendereze Yakuwa mmwe mmwenna bamalayika be+ ab’amaanyi ennyo,

Abakolera ku kigambo kye,+ abagondera eddoboozi lye.*

21 Mutendereze Yakuwa mmwe mmwenna ab’omu ggye lye,+

Abaweereza be abakola by’ayagala.+

22 Mutendereze Yakuwa mmwe mmwenna ebitonde bye,

Mu bifo byonna by’afuga.*