Danyele

10 Na mbula ya misato ya Siruse mokonzi+ ya Perse, Danyele, oyo bazalaki kobenga Beleteshazare,+ azwaki emoniseli moko; nsango yango ezalaki solo, mpe elobelaki etumba moko monene. Akangaki ntina ya nsango yango, mpe bapesaki ye ndimbola ya makambo oyo amonaki.

2 Na eleko yango, ngai Danyele nazalaki na mawa makasi+ pɔsɔ misato mobimba. 3 Nalyaki bilei ya malonga te, mosuni to vinyo ekɔtaki na monɔkɔ na ngai te, mpe napakolaki mafuta ata moke te na nzoto na ngai pɔsɔ misato mobimba. 4 Na mokolo ya 24 ya sanza ya liboso, ntango nazalaki pembeni ya ebale monene, elingi koloba Tigre,*+ 5 natombolaki miso mpe namonaki mobali moko alati elamba ya lini,+ ná mokaba ya wolo ya Ufaze na loketo. 6 Nzoto na ye ezalaki lokola krizolite,+ mpe elongi na ye ezalaki kongɛnga lokola mokalikali, miso na ye ezalaki lokola mwa banzete ya mɔtɔ, mabɔkɔ na ye mpe makolo na ye ezalaki lokola kwivre oyo bangɛngisi,+ mpe mongongo na ye ezalaki koyokana lokola lokito ya bato ebele. 7 Kaka ngai Danyele nde namonaki emonaneli yango; mibali oyo bazalaki elongo na ngai bamonaki emonaneli yango te.+ Nzokande, babangaki mingi, bakimaki mpe bamibombaki.

8 Na yango natikalaki kaka ngai moko, mpe ntango namonaki emonaneli wana monene, makasi na ngai nyonso esilaki; nakómaki lokola moto asili mai ná makila, mpe nazalaki lisusu na makasi te.+ 9 Bongo nayokaki mongongo na ye; kasi ntango nayokaki ye azali koloba, nalalaki mpɔngi makasi, natye elongi na nse.+ 10 Na mbala moko lobɔkɔ moko esimbaki ngai,+ eningisaki ngai mpo nalamuka mpe natɛlɛma na mabɔkɔ na ngai mpe na mabɔlɔngɔ na ngai. 11 Na nsima alobaki na ngai:

“Ee Danyele, yo moto ya motuya mingi,*+ tyá likebi na maloba oyo nalingi koloba na yo. Sikoyo tɛlɛmá, mpamba te batindi ngai epai na yo.”

Ntango alobaki na ngai bongo, natɛlɛmaki, nazali kolɛnga.

12 Na nsima alobaki na ngai: “Kobanga te,+ Ee Danyele. Maloba na yo eyokanaki banda mokolo ya liboso oyo motema na yo endimaki kokanga ntina mpe komikitisa liboso ya Nzambe na yo, mpe nayei mpo na maloba na yo.+ 13 Kasi nkumu+ ya bokonzi ya Perse atɛmɛlaki ngai mikolo 21. Nzokande Mikaele,*+ moko ya bankumu minene,* ayaki kosalisa ngai; mpe natikalaki kuna pene ya bakonzi ya Perse. 14 Nayei kosalisa yo mpo oyeba makambo oyo ekokómela bato ya ekólo na yo na eleko ya nsuka ya mikolo,+ mpo emonaneli yango ekokokisama na mikolo ezali koya.”+

15 Ntango alobaki na ngai maloba yango, nakitisaki elongi na ngai na nse mpe nazangaki likambo ya koloba. 16 Bongo moto oyo azalaki komonana lokola mobali asimbaki mbɛbu na ngai,+ nafungolaki monɔkɔ mpe nalobaki na moto oyo atɛlɛmaki liboso na ngai ete: “Nkolo na ngai, nazali kolɛnga makasi mpo na emonaneli wana, mpe nazali na makasi te.+ 17 Bongo, nkolo na ngai, ndenge nini ngai mosaleli na yo nakoki koloba na yo, nkolo na ngai?+ Mpo sikoyo nazali lisusu na makasi te, mpe nazali na mpema ata moke te.”+

18 Mpe ye oyo azalaki komonana lokola mobali asimbaki ngai lisusu mpe apesaki ngai makasi.+ 19 Bongo alobaki na ngai: “Kobanga te,+ Ee moto ya motuya mingi.*+ Kimya ezala na yo.+ Zalá makasi, ɛɛ, zalá makasi.” Ntango azalaki koloba na ngai, nazwaki makasi mpe nalobaki: “Loba, nkolo na ngai, mpo opesi ngai makasi.”

20 Bongo alobaki na ngai: “Oyebi mpo na nini nayei epai na yo? Nakozonga mpo na kobunda na nkumu ya Perse.+ Mpe ntango nakokende, nkumu ya Grɛsi akoya. 21 Kasi nakoyebisa yo makambo oyo ekomami na mokanda ya makambo ya solo. Ezali na moto moko te oyo azali kosalisa ngai mpenza na makambo oyo, longola kaka Mikaele,+ nkumu na bino.+