Danyele

9 Na mbula ya liboso ya Dariuse+ mwana ya Asueruse—mokitani ya Bamede oyo bakómisaki mokonzi na bokonzi ya Bakaladea+— 2 na mbula ya liboso ya boyangeli na ye, ngai Danyele nasosolaki na nzela ya babuku* ete na kolanda liloba ya Yehova epai ya mosakoli Yirimia, motángo ya bambula oyo Yerusaleme ekotikala mpamba+ ezali: mbula 70.+ 3 Na yango nabalukaki* epai ya Yehova Nzambe ya solo, nalelelaki ye na libondeli, nakilaki bilei,+ nalataki ngɔtɔ* mpe napakolaki putulu. 4 Nabondelaki Yehova Nzambe na ngai, nayambolaki masumu mpe nalobaki:

“Ee, Yehova Nzambe ya solo, Nzambe monene mpe ya nsɔmɔ, oyo abatelaka kondimana na ye mpe amonisaka bolingo ya sembo+ epai ya baoyo balingaka ye mpe batosaka mitindo na ye,+ 5 tosali lisumu, tosali libunga, tosali makambo na motema mabe mpe totombokaki;+ totosi te mitindo na yo mpe bikateli* na yo. 6 Toyoki te basaleli na yo basakoli,+ oyo balobaki na nkombo na yo epai ya bakonzi na biso, bankumu na biso, bankɔkɔ na biso mpe bato nyonso ya mokili oyo. 7 Ee Yehova, bosembo ezali ya yo, kasi nsɔni* ezali ya biso lokola na mokolo ya lelo; ɛɛ, epai ya bato ya Yuda, bafandi ya Yerusaleme mpe Yisraele mobimba, baoyo bazali pene mpe baoyo bazali mosika, na mikili nyonso oyo opalanganisaki bango mpo bazalaki sembo te epai na yo.+

8 “Ee Yehova, nsɔni* ezali ya biso, ya bakonzi na biso, bankumu na biso mpe bankɔkɔ na biso, mpo tosaleli yo lisumu. 9 Yehova Nzambe na biso, ozali na motema mawa mpe olimbisaka,+ kasi biso totombokeli yo.+ 10 Yehova Nzambe na biso, totosi mongongo na yo te, tolandi mibeko na yo te oyo opesaki biso na nzela ya basaleli na yo basakoli.+ 11 Yisraele mobimba ebuki Mobeko na yo mpe eboyi kotosa mongongo na yo. Yango wana osopelaki biso elakeli mabe mpe ndai oyo ekomami na Mobeko ya Moize mosaleli ya Nzambe ya solo,+ mpo tosaleli yo lisumu. 12 Okokisi maloba oyo olobaki mpo na biso+ mpe bato oyo bazalaki kokamba biso,* na ndenge omemeli biso mpasi monene; mpasi oyo ekómeli Yerusaleme esalemá naino te na mabele mobimba.+ 13 Ndenge kaka ekomami na Mobeko ya Moize, mpasi oyo nyonso ekweli biso,+ nzokande biso tosɛngi te boboto* ya Yehova Nzambe na biso, na ndenge totiki libunga na biso te+ mpe toluki te kososola solo* na yo.

14 “Na yango Yehova akangaki miso te mpe amemeli biso mpasi, mpo Yehova Nzambe na biso azali sembo* na misala nyonso oyo asali; kasi biso totosi mongongo na ye te.+

15 “Ee Yehova Nzambe na biso, yo oyo obimisaki bato na yo na mokili ya Ezipito na lobɔkɔ na yo ya nguya+ mpe osalaki ete nkombo na yo eyebana ndenge ezali tii lelo,+ tosali lisumu mpe tosali makambo na motema mabe. 16 Ee Yehova, na kolanda misala na yo nyonso ya bosembo,+ nabondeli yo, tiká ete nkanda na yo ya makasi elongwa na engumba na yo Yerusaleme, ngomba na yo mosantu; mpo likoló ya masumu na biso mpe mabunga ya bankɔkɔ na biso, Yerusaleme ná bato na yo bakómi eloko ya kotyola epai ya baoyo nyonso bazali zingazinga na biso.+ 17 Mpe sikoyo, Ee Nzambe na biso, yoká libondeli na ngai mosaleli na yo mpe kolela na ngai, mpe mpo na lokumu ya nkombo na yo, Ee Yehova, ngɛngisá elongi na yo likoló ya esika na yo mosantu+ oyo ebebi.+ 18 Tyá likebi, Ee Nzambe na ngai, mpe yoká! Fungolá miso na yo mpe talá mpasi na biso mpe ndenge engumba oyo ebengami na nkombo na yo ebebi; mpo tozali kobelela yo mpo na misala na biso ya bosembo te, kasi mpo na motema mawa na yo monene.+ 19 Ee Yehova, yoká. Ee Yehova, limbisá.+ Ee Yehova, tyá likebi mpe salá! Koumela te mpo na lokumu ya nkombo na yo, Ee Nzambe na ngai, mpo engumba oyo mpe bato na yo bamemi nkombo na yo.”+

20 Wana nazalaki naino koloba, kobondela, koyambola lisumu na ngai mpe lisumu ya bato ya ekólo na ngai Yisraele, mpe kosɛnga Yehova Nzambe na ngai amonisa motema boboto mpo na ngomba mosantu ya Nzambe na ngai,+ 21 ɛɛ, ntango nazalaki naino koloba na libondeli, mobali yango Gabriele,+ oyo namonaki liboso na emonaneli,+ ayaki pene na ngai ntango nalɛmbaki makasi; ezalaki pene ya ntango ya likabo ya mpokwa. 22 Asalisaki ngai nakanga ntina, alobi:

“Ee Danyele, nayei sikoyo mpo na kopesa yo mayele ya kososola mpe kosalisa yo okanga ntina. 23 Ntango ozalaki kolelela Nzambe, Nzambe apesaki ngai nsango, mpe nayei koyebisa yo yango mpo ozali moto ya motuya mingi.*+ Yango wana tyá likebi na nsango oyo, mpe kangá ntina ya emonaneli.

24 “Bakateli bato ya ekólo na yo mpe engumba mosantu+ pɔsɔ 70,* mpo na kosukisa kobuka mibeko, kosilisa lisumu,+ kolimbisa* libunga,+ kokɔtisa bosembo ya seko,+ kobɛta kashɛ na emonaneli mpe esakweli,*+ mpe kotya Esika Mosantu ya Bisika Mosantu* mafuta. 25 Osengeli koyeba mpe kokanga ntina ete banda kobima ya etinda ya kobongisa mpe kotonga lisusu Yerusaleme+ tii Masiya*+ Mokambi+ ekozala pɔsɔ 7, mpe lisusu pɔsɔ 62.+ Yerusaleme ekobongisama mpe ekotongama lisusu, ná esika monene ya bato nyonso mpe libulu monene, kasi ekozala na eleko ya mpasi.

26 “Mpe nsima ya pɔsɔ 62 yango, Masiya akolongolama,*+ akotikala na eloko te.+

“Mpe bato ya mokambi moko oyo azali koya bakobebisa engumba yango mpe esika mosantu.+ Mpe nsuka na yango ekoya na nzela ya mpela. Mpe tii na nsuka ekozala etumba; oyo ekanami ezali libebi na libebi.+

27 “Mpe akobatela kondimana ezala naino mpo na bato ebele na boumeli ya pɔsɔ moko; mpe na katikati ya pɔsɔ yango, akotya nsuka na bambeka mpe makabo.+

“Mpe na lipapu ya biloko ya bosɔtɔ, ekozala na ye oyo ayeisaka libebi;+ mpe tii na ntango ya kosilisama nyɛɛ, eloko oyo ekanami ekosopama mpe likoló ya oyo ebebisami.”