Danyele

11 “Nzokande, na mbula ya liboso ya Dariuse+ Momede, ngai natɛlɛmaki mpo na kolendisa ye mpe kopesa ye makasi.* 2 Makambo oyo nalingi koyebisa yo sikoyo ezali ya solo:

“Talá! Bakonzi mosusu misato bakotɛlɛma* mpo na Perse, mpe oyo ya minei akonduka bomɛngo mingi koleka bamosusu nyonso. Mpe ntango bomɛngo na ye ekokómisa ye makasi, akosala ete eloko nyonso etɛmɛla bokonzi ya Grɛsi.+

3 “Mpe mokonzi moko ya nguya akotɛlɛma mpe akoyangela na bokonzi monene*+ mpe akosala ndenge alingi. 4 Kasi ntango akotɛlɛma, bokonzi na ye ekobukana mpe ekokabwana na ngámbo nyonso minei* ya likoló,+ kasi ekopesama na bakitani na ye te mpe biyangeli yango ekozala lokola oyo ya ye te; mpo bokonzi na ye ekopikolama mpe ekopesama na bato mosusu.

5 “Mpe mokonzi ya sudi, elingi koloba moko ya bankumu na ye akokóma makasi; kasi moto moko akolonga ye mpe akoyangela na bokonzi monene, bokonzi monene koleka oyo ya ye.

6 “Nsima ya mwa bambula, bakosala kondimana moko, mpe mwana mwasi ya mokonzi ya sudi akoya epai ya mokonzi ya nɔrdi mpo na kosala boyokani moko oyo ebongi. Kasi lobɔkɔ ya mwana mwasi yango ekozala lisusu na nguya te; mpe mokonzi akotɛlɛma te, lobɔkɔ na ye mpe te; mpe mwana mwasi yango akokabama, ye ná baoyo bayaki na ye, ezala mpe tata na ye, mpe moto oyo azali kokómisa ye makasi na bantango wana. 7 Mpe mwa nzete ya sika oyo ebimi na misisa na ye ekotɛlɛma na esika na ye, mpe akoyela limpinga ya basoda mpe akoya kobundisa ndako makasi ya mokonzi ya nɔrdi; akobunda na bango mpenza mpe akolonga. 8 Akomema mpe na Ezipito banzambe na bango, bikeko na bango ya ebende,* biloko na bango ya kitoko* ya palata mpe ya wolo, mpe bakangami. Na boumeli ya mwa bambula, akozala mosika na mokonzi ya nɔrdi. 9 Ye akoya kobundisa bokonzi ya mokonzi ya sudi, kasi akozonga na mokili na ye.

10 “Kasi bana na ye bakomibongisa mpo na etumba mpe bakoyanganisa limpinga moko monene mpenza ya basoda. Akopusana mpenza mpe akosopana lokola mai ya mpela. Kasi akozonga, mpe akobunda etumba nzelanzela tii akokóma na ndako makasi na ye.

11 “Mpe mokonzi ya sudi akosilika mpe akokende kobundisa ye, elingi koloba, mokonzi ya nɔrdi; mpe ye akoyanganisa ebele mpenza ya bato, kasi ebele mpenza ya bato yango bakopesama na lobɔkɔ ya oyo wana. 12 Mpe ebele ya bato yango bakomemama. Motema na ye ekokóma na lolendo, mpe akokweisa bankóto zomi zomi; kasi akosalela mpenza te makasi oyo akokóma na yango.

13 “Mpe mokonzi ya nɔrdi akozonga mpe akoyanganisa ebele ya bato koleka oyo ya liboso; mpe na nsuka ya bantango, nsima ya mwa bambula, akoya na limpinga monene ya basoda mpe na biloko mingi. 14 Na bantango yango, bato mingi bakobundisa mokonzi ya sudi.

“Mpe bato ya mobulu* na kati ya bato ya ekólo na yo, bakomemama mpo na komeka kokokisa emonaneli moko; kasi bakolonga te.*

15 “Mpe mokonzi ya nɔrdi akoya mpe akosala mwa ngomba ya mabele mpo na kozinga mpe akozwa mpenza engumba oyo ebatelami makasi. Mpe mampinga* ya mokonzi ya sudi ekotɛlɛma te, ata mpe bato na ye oyo baponamaki; mpe bakozala na nguya ya kotɛlɛma te. 16 Moto oyo akoya kobundisa ye akosala ndenge alingi, mpe moto moko te akokoka kotɛmɛla ye. Akotɛlɛma na mokili Kitoko,+ mpe nguya ya kobebisa ekozala na lobɔkɔ na ye. 17 Akozwa mokano* ya koya na bokasi nyonso ya bokonzi na ye, mpe akosala na ye boyokani oyo ebongi; mpe akosala mpenza makambo. Bakopesa ye nzela amemela mwana mwasi ya basi mpasi. Mpe mwana mwasi yango akotɛmɛla ye te, mpe akozala lisusu mwasi ya mobali yango te. 18 Akobalukela mikili oyo ezali pembeni ya mbu mpe akozwa mingi na yango. Mpe komanda moko akosukisa nsɔni oyo azalaki koyokisa ye, bongo nsɔni na ye ekozala te. Akozongisa nsɔni yango epai ya oyo wana. 19 Bongo akozonga* na bandako makasi ya mokili na ye moko, akobɛta libaku mpe akokwea, mpe akomonana lisusu te.

20 “Mpe na esika na ye, ekozala na moto moko oyo akotinda mokɔngɔli-mpako* moko alekaleka na bokonzi ya nkembo, kasi nsima ya mwa mikolo, akobukana, kasi na nkanda te mpe na etumba te.

21 “Mpe na esika na ye, moto moko oyo atyolami* akotɛlɛma, mpe bakopesa ye lokumu ya bokonzi; mpe akoya na ntango oyo bato bazali na likambo ya kobanga te* mpe akozwa bokonzi na nzela ya boboto ya lokuta.* 22 Mpe akokɔmbɔla mampinga* oyo ezali kosopana lokola mpela, mpe ekobukana, kaka ndenge Mokambi+ ya kondimana akobukana.+ 23 Mpe mpo na kondimana na bango elongo na moto oyo atyolami, akokoba kosalela bokosi, akomata mpe akokóma makasi na nzela ya ekólo moko ya moke. 24 Na ntango oyo bato bazali na likambo ya kobanga te,* akokende na bamboka oyo etondá na bomɛngo* ya etúká,* akosala makambo oyo batata na ye ná bankɔkɔ na ye basalá te. Akokabolela bango biloko oyo bapunzi, biloko oyo babɔtɔli mpe biloko mosusu; akosala myango mpo na kobundisa bisika oyo ebatelami makasi, kasi ekozala kaka mpo na mwa ntango.

25 “Mpe akosangisa nguya mpe mpiko* na ye mpo na kobundisa mokonzi ya sudi, ná limpinga moko monene; mpe mokonzi ya sudi akomibongisa mpo na etumba, ná limpinga moko monene mpenza ya basoda ya nguya. Mpe akotɛlɛma te, mpo bakosala myango mpo na kobundisa ye. 26 Mpe baoyo balyaka biloko na ye ya kitoko bakokweisa ye.

“Kasi limpinga na ye ya basoda ekokɔmbɔlama,* mpe mingi bakobomama.

27 “Nzokande bakonzi yango mibale bakozala na makanisi ya mabe,* mpe bakofanda na mesa moko, bazali kolobana lokuta. Kasi eloko moko te ekolonga, mpo nsuka ezali naino mpo na ntango oyo etyamá.+

28 “Mpe akozonga na mokili na ye na biloko ebele, mpe motema na ye ekotɛmɛla kondimana mosantu. Akosala mpenza oyo akanaki, mpe akozonga na mokili na ye.

29 “Na ntango oyo etyamá, akozonga mpe akobundisa sudi. Kasi na ntango yango, makambo ekosalema lokola na mbala ya liboso te, 30 mpo bamasuwa ya Kitime+ ekoya kobundisa ye, mpe akosambwa.

“Akozonga, akoloba makambo ya nkanda mpo na kotɛmɛla* kondimana mosantu+ mpe akosala mpenza makambo oyo akanaki; mpe akozonga, mpe akotya likebi na baoyo bazali kosundola kondimana mosantu. 31 Mampinga* oyo ye akotinda ekotɛlɛma; bakokómisa esika mosantu,+ ndako makasi, eloko mpamba, mpe bakolongola mbeka ya ntango nyonso.*+

“Mpe bakotya eloko ya bosɔtɔ oyo eyeisaka libebi.+

32 “Mpe baoyo bazali kobebisa kondimana yango, akomema bango na botomboki* na nzela ya maloba ya sukali.* Kasi bato oyo bayebi Nzambe na bango bakolonga mpe bakosala oyo bakani. 33 Mpe na kati ya bato, baoyo bazali na mayele ya kososola+ bakopesa bato mingi mayele. Bakokweisama na mopanga mpe na mɔtɔ,* bakokanga bango mpe bakobɔtɔla biloko na bango mpo na mwa mikolo. 34 Kasi ntango bakokweisama, bakozwa mwa lisalisi ya moke; mpe bato mingi bakosalela maloba ya sukali* mpo na kosangana na bango. 35 Mpe na kati ya bato oyo bazali na mayele ya kososola, bamosusu bakokwea, mpo na ntina na bango, mosala ya kopɛtola, ya kokómisa pɛto, mpe ya kokómisa mpɛmbɛ,+ esalema tii na ntango ya nsuka; mpo yango ezali naino mpo na ntango oyo etyamá.

36 “Mokonzi yango akosala ndenge alingi, akokóma na lolendo mpe akomitombola likoló ya nzambe nyonso; mpe akoloba makambo ya kokamwa mpo na kotɛmɛla Nzambe ya banzambe.+ Akobanda kolonga tii ntango nkanda ekokóma na nsuka; mpo makambo oyo ekanami esengeli kosalema. 37 Akozala na limemya te mpo na Nzambe ya batata na ye; akozala mpe na limemya te mpo na mposa ya basi to mpo na nzambe mosusu nyonso, kasi akomitombola likoló ya moto nyonso. 38 Nzokande* akopesa nkembo nde na nzambe ya bandako makasi; mpe na nzambe oyo batata na ye bayebaki te akopesa nkembo na nzela ya wolo, ya palata, ya mabanga ya ntalo mpe ya biloko kitoko.* 39 Akosala makambo oyo akanaki mpo na kobundisa bisika makasi oyo ebatelami malamu koleka, elongo na* nzambe moko ya bapaya. Akopesa nkembo mingi na baoyo bakondima ye,* mpe akotya bango báyangela bato mingi; mpe akokabola mabele mpo na ntalo moko boye.

40 “Na ntango ya nsuka, mokonzi ya sudi akobunda na ye, bakotindikana,* mpe mokonzi ya nɔrdi akokitela ye na makalo, batambwisi-mpunda mpe bamasuwa ebele; mpe akokɔta na mikili ndenge na ndenge mpe akosopana lokola mai ya mpela. 41 Akokɔta mpe na mokili Kitoko,+ mpe mikili mingi ekokwea. Kasi baoyo bakobika na lobɔkɔ na ye bango oyo: Edome, Moabe mpe eteni oyo eleki monene ya Baamone. 42 Mpe akosembola lobɔkɔ na ye mpo na kobundisa mikili ndenge na ndenge; ata mokili ya Ezipito mpe ekobika te. 43 Mpe akoyangela biloko ya motuya oyo ebombaná, wolo, palata mpe biloko nyonso ya kitoko* ya Ezipito. Mpe bato ya Libi mpe ya Etiopi bakozala na matambe na ye.*

44 “Kasi bansango oyo euti na ɛsti* mpe na nɔrdi ekobulunganisa ye, mpe akobima na nkanda makasi mpo na koboma mpe kosilisa ebele ya bato. 45 Mpe akopika bahema na ye ya bokonzi kati na mbu monene mpe ngomba mosantu ya mokili Kitoko.+ Bongo nsuka na ye ekoya, mpe moto ya kosalisa ye akozala te.