Basaleli na misala basalaka mosala ya motuya

NTOMA Paulo akomelaki lisangá ya Filipi boye: “Paulo ná Timote, baombo ya Kristo Yesu, epai ya basantu nyonso oyo bazali na bomoko na Kristo Yesu, oyo bazali na Filipi, ná bakɛngɛli ná basaleli na misala.” (Flp. 1:1) Simbá ete Paulo apesi basaleli na misala mbote. Na ntembe te, mibali wana bazalaki kosala mosala moko ya ntina mingi na ndenge bazalaki kosalisa bankulutu na lisangá na ntango wana. Ezali mpe ndenge moko lelo oyo. Basaleli na misala basalaka misala mingi mpo na kosalisa bakɛngɛli mpe yango esalaka ete makambo esalema na molɔngɔ na lisangá.

² Oyebi basaleli na misala ya lisangá na bino? Oyebi misala oyo basalaka mpo na bolamu na yo mpe mpo na bolamu ya lisangá mobimba? Na ntembe te, Yehova asepelaka mpenza na mosala makasi ya bandeko yango. Ntoma Paulo akomaki boye: “Mibali oyo bazali kosala mosala na ndenge ya malamu mpenza bazali kozwa esika ya lokumu, koloba polele mpe na bosembo mpo na kondima oyo bandimeli Kristo Yesu.”​—1 Tim. 3:13.

³ Basaleli na misala basengeli kozala bakristo ya bizaleli malamu, bato oyo bakoki kotyelama motema mpe oyo basalaka mosala na bango malamu. Yango emonisami polele na mokanda oyo Paulo akomelaki Timote mpo na masɛngami ya Biblia mpo na kokóma mosaleli na misala: “Basaleli na misala mpe basengeli kozala bato oyo bazwaka makambo na lisɛki te, bato ya minɔkɔ mibale te, bato oyo bamipesá na vinyo te, bázala te bato ya lokoso oyo balukaka kozwa litomba na ndenge ya mabe, bábatelaka sekele mosantu ya kondima na lisosoli ya pɛto. Lisusu, bámekama liboso mpo na koyeba soki bakoki, na nsima bázala basaleli, soki bafundami ata na likambo moko te. Basaleli na misala bázala mibali ya mwasi kaka moko, bato oyo bakambaka bana na bango mpe bato ya ndako na bango na ndenge ya malamu mpenza.” (1 Tim. 3:8-10, 12) Kolanda makambo oyo Biblia esɛngi mpo na kokóma mosaleli na misala ekosala ete báfunda lisangá te ete ezali kopesa bandeko oyo babongi te mikumba.

⁴ Bázala bilenge to mikóló, basaleli na misala basengeli komipesa na mosala ya kosakola sanza na sanza. Na ndakisa ya Yesu, bamonisaka molende na mosala ya kosakola. Soki bazali na molende ndenge wana, bakomonisa mposa oyo Yehova azali na yango ya kobikisa bato.​—Yis. 9:7.

⁵ Basaleli na misala basengeli mpe kozala ndakisa na molato, na kobongisa nsuki, na elobeli, na makanisi mpe na etamboli. Bazalaka na makanisi malamu, mpe yango esalaka ete bato mosusu bámemya bango. Longola yango, basaleli na misala bazwaka boyokani na bango na Yehova mpe mikumba na bango na lisangá na lisɛki te.​—Tito 2:2, 6-8.

⁶ Mibali yango ‘bamekamaki mpo na koyeba soki bakoki.’ Ata liboso bátyama basaleli na misala, bamonisaki ete bazali bato oyo bamipesi mpenza na Nzambe. Bamonisaki ete batyaka mosala ya Bokonzi na esika ya liboso na bomoi na bango mpe ete bazali pene ya kokokisa ata mokumba nini oyo bakoki kopesa bango. Bazali mpenza bandakisa oyo bandeko mosusu na lisangá bakoki komekola.​—1 Tim. 3:10.

⁷ Basaleli na misala basalaka ebele ya misala ya ntina mpo na bandeko; yango esalisaka bakɛngɛli bákoba komipesa na mosala na bango ya koteya mpe ya kobatela bampate. Ntango lisangani ya bankulutu ezali kopesa basaleli na misala mikumba, etalelaka makoki ya mokomoko na bango mpe bamposa ya lisangá.

⁸ Tótalela misala mosusu oyo basalaka: Mosaleli na misala moko akoki kozwa mokumba ya kotalela mikanda mpo tózwaka mikanda oyo biso moko tokoyekola mpe oyo tokosalela na mosala ya kosakola. Basusu bazwaka mokumba ya kotalela teritware to mpe kɔnti ya lisangá. Basusu bazwaka mokumba ya kotambwisa mikro, kosalela baaparɛyi ya sono, koyamba bato to kosalisa bankulutu na lolenge mosusu. Ezali na misala mingi oyo esengeli kosalema mpo na kobatela Ndako ya Bokonzi malamu mpe pɛto, yango wana mbala mingi basɛngaka basaleli na misala bápesa mabɔkɔ na mikumba yango.

⁹ Na masangá mosusu, bakoki kopesa mosaleli na misala mokomoko mokumba moko kati na mikumba yango. Kasi na masangá mosusu, mosaleli na misala moko akoki kozala na mikumba mingi. Ntango mosusu, basaleli na misala mibale to koleka bakoki kotyama na mosala moko. Soki basaleli na misala bazali mingi te mpo na kosala makambo wana, lisangani ya bankulutu ekoki kosɛnga bandeko mibali mosusu oyo bazwá batisimo mpe bazali ndakisa malamu básala misala mosusu ya ntina. Na ndenge yango, bakomesana na misala yango mpe yango ekosalisa bango na nsima, ntango bakokokisa masɛngami ya Biblia mpo na kotyama basaleli na misala. Soki bandeko mibali bazali te, bakoki kosɛnga ndeko mwasi moko, oyo azali ndakisa malamu, apesa mabɔkɔ na misala mosusu, atako akotyama mosaleli na misala te. Moto oyo azali ndakisa malamu azali moto oyo basusu bakoki komekola etamboli na ye mpe lolenge na ye ya kosambela Yehova. Azali ndakisa malamu mpo na basusu na likambo etali koyangana na makita, mosala ya kosakola, bomoi ya libota, kopona masano to kominanola, kolata, ndenge ya kobongisa nsuki, mpe bongo na bongo.

¹⁰ Na masangá oyo bankulutu bazali mingi te, bakoki kosɛnga basaleli na misala oyo bayebi mateya ya Biblia malamu bátalela na moto mituna ya batisimo oyo etali mateya na biso. Makambo yango ezali na Apɛndisi “Eteni 1: Bindimeli ya bakristo.” Lokola “Eteni 2: Bomoi ya bakristo” ezali mpe na makambo oyo etali moto ye moko, nkulutu moko nde asengeli kotalela yango.

¹¹ Nsima ya mwa ntango, soki lisangani ya bankulutu emoni ete esengeli kolongola mosaleli na misala na mosala moko mpo na kopesa ye mosala mosusu, ekoki kosala yango. Nzokande, ezalaka malamu mpenza kotika bandeko bákoba na misala oyo bapesi bango ntango molai mpo báyeba yango malamu, bámesana mpenza na yango, mpe básala yango malamu.

¹² Na kotalela makambo ya lisangá mokomoko, bakoki kopesa mikumba mosusu na basaleli na misala oyo ‘bato nyonso bazali komona polele ete bazali kokende liboso.’ (1 Tim. 4:15) Soki bankulutu bazali mingi te, bakoki kotya mosaleli na misala moko azala mosungi ya mokɛngɛli ya etuluku to, na ntango mosusu, azala mosaleli ya etuluku, na kolanda malako ya bankulutu. Soki esengeli, bakoki mpe kopesa basaleli na misala masolo mosusu na likita Bomoi mpe mosala, ata mpe kotambwisa Boyekoli ya Biblia na lisangá soki bosɛnga ezali, mpe kosala badiskur ya bato nyonso na lisangá. Bakoki kopesa basaleli na misala mikumba mosusu soki ntina moko esɛngi kosala bongo, mpe soki bakokisi makambo oyo esɛngami mpo na yango. (1 Pe. 4:10) Ntango basaleli na misala bazali kosalisa bankulutu, basengeli komipesa na bolingo na bango moko.

¹³ Atako mosala na bango ekeseni na oyo ya bankulutu, ezali mpe mosala mosantu mpo na Nzambe mpe ezali na ntina mingi mpo lisangá etambola malamu. Na nsima, soki mosaleli na misala azali kokokisa mikumba na ye malamu mpe soki akokisi masɛngami ya Biblia mpo na kozala mobateli ya bampate mpe moteyi, bankulutu bakoki kotya nkombo na ye mpo akóma nkulutu.

¹⁴ Soki ozali elenge mobali to mpe ozwi batisimo sika, ozali koluka kokóma mosaleli na misala? (1 Tim. 3:1) Lokola bato mingi bazali koyamba solo mbula na mbula, tosengeli na mibali ya makoki oyo bakɔmeli na elimo mpo na kozwa mikumba na lisangá. Okoki kosala yango soki ozali kokolisa mposa ya kosalisa basusu. Ndenge moko ya kosala yango ezali komanyola na ndakisa ya Yesu. (Mat. 20:28; Yoa. 4:6, 7; 13:4, 5) Mposa na yo ekokola ntango okoyoka esengo oyo eutaka na kopesa. (Mis. 20:35) Yango wana, omipesa na bolingo na yo moko mpo na kosalisa basusu, kobongisa Ndako ya Bokonzi, to mpe kosala lisolo na likita Bomoi mpe mosala soki mwana-kelasi oyo asengelaki kosala yango azali te. Koluka kozwa mikumba esɛngi mpe kozala na momeseno ya koyekolaka yo moko mpo na kokolisa bizaleli ya elimo. (Nz. 1:1, 2; Gal. 5:22, 23) Lisusu, ndeko mobali oyo alingi kozwa mikumba asengeli komonisa ete azali moto ya kotyela motema mpe azali sembo ntango bapesi ye mikumba na lisangá.​—1 Ko. 4:2.

¹⁵ Basaleli na misala batyamaka na elimo santu mpo na bolamu ya lisangá. Bandeko ya lisangá bakomonisa ete basepelaka na mosala makasi oyo basaleli na misala basalaka soki bazali kolanda makambo oyo bazali koyebisa bango ntango bazali kosala mosala na bango. Na ndenge yango, lisangá ekomonisa ete ezali kosepela na bibongiseli oyo Yehova azwi mpo ndako na ye etambola na molɔngɔ.​—Gal. 6:10.