Maroma

15 Kono luna ba ba tiile lu swanela ku lwala mifokolo ya ba ba si ka tiya, ni ku sa ezanga ze tabisa luna bañi. 2 Mañi ni mañi wa luna a tabise yo muñwi kuli a ezeze yo bunde ni ku mu yahisa. 3 Kakuli nihaiba Kreste naa si ka eza ze tabisa yena muñi; kono sina mo ku ñolezwi: “Mashubu a ba ne ba ku shubula a wezi fahalimwaa ka.” 4 Kakuli lika kaufela ze ne ñozwi kwamulaho ne li ñolezwi ku lu luta, kuli ka buitiiso bwa luna ni ka ku omba-ombiwa ki Mañolo lu kone ku ba ni sepo. 5 Cwale haike Mulimu ya fa buitiiso ni ku omba-omba a mi tuse kaufelaa mina ku ba ni maikuto a swana, a naa na ni ona Kreste Jesu, 6 kuli kaufelaa mina hamoho ka mulomo u li muñwi mu kone ku kanyisa Mulimu yena Ndatahe Mulenaa luna Jesu Kreste.

7 Hakulicwalo mu amuhelane, sina Kreste ni yena ha lu amuhezi, kuli Mulimu a kanyiswe. 8 Kakuli ni mi bulelela kuli Kreste mane naa bile sikombwa sa ba ba keni mwa mupato kuli a pake buniti bwa Mulimu, ili ku tiisa lisepiso za naa file Mulimu ku bo kukwaa bona, 9 ni kuli macaba a kanyise Mulimu kabakala sishemo sa hae. Sina ha ku ñozwi kuli: “Ki lona libaka ha ni ka ku lumba fapilaa nyangela mwa macaba mi libizo la hao ni ka li lumbeka ka pina.” 10 Hape u li: “Mu nyakalale, mina macaba, hamoho ni batu ba hae.” 11 Mi hape u li: “Mu lumbeke Jehova, mina macaba kaufela, mi haike batu kaufela ba mu lumbeke.” 12 Mi Isaya hape u li: “Ku ka bonahala mubisi wa Jese, mi ku ka taha ya ka busa macaba; mi macaba a ka beya sepo ya ona ku yena.” 13 Haike Mulimu ya fa sepo a mi taze tabo ni kozo kaufela ka ku mu sepa kwa mina, kuli mu tale sepo ka maata a moya o kenile.

14 Cwale na luli ni kozwi ka za mina mizwale ba ka, kuli ni mina ka sibili mu tezi bunde, sina ha mu talizwe zibo kaufela, ni kuli mwa kona ku elezana. 15 Kono cwale ni mi ñolela patalaza mwa litaba ze ñwi, kuli ni mi hupulise hape, kabakala sishemo se ni filwe ki Mulimu 16 kuli ni be mutangaa Kreste Jesu ku bamacaba. Ni eza musebezi o kenile wa taba ye nde ya Mulimu, ilikuli nubu ye, ona macaba a, i kone ku amuheleha, i keniswe ka moya o kenile.

17 Hakulicwalo ni na ni libaka la ku nyakalala ka Kreste Jesu bakeñisa lika ze ama Mulimu. 18 Kakuli ha ni na ku ipa ku bulela ka za nto ifi kamba ifi kwandaa lika zeo Kreste naa ezize ka na kuli macaba a ipeye ku utwa, ka manzwi ni likezo za ka, 19 ka maata a limakazo ni ze komokisa, ka maata a moya o kenile; kuli mane ni kutalize taba ye nde ya za Kreste ka ku tala ku zwa mwa Jerusalema ni ku potoloha ku yo fita kwa Iliriko. 20 Ka mukwa wo mane, ne ni likile ka taata ku sa shaela taba ye nde mwa libaka mo ne li utwahezi kale libizo la Kreste, ilikuli ni si ke na yaha fa mutomo wa yo muñwi; 21 kono sina mo ku ñolezwi: “Ba ne ba si ka zibiswa za hae ba ka bona, ni ba ba si ka utwa ba ka utwisisa.”

22 Ki lona libaka ha ne ni tibezwi hañata ku taha ku mina. 23 Kono cwale ha ku sa na kalulo ye ni si ka fita ku yona mwa libaka zeo, mi se li lilimo ze ñata ni nze ni shukelwa ku taha ku mina. 24 Kamukwaocwalo ni sepa kuli ha ni li mwa musipili wa ku ya kwa Spain, ni ka to mi bona mi mu ka ni sindeketa sibakanyana ha se ni ikozi siango ni mina ka nakonyana. 25 Kono cwale ni tuha ni ya kwa Jerusalema ku yo sebeleza ba ba kenile. 26 Kakuli ba mwa Masedonia ni Akaya ba tabile ku ikabela za bona sina nubu ya ku tusa babotana ba ba mwahalaa ba ba kenile mwa Jerusalema. 27 Ki niti, ba tabile ku eza cwalo, mi luli ne ba na ni sikoloti ku bona; kakuli haiba macaba a fumani kabelo kwa lika za kwa moya za ba ba kenile, ni ona a na ni sikoloti sa ku sebeleza ba ba kenile ka lika za ona za kwa mubili. 28 Cwale ha se ni felize ku eza cwalo ni ku fitisa ku bona linubu ze, li nze li kwanile, ni ka fita ku mina ha ni ya kwa Spain. 29 Mi na ziba kuli ha ni taha ku mina ni ka taha ni tikanyo ye tezi ya limbuyoti ze zwa ku Kreste.

30 Cwale na mi kupa mizwale, ka Mulenaa luna Jesu Kreste ni ka lilato la moya, kuli mu itiise ni na mwa litapelo za ku ni lapelela ku Mulimu, 31 kuli ni kone ku lamulelwa ku ba ba sa lumeli mwa Judea ni kuli bukombwa bwa ka bo ni ezeza ba ba kenile mwa Jerusalema bu kone ku amuheleha ku bona, 32 ilikuli ka tato ya Mulimu ni tahe ku mina ka tabo mi ni to katuluha hamoho ni mina. 33 Haike Mulimu ya fa kozo a be ni mina kaufela. Amen.