Montre Lamur Fidel Anver Bann Ki Bizin Nu Led

“Pratik lamur fidel . . . sakenn anver so kamarad.”—ZEKARYA 7:9.

1, 2. (a) Kifer eski nu bizin manifeste lamur fidel? (b) Ki bann kestyon nu pu egzamine?

PAROL Bondye Zeova ankuraz nu pu kontan “lamur fidel.” (Mika 6:8) Li usi donn nu bann rezon kifer nu bizin fer sa. Enn rezon se parski “enn zom ki ena lamur fidel li rekonpans so prop nam.” (Proverb 11:17) Sa li byin vre! Kan nu montre lamur fidel, sa kapav kre bann lyin salere, dirab ek byin pros avek lezot. Rezilta: Nu pu ena bann kamarad fidel—sa vremem enn rekonpans ki ena buku valer!—Proverb 18:24.

² Anplis, Labib dir nu: “Sa kikenn ki rod lazistis ek lamur fidel la pu truv lavi.” (Proverb 21:21) Wi, si nu rod lamur fidel, nu pu vinn enn kikenn ki Bondye byin kontan ek sa pu permet nu zwir bann benediksyon dan lavenir, parmi ena lavi pu tuletan. Me kuma eski nu kapav montre lamur fidel? Anver kisannla nu bizin manifeste sa kalite la? Ek kuma eski lamur fidel li diferan avek santiman natirel uswa santiman bonte ki bann imin ena an zeneral?

Santiman Natirel Bann Dimunn ek Lamur Fidel

3. Kuma eski lamur fidel diferan avek santiman imin?

³ Santiman natirel ki bann dimunn ena ek lamur fidel zot diferan dan plizir fason. Par egzanp, bann ki montre santiman natirel, suvan zot fer sa san ki zot ena enn latasman profon ek personel, uswa enn relasyon avek bann dimunn ki zot pe tret avek bonte. Me, si nu manifeste lamur fidel anver enn kikenn, nu pe atas nu avek lamur ar sa dimunn la. Dan Labib, bann manifestasyon lamur fidel ant bann dimunn ti baze kitfwa lor bann relasyon ki ti deza egziste. (Zenez 20:13; 2 Samyel 3:8; 16:17) Uswa li ti baze lor bann relasyon ki ti’nn devlope grasa bann aksyon lamur fidel ki ti’nn manifeste dan lepase. (Zozye 2:1, 12-14; 1 Samyel 15:6; 2 Samyel 10:1, 2) Pu nu byin konpran sa diferans la, anu konpar de legzanp biblik, enn konsernan bann santiman natirel ek enn lot konsernan lamur fidel ant bann dimunn.

4, 5. Kuma eski sa de legzanp biblik ki finn site la montre byin diferans ki ena ant santiman natirel imin ek lamur fidel?

⁴ Anu egzaminn enn premye legzanp kot bann dimunn ti manifeste bann santiman natirel. Enn grup dimunn ti fer nofraz, parmi ti ena lapot Pol. Bann vag lamer ti sarye zot ek ti zet zot lor laplaz lil Malt. (Akt 27:37–28:1) Mem si bann abitan Malt pa ti ena okenn ansyin obligasyon anver sa bann vwayazer ki ti’nn fer nofraz la, ni zot ti ena kit relasyon avek bannla, sa bann ilwa la ti akey sa bann etranze la avek lospitalite. Zot ti montre “enn santiman imin extraordiner.” (Akt 28:2, 7) Zot ti montre zot lospitalite avek bonte, me sa ti arive zis enn kut kumsa, ek anver bann etranze. Donk zot finn manifeste bann santiman natirel.

⁵ Pu fer konparezon, anu egzaminn lospitalite ki Lerwa David li, li ti manifeste anver Mefiboset, garson so kamarad Yonatann. David ti dir Mefiboset: “To pu manz dipin tuletan lor mo latab.” Pu explike kifer li ti’nn pran sa dispozisyon la, David ti dir li: “Vremem mo pu manifeste lamur fidel anver twa akoz Yonatann to papa.” (2 Samyel 9:6, 7, 13) Donk, kapav dir ki lospitalite ki David ti pu kontiyn manifeste, ti enn fason ki li ti pu montre so lamur fidel. Sa pa ti enn sinp santiman imin, me ti enn prev so fidelite anver enn relasyon ki ti’nn deza etabli. (1 Samyel 18:3; 20:15, 42) Zordi usi parey, bann serviter Bondye montre santiman natirel anver tu dimunn an zeneral. Me zot sirtu kontiyn manifeste lamur fidel anver bann dimunn, avek ki zot partaz enn relasyon ki apruve par Bondye.—Matye 5:45, Galat 6:10.

 6. Ki bann laspe lamur fidel ki manifeste ant bann dimunn Parol Bondye fer byin resorti?

⁶ Pu idantifye detrwa lezot laspe lamur fidel, nu pu egzaminn, san rant dan tro detay, trwa resi biblik ki montre byin sa kalite la. Dan sa bann legzanp la nu pu remarke ki lamur fidel ki bann dimunn montre li manifeste (1) par bann aksyon byin presi, (2) dan enn fason volonter, ek (3) sirtu anver bann ki ena enn bezwin. Anplis, sa bann resi la montre byin kuma nu kapav manifeste lamur fidel zordi.

Enn Papa Montre Lamur Fidel

 7. Ki kitsoz serviter Abraam ti dir Betuel ek Labann, ek ki kestyon ki fer reflesi serviter la ti suleve?

⁷ Zenez 24:28-67 rakont laswit zistwar serviter Abraam, ki ti mansyone dan lartik avan. Apre ki li ti zwenn Rebeka, li ti invite kot Betuel, papa Rebeka. (Verse 28-32) Laba, serviter la ti rakont an detay ki li ti’nn vinn rod enn madam pu garson Abraam. (Verse 33-47) Li ti byin fer remarke ki li ti konsider sikse ki li ti’nn gayne ziska la, kuma enn siyn Zeova ki “ti’nn diriz [li] dan bon semin pu pran tifi frer [so] met, pu so garson.” (Verse 48) Sirman serviter la ti espere ki rapor sinser ki li ti fer, ti pu konvink Betuel ek so garson Labann ki Zeova ti pe beni so misyon. Alafin, serviter la ti dir: “Si zot pe montre lamur fidel ek konfyans anver mo met, dir mwa; me sinon, dir mwa pu ki mo kapav turn adrwat uswa agos.”—Verse 49.

 8. Ki ti reaksyon Betuel lor bann kitsoz ki ti konsern Rebeka?

⁸ Zeova ti’nn deza montre lamur fidel anver Abraam. (Zenez 24:12, 14, 27) Eski Betuel ti pu pre pu fer parey kuma Bondye, ek les Rebeka al avek serviter Abraam? Eski lamur fidel ki bann dimunn manifeste ti pu azut avek lamur fidel Bondye pu ki sa atenn so bi? Uswa eski sa long vwayaz ki sa serviter la ti’nn fer, ti pu tom dan delo? Sirman li ti enn rekonfor pu serviter Abraam kan li ti tann Labann ek Betuel dir: “Sa kitsoz la finn sorti kot Zeova.” (Verse 50) Zot ti rekonet ki Zeova ki ti pe diriz sa bann kitsoz la ek san ezite zot ti aksepte so desizyon. Apre sa, Betuel ti exprim so lamur fidel kan li ti dir: “Ala Rebeka devan twa. Pran li ale! Ek les li vinn fam garson to met, parey kuma Zeova ti’nn dir.” (Verse 51) Rebeka ti akonpayn serviter Abraam volonterman, ek li pa ti’nn tarde pu vinn fam Izaak ek Izaak ti byin kontan li.—Verse 49, 52-58, 67.

Lamur Fidel Manifeste par enn Garson

 9, 10. (a) Ki kitsoz Zakob ti demann Zozef so garson, fer pu li? (b) Kuma eski Zozef ti montre lamur fidel anver so papa?

⁹ Zakob, tizanfan Abraam, li usi li ti resevwar lamur fidel. Parey kuma Zenez sapit 47 rakonte, sa lepok la Zakob ti pe viv dan Lezip, ek ‘bann zur so lamor ti’nn koste.’ (Verse 27-29) Li ti trakase parski li ti pu mor andeor peyi ki Bondye ti promet Abraam. (Zenez 15:18; 35:10, 12; 49:29-32) Zakob pa ti anvi ki anter li dan Lezip, akoz sa li ti’nn fer bann laranzman pu amenn so lekor dan peyi Kanaan. Kisannla apart Zozef, so garson ki ti ena enn gran pozisyon, ti pli byin plase pu fer sir ki dezir Zakob realize?

¹⁰ Resi la dir: “Lerla [Zakob] apel so garson Zozef ek li dir li: ‘Si asterla, mo finn truv faver devan to lizye, . . . to bizin montre lamur fidel ek konfyans anver mwa. (Silteple, pa anter mwa dan Lezip.) Ek mo bizin al dormi avek mo bann papa, ek to bizin amenn mwa andeor Lezip ek anter mwa dan zot tom.’” (Zenez 47:29, 30) Zozef ti promet ki li pu respekte seki li ti pe demande, ek enn tipe letan apre, Zakob ti mor. Zozef ek bann lezot garson Zakob ti amenn so lekor “dan peyi Kanaan ek ti anter li dan lagrot ki ti dan terin Makpela, terin ki Abraam ti’nn aste.” (Zenez 50:5-8, 12-14) Ala kuma Zozef ti manifeste lamur fidel anver so papa.

Lamur Fidel enn Belfi

11, 12. (a) Kuma eski Rit ti montre lamur fidel anver Naomi? (b) Kuma eski lamur fidel ki Rit ti manifeste “dezyem fwa” ti pli bon ki “premye fwa”?

¹¹ Liv Rit rakonte kuma Naomi, enn vev, ti resevwar lamur fidel Rit, so belfi Moabit ki li usi ti enn vev. Kan Naomi ti desid pu return Betleem, an Zida, Rit ti manifeste lamur fidel ek determinasyon kan li ti dir: “Kot to pu ale mo pu ale, kot to pu pas lanwit, mo pu pas lanwit. To pep pu vinn mo pep, ek to Bondye pu vinn mo Bondye.” (Rit 1:16) Plitar Rit ti manifeste so lamur fidel kan li ti fer kone ki li ti dispoze pu marye avek Boaz, enn paran aze Naomi.a (Deteronom 25:5, 6; Rit 3:6-9) Boaz ti dir Rit: “To’nn montre to lamur fidel pli byin ankor dezyem fwa ki premye fwa, kan to pa’nn galup deryer bann zenn zan, ki zot ris uswa zot modes.”—Rit 3:10.

¹² “Premye fwa” ki Rit ti manifeste lamur fidel, se kan li ti kit so pep ek li ti res atase avek Naomi. (Rit 1:14; 2:11) Me sa aksyon lamur fidel ki Rit ti fer “dezyem fwa” la—kan li ti pre pu marye avek Boaz—sa ti pli gran ki seki avan la. Asterla Rit ti pu kapav donn nesans enn zeritye pu Naomi, ki ti depas laz pu gayn zanfan. Apre zot maryaz, kan Rit ti gayn tibaba, bann fam Betleem ti kriye: “Naomi finn gayn enn garson.” (Rit 4:14, 17) Rit ti vremem enn “bon fam.” Plitar Zeova ti rekonpans li—li ti gayn privilez extraodiner pu vinn enn anset Zezi Kris.—Rit 2:12; 3:11; 4:18-22; Matye 1:1, 5, 6.

Manifeste par Bann Aksyon

13. Kuma eski Betuel, Zozef, ek Rit ti manifeste zot lamur fidel?

¹³ Eski u’nn remarke kuma Betuel, Zozef ek Rit ti manifeste zot lamur fidel? Zot pa finn fer li zis par bann bon parol, me par bann aksyon byin presi. Betuel pa ti zis dir, “Ala Rebeka.” Me li ti “avoy Rebeka.” (Zenez 24:51, 59) Zozef pa ti zis dir, “Mwa, mo pu fer dapre to parol.” Me li ek so bann frer ti fer pu Zakob “egzakteman kuma li ti donn zot lord pu fer.” (Zenez 47:30; 50:12, 13) Rit pa ti zis dir, “Kot to pu ale mo pu ale.” Me li ti kit so pep ek li ti akonpayn Naomi pu ki “zot kontiyn zot semin ansam ziska ki zot ariv Betleem.” (Rit 1:16, 19) Dan Zida, Rit ti azir ankor “dapre tu seki so belmer ti donn li lord pu fer.” (Rit 3:6) Wi, Rit, parey kuma Betuel ek Zozef ti manifeste zot lamur fidel par bann aksyon.

14. (a) Kuma eski bann serviter Bondye zordi zur montre lamur fidel par bann aksyon? (b) Ki bann aksyon lamur fidel parmi bann Temwin dan u landrwa, u kone?

¹⁴ Li tusan pu truve kuma bann serviter Bondye zordi kontiyn manifeste lamur fidel par bann aksyon. Par egzanp, mazinn bann ki kontiyn sutenir lor plan afektif zot bann frer ek ser andikape, depresif, uswa ki dan dey. (Proverb 12:25) Uswa mazinn sa kantite Temwin Zeova ki fidelman amenn bann dimunn aze Lasal DiRwayom pu asiste bann reynion kongregasyon sak semenn. Anna, ki ena 82 an ek ki sufer lartrit, exprim santiman buku lezot dimunn kuma li, kan li dir: “Gayn enn dimunn pu amenn mwa dan loto pu asiste tu bann reynion, sa li enn gran benediksyon Zeova. Mo remersye Li avek tu mo leker ki Li finn donn mwa bann frer ek bann ser ki ena buku lamur.” Eski u pe partisip dan sa bann kalite aksyon la dan kongregasyon? (1 Zan 3:17, 18) Si u pe fer sa, u kapav sir ki u lamur fidel li byin apresye.

Manifeste Volonterman

15. Dan sa trwa resi biblik ki nu’nn egzamine la, ki bann laspe lamur fidel resorti ankor pli byin?

¹⁵ Bann resi biblik ki nu’nn egzamine montre usi ki lamur fidel li manifeste volonterman, pa par fors. Betuel ti korpere volonterman avek serviter Abraam. Rebeka usi parey. (Zenez 24:51, 58) Zozef ti montre so lamur fidel san ki lezot obliz li pu fer sa. (Zenez 50:4, 5) Rit ti “persiste pu al avek [Naomi].” (Rit 1:18) Kan Naomi ti propoz Rit pu apros Boaz, lamur fidel ti pus sa tifi Moabit la pu dir: “Tu seki to dir mwa fer mo pu fer.”—Rit 3:1-5.

16, 17. Ki leson inportan nu kapav aprann par sa lamur fidel ki Betuel, Zozef ek Rit ti’nn manifeste la, ek ki ti pus zot pu manifeste sa kalite la?

¹⁶ Lamur fidel ki Betuel, Zozef ek Rit ti’nn manifeste montre nu buku kitsoz, parski Abraam, Zakob ek Naomi pa ti fer okenn presyon lor zot pu fors zot fer kitsoz. Apre tu, pa ti ena okenn lalwa ki ti obliz Betuel donn so tifi. Li ti kapav fasilman dir serviter Abraam: ‘Non, mo’le gard mo tifi ki byin debriyar pre kot mwa.’ (Zenez 24: 18-20) Zozef usi ti lib pu deside pu respekte uswa pa respekte demann so papa, parski Zakob ti pu mor ek li pa ti pu kapav fors li pu gard so parol. Naomi limem, ti dir ki Rit ti lib pu res Moab. (Rit 1:8) Rit ti lib usi pu marye avek enn parmi “bann zenn zan” olye marye avek Boaz ki ti aze.

¹⁷ Betuel, Zakob ek Rit ti manifeste lamur fidel volonterman; zot ti anvi fer li avek tu zot leker. Zot ti santi ki zot ti ena enn responsabilite moral pu manifeste sa kalite la anver bann dimunn avek ki zot ti ena enn relasyon, parey kuma Lerwa David plitar finn santi li oblize pu manifeste sa mem kalite la anver Mefiboset.

18. (a) Avek ki latitid eski bann ansyin “pran swin trupo Bondye”? (b) Kuma eski enn ansyin ti exprim so bann santiman konsernan led ki li donn bann lezot krwayan?

¹⁸ Lamur fidel li tuzur enn mark ki idantifye lepep Bondye ek usi bann zom ki pran swin trupo Bondye. (Psom 110:3; 1 Tesalonisyin 5:12) Sa bann ansyin uswa sirveyan la, santi zot responsab pu viv an akor avek konfyans ki ti fer zot kan ti nom zot. (Akt 20:28) Mem sa, zot fer zot laktivite berze ek bann lezot aksyon lamur fidel pu kongregasyon “avek plezir, pa par fors.” (1 Pyer 5:2) Bann ansyin pran swin trupo parski zot ena sa responsabilite la ek zot anvi fer li. Zot manifeste lamur fidel anver bann muton Kris parski se zot devwar ek zot ule fer li. (Zan 21:15-17) Enn ansyin dir: “Mo byin kontan vizit bann frer kot zot, uswa telefonn zot zis pu montre ki mo pans zot. Pu mwa, ed mo bann frer, fer mwa gayn lazwa ek satisfaksyon!” Tu bann ansyin ki pran byin kont trupo zot kongregasyon, dakor avek sa parol la avek tu zot leker.

Montre Lamur Fidel Anver Bann Ki Bizin Nu Led

19. Dan bann resi biblik ki nu’nn egzamine dan sa lartik la, ki kitsoz ki byin resorti konsernan lamur fidel?

¹⁹ Bann resi biblik ki nu’nn egzamine la montre byin usi ki bizin manifeste lamur fidel anver bann ki ena enn bezwin, me ki pa kapav satisfer sa bezwin la par zotmem. Abraam ti bizin korperasyon Betuel pu ki so desandans kontiyne. Zakob ti bizin led Zozef pu amenn so lekor dan Kanaan. Ek Naomi ti bizin led Rit pu li gayn enn eritye. Ni Abraam, ni Zakob, ni Naomi pa ti pu kapav satisfer sa bann bezwin la san led. Zordi usi parey, bizin manifeste lamur fidel sirtu anver bann ki dan bezwin. (Proverb 19:17) Nu bizin imit Zob, enn sef fami ki ti pran kont “sa kikenn ki dan lapenn ek ki kriy osekur la, sa garson ki pena papa la ek ninport kisannla ki pena personn pu ed li” ek usi “sa kikenn ki pe al mor la.” Zob ti usi ‘fer leker vev kontan’ ek li ti vinn ‘lizye pu kikenn ki aveg, ek lipye pu kikenn ki bwate.’—Zob 29:12-15.

20, 21. Kisannla ki bizin nu bann manifestasyon lamur fidel, ek ki sakenn parmi nu bizin determine pu fer?

²⁰ Zordi dan sak kongregasyon Kretyin, ena ‘bann ki dan lapenn ek ki pe kriye osekur,’ kitfwa parski zot santi zot tusel, zot dekuraze, zot ena santiman ki zot pa vo nanyin, lezot dimunn finn desevwar zot, zot ena enn maladi byin grav, uswa zot finn perdi enn kikenn ki zot byin kontan dan lamor. Ninport ki sufrans zot pe kone, tu sa bann dimunn ki nu byin kontan la zot ena bann bezwin ki nu kapav ek ki nu bizin satisfer grasa nu bann aksyon lamur fidel volonter ki nu kontiyn manifeste.—1 Tesalonisyin 5:14.

²¹ Donk, anu kontiyn imit Bondye Zeova ki “ena labondans lamur fidel.” (Egzod 34:6; Efezyin 5:1) Nu kapav fer sa kan nu pre pu fer bann aksyon presi sirtu anver bann ki bizin nu led. Pena dut ki nu pu donn Zeova loner ek nu pu konn enn gran lazwa amezir ki nu “pratik lamur fidel sakenn anver so kamarad.”—Zekarya 7:9.

[Not anba paz]

Kuma Eski U Pu Reponn?

• Kuma eski lamur fidel diferan avek santiman natirel bann dimunn?

• Kuma eski Betuel, Zozef ek Rit finn manifeste lamur fidel?

• Avek ki latitid nu bizin manifeste lamur fidel?

• Kisannla ki bizin nu lamur fidel?

[Zimaz lor paz 15]

Kuma eski Betuel ti manifeste lamur fidel?

[Zimaz lor paz 17]

Lamur fidel Rit ti enn benediksyon pu Naomi[

[Zimaz lor paz 19]

Lamur fidel bann dimunn li manifeste volonterman, par bann aksyon presi, ek anver bann ki bizin nu led