Salamo

84 Tiako loatra ny tranolainao be voninahitra,+

Jehovah Tompon’ny tafika ô!+

 2 Manimanina te ho any amin’ny tokotanin’ny tranolain’i Jehovah aho, ka trotraky ny alahelo.+

Mihoby an’ilay Andriamanitra velona ny foko sy ny tenako manontolo.+

 3 Na ny vorona aza nahita trano,

Ary ny sidintsidina nahita akany

Hametrahany ny zanany,

Dia eo amin’ny alitaranao be voninahitra, Jehovah Tompon’ny tafika ô, ry Mpanjakako sy Andriamanitro!

 4 Sambatra ny olona monina ao an-tranonao!+

Fa midera anao foana izy ireo.+ Sela.

 5 Sambatra ny olona mahazo hery avy aminao,+

Sy maniry hizotra amin’ny lalana mankany an-tranonao.+

 6 Na dia lemaka karakaina anirian’ny hazo bakà* aza no andalovany,+

Dia manjary toy ny tany misy loharano.

Mitafy fiderana toy ny fitafy akanjo ilay mpampianatra.+

 7 Hitombo hery eny am-pandehanana ireny,+

Ary samy miseho eo anatrehan’Andriamanitra ao Ziona.+

 8 Henoy ny vavaka ataoko, Jehovah Andriamanitry ny tafika ô!+

Aoka ianao hanongilan-tsofina, ry Andriamanitr’i Jakoba ô!+ Sela.

 9 Ry Andriamanitra ampinganay ô, mba jereo+

Sy tsinjovy ilay voahosotrao.+

10 Fa ny indray andro eo an-tokotaninao dia tsara noho ny arivo any an-toeran-kafa.+

Aleoko mijoro eo an-tokonam-baravaran’ny tranon’Andriamanitro,+

Toy izay hiriaria ao amin’ny tranolain’ny ratsy fanahy.+

11 Fa masoandro+ sy ampinga+ i Jehovah Andriamanitra,

Fankasitrahana sy voninahitra no omeny.+

Tsy hiahotra ny hanome zava-tsoa ho an’izay mandeha tsy misy tsiny i Jehovah.+