Ña̱ chíndeétáʼan xíʼin na̱ kúáa nu̱ú

Iníí ñuyǐví ki̱ʼva 43 millón na̱ yiví kúáa íyo, ta 295 millón kúú na̱ loʼo kuití túvi nu̱ú.a Ku̱a̱ʼání na̱yóʼo kǒo kúʼvi̱-inina xíninana ta íxandi̱va̱ʼana xíʼinna.

¿Ndáaña ndóʼo Ndióxi̱ tá xítora na̱ kúáa nu̱ú? ¿Ndáaña káʼa̱n Biblia xa̱ʼa̱ na̱yóʼo?, ta ¿ndáaña kéʼé miíndi̱ na̱ testigo Jehová ña̱ va̱ʼa chindeétáʼanndi̱ xíʼinna?

¿Ndáaña ndóʼo Ndióxi̱ tá xítora na̱ kúáa nu̱ú?

Biblia káʼa̱nña ña̱ ndíʼi̱ní-ini Jehováb xa̱ʼa̱ na̱ kúáa nu̱ú ta kuni̱ra ña̱ saátu na̱yóʼo ná kunda̱a̱-inina xa̱ʼa̱ra ta ná kǒo kundasíyó kuniyóna. Ta káʼa̱nra taxira ña̱ va̱ʼa ndaʼa̱na chí nu̱únínu.

Ña̱ káʼa̱n Biblia: “Na̱ sándañúʼu na̱ kúáa chí yichi̱ nu̱ú ku̱a̱ʼa̱nna, ná ndakiʼinna chiʼña” (Deuteronomio 27:18).

Ña̱ kúni̱ kachiña: Tiempo xi̱naʼá ley ña̱ ta̱xi Ndióxi̱ ndaʼa̱ na̱ ñuura xi̱kaʼa̱nña ña̱ ná kǒo ixandi̱va̱ʼana xíʼin na̱ kúáa nu̱ú.

Ña̱ káʼa̱n Biblia: “Va̱ása ndáka̱xin Ndióxi̱ na̱ yiví” (Hechos 10:34).

Ña̱ kúni̱ kachiña: Kúʼvi̱-ini Ndióxi̱ xínira ndiʼi na̱ yiví, na̱ túvi nu̱ú xíʼin na̱ kúáa nu̱ú.

Ña̱ káʼa̱n Biblia: Ta̱ Jesucristo “nda̱kunára nu̱ú na̱ kúáa nu̱ú” (Lucas 7:21).

Ña̱ kúni̱ kachiña: Tá ki̱xi ta̱ Jesús nu̱ú ñuʼú yóʼo nda̱kunára nu̱ú na̱ kúáa nu̱ú ta saá ni̱na̱ʼa̱ra ndáaña keʼé Reino Ndióxi̱ chí nu̱únínu.

Ña̱ káʼa̱n Biblia: “Ndakoto na̱ kúáa” (Isaías 35:5).

Ña̱ kúni̱ kachiña: Jehová káʼa̱nra ña̱ si̱lóʼoní tiempo kúma̱ní ta kaʼndachíñu reinora nu̱ú ñuʼú yóʼo, ta saá ndiʼi na̱ kúáa ndaku̱ná nu̱úna.

¿Ndáaña kéʼé miíndi̱ na̱ testigo Jehová ña̱ va̱ʼa chindeétáʼanndi̱ xíʼin na̱ kúáa nu̱ú?

Iníí ñuyǐví nátúʼunndi̱ xíʼin na̱ yiví na̱ kúáa nu̱ú ña̱ káʼa̱n Ndióxi̱ keʼéra chí nu̱únínu, ¿ndáa ki̱ʼva kéʼéndi̱ña?

Távándi̱ Biblia, tutu xíʼin video ña̱ kivi kuniñúʼu na̱ kúáa nu̱ú á na̱ loʼo kuití túvi nu̱ú. Tá kúú távándi̱ tutu ña̱ braille, ña̱ letra náʼnu xíʼin audio.
Ndiʼi semana kúúmiíndi̱ reunión nu̱ú kivi ku̱ʼu̱n ndiʼi na̱ yiví nda̱a̱ na̱ kúáa nu̱ú.
Sánáʼa̱ndi̱ na̱ yiví xa̱ʼa̱ Biblia.c

Kǒo xu̱ʼún kíʼinndi̱ xa̱ʼa̱ ndiʼi ña̱ kéʼéndi̱ yóʼo. ¿Nda̱chun? Saáchi ta̱ Jesús xa̱ʼndara chiñu yóʼo: “Va̱ása níchaʼvindó xa̱ʼa̱ ña̱yóʼo, ña̱kán va̱ása ndukúndó ña̱ʼa nu̱úna” (Mateo 10:8).

Miíndi̱ na̱ testigo Jehová ndixaní ndíʼi̱-inindi̱ xa̱ʼa̱ na̱ kúáa na̱ kúni̱ ndasakáʼnu Ndióxi̱ xíʼinndi̱ ndaniʼi̱na na̱ migo na̱ chindeétáʼan xíʼinna. Yóʼo kunda̱a̱-iniún xa̱ʼa̱ sava na̱ testigo Jehová na̱ kúáa nu̱ú.

Ñá Talita Alnashi, ñá ñuu Suecia, tá ka̱kuvíñá kǒo túvi va̱ʼaví nu̱úñá. Koto ndáa ki̱ʼva sánáʼa̱ na̱ yiváñá miíñá ña̱ va̱xi nu̱ú Biblia ta saátu koto ndáa ki̱ʼva chíndeétáʼan na̱ migona xíʼinna ta ndáa ki̱ʼva náʼa̱na ña̱ kúʼvi̱-inina xíninana.

Ta̱ James Ryan, ta̱ ñuu Estados Unidos, ta̱ so̱ʼo kúúra tá ka̱kura ta tá ni̱ya̱ʼa loʼo ndu̱kúara. Koto ndáaña kúú ña̱ chíndeé miíra ña̱ va̱ʼa kusi̱í-inira.

Ñá Cynthia Pablo, ñá ñuu Filipinas, ñá so̱ʼo kúúñá ta kǒo túvi nu̱úñá. Na̱ testigo Jehová na̱ íyo yatin nu̱ú íyoñá chi̱ndeétáʼanna xíʼinñá tá xi̱ndikaa̱ kue̱ʼe̱ COVID-19. Koto ndáa ki̱ʼva chi̱ndeétáʼanna xíʼinñá nu̱ú artículo ña̱ naní “Una publicadora sordociega recibe ayuda de su congregación durante la pandemia”.

¿Ndáaña xíniñúʼundi̱ ña̱ va̱ʼa sanáʼa̱ndi̱na ña̱ va̱xi nu̱ú Biblia?

Iin ta̱a ta̱ kúáa nu̱ú xíniñúʼura iin anotador ña̱ braille.

Tutu ña̱ braille. Xa̱a̱ kúúmiíndi̱ Biblia tu̱ʼun braille, sava tu̱ʼun xa̱a̱ íyo iníí Biblia tu̱ʼun braille ta savaña iin táʼví kuitíña íyo (nu̱ú recuadro “Ña̱ Traducción del Nuevo Mundo ña̱ tu̱ʼun braille”, kivi kotoún iin lista tu̱ʼun ña̱ xa̱a̱ íyoña). Xa̱a̱ ku̱a̱ʼání tutu távándi̱ tu̱ʼun braille. Ta saátu kúúmiíndi̱ iin cuaderno ña̱ naní Aprenda a leer braille, ña̱yóʼo na̱kuva̱ʼaña xa̱ʼa̱ na̱ kúáa na̱ kǒo xíni kaʼvi braille ña̱ va̱ʼa sanáʼa̱ iin na̱ túvi nu̱ú miína.

Tá kúni̱ún kuumiíún tutu tu̱ʼun braille ka̱ʼa̱n xíʼin iin na̱ testigo Jehová á ki̱ʼvi nu̱ú káʼa̱nña solicite una visita.

Távándi̱ tutu letra náʼnu ta saátu kivi ndasanáʼnuna letra nu̱ú pantalla. Ku̱a̱ʼání tutu távándi̱ ña̱ letra náʼnu ña̱ va̱ʼa kaʼvi na̱ yiví na̱ loʼo kuití túvi nu̱ú. Sitio ña̱ internet jw.org ña̱ kúúmiíndi̱ va̱ʼaní i̱xava̱ʼandi̱ña, saáchi ni ná ndasanáʼnuna letra nu̱úña káxiníva túviña. Ta saátu kivi ndasanáʼnuna letra nu̱ú aplicación JW Library.

Tá kúni̱ún tutu ña̱ letra náʼnu, ka̱ʼa̱n xíʼin iin na̱ testigo Jehová á ki̱ʼvi nu̱ú káʼa̱nña solicite una visita.
Nu̱ú jw.org kivi taváún tutu ña̱ PDF ña̱ letra náʼnu ña̱ va̱ʼa kaʼviúnña.

Tutu ña̱ kúúmií audio. Xa̱a̱ yáʼaka 200 nu̱ú tu̱ʼun kúúmiíndi̱ audio ña̱ Biblia ña̱ Traducción del Nuevo Mundo. Ta saátu xa̱a̱ ku̱a̱ʼání tutu ña̱ távándi̱ kúúmiíña audio, ta sava audio yóʼo káʼa̱nña xa̱ʼa̱ na̱ʼná ña̱ va̱xi nu̱ú tutu kán.

Kivi kuniso̱ʼún audio á kivi taváúnña nu̱ú jw.org ta saátu nu̱ú ña̱ aplicación JW Library.
Nu̱ú jw.org kivi taváún archivo ña̱ xíniñúʼuna xíʼin lector ña̱ pantalla ta saátu inkaka táʼan ña̱yóʼo.d

Video ña̱ kúúmií audiodescripción.e Miíndi̱ na̱ testigo Jehová yáʼaka 100 nu̱ú tu̱ʼun távándi̱ video ña̱ kúúmií audiodescripción, tá kúú tu̱ʼun sáʼán xíʼin inkaka tu̱ʼun. Video yóʼo nu̱ú Biblia kánaña ta chíndeétáʼanña xíʼin na̱ yiví ña̱ kunda̱a̱-inina ta saátu ña̱ kuniso̱ʼona consejo ña̱ va̱xi nu̱ú tu̱ʼun Ndióxi̱.

Yóʼo va̱xi sava video ña̱ kúúmií audiodescripción:

Kúúmiíndi̱ reunión. Iníísaá ñuyǐví kúúmiíndi̱ congregación ta semana tá semana ndátakandi̱ ña̱ va̱ʼa sakúaʼandi̱ xa̱ʼa̱ Ndióxi̱ ta ndasakáʼnundi̱ra. Ndiʼi ku̱i̱ya̱ kéʼéndi̱ sava reunión náʼnu nu̱ú xáʼa̱n ku̱a̱ʼá na̱ yiví ña̱ va̱ʼa sakúaʼana xa̱ʼa̱ Biblia. Sava reunión yóʼo yáʼa video, ta tá íyo na̱ kúáa chíkaa̱ndi̱ video ña̱ kúúmií audiodescripción ña̱ va̱ʼa kuniso̱ʼonaña. Ta tá xáa̱ iin na̱ kǒo kivi kuniso̱ʼo ta va̱ása túvi nu̱úna iin na̱ xíni̱ tu̱ʼun seña kúú na̱ chíndeétáʼan xíʼinna. Ti̱xin reunión ña̱ kúúmiíndi̱ kǒo kúndasíndi̱ na̱ yiví, ndiʼivana kivi ku̱ʼu̱n.

Ndukú nu̱ú ndataka na̱ testigo Jehová ña̱ va̱ʼa ku̱ʼún reuniónna.
Koto ama koo asamblea ña̱ xíyo ku̱i̱ya̱ tá ku̱i̱ya̱.
Kánandi̱ yóʼó ña̱ ku̱ʼún Conmemoración xíʼinndi̱, ña̱ va̱ʼa ndakaʼányó xa̱ʼa̱ ña̱ ni̱xi̱ʼi̱ ta̱ Jesús chi ña̱yóʼo kúú reunión ña̱ ndáyáʼvika kúúmiíndi̱ ku̱i̱ya̱ tá ku̱i̱ya̱.

Ta̱ José Luis Ayala, ta̱ ñuu México. Tá ka̱kuvíra va̱ása kívi kuniso̱ʼora, ta tá xi̱kuumiíra 29 ku̱i̱ya̱ ndu̱kúara. Koto ndáa ki̱ʼva xa̱a̱ chíndeétáʼan reunión ña̱ kúúmií na̱ testigo Jehová xíʼinra ta koto ndáa ki̱ʼva xa̱a̱ chíndeétáʼan inkana xíʼinra ña̱ viíní sanáʼa̱ra xa̱ʼa̱ Biblia.

a Tá xa̱a̱ káʼa̱nyó xa̱ʼa̱ na̱ loʼo kuití túvi nu̱ú káʼa̱nyó xa̱ʼa̱ na̱ kǒo kúvíka ndaʼa̱ nu̱ú ta íxayo̱ʼvi̱ña xíʼinna keʼéna nda̱a̱ ndáaka chiñu. Nu̱ú artículo yóʼo ka̱ʼa̱nyó xa̱ʼa̱ na̱ kúáa nu̱ú ta̱ na̱yóʼo kúú na̱ ni loʼo kǒo túvi nu̱ú á na̱ loʼo kuití túvi nu̱ú.

b Jehová kúú ki̱vi̱ Ndióxi̱ (Salmo 83:18). Koto artículo ña̱ naní “¿Ndáa ta̱ kúú Jehová?”.

c Ka̱ʼa̱n xíʼin iin na̱ testigo ná na̱ʼa̱na nu̱ún ndáa ki̱ʼva káʼvindi̱ xíʼin na̱ yiví.

d Lector ña̱ pantalla xíʼin inkaka táʼan ña̱yóʼo káʼviña letra ña̱ va̱xi nu̱ú pantalla á audio ña̱ va̱xi xíʼinña. Na̱ xíniñúʼu ña̱yóʼo kivi kuniso̱ʼona nda̱a̱ ndáaka táʼví ña̱ va̱xi nu̱ú pantalla.

e Ña̱ audiodescripción kúú ña̱ káʼa̱n xa̱ʼa̱ ña̱ kéʼé na̱ yiví na̱ ku̱a̱yaʼa nu̱ú video.