Kutollo Yeo e Utolletšwego Johane
17 Yo mongwe wa barongwa ba šupago go bao ba bego ba swere dibjana tše šupago+ a tla go nna a re: “Etla ke go bontšhe gore mogwebakammele yo mogolo yoo a dutšego godimo ga meetse a mantši o tla ahlolwa bjang,+ 2 yoo dikgoši tša lefase di itshwerego gampe ka tša thobalano*+ le yena, le yoo batho bao ba dulago lefaseng ba ilego ba tagwa ke beine ya gagwe.”+
3 Ka gona a nthwala a nkiša lešokeng a diriša moya o mokgethwa. Ka bona mosadi a nametše sebata se sekhwibidukhwibidu seo se bego se tletše maina a maroga ebile se na le dihlogo tše šupago le manaka a lesome. 4 Mosadi yoo o be a apere seaparo sa mmala o mophepolo+ le o mokhwibidukhwibidu. O be a ikgabišitše ka dilo tša go dirwa ka gauta, maswika a bohlokwa le tša go dirwa ka dipheta*+ ebile a swere komiki ya gauta yeo e tletšego ka dilo tšeo di šišimišago le tšeo di sa hlwekago tša boitshwaro bja gagwe bjo bobe bja tša thobalano. 5 Phatleng ya gagwe go be go ngwadilwe leina leo e lego sephiri, leo le rego: “Babilona o Mogolo, mmago bagwebakammele+ le mmago dilo tšeo di šišimišago tša lefase.”+ 6 Ka bona gore mosadi yoo o be a tagilwe ke madi a bakgethwa le madi a dihlatse tša Jesu.+
Ge ke mmona ke ile ka makala kudu. 7 Ke moka morongwa a re go nna: “Ke ka baka la eng o be o maketše? Ke tla go botša sephiri sa mosadi yoo+ le sa sebata seo a se nametšego seo se nago le dihlogo tše šupago le manaka a lesome.+ 8 Sebata seo o se bonego se be se le gona peleng, eupša gona bjale ga se sa le gona. Ebile se kgauswi le go rotoga sa tšwa sekoting+ ke moka se tla fedišwa. Batho bao ba dulago mo lefaseng, bao maina a bona a sego a ngwalwa pukung ya bophelo+ go tloga ge batho ba eba gona lefaseng, ba tlo makala ge ba bona gore sebata seo se bego se le gona, ga se sa le gona, eupša se tla tla se eba gona gape.
9 “Motho o swanetše go ba bohlale gore a kwešiše dilo tše. Dihlogo tše šupago+ di swantšhetša dithaba tše šupago tšeo mosadi yoo a dulago godimo ga tšona. 10 Go na le dikgoši tše šupago. Tše hlano di wele, e nngwe e gona gomme e nngwe ga se ya tšwa e fihla, eupša ge e fihla e tla ba gona ka lebakanyana. 11 Sebata seo se bego se le gona eupša gona bjale se se gona,+ ke kgoši ya boseswai. Se tšwa go dikgoši tše šupago gomme mafelelong se tla fedišwa.
12 “Manaka a lesome ao o a bonego a swantšhetša dikgoši tše lesome tšeo di sešogo tša hwetša mmušo, eupša di tla hwetša maatla a go buša gotee le sebata ka iri e tee feela. 13 Tšona di na le kgopolo e tee, ka gona di fa sebata maatla a tšona le tshwanelo ya tšona ya go buša. 14 Di tla lwa le Kwana,+ eupša ka ge Kwana e le Morena wa marena le Kgoši ya dikgoši,+ e tla di fenya.+ Le gona, bao Modimo a ba biditšego le go ba kgetha ebile ba mmotegela, le bona ba tla di fenya.”+
15 Morongwa a re go nna: “Meetse ao o a bonego, ao mogwebakammele a dutšego godimo ga ona, a swantšhetša merafo ya go fapafapana, mašaba a batho, ditšhaba tša go fapafapana le batho ba maleme a go fapafapana.+ 16 Manaka a lesome+ ao o a bonego le sebata,+ di tla hloya mogwebakammele+ tša mo tšeela dilo tša gagwe ka moka gomme tša mo tlogela a se a apara selo, tša ja dinama tša gagwe tša ba tša mo fiša lorelore.+ 17 Modimo o dirile gore dikgoši tše lesome di nagane seo a nyakago se direga,+ e lego kgopolo e tee yeo ka moka di nago le yona, ya gore di fe sebata maatla a tšona a go buša,+ go fihlela ge seo Modimo a se boletšego se phethagetše. 18 Mosadi+ yo o mmonego o swantšhetša motse o mogolo woo o bušago dikgoši tša lefase.”