Salimo

43 Ndiweruzeni inu Mulungu,+

Nditetezeni pa mlandu wanga+ wotsutsana ndi mtundu wosakhulupirika.

Ndipulumutseni kwa munthu wachinyengo komanso wochita zinthu zopanda chilungamo.

2 Inu ndinu Mulungu wanga, ndinu malo anga achitetezo.+

Nʼchifukwa chiyani mwanditaya?

Kodi ndiziyenda wachisoni chifukwa chiyani? Nʼchifukwa chiyani adani anga akundipondereza?+

3 Tumizani kuwala kwanu ndi choonadi chanu.+

Zimenezi zinditsogolere.+

Zinditsogolere kuphiri lanu lopatulika ndi kuchihema chanu chachikulu.+

4 Kenako ndidzapita paguwa lansembe la Mulungu,+

Kwa Mulungu amene amandisangalatsa kwambiri.

Ndipo ndidzakutamandani ndi zeze+ inu Mulungu, Mulungu wanga.

5 Nʼchifukwa chiyani ndataya mtima?

Nʼchifukwa chiyani ndikuvutika mumtima mwanga?

Ndidzayembekezera Mulungu,+

Ndidzamutamanda chifukwa iye ndi Mpulumutsi wanga Wamkulu komanso Mulungu wanga.+