“[Bɛhyɛ] Azɛlɛ Ne Kɛ Bɛ Agyapadeɛ”

1, 2. (a) Adehilelɛ boni mɔ a Gyihova vale maanle Yizikeɛle a? (b) Kpuya boni mɔ a yɛbazuzu nwo a?

KƐKALA a Yizikeɛle ɛnwu ɛnyelɛzodeɛnwunlɛ bie mɔɔ ɔbayɛ kɛ ɔhwenle ye adwenle ɔhɔle edwɛkɛ bie mɔɔ zile ɛvolɛ kɛyɛ 900 anu wɔ Mosisi nee Dwɔhyua mekɛ zo la azo a. Mekɛ zɔhane, Gyihova hilele Mosisi Ɛwɔkɛ Azɛlɛ ne ɛweɛne ne mɔ na nzinlii ɔhilele Dwɔhyua kɛzi ɔwɔ kɛ bɛkyɛ bɛmaa Yizilayɛ mbusua ne mɔ la. (Nɔm. 34:1-15; Dwɔh. 13:7; 22:4, 9) Noko kɛkala, wɔ ɛvolɛ 593 K.Y.M., Gyihova ɛze Yizikeɛle nee menli ne kɛ bɛhyɛ bɛmaa Yizilayɛ mbusua ne mɔ bieko!​—Yiz. 45:1; 47:14; 48:29.

² Edwɛkɛ boni a wɔ ɛnyelɛzodeɛnwunlɛ ɛhye anu maa Yizikeɛle nee menli ne a? Duzu ati a ɛnyelɛzodeɛnwunlɛ ɛhye maa yɛ anwosesebɛ ɛnɛ a? Asoo ɔbara nu kpole kenle bie?

3, 4. (a) Anyelazo edwɛkɛ nna boni mɔ a wɔ ɛnyelɛzodeɛnwunlɛ mɔɔ li awieleɛ la anu a? (b) Wɔ tile ɛhye anu, ɛwɔkɛ boni a yɛbazuzu nwo a?

³ Yizikeɛle ɛnyelɛzodeɛnwunlɛ mɔɔ li amozi la anwo edwɛkɛ wɔ ye buluku ne adile ngɔnla anu. (Yiz. 40:1–48:35) Ɔmaanle menli ne dele Yizilayɛ maanle ne mɔɔ bɛbava bɛazie ɛkɛ ne bieko la anwo anyelazo edwɛkɛ nna mɔɔ maa anwosesebɛ la. Duzu a le anyelazo edwɛkɛ zɔhane mɔ? Mɔɔ limoa, bɛbava nɔhalɛ ɛzonlenlɛ bɛazie ɛkɛ ne bieko wɔ Nyamenle ɛzonlenlɛsua ne anu. Mɔɔ tɔ zo nwiɔ, ɛsɔfoma nee mboaneneavolɛ tenlenema bali maanle ne mɔɔ bɛva bɛzie ɛkɛ ne bieko la anyunlu. Mɔɔ tɔ zo nsa, bɛdabɛ mɔɔ bɛbazia bɛara la amuala bɛanyia azɛlɛ kɛ bɛ agyapadeɛ. Yɛɛ mɔɔ tɔ zo nna, Gyihova baboka bɛ nwo, ɔ nee bɛ badɛnla bieko.

⁴ Tile 13 nee 14 hilehilele kɛzi ɛwɔkɛ nwiɔ ne mɔɔ limoa la​—nɔhalɛ ɛzonlenlɛ mɔɔ bɛbava bɛazie ɛkɛ ne bieko nee mboaneneavolɛ tenlenema mɔɔ bali bɛ nyunlu​—bara nu la anu. Yɛbaha mɔɔ tɔ zo nsa la, azɛlɛ ne mɔɔ bɛbanyia ye kɛ bɛ agyapadeɛ la anwo edwɛkɛ titili wɔ tile ɛhye anu. Wɔ tile mɔɔ doa zo la anu, yɛbazuzu Gyihova mɔɔ ɔ nee bɛ badɛnla la anwo ɛwɔkɛ ne anwo.​—Yiz. 47:13-21; 48:1-7, 23-29.

5, 6. (a) Wɔ ɛnyelɛzodeɛnwunlɛ ne anu, azɛlɛ boni a bɛbahyɛ a? (Nea mɔlebɛbo nvoninli ne.) (b) Azɛlɛ ne ɛhyɛlɛ nwo ɛnyelɛzodeɛnwunlɛ ne bodane a le duzu?

⁵ Kenga Yizikeɛle 47:14. Gyihova hwenle Yizikeɛle adwenle hɔle azɛlɛ bie mɔɔ ɔnrɛhyɛ ɔbazɔho “Yidɛn tola ne” la azo wɔ ɛnyelɛzodeɛnwunlɛ nu. (Yiz. 36:35) Akee ɔhanle kɛ: “Ɛhye a le azɛlɛ ne mɔɔ bɛbahyɛ bɛamaa Yizilayɛ mbusua 12 ne kɛ bɛ agyapadeɛ la.” (Yiz. 47:13) Ɛnee “azɛlɛ ne” a le Yizilayɛ azɛlɛ ne mɔɔ menli mɔɔ bɛbazia la bɛahɔdɛnla zolɛ la. Bieko, kɛ mɔɔ bɛhɛlɛ ye wɔ Yizikeɛle 47:15-21 la, Gyihova hilele azɛlɛ ne anloa ɛweɛne ne mɔ amuala pɛpɛɛpɛ.

⁶ Ɛnee ɛnyelɛzodeɛnwunlɛ ɛhye bodane a le duzu? Edwɛkɛ ɛhye maanle Yizikeɛle nee menli ne nyianle anwodozo kɛ, kɛ ɔde ye biala la bɛ sa baha bɛ azɛlɛ ne mɔɔ bɛ nye die nwo la bieko. Nea kɛzi anyelazo edwɛkɛ ɛhye mɔɔ Gyihova hilehilele nu wienyi la maanle menli ne nyianle akɛnrasesebɛ a! Asoo bɛhyɛle azɛlɛ bɛmaanle Nyamenle tete menli ne kɛ bɛ agyapadeɛ amgba? Ɛhɛe, bɛhyɛle.

7. (a) Duzu a bɔle ɔ bo wɔ 537 K.Y.M. a, na duzu a bɛkakye yɛ a? (b) Kpuya boni a yɛbalimoa yɛazuzu nwo a?

⁷ Wɔ 537 K.Y.M., ɛvolɛ kɛyɛ 56 ɔvi mekɛ mɔɔ Yizikeɛle nyianle ye ɛnyelɛzodeɛnwunlɛ ne la anzi, menli apenle dɔɔnwo bɔle ɔ bo kɛ bɛsia bɛahɔ Yizilayɛ azɛlɛ ne azo na bɛahɔdɛnla ɛkɛ. Nwanwane edwɛkɛ ɛhye mɔɔ zile tete ne la kakye yɛ debie bie mɔɔ ɛlɛkɔ zo wɔ Nyamenle menli avinli ɛnɛ la. Wɔ adenle bie azo, bɛhyɛle azɛlɛ bɛmaanle bɛ. Kɛzi? Gyihova maanle ye azonvolɛ adenle bɛhɔle sunsum nu azɛlɛ bie azo na bɛdɛnlanle zo. Saa ɔle zɔ a, ɛnee tete Ɛwɔkɛ Azɛlɛ ne mɔɔ bɛ sa hanle ye bieko la kola kile yɛ Nyamenle menli mɔɔ wɔ ɛkɛ ne ɛnɛ la sunsum nu azɛlɛ ne mɔɔ bɛ sa ɛha ye bieko la anwo ninyɛne dɔɔnwo. Noko kolaa na yɛazuzu ɛzukoalɛdeɛ ɛhye mɔ anwo la, bɛmaa yɛlimoa yɛbua kpuya ɛhye, “Duzu ati a yɛbahola yɛaha kɛ sunsum nu azɛlɛ bie wɔ ɛkɛ ne amgba ɛnɛ a?”

8. (a) Maanle boni a Gyihova vale ziele nwonane nu Yizilayɛma agyakɛ anu a? (b) Duzu a le sunsum nu azɛlɛ, anzɛɛ paladaese ne? (d) Kenlenzu a ɔbɔle ɔ bo a, na nwane mɔ a ɛradɛnla ɛkɛ a?

⁸ Wɔ ɛnyelɛzodeɛnwunlɛ bie mɔɔ Yizikeɛle limoale nyianle la anu, Gyihova hanle kɛ ngapezo zɔhane mɔ mɔɔ fale Yizilayɛma mɔɔ bɛbazia bɛara anwo la bara nu kpole wɔ mekɛ mɔɔ ye “sonvolɛ Devidi,” Gyisɛse Kelaese babɔ ɔ bo ali Belemgbunli la. (Yiz. 37:24) Ɛhye zile 1914 Y.M. Mekɛ zɔhane kadwu la, ɛnee bɛva sunsum nu Yizilayɛma mɔɔ bɛle Kilisienema mɔɔ bɛkpokpa bɛ la bɛzie nwonane nu Yizilayɛ maanle ne agyakɛ anu kɛ Nyamenle menli. (Kenga Mateyu 21:43; 1 Pita 2:9.) Eza Gyihova vale sunsum nu azɛlɛ anzɛɛ paladaese bie ziele Yizilayɛ azɛlɛ ne agyakɛ anu. (Aye. 66:8) Kɛ mɔɔ yɛnwunle ye wɔ Tile 17 ne la, sunsum nu azɛlɛ ne a le sunsum nu tɛnlabelɛ anzɛɛ ɛleka mɔɔ gyimalilɛ kɔ zo mɔɔ menli mɔɔ bɛkpokpa bɛ la mɔhama ɛzonle Gyihova ɔvi 1919 la. (Nea ɛlɛka 9B, “Duzu Ati A 1919 A?”) Mekɛ ne ɛlɛkɔ la, bɛdabɛ mɔɔ bɛlɛ azɛlɛ ye azo anyelazo la, “mboane gyɛne” ne anu amra noko bɔle ɔ bo radɛnlanle sunsum nu azɛlɛ ɛhye azo bie. (Dwɔn 10:16) Ɛnɛ, sunsum nu paladaese ne ɛlɛkɔ zo yɛɛ nuhua ɛlɛtɛlɛ ɛdeɛ, noko Amagɛdɔn anzi a yɛbanyia ye nyilalɛ ne mɔ amuala a.

9. Adehilelɛ boni mɔ a Gyihova vale maanle wɔ azɛlɛ ne ɛhyɛlɛ nwo a?

⁹ Kenga Yizikeɛle 48:1, 28. Mɔɔ bɛnwunle azɛlɛ ne ɛweɛne ne mɔ la, Gyihova hilele bɛ kɛzi ɔwɔ kɛ bɛkyɛ ye la. Ɔhanle kɛ bɛhyɛ ye pɛpɛɛpɛ bɛmaa mbusua 12 ne ɔvi sɔlɔ kɔdwu nyiakɛ, bɛbɔ ɔ bo wɔ Dan abusua ne anwo zo wɔ azɛlɛ ne sɔlɔ ɛweɛne ne azo bɛhɔdwu Gaade abusua ne anwo zo wɔ ye nyiakɛ ɛweɛne ne azo. Azɛlɛ 12 ne anu biala bɔ ɔ bo wɔ fema zo kɔdwu bɛne zo, ɔvi azɛlɛ ne ɛweɛne zo wɔ aduduleɛ ɔkɔdwu Nyevile Kpole ne anzɛɛ Mɛdetɛlenia Nyevile ne anloa wɔ adɔleɛ.​—Yiz. 47:20.

10. Anyelazo boni a ɛnyelɛzodeɛnwunlɛ ne foa ɛhye maanle menli ne nyianle a?

¹⁰ Anyelazo boni mɔ a ɔbayɛ kɛ ɛnyelɛzodeɛnwunlɛ ne foa ɛhye maanle menli ne nyianle a? Ɔbayɛ kɛ edwɛkɛ mɔɔ Yizikeɛle hanle ye wɔ azɛlɛ ne ɛhyɛlɛ nwo la, zinle menli ne anwo ɔluakɛ ɛnee ye ɛhyɛlɛ ne bayɛ pɛpɛɛpɛ. Bieko, azɛlɛ ne mɔɔ bɛbahyɛ ye pɛpɛɛpɛ bɛamaa mbusua 12 ne amuala la zile zolɛ kɛ, kɛzi ɔde ye biala la awie ko biala mɔɔ bazia ara la asa baha azɛlɛ ne bie. Awie biala ɛnrɛra mɔɔ ɔnrɛnyia azɛlɛ anzɛɛ sua a.

11. Ɛzukoalɛdeɛ boni a yɛnyia yɛfi azɛlɛ ne ɛhyɛlɛ mɔɔ le ngapezo la anu a? (Nea ɛlɛka “Azɛlɛ Ne Ɛhyɛlɛ.”)

¹¹ Ɛzukoalɛdeɛ mɔɔ maa anwosesebɛ la boni a yɛbahola yɛanyia ye yɛavi nu ɛnɛ a? Tɛ ɛsɔfoma, Livaema ne yɛɛ mgbanyima ne mɔ angome a bɛanyia ɛleka wɔ Ɛwɔkɛ Azɛlɛ ne mɔɔ bɛ sa baha ye bieko la azo a, emomu mbusua 12 ne anu amra amuala noko bɛanyia bie. (Yiz. 45:4, 5, 7, 8) Ɛnɛ noko, sunsum nu paladaese ne wɔ ɛkɛ maa mɔhama ne mɔɔ bɛkpokpa bɛ la, bɛdabɛ mɔɔ bɛboka “menli ekpunli kpole” ne anwo mɔɔ bɛdi yɛ nyunlu la yɛɛ menli ekpunli kpole ne anu amra amuala.a (Yek. 7:9) Ɔnva nwo kɛzi yɛ gyinlabelɛ de wɔ ahyehyɛdeɛ ne anu la, yɛlɛ yɛ ɛleka nee gyima mɔɔ sonle bolɛ la wɔ yɛ sunsum nu azɛlɛ ne azo. Anyelazo edwɛkɛ mɔɔ maa anwosesebɛ la boni ɛne!

12, 13. Azɛlɛ ne mɔɔ bɛkyɛ bɛamaa mbusua ne mɔ la anwo adehilelɛ boni mɔ a Gyihova vale maanle a?

¹² Bie a azɛlɛ ne ɛhyɛlɛ nwo adehilelɛ ne mɔɔ Gyihova vale maanle Yizikeɛle la bie mɔ zinle ɔ nwo ɔluakɛ ɛnee bɛle ngakyile bɛfi mɔɔ ɔvale ɔmaanle Mosisi la anwo. Suzu nwiɔ ɛhye anwo. Ko fale azɛlɛ ne anwo; yɛɛ ko fale menli mɔɔ badɛnla zo la anwo.

¹³ Mɔɔ limoa, azɛlɛ ne. Bɛzele Mosisi kɛ ɔmaa mbusua mɔɔ bɛ nwo zonle la azɛlɛ ɛdeɛ ne ɛyɛ kpole ɛdɛla bɛdabɛ mɔɔ bɛ nwo anzo la. (Nɔm. 26:52-54) Noko wɔ ɛnyelɛzodeɛnwunlɛ ne anu, Gyihova vale adehilelɛ maanle kɛ bɛhyɛ azɛlɛ ne anu “pɛpɛɛpɛ” bɛmaa mbusua ne mɔ amuala [“awie ko biala nee ɔ diema,” ɔbdw.]. (Yiz. 47:14) Ɛnee ɔwɔ kɛ bɛkyɛ ye pɛpɛɛpɛ ɔvi sɔlɔ ɛweɛne zo kɔdwu nyiakɛ ɛweɛne zo bɛmaa mbusua 12 ne. Ɛhye ati, Yizilayɛma kɔsɔɔti​—ɔnva nwo mbusua mɔɔ bɛvi nu la​—bɛanyia Ɛwɔkɛ Azɛlɛ ne mɔɔ nzule dɔɔnwo wɔ zo na ɔkye aleɛ la bie pɛpɛɛpɛ.

14. Kɛzi adehilelɛ mɔɔ Gyihova vale maanle wɔ nyɛvolɛ nwo la kɔ moa tɛla mɔɔ wɔ Mosisi Mɛla ne anu la ɛ?

¹⁴ Mɔɔ tɔ zo nwiɔ, menli mɔɔ badɛnla zo la. Mosisi Mɛla ne bɔle nyɛvolɛ nwo bane na bɛ nee bɛ zonlenle Gyihova, noko bɛammaa bɛ azɛlɛ ne bie. (Lɛv. 19:33, 34) Noko, mɔɔ Gyihova ɛha ɛhile Yizikeɛle kɛkala la kɔ moa tɛla mɔɔ Ɔhanle ye wɔ Mɛla ne anu la. Ɔzele ye kɛ: “Ɔwɔ kɛ bɛmaa ɛyɛvolɛ ne agyapadeɛ wɔ abusua ne mɔɔ ɔde bɛ azɛlɛ zo la avinli.” Ɔluale mɛla ɛhye azo ɔyele ngakyile kpole ne mɔɔ wɔ bɛdabɛ mɔɔ “bɛvi Yizilayɛ maanle ne anu” nee nyɛvolɛ mɔɔ bɛde azɛlɛ ne azo avinli la ɔvile ɛkɛ. (Yiz. 47:22, 23) Wɔ azɛlɛ ne mɔɔ Yizikeɛle nwunle ye la azo, menli mɔɔ de ɛkɛ ne la, bie ɛndɛla bie yɛɛ bɛyɛ ko bɛlɛsonle.​—Lɛv. 25:23.

15. Gyihova anwo nɔhalɛ edwɛkɛ mɔɔ ɛngakyi ɛlɛ la boni a bɛzile zo wɔ adehilelɛ ɛhye anu a?

¹⁵ Ɔbayɛ kɛ adehilelɛ titili nwiɔ ɛhye mɔɔ bɛvale bɛmaanle Yizikeɛle la maanle menli ne anwosesebɛ. Ɛnee bɛze kɛ saa bɛle Yizilayɛma o anzɛɛ nyɛvolɛ mɔɔ bɛlɛsonle Gyihova o, Gyihova bahyɛ azɛlɛ ne anu pɛpɛɛpɛ yeamaa bɛ. (Ɛzela 8:20; Nih. 3:26; 7:6, 25; Aye. 56:3, 8) Adehilelɛ ɛhye mɔ eza si nɔhalɛ edwɛkɛ ɛhye mɔɔ maa anwosesebɛ na ɔngakyi ɛlɛ la azo kɛ Gyihova azonvolɛ kɔsɔɔti sonle bolɛ maa ye. (Kenga Hagae 2:7.) Ɛnɛ, saa yɛlɛ anwuma anyelazo o anzɛɛ azɛlɛ ye azo anyelazo o, zɔhane nɔhalɛ edwɛkɛ ne sonle bolɛ maa yɛ.

16, 17. (a) Kɛzi azɛlɛ ne nee bɛdabɛ mɔɔ bɛbadɛnla zo mɔɔ yɛzuzu bɛ nwo la baboa yɛ ɛ? (b) Duzu a yɛbazuzu nwo wɔ tile mɔɔ doa zo la anu a?

¹⁶ Kɛzi azɛlɛ ne nee bɛdabɛ mɔɔ bɛde zo la anwo edwɛkɛ bie mɔ mɔɔ yɛzuzu nwo la baboa yɛ ɛ? Bɛhakye yɛ kɛ ɔwɔ kɛ debie biala yɛ pɛpɛɛpɛ na yɛmaa koyɛlɛ da ali wɔ yɛ ewiade amuala mediemayɛlɛ ne anu ɛnɛ. Gyihova ɛnnea sonla nyunlu. Ɔhyia kɛ yɛbiza yɛ nwo kɛ: ‘Asoo mennea sonla nyunlu kɛ Gyihova la? Wɔ me ahonle nu, asoo mebu me gɔnwo mɔ mɔɔ me nee bɛ ɛlɛsonle la, ɔnva nwo abusua mɔɔ bɛvi nu anzɛɛ bɛ gyinlabelɛ wɔ ɛbɛlabɔlɛ nu la?’ (Wlo. 12:10) Ɔyɛ yɛ fɛ kɛ Gyihova ɛmaa yɛ muala nwolɛ adenle ko ne ala wɔ sunsum nu paladaese ne anu, ɛleka mɔɔ yɛfi yɛ ɛkɛla muala anu yɛsonle yɛ anwuma Selɛ ne na yɛnyia ye nyilalɛ la.​—Gal. 3:26-29; Yek. 7:9.

¹⁷ Akee maa yɛzuzu anyelazo edwɛkɛ mɔɔ tɔ zo nna mɔɔ wɔ Yizikeɛle ɛnyelɛzodeɛnwunlɛ ne foa mɔɔ li awieleɛ anu la anwo​—Gyihova mɔɔ ɔ nee menli ne badɛnla la anwo ɛwɔkɛ ne. Duzu a yɛbahola yɛazukoa yɛavi nu a? Tile mɔɔ doa zo la babua.