Yòb

 4 Kiko bo ke siña mi realmente?

Ken a inspirá bo pa papia e kosnan akí ku bo ta papia?*

 5 E mortonan ta tembla pa Dios;

kaminda nan ta, ta mas profundo ku fondo di laman; nan ta mas den profundidat ku e kriaturanan di laman.

 6 Graf* ta sunú dilanti di Dios;

no tin nada ku ta tapa e lugá di destrukshon.*

 7 Dios* a span shelu* den espasio bashí,

i no tin nada ta karga tera;* asina Dios a pon’é den espasio.

 8 Dios ta kohe e awanan lora i forma nubia ku nan;

tòg, e nubianan no ta rementá debí na nan peso.

 9 Dios ta span e nubianan;

asina, e ta tapa su trono.

10 El a establesé un horizonte* pa laman,*

i el a establesé un límite pa klaridat i skuridat.

11 Ora Dios rabia,

asta e pilánan di shelu ta sagudí.*

12 Dios por usa su poder i pone laman bira brutu,

i Dios por usa su sabiduria pa destrosá e mònster di laman.*

13 Ku su rosea,* e ta hasi shelu limpi;

ku su mannan, e por mata kolebra ku ta difísil pa gara.*

14 Tende! Esakinan ta djis algun di e kosnan ku Dios por hasi;

loke nos a tende kuchikuchi den nos orea tokante dje ta djis un ñapa!