Pakico Ser Pordonador?

E ESCOLASTICO i escritor hudiu Josefo Jacobo a yega di describí pordonamentu como “e les moral di mas haltu i mas difícil di tur.” En berdad, hopi ta haña e palabranan “Mi ta pordoná bo” masha difícil pa bisa.

Aparentemente, pordonamentu ta mescos cu placa. Bo por gast’é libremente i compasivamente cu otronan of bo por acumul’é di un forma pichiri pa bo mes. Esun promé ta e manera piadoso. Nos mester cultivá custumbernan di gasta generoso ora ta trata di pordoná. Pakico? Pasobra Dios ta animá esaki i pasobra un spiritu no-pordonador i vengativo solamente por haci cosnan pió.

Hopi hende ta bisa: “Ami no ta cuent’i rabia; mi ta regla cuenta unbes!” Lamentablemente, esaki ta un principio cu ta guia bida di hopi hende awe. Por ehempel, un señora a nenga di papia cu su cuñá pa mas cu siete aña, pasobra, manera e señora ta bisa, “el a lastrá mi te na suela i mi nunca por a pordon’é.” Pero ora e método di ignorá un hende completamente ser usá como palanca pa forsa un dispensa for dje persona acusá of como arma pa castigá cuné, rara bes e ta satisfacé e deseo pa vengansa. Mas bien, e por simplemente prolongá e controversia, permitiendo un rencor completo desaroyá. Si e ciclo di angustia aki no ser kibrá, e garanan poderoso di vengansa por ruiná relacionnan i asta e persona su salú.

E Daño di un Spiritu No-Pordonador

Ora un persona no ta pordoná, e conflicto cu e ta causa ta crea tension. En buelta, tension por hiba na malesa serio. Dr. William S. Sadler a skirbi: “Ningun hende por comprendé mes mihó cu un dokter e porcentahe asombrosamente grandi di malesa i sufrimentu humano cu por ser atribuí directamente na preocupacion, miedu, conflicto, . . . pensamentu insaludabel i bibamentu impuru.” Sin embargo, realmente, cuantu daño trastorno emocional ta causa? Un publicacion médico ta contestá: “Estadísticanan . . . ta indicá cu dos tercer parti dje pashentnan cu a bai un dokter tabatin síntomanan causá of empeorá dor di tension mental.”

Sí, amargura, resentimentu i rencor ta leu for di ta inofensivo. E emocionnan amargá aki ta manera frustu cu lentamente ta come e curpa di un auto. E banda pafó dje auto por parce bunita, pero bou dje ferf un proceso destructivo ta tumando lugá.

Asta mas importante, nos nengamentu pa pordoná ora tin un base pa misericordia por perhudicá nos spiritualmente tambe. Den bista di Jehova Dios, nos por bira manera e esclabo den e ilustracion di Jesus. E esclabo a ser pordoná dor di su doño di un debe enorme. Sin embargo, ora su co-esclabo a rogu’é p’e pordon’é un debe comparativamente masha chikitu, e tabata severo i no kier a pordoná no-pordonador. Jesus a haci cla cu si nos di igual manera ta indispuesto pa pordoná, Jehova lo nenga di pordoná nos nos picánan. (Mateo 18:​21-35) P’esei, si nos no ta pordoná, nos por perde nos concenshi limpi dilanti Dios i asta nos speransa pa futuro! (Compará cu 2 Timoteo 1:⁠3.) Kico nos por haci anto?

Siña Pordoná

Berdadero pordon ta sali di curason. E ta enbolbé pordoná eror di un ofensor i deshací di cualkier deseo pa vengansa. Pues, husticia final i posibel pago pa castigu ta ser lagá den man di Jehova.​—⁠Romano 12:19.

Sin embargo, nos mester bisa cu siendo cu “e curason ta mas traicionero cu cualkier otro cos i ta desesperá,” e no ta semper incliná pa pordoná asta ora e mester. (Jeremías 17:⁠9) Jesus mes a bisa: “For di curason ta sali mal razonamentu, matamentu, adulterio, fornicacion, ladronicia, falsu testimonio, blasfemia.”​—⁠Mateo 15:19.

Ta bon cu nos curason por ser entrená pa haci loke ta corecto. Sin embargo, e entrenamentu necesario mester bini for di un fuente mas haltu. Nos no por haci’é nos so. (Jeremías 10:23) Un salmista divinamente inspirá a reconocé esaki i a resa p’e guia di Dios. El a suplicá Jehova den oracion: “Siñá mi bo disposicionnan reglamentario. Hací mi comprendé e caminda di bo propio ordunan.”​—⁠Salmo 119:​26, 27.

Segun un otro salmo, Rey David di Israel di antigua a yega na “comprendé e caminda” di Jehova. El a experenci’é personalmente i a siña for di dje. P’esei, e por a bisa: “Jehova ta misericordioso i yen di gracia, tardá pa rabia i abundante den bondad amoroso. Mescos cu un tata ta mustra misericordia na su yunan, Jehova a mustra misericordia na esnan cu ta tem’é.”​—⁠Salmo 103:​8, 13.

Nos mester siña mescos cu Rey David a siña. Studia huntu cu oracion Dios su ehempel perfecto di pordoná, i tambe esun di su Yu. Asina, nos por siña pordoná di curason.

Sin embargo, algun por wel puntra: Kico di picá serio? Mester pordoná tur picá?

Buscando un Balansa

Ora un persona ta faya gravemente cu un otro, e dolor por ta inmenso. Esaki ta particularmente e caso ora bo ta e víctima inocente di un picá serio. Algun asta por puntra, ‘Con mi por pordoná un hende cu a traicioná mi i ofendé mi di un manera baho?’ Den e caso di un picá grave cu por merecé expulsion, kisas e víctima mester aplicá e conseho di Mateo 18:​15-17.

Den cualkier caso, hopi por dependé dje ofensor. Desde e malecho tabatin cualkier señal di repentimentu sincero? E pecador a cambia, talbes a asta purba haci berdadero compensacion? Den bista di Jehova un repentimentu asina ta un clave pa pordon asta den caso di picánan berdaderamente horibel. Por ehempel, Jehova a pordoná Manases, un dje reynan di mas malbado den historia di Israel. Riba ki base? Dios a haci esei debí cu Manases finalmente a humiyá su mes i a repentí di su camindanan baho.​—⁠2 Crónica 33:​12, 13.

Den Bijbel repentimentu genuino ta enbolbé un cambio sincero den actitud, un duele di curason riba cualkier malecho cometí. Caminda ta apropiado i posibel, repentimentu ta ser compañá cu un esfuerso pa haci restitucion n’e víctima dje picá. (Lucas 19:​7-10; 2 Corintio 7:11) Caminda no tin un repentimentu asina, Jehova no ta pordoná.a Ademas, Dios no ta spera pa cristiannan pordoná esnan cu un tempu tabata iluminá spiritualmente pero cu awor boluntariamente i sin repentí ta practicá malecho. (Hebreo 10:26-31) Den casonan extremo, pordon por ta masha inapropiado.​—⁠Salmo 139:​21, 22; Ezekiel 18:​30-32.

Sea pordon ta posibel of no, un víctima di picá serio lo kier considerá un pregunta mas: Mi mester permanecé den un trastorno emocional severo, sintiendo mi mes intensamente profundamente ofendí i rabiá, te ora e asuntu ser resolvé completamente? Considerá un ehempel. Rey David a sinti su mes intensamente ofendí ora su general, Joab, a mata Abner i Amasa, “dos homber mas hustu i mihó cu [Joab] tabata.” (1 Rey 2:32) David a expresá su rabia verbalmente i indudablemente na Jehova den oracion. Pero cu tempu, e profundo intensidad di David su sintimentunan probablemente a mengua. E no tabata dominá pa rabia te n’e fin di su dianan. David asta a sigui traha cu Joab, pero e no a simplemente pordoná e asesino no-repentí aki. David a percurá pa alolargu husticia ser hací.​—⁠2 Samuel 3:​28-39; 1 Rey 2:​5, 6.

Kisas por tuma algun tempu i esfuerso promé cu esnan ofendí dor di picá serio di otronan pasa riba nan rabia inicial. E proceso di curacion por ta hopi mas fácil ora e ofensor ta reconocé su malecho i ta repentí. Sin embargo, un víctima inocente di picá mester por haña consuelo i alivio den su conocimentu di Jehova su husticia i sabiduria i den e congregacion cristian, sin importá e curso dje malechor.

Reconocé tambe, cu ora bo pordoná un pecador, esaki no ta nificá cu bo ta dispensando e picá. P’e cristian, pordon ta nificá laga e asuntu cu confiansa den man di Jehova. E ta e Hues hustu di henter e universo, i lo e efectuá husticia n’e debido tempu. Esei lo incluí husga “fornicadornan i adúlteronan” traicionero.​—⁠Hebreo 13:⁠4.

E Beneficionan di Pordoná

E salmista David a canta: “Pasobra abo, O Jehova, ta bon i cla pa pordoná; i e bondad amoroso pa tur esnan cu ta inbocá bo nomber ta abundante.” (Salmo 86:⁠5) Bo ta “cla pa pordoná” mescos cu Jehova? E beneficionan ta hopi.

Promé, pordonando otronan ta promové bon relacionnan. Bijbel ta insta cristiannan: “Bira bondadoso un cu otro, tiernamente compasivo, pordonando otro libremente mescos cu Dios tambe mediante Cristo a pordoná boso libremente.”​—⁠Efesio 4:32.

Di dos, pordonamentu ta trece pas. Esaki no ta simplemente pas cu próhimo sino pas interno tambe.​—⁠Romano 14:19; Colosense 3:​13-15.

Di tres, pordonando otronan ta yuda nos corda cu nos mes ta den necesidad di pordon. Sí, “tur a peca i no ta alcansá e gloria di Dios.”​—⁠Romano 3:23.

Finalmente, pordonando otronan ta habri e caminda pa nos picánan ser pordoná dor di Dios. Jesus a bisa: “Si boso pordoná hende nan ofensanan, boso Tata celestial lo pordoná boso tambe.”​—⁠Mateo 6:14.

Imaginá e hopi cosnan cu mester a ocupá Jesus su mente riba e atardi di su morto. E tabata preocupá tocante su disipelnan, e trabou di predicacion i specialmente su integridad na Jehova. Tog, asta ora e tabata sufriendo intensamente riba e staca di tormento, kico el a papia tocante dje? Entre su último palabranan tabatin, “Tata, pordoná nan.” (Lucas 23:34) Nos por imitá Jesus su ehempel perfecto dor di pordoná un e otro di curason.

[Footnotes]

[Caption on page 5]

Bo a capta e punto di Jesus su ilustracion dje esclabo no-pordonador?

[Caption on page 7]

Pordonando otronan ta promové bon relacionnan i ta trece felicidad