Jehova Ta Nos Refugio

“Pasobra bo a bisa: ‘Jehova ta mi refugio,’ . . . ningun calamidad lo bini riba bo.”—SALMO 91:9, 10.

 1. Pakico nos por bisa cu Jehova ta nos refugio?

JEHOVA ta un berdadero refugio pa su pueblo. Si nos ta completamente dedicá na dje, nos por ta ‘oprimí den tur manera, pero no pertá di tal manera cu nos no por move; confundí, pero no absolutamente sin salida; persiguí, pero no lagá sin yudansa; tumbá, pero no destruí.’ Pakico? Pasobra Jehova ta duna nos “poder mas ayá di loke ta normal.” (2 Corintionan 4:7-9) Sí, nos Tata celestial ta yuda nos hiba un bida dedicá na dje, i nos por tuma na pechu e palabranan dje salmista: “Pasobra bo a bisa: ‘Jehova ta mi refugio,’ bo a haci e Haltísimo mes bo lugá di biba; ningun calamidad lo bini riba bo.”—Salmo 91:9, 10.

 2. Kico nos por bisa di Salmo 91 i di loke e ta primintí?

² Probablemente ta Moises ta esun cu a skirbi e palabranan ei di Salmo 91. E título di Salmo 90 ta mencioná é como compositor, i Salmo 91 ta sigui Salmo 90 sin haci mencion di un otro escritor. Tal bes e forma cu nan a canta Salmo 91 ta cu un persona lo a canta promé (91:1, 2), i un coro lo a respondé (91:3-8). Posiblemente, a sigui un solista (91:9a) pa despues un coro respondé (91:9b-13). Por último, un solista lo a canta e palabranan final (91:14-16). Sea cual sea e caso, Salmo 91 ta primintí siguridad spiritual na cristiannan ungí como clase i ta duna e mésun siguransa na nan compañeronan dedicá como grupo.a Laga nos considerá e salmo aki for dje punto di bista di tur e sirbidónan ei di Jehova.

Sigur den e ‘Lugá Secreto di Dios’

 3. (a) Kico ta “e lugá secreto dje Haltísimo”? (b) Kico nos ta experimentá dor di tuma “posada bou dje sombra dje Todopoderoso”?

³ E salmista ta canta: “Ken cu ta biba den e lugá secreto dje Haltísimo lo percurá pa su mes posada bou dje sombra dje Todopoderoso. Lo mi bisa Jehova: ‘Bo ta mi refugio i mi fortalesa, mi Dios, den ken lo mi confia.’” (Salmo 91:1, 2) “E lugá secreto dje Haltísimo” ta un lugá figurativo di proteccion pa nos, i particularmente p’e ungínan, kendenan ta blanco special di Diabel. (Revelacion 12:15-17) Si no tabata p’e proteccion cu nos ta gosa di dje como personanan cu ta hospedá cerca Dios como invitado spiritual, Diabel lo a destruí nos tur. Dor di tuma “posada bou dje sombra dje Todopoderoso,” nos ta haña Dios su sombra di proteccion. (Salmo 15:1, 2; 121:5) No tin un refugio mas sigur of un fortalesa mas formidabel cu nos Soberano Señor Jehova.—Proverbionan 18:10.

 4. Ki strategia “e yagdó di para,” Satanas, ta usa, i con nos ta scapa?

⁴ E salmista ta agregá: “E mes [Jehova] lo libra bo for di e trampa dje yagdó di para, for di e pest cu ta causa contratempu.” (Salmo 91:3) Hopi bes un yagdó di para den Israel di antaño tabata usa trampa pa coge para. Entre e trampanan cu “e yagdó di para,” Satanas, ta usa ta su organisacion malbado i “obranan mañoso.” (Efesionan 6:11, nota na pia di página) E ta pone trampa scondí den nos caminda pa lok nos den maldad i causa nos ruina spiritual. (Salmo 142:3) Sin embargo, dor cu nos a rechasá inhusticia, ‘nos alma ta manera un para cu ta scapa for dje trampa.’ (Salmo 124:7, 8) Ki gradicidu nos ta cu Jehova ta libra nos for dje “yagdó di para” malbado!—Mateo 6:13.

 5, 6. Ki “pest” a causa “contratempu,” pero pakico e pueblo di Jehova no ta sucumbí na dje?

⁵ E salmista ta cita “e pest cu ta causa contratempu.” Manera un enfermedad contagioso cu a bira un epidemia, tin algu cu ta causa “contratempu” pa e famia humano i pa esnan cu ta apoyá e soberania di Jehova. Den e contexto aki, historiadó Arnold Toynbee a skirbi: “Desde e fin di Guera Mundial II nacionalismo a pone cu e cantidad di estado local cu a haña nan soberania independiente a bira dòbel . . . E actitud actual di humanidad ta causando mas i mas division.”

⁶ Atrabes di siglonan, cierto gobernantenan a waya e vlamnan di conflicto internacional cu ta causa division. Tambe nan a exigí pa dirigí adoracion na nan of na vários imágen of símbolo. Pero nunca Jehova a laga su pueblo fiel sucumbí na tal “pest.” (Daniel 3:1, 2, 20-27; 6:7-10, 16-22) Como un hermandad internacional amoroso, nos ta duna Jehova debocion exclusivo, mantené neutralidad bíblico i reconocé sin prehuicio cu “den tur nacion e hende cu ta teme [Dios] i ta obra husticia ta aceptabel p’e.” (Echonan 10:34, 35; Éxodo 20:4-6; Juan 13:34, 35; 17:16; 1 Pedro 5:8, 9) Aunke nos ta sufri “contratempu” den e forma di persecucion como cristian, nos ta gososo i nos tin siguridad spiritual “den e lugá secreto dje Haltísimo.”

 7. Con Jehova ta protehá nos “cu su punta di alanan”?

⁷ Dor cu nos tin Jehova como nos refugio, nos ta haña consuelo for dje palabranan: “Cu su punta di alanan lo e blokea acceso na bo, i bou di su alanan lo bo tuma refugio. Su apego na e berdad lo ta un escudo grandi i un baluarte.” (Salmo 91:4) Dios ta protehá nos, mescos cu un para ta zweef riba su yunan pa protehá nan. (Isaías 31:5) ‘Cu su punta di alanan e ta blokea acceso na nos.’ Un para ta usa su alanan pa cubri su yunan i protehá nan asina contra roofdier. Mescos cu simpel para yong sin pluma ainda, nos tin proteccion bou di Jehova su alanan figurativo pasobra nos a haña refugio den su berdadero organisacion cristian.—Rut 2:12; Salmo 5:1, 11.

 8. Den ki sentido Jehova su “apego na e berdad” ta un escudo grandi i un baluarte?

⁸ Nos ta confia den “apego na e berdad,” of fieldad. Esei ta manera un escudo grandi di antigwedad, cu hopi bes tabatin forma di un porta suficiente grandi pa cubri curpa completo di un persona. (Salmo 5:12) Confiansa den un proteccion asina ta libra nos di temor. (Génesis 15:1; Salmo 84:11) Mescos cu nos fe, Dios su apego na e berdad ta un escudo grandi di proteccion cu ta blokea Satanas su misilnan di candela i desviá golpinan di enemigu. (Efesionan 6:16) Tambe e ta un baluarte, un lugá fortificá cu ta sirbi como defensa tras di cua nos ta para firme.

‘Nos Lo No Tin Miedu’

 9. Pakico ora di anochi por hinca teror den hende, pero pakico nos no tin miedu?

⁹ En bista dje proteccion cu Dios ta duna, e salmista ta bisa: “Lo bo no tin miedu di ningun teror di anochi, ni di e flecha cu ta bula den dia, ni di e pest cu ta cana den scuridad, ni di e destruccion cu ta plunder violentamente merdia.” (Salmo 91:5, 6) Siendo cu hopi maldad ta sosodé den scuridad, ora di anochi por hinca temor den hende. Meimei dje scuridad spiritual cu ta cubri tera awe, hopi bes nos enemigunan ta recurí na cosnan engañoso den un intento pa caba cu nos spiritualidad i para nos trabou di predicá. Pero ‘nos no tin miedu di ningun teror di anochi’ pasobra Jehova ta protehá nos.—Salmo 64:1, 2; 121:4; Isaías 60:2.

10. (a) Kico “e flecha cu ta bula den dia” ta parce di denotá, i con nos ta reaccioná riba dje? (b) Kico ta e caracter di “e pest cu ta cana den scuridad,” i pakico nos no tin miedu di dje?

¹⁰ Ta parce cu “e flecha cu ta bula den dia” ta denotá atake verbal. (Salmo 64:3-5; 94:20) Segun cu nos ta persistí den presentá informacion verídico, tal oposicion abierto contra nos sirbishi sagrado ta en bano. Ademas, nos no tin miedu di “e pest cu ta cana den scuridad.” Esaki ta un pest figurativo cu ta ser fomentá meimei dje scuridad moral i religioso dje mundu enfermo aki cu ta drumi den poder di Satanas. (1 Juan 5:19) E ta producí un condicion mortífero di mente i curason cu ta laga hende den scuridad relacioná cu Jehova, su propósitonan i su percuracionnan amoroso. (1 Timoteo 6:4) Meimei dje scuridad aki, nos no tin miedu, ya cu nos ta disfrutá di iluminacion spiritual na abundancia.—Salmo 43:3.

11. Kico ta sosodé cu esnan cu ta experimentá ‘plundermentu violento parti merdia’?

¹¹ “E destruccion cu ta plunder violentamente merdia” tampoco no ta spanta nos. “Merdia” por referí n’e asina yamá iluminacion di mundu. Esnan cu ta sucumbí na su punto di bista materialista ta sufri destruccion spiritual. (1 Timoteo 6:20, 21) Ora nos ta declará e mensahe di Reino cu curashi, nos no tin miedu di niun di nos enemigunan pasobra Jehova ta nos Protector.—Salmo 64:1; Proverbionan 3:25, 26.

12. Na banda di ken miles ta “cai,” i den ki manera?

¹² E salmista ta continuá: “Mil lo cai banda di bo, i dies mil na bo man drechi; cerca bo lo e no yega. Ta solamente cu bo wowo lo bo observá i mira e castigu mes dje malbadonan.” (Salmo 91:7, 8) Dor di keda sin haci Jehova nan refugio, hopi hende ta “cai” den morto spiritual “banda” di nos. De echo, “dies mil” a cai na “man drechi” dje israelitanan spiritual djawe. (Galationan 6:16) Pero sea nos ta cristian ungí of nan compañeronan dedicá, nos tin siguridad den e “lugá secreto” di Dios. Nos ta djis ‘observá i mira e castigu dje malbadonan’ cu ta haña nan cu problema den asuntunan comercial, religioso, etcétera.—Galationan 6:7.

‘Ningun Calamidad Lo Bini Riba Nos’

13. Ki calamidadnan no ta bini riba nos, i pakico?

¹³ Aunke e siguridad dje mundu aki ta cabando na nada, nos ta pone Dios na promé lugá i cobra ánimo for dje palabranan dje salmista: “Pasobra bo a bisa: ‘Jehova ta mi refugio,’ bo a haci e Haltísimo mes bo lugá di biba; ningun calamidad lo bini riba bo, i ni sikiera un plaga lo acercá bo tent.” (Salmo 91:9, 10) Sí, Jehova ta nos refugio. Pero, tambe nos ta haci e Haltísimo Dios ‘nos lugá di biba,’ caminda nos ta haña siguridad. Nos ta alabá Jehova como e Soberano Universal, “biba” den dje como nos Fuente di siguridad, i declará e bon nobo di su Reino. (Mateo 24:14) P’esei, ‘ningun calamidad lo bini riba nos’—ningun dje calamidadnan describí anteriormente den e salmo aki. Asta ora nos tambe pasa den calamidadnan manera temblor, horcan, inundacion, hamber i guera i su efectonan, e cosnan aki no ta caba cu nos fe ni nos siguridad spiritual.

14. Como sirbidó di Jehova, pakico nos no ta contaminá cu plaga mortífero?

¹⁴ Cristiannan ungí ta manera residente stranhero cu ta biba den tent leu for dje sistema di cosnan aki. (1 Pedro 2:11) ‘Ni sikiera un plaga ta acercá nan tent.’ Sea nos speransa ta celestial of terenal, nos no ta parti di mundu, i nos no ta contaminá cu plaga spiritualmente mortífero manera su inmoralidad, materialismo, religion falsu i adoracion di “e bestia salbahe” i su “imágen,” Nacionnan Uní.—Revelacion 9:20, 21; 13:1-18; Juan 17:16.

15. Den ki sentido nos tin yudansa dje angelnan?

¹⁵ Relacioná cu e proteccion cu nos ta gosa di dje, e salmista ta agregá: “Lo e [Jehova] duna su mes angelnan un mandato relacioná cu bo, pa protehá bo den tur bo camindanan. Riba nan mannan nan lo carga bo, pa bo no dal bo pia contra piedra.” (Salmo 91:11, 12) Angelnan a ricibí poder pa protehá nos. (2 Reynan 6:17; Salmo 34:7-9; 104:4; Mateo 26:53; Lucas 1:19) Nan ta protehá nos ‘den tur nos camindanan.’ (Mateo 18:10) Como proclamadó di Reino nos tin e guia i proteccion di angelnan i nos no ta trompecá spiritualmente. (Revelacion 14:6, 7) Ni “piedra” manera prohibicion riba nos trabou no a pone nos trompecá i perde aprobacion divino.

16. Ki diferencia tin entre e atake di un “leon yong” i esun di un “cobra,” i con nos ta reaccioná riba nan?

¹⁶ E salmista ta continuá: “Riba e leon yong i e cobra lo bo cana pasa; lo bo trapa e leon yong cu klina i e colebra grandi.” (Salmo 91:13) Mescos cu un leon yong ta lansa un atake frontal abierto, algun di nos enemigunan ta mustra nan oposicion abierto dor di pasa leynan diseñá pa stop nos trabou di predicá. Ademas di eseinan, nos ta haña nos cu atakenan inesperá manera esnan di un cobra for di un lugá di sconde. Aunke miembronan di clero mes ta keda den fondo, tin bes nan ta atacá nos pa medio di esnan cu ta traha ley, huesnan i otro personanan. Pero cu e sosten di Jehova, di un manera pacífico nos ta busca nos derechonan den corte i ta ‘defendé i establecé asina e bon nobo legalmente.’—Filipensenan 1:7; Salmo 94:14, 20-22.

17. Den ki manera nos ta trapa “e leon yong cu klina”?

¹⁷ E salmista ta papia di trapa “e leon yong cu klina i e colebra grandi.” Un leon yong cu klina por ta bastante feros, i un colebra grandi por ta un reptil bastante grandi. (Isaías 31:4) Pero pa feros cu e leon yong cu klina por ta, ora e ta haci un atake frontal, nos ta trap’é di un manera figurativo dor di obedecé Dios mas bien cu hende of organisacionnan semehante na leon. (Echonan 5:29) Pues e “leon” cu ta menasá no ta causa nos ningun daño spiritual.

18. Riba ken “e colebra grandi” por pone nos corda, i kico nos tin cu haci si nos ta bou di atake?

¹⁸ E Septuaginta griego ta yama “e colebra grandi” “un dragon.” Esaki por wel pone nos corda riba “e dragon grandi . . . , e colebra original, esun yamá Diabel i Satanas.” (Revelacion 12:7-9; Génesis 3:15) E ta manera un reptil monstruoso cu ta capas pa primi su prooi mata i gulié. (Jeremías 51:34) Ora Satanas ta purba lora su curpa rond di nos, primi nos mata cu e preshonnan dje mundu aki i guli nos, laga nos sagudí nos curpa, los i trapa e “colebra grandi” aki. (1 Pedro 5:8) Esei ta loke e resto ungí lo tin cu haci pa nan participá den e cumplimentu di Romanonan 16:20.

Jehova—Nos Fuente di Salbacion

19. Pakico nos ta tuma refugio den Jehova?

¹⁹ Relacioná cu e adoradó berdadero, e salmista ta representá Dios bisando: “Pa motibu cu el a pone su cariño riba mi, ami tambe lo percurá escape p’e. Lo mi proteh’é pasobra el a yega di conocé mi nomber.” (Salmo 91:14) E frase “lo mi proteh’é” ta nificá literalmente, “lo mi pon’é na haltu,” esta, fuera di alcanse. Nos ta tuma refugio den Jehova como su adoradónan foral pasobra ‘nos a pone nos cariño riba dje.’ (Marco 12:29, 30; 1 Juan 4:19) En buelta, Dios ‘ta percurá escape pa nos’ for di nos enemigunan. Hamas nos lo ser destruí for di riba tera. Mas bien, nos lo ser salbá pasobra nos conocé e nomber di Dios i ta inbok’é cu fe. (Romanonan 10:11-13) I nos ta determiná pa ‘cana den e nomber di Jehova pa semper.’—Mikéas 4:5; Isaías 43:10-12.

20. Segun e conclusion di Salmo 91, kico Jehova ta primintí su fiel sirbidó?

²⁰ Manera Salmo 91 ta concluí, Jehova ta bisa di su fiel sirbidó: “Lo e inbocá mi, i ami lo respond’é. Lo mi ta cuné den angustia. Lo mi rescat’é i glorifik’é. Lo mi satisfac’é cu largura di dianan, i lo mi lagu’é mira salbacion pa medio di mi.” (Salmo 91:15, 16) Ora nos inbocá Dios den oracion segun su boluntad, e ta contestá nos. (1 Juan 5:13-15) Ya nos a pasa dor di hopi angustia caba pa motibu dje hostilidad cu Satanas ta fomentá. Pero e palabranan “lo mi ta cuné den angustia” ta prepará nos pa pruebanan cu lo bini den futuro i ta garantisá nos cu Dios lo sostené nos ora e sistema malbado aki ser destruí.

21. Con e ungínan a ser glorificá caba?

²¹ Apesar di Satanas su oposicion furioso, despues di pasa “largura di dianan” riba tera, henter e resto dje ungínan cu ainda ta meimei di nos lo ser glorificá den shelu n’e debido tempu di Jehova. Pero ya caba e liberacionnan remarcabel di Dios a trece gloria spiritual p’e ungínan. I pa nan ta un gran onor di por hiba delantera como Testigo di Jehova riba tera den e último dianan aki! (Isaías 43:10-12) E mayor liberacion cu Jehova lo efectuá na fabor di su pueblo lo tuma lugá durante su guera grandi di Armagedon ora e vindicá su soberania i santificá su nomber.—Salmo 83:18; Ezekiel 38:23; Revelacion 16:14, 16.

22. Ken lo ‘mira salbacion di parti di Jehova’?

²² Sea nos ta cristian ungí of nan compañeronan dedicá, nos ta acudí na Dios pa salbacion. Durante Jehova su ‘dia grandi i inspirador di temor,’ esnan cu ta sirbi Dios lealmente lo ser salbá. (Joël 2:30-32) Dios lo ‘satisfacé cu largura di dianan’—bida sin fin—esnan entre nos cu lo forma e “multitud grandi” di sobrebibiente pa drenta Su mundu nobo i cu lo permanecé fiel durante un prueba final. Tambe lo e resucitá multitud di hende. (Revelacion 7:9; 20:7-15) Sí, Jehova lo tin un gran deleite den ‘laga nos mira salbacion’ pa medio di Jesucristo. (Salmo 3:8) Cu e prospectonan magnífico ei nos dilanti, laga nos sigui acudí na Dios p’e yuda nos conta nos dianan pa su gloria. Cu palabra i accion, laga nos sigui demostrá cu Jehova ta nos refugio.

[Nota]

Con Lo Bo Contestá?

• Kico ta “e lugá secreto dje Haltísimo”?

• Pakico nos no tin miedu?

• Den ki sentido ‘ningun calamidad ta bini riba nos’?

• Pakico nos por bisa cu Jehova ta nos fuente di salbacion?

[Plachi na página 17]

Bo sa den ki sentido Jehova su apego na e berdad ta un escudo grandi pa nos?

[Plachinan na página 18]

Jehova ta yuda su sirbidónan efectuá nan ministerio apesar di atakenan inesperá i oposicion abierto

[Rekonosementu]

Cobra: A. N. Jagannatha Rao, Trustee, Madras Snake Park Trust