Tene Kuidou pa Bo Kurason No Bira Halsá
“Dios ta oponé esnan halsá.”—SANTIAGO 4:6, NW.
1. Duna un ehèmpel di sintimentu apropiá di orguyo.
BO A yega di pasa den un eksperensia ku a yena bo ku orguyo? Mayoria di nos a yega di haña e dushi sensashon ei. E echo ku nos por sinti sierto orguyo no ta nada malu. Por ehèmpel, ora un pareha kristian wak rapòrt di nan yu muhé ku ta mustra su bon kondukta i trabou duru na skol, probablemente nan lo sinti nan masha satisfecho ku su logronan. Apòstel Pablo i su kompañeronan a sinti nan orguyoso di un kongregashon nobo ku nan a yuda lanta, pasobra e rumannan a soportá persekushon fielmente.—1 Tesalonisensenan 1:1, 6; 2:19, 20; 2 Tesalonisensenan 1:1, 4.
2. Pakiko sintimentu di orguyo por lo general ta indeseabel?
2 For di e ehèmpelnan anterior, nos ta mira ku orguyo por nifiká e goso ku un hende ta sinti pa motibu di un akshon òf algu ku e ta poseé. Pero, hopi bes orguyo ta indiká un outo-estima inapropiá, un sintimentu di superioridat pa motibu di abilidat, aparensia, rikesa òf rango, i ku frekuensia e ta keda manifestá pa medio di un aktitut arogante. E tipo di orguyo ei ta algu ku definitivamente nos komo kristian mester tene kuidou kuné. Dikon? Pasobra nos tin e tendensia natural pa ta egoista; esei ta algu ku nos a heredá for di nos antepasado Adam. (Génesis 8:21) Dor di esei, fásilmente nos kurason por pone nos sinti un orguyo pa motibunan inkorekto. Por ehèmpel, kristiannan mester evitá di sinti nan orguyoso pa motibu di nan rasa, rikesa, edukashon, abilidatnan natural òf prestashon na trabou na komparashon ku otro hende. E sintimentu di orguyo ku ta lanta pa motibu di e kosnan ei ta inapropiá i ta desagradá Yehova.—Jeremias 9:23; Echonan 10:34, 35; 1 Korintionan 4:7; Galationan 5:26; 6:3, 4.
3. Kiko ta un kurason halsá, i kiko Hesus a bisa tokante dje?
3 Tin un motibu mas pakiko nos tin ku rechasá orguyo inapropiá. Si nos laga e sintimentu ei krese den nos kurason, e por desaroyá i bira un forma di orguyo masha repugnante: un kurason halsá. Kiko esei ta nifiká? Ademas di sinti su mes superior, e hende ku tin un kurason halsá ta menospresiá otro hende ku e ta mira komo inferior. (Lukas 18:9; Juan 7:47-49) Hesus a menshoná un aktitut ‘halsá’ [NW] òf arogante huntu ku otro mal karakterístikanan ku ta sali “for di kurason” i ku ta “kontaminá hende.” (Marko 7:20-23) Kristiannan por mira kon esensial ta pa evitá di desaroyá un kurason halsá.
4. Kon un análisis di ehèmpelnan bíbliko tokante hende ku tabatin un kurason halsá por yuda nos?
4 Un análisis di algun relato di Beibel tokante hende ku tabatin un kurason halsá por yuda bo evitá e aktitut ei. E ora ei lo bo ta den un mihó posishon pa detektá sintimentunan inapropiá di orguyo ku lo por ta biba den bo òf ku lo por desaroyá ku tempu. Esaki lo yuda bo rechasá pensamentu- òf sintimentunan ku por pone bo bira halsá. Komo resultado, lo bo no sufri e konsekuensianan desfaborabel ora Dios kumpli ku loke el a spièrta di dje: “Lo mi kita for di meimei di boso esnan ku ta alegrá ku orguyo, i nunka mas lo bo ta sobèrbè riba mi seru santu.”—Sofonias 3:11.
Dios Ta Aktua Kontra Hende ku Kurason Halsá
5, 6. Kon Fárao a mustra un kurason halsá, i ku ki resultado?
5 E manera ku Yehova a aktua kontra gobernantenan poderoso manera Fárao por duna bo un idea tambe kon Yehova ta mira hende ku ta halsa nan mes. Tabata bisto ku Fárao tabatin un kurason halsá. El a mira su mes komo un dios ku hende mester a adorá, p’esei el a despresiá su esklabonan, e israelitanan. Wak kon el a reakshoná ora a pidié pa laga Israel bai den desierto pa “tene un fiesta” pa Yehova. El a kontestá ku un aire di arogansia: “Ta ken ta [“Yehova,” NW] ku mi mester obedesé su bos i laga Israel bai?”—Eksodo 5:1, 2.
6 Despues ku Fárao a eksperensiá seis plaga, Yehova a bisa Moisés pa puntra e gobernante egipsio: “Ainda bo ta halsa bo mes kontra mi pueblo dor di no laga nan bai”? (Eksodo 9:17) E ora ei Moisés a anunsiá e di shete plaga—hagel ku a ruiná e tera. Despues di e di dies plaga Fárao a laga e israelitanan sali liber, ma el a kambia di idea i a sali nan tras. Finalmente, Fárao i su ehérsito a keda atrapá den Laman Kòrá. Imaginá kiko lo mester a pasa den nan mente ora e awanan a sera riba nan! Kiko tabata e resultado di Fárao su arogansia? Su tropanan élite a bisa: “Laga nos hui pa Israel, pasobra [“Yehova,” NW] ta bringa pa nan kontra e egipsionan.”—Eksodo 14:25.
7. Kon gobernantenan di Babilonia a mustra ku nan tabatin kurason halsá?
7 Otro gobernantenan arogante, ku tabatin kurason halsá, tambe a sufri humiashon na man di Yehova. Un di nan tabata Senakerib, rei di Asiria. (Isaias 36:1-4, 20; 37:36-38) Ku tempu, e babilonionan a derotá Asiria, pero dos rei di Babilonia ku tabatin kurason halsá tambe a ser humiá. Kòrda riba e fiesta ku Rei Belsasar a tene durante kua e ku su invitadonan real a bebe biña for di e kopanan saká for di e tèmpel di Yehova, pa alabá e diosnan di Babilonia. Diripiente e dedenan di un man a aparesé i a skirbi un mensahe riba muraya. Ora a puntra profeta Daniel pa splika kiko e palabranan misterioso a nifiká, el a rekordá Belsasar: “E Dios Haltísimo a duna bo tata Nabukodonosor soberania . . . Ma ora su kurason a halsa . . . , el a wòrdu bahá for di su trono real, i su gloria a wòrdu kitá for di dje. . . . Abo, su yu hòmber Belsasar, no a humiá bo kurason, ounke ku bo tabata sa tur esaki.” (Daniel 5:3, 18, 20, 22) E mesun anochi ei, e ehérsito di Medo-Persia a derotá Babilonia i mata Belsasar.—Daniel 5:30, 31.
8. Kon Yehova a trata ku vários hende arogante ku tabatin kurason halsá?
8 Pensa tambe riba otro hòmbernan arogante ku tabatin kurason halsá i ku a despresiá e pueblo di Yehova: Goliat, e gigante filisteo, Haman e Promé Minister perso, Rei Herodes Agripa, kende a goberná e provinsia di Judea. Pa motibu di nan arogansia e tres hòmbernan ei a muri un morto humiante na man di Dios. (1 Samuel 17:42-51; Ester 3:5, 6; 7:10; Echonan 12:1-3, 21-23) E manera ku Yehova a trata ku e hòmbernan ei ta konfirmá e bèrdat aki: “Orguyo ta bin promé ku destrukshon, i un spiritu arogante promé ku kaida.” (Proverbionan 16:18) En bèrdat, no tin duda ku “Dios ta oponé esnan halsá.”—Santiago 4:6, NW.
9. Kon e reinan di Tiro a resultá di ta traidónan?
9 Na kontraste ku e gobernantenan di Egipto, Asiria i Babilonia ku tabatin kurason halsá, e rei di Tiro un tempu a duna yudansa na e pueblo di Dios. Durante e reinado di David i di Salomon, e rei aki a perkurá hòmbernan ábil di fishi i material pa e edifisionan real i pa e tèmpel di Dios. (2 Samuel 5:11; 2 Krónikanan 2:11-16) Lamentablemente, despues e reinan di Tiro a bira kontra e pueblo di Yehova. Kiko a kousa esei?—Salmo 83:3-7; Joel 3:4-6; Amos 1:9, 10.
“Bo Kurason A Bira Halsá”
10, 11. (a) Ku ken nos por kompará e reinan di Tiro? (b) Kiko a kambia e aktitut di Tiro pa ku Israel?
10 Yehova a inspirá su profeta Ezekiel pa desenmaskará i kondená Tiro su dinastia di reinan. E mensahe ei dirigí na e “rei di Tiro” ta kontené ekspreshonnan ku ta kuadra ku tantu e dinastia di Tiro komo e traidó original, Satanas, kende ‘no a para [firme] den e bèrdat.’ (Ezekiel 28:12; Juan 8:44) Un tempu Satanas tabata un kriatura spiritual leal den Yehova su organisashon di yunan selestial. Yehova Dios a duna un indikashon mediante Ezekiel kiko ta e motibu básiko ku tantu e dinastia di Tiro komo Satanas a bira lomba pa Dios:
11 “Bo tabata na Edén, e hòfi di Dios; bo tabata dòrná ku tur sorto di piedra presioso . . . Bo tabata ungí komo e kerubin wardadó . . . Bo tabata perfekto den bo kamindanan for di e dia ku bo a wòrdu kreá, te na e momentu ku inhustisia a wòrdu hañá den bo. Pa motibu di bo negoshamentu ekstenso bo a yena ku violensia, i bo a peka. P’esei [lo mi] . . . destruí bo, o kerubin wardadó . . . Bo kurason a bira orguyoso [“halsá,” NW] pa motibu di bo bunitesa; bo a korumpí bo sabiduria pa motibu di bo splendor.” (Ezekiel 28:13-17) Sí, un aktitut halsá i arogante a impulsá e reinan di Tiro pa bira violento kontra e pueblo di Yehova. Tiro a bira un sentro komersial sumamente próspero i famoso pa su bunita obranan. (Isaias 23:8, 9) E reinan di Tiro a bira masha arogante i nan a kuminsá oprimí e pueblo di Dios.
12. Kiko a pone Satanas bira desleal, i kiko el a sigui hasi?
12 Di igual manera, un tempu e kriatura spiritual ku a bira Satanas tabatin e sabiduria nesesario pa kumpli ku kualke asignashon ku Dios tabatin p’e. En bes di ta gradisidu pa esei, el a bira “orguyoso” i a kuminsá menospresiá Dios su manera di goberná. (1 Timoteo 3:6) El a bira asina halsá ku el a kuminsá anhelá e adorashon di Adam ku Eva. E mal deseo aki a bira fértil i a duna lus na piká. (Santiago 1:14, 15) Satanas a sedusí Eva pa kome e fruta di e úniko palu ku Dios a prohibí. Anto, usando Eva, Satanas a pone Adam tambe kome di e fruta prohibí. (Génesis 3:1-6) Di e forma ei e promé pareha humano a rechasá e derecho di Dios di goberná riba nan i, de fakto, nan a bira adoradó di Satanas. Satanas su arogansia no tin límite. El a purba sedusí tur kriatura inteligente den shelu i riba tera, inkluso Hesukristu, pa ador’é i asina rechasá e soberania di Yehova.—Mateo 4:8-10; Revelashon 12:3, 4, 9.
13. Na kiko un kurason halsá a hiba?
13 Pues bo por mira ku e promé persona ku a desaroyá un kurason halsá ta Satanas; esei ta e kousa básiko di piká, sufrimentu i degenerashon den e mundu djawe. Komo “dios di e mundu aki,” Satanas ta sigui promové sintimentu inapropiá di orguyo i arogansia. (2 Korintionan 4:4) E sa ku no a sobr’é muchu tempu mas, p’esei e ta hiba un guera kontra kristiannan berdadero. Su meta ta pa alehá nan for di Dios, pa nan bira stimadó di nan mes, bromadó i arogante. Beibel a profetisá ku e karakterístikanan egoista ei lo reina den e “último dianan” aki.—2 Timoteo 3:1, 2; Revelashon 12:12, 17.
14. A base di ki regla Yehova ta trata ku su kriaturanan inteligente?
14 Hesukristu, di su parti, a eksponé e fruta putrí kousá pa Satanas su arogansia. Na por lo ménos tres okashon i den presensia di enemigunan ku tabata hustu den nan mes bista, Hesus a splika a base di ki regla Yehova ta trata ku humanidat: “Ken ku halsa su mes lo wòrdu humiá, i esun ku humiá su mes lo wòrdu halsá.”—Lukas 14:11; 18:14; Mateo 23:12.
Tene Kuidou pa Bo Kurason No Bira Halsá
15, 16. Kiko a pone Hagar su kurason bira halsá?
15 Kisas bo a nota ku e ehèmpelnan menshoná anteriormente di hende arogante ku tabatin un spiritu halsá tabatin keber ku hòmbernan prominente. Esei ta nifiká ku hende komun i koriente no tin e tendensia di bira halsá? Klaru ku nò. Tuma por ehèmpel un insidente ku a tuma lugá den e famia di Abraham. E patriarka no tabatin yu pa bira su heredero, i su esposa, Sara, ya kaba a pasa e edat di haña yu. Den e tempu ei tabatin e kustumber pa un hòmber den e situashon di Abraham tuma un di dos esposa i haña yu kuné. Dios a tolerá e matrimonionan ei pasobra ainda no tabata su tempu pa restablesé su norma original di matrimonio entre adoradónan berdadero.—Mateo 19:3-9.
16 Riba insistensia di su kasá, Abraham a bai di akuerdo pa produsí un potensial heredero pa medio di Sara su kriá egipsio, Hagar. Komo esposa sekundario di Abraham, Hagar a sali na estado. Lo e mester tabata profundamente gradisidu pa su posishon di onor. Pero, en bes di esei, el a laga su kurason bira halsá. E relato di Beibel ta bisa: “Ora ku el a mira ku el a sali na estado, [Sarai] a keda despresiá den su bista.” E aktitut ei a kousa asina tantu konflikto den famia di Abraham te ku Sara a kore ku Hagar. Pero tabatin un solushon pa e problema. E angel di Dios a konsehá Hagar: “Bai bèk serka [Sarai], i someté bo mes na su outoridat.” (Génesis 16:4, 9) Aparentemente, Hagar a sigui e konseho aki, el a kambia su aktitut pa ku Sara i a bira antepasado di hopi hende.
17, 18. Pakiko nos tur tin ku tene kuidou pa no desaroyá un kurason halsá?
17 E kaso di Hagar ta ilustrá ku ora situashon drecha pa un hende, su kurason por bira halsá. E lès ku nos por siña for di esei ta ku asta un kristian ku a sirbi Dios ku un kurason puru por bira halsá ora e haña rikesa òf outoridat. E aktitut ei por desaroyá tambe ora otro hende elogi’é pa su éksito, sabiduria òf abilidat. Sí, un kristian mester tene kuidou p’e no desaroyá un kurason halsá. Esei ta konta spesialmente ora e logra sierto éksito òf haña mas responsabilidat.
18 E motibu di mas importante pa evitá un kurason halsá ta e manera ku Dios ta mira e karakterístika aki. Su Palabra ta deklará: “Un mirada orguyoso, un kurason halsá, i e lampi di e malbado ta piká.” (Proverbionan 21:4) Ta interesante pa nota ku Beibel ta spièrta partikularmente kristiannan “ku ta riku den e mundu aktual” pa nan no ta “sobèrbè,” òf halsá. (1 Timoteo 6:17; Deuteronomio 8:11-17) Kristiannan ku no ta riku mester evitá di tin un wowo ‘envidioso,’ i nan mester kòrda ku tur hende, sea riku òf pober, por desaroyá un kurason halsá.—Marko 7:21-23; Santiago 4:5, NW.
19. Den ki manera Uzias a daña pa tur e bon ku el a hasi?
19 Un kurason halsá huntu ku otro mal karakterístikanan por ruiná un bon relashon ku Yehova. Tuma por ehèmpel e promé parti di Rei Uzias su reinado: “El a hasi bon den bista di SEÑOR . . . I el a sigui buska Dios . . . ; i tanten ku el a buska SEÑOR, Dios a hasié prosperá.” (2 Krónikanan 26:4, 5) Pero lamentablemente Rei Uzias a daña pa tur e bon ku el a hasi pasobra “su kurason a bira asina orguyoso ku el a aktua korumpí.” El a bira asina arogante ku el a drenta e tèmpel i a ofresé sensia. Ora e saserdotenan a spièrt’é pa e no kometé e akto sobèrbè aki, Uzias ‘a rabia mashá.’ Komo resultado, Yehova a dal e ku lepra, i el a muri komo un hòmber desaprobá pa Dios.—2 Krónikanan 26:16-21.
20. (a) Kon Rei Ezekias a hera di daña pa tur e bon ku el a hasi? (b) Kiko nos lo konsiderá den e siguiente artíkulo?
20 Di otro banda, wak e ehèmpel di Rei Ezekias. Na un okashon, e rei a hera di daña pa tur e bon ku el a hasi pasobra el a bira “orguyoso.” Afortunadamente, “Ezekias a humiá e orguyo di su kurason” i a rekobrá e aprobashon di Dios. (2 Krónikanan 32:25, 26) Ripará ku loke a kura e kurason halsá di Ezekias tabata humildat. Sí, humildat ta nèt kontrali di un kurason halsá. P’esei, den e siguiente artíkulo, nos lo konsiderá kon nos por kultivá i mantené humildat kristian.
21. Kiko kristiannan humilde por anhelá?
21 Pero, laga nos no lubidá tur e mal fruta ku arogansia i un kurason halsá a produsí. Siendo ku “Dios ta oponé hende halsa,” laga nos ta firmemente determiná pa rechasá sintimentu di orguyo inapropiá. Segun ku nos ta hasi esfuerso pa ta kristiannan humilde, nos por anhelá pa sobrebibí e gran dia di Dios, ora hende ku kurason halsá i nan fruta lo ser eliminá for di tera. E ora ei, “e orguyo di hende lo wòrdu humiá, i e arogansia di hende lo wòrdu rebahá; i SEÑOR so lo wòrdu halsá den e dia ei.”—Isaias 2:17.
Puntonan pa Meditá Ariba
• Kon lo bo deskribí un persona halsá?
• Kon e aktitut di un kurason halsá a originá?
• Kiko ta pone un hende su kurason bira halsá?
• Pakiko nos tin ku tene kuidou pa nos kurason no bira halsá?
[Plachi na página 23]
E kurason halsá di Fárao a kousa su humiashon
[Plachi na página 24]
Ora situashon a drecha pa Hagar, su kurason a bira halsá
[Plachi na página 25]
Ezekias a humiá su mes i a rekobrá e aprobashon di Dios