Tuma Bo Sirbishi na Yehova na Serio

‘Tur loke ta digno di konsiderashon serio, sigui konsiderá esakinan.’​—FIL. 4:8, NW.

1, 2. Kiko ta pone ku hopi hende no ta mira bida komo un asuntu serio, i ki preguntanan e aktitut akí ta lanta?

NOS ta bibando den un di e periodonan di mas difísil den historia humano. I pa hende ku no tin un bon relashon ku Yehova ta kasi imposibel pa trata ku e ‘tempu trabahoso’ akí. (2 Tim. 3:​1-5) Riba nan mes forsa, apénas nan ta logra solushoná nan problemanan diario. P’esei, den un intento pa lubidá kon tristu nan bida ta, hopi hende ta dediká nan tempu na tur tipo di dibertishon i entretenimentu.

² Sí, pa trata ku tenshon di bida, hopi bes hende ta pone deseo pa plaser na promé lugá. I si kristiannan no paga tinu, fásilmente nan por kuminsá hasi meskos. Pero kon nos por evitá esei? Esei ta nifiká ku semper nos mester ta serio, sin ningun plaser den bida? Kon nos por haña un balansa entre plaser i nos responsabilidatnan? Ki prinsipionan bíbliko ta yuda nos mira bida komo un asuntu serio i tòg no tuma nos mes muchu na serio?

Seriedat den un Mundu Ku Ta Stima Plaser

3, 4. Kon e Skritura ta yuda nos mira e importansia di desplegá seriedat?

³ Ta bisto ku e mundu akí ta duna demasiado importansia na “plaser.” (2 Tim. 3:4) E énfasis ku hende ta pone riba dibertishon por ta un peliger pa nos relashon ku Yehova. (Pro. 21:17) P’esei mes apòstel Pablo a inkluí den su kartanan na Timoteo i Tito konseho relashoná ku e klase di seriedat ku kristiannan mester desplegá. Si nos apliká e konsehonan ei, mundu su falta di seriedat lo no afektá nos.​—Lesa 1 Timoteo 2:​1 i 2; Tito 2:​2-8.a

⁴ Hopi tempu pasá, Salomon a skirbi ku tin biaha ta muchu mas benefisioso pa tuma tempu pa asuntunan serio di bida en bes di enfoká riba plaser. (Ekl. 3:4; 7:​2-4) Sí, debí ku bida ta kòrtiku, nos tin ku “hasi tur esfuerso” pa haña salbashon. (Luk. 13:24) P’esei, nos tin ku sigui konsiderá tur loke ta “digno di konsiderashon serio.” (Fil. 4:​8, 9, NW) Esei ta nifiká ku nos tin ku presta bon atenshon na kada aspekto di nos bida kristian.

 5. Menshoná un área di bida na kua nos tin ku presta bon atenshon.

⁵ Por ehèmpel, imitando Yehova i Hesus, kristiannan berdadero ta traha duru pasobra nan ta tuma nan responsabilidatnan masha na serio. (Juan 5:17) Esei ta pone ku hopi bes hende ta elogiá nan ya ku nan ta bon trahadó i hende konfiabel. Spesialmente kabesnan di famia ta traha duru pa perkurá pa nan famia. Al fin i al kabo, si un persona no ta perkurá materialmente pa su famia, el a “nenga e fe,” lokual ta meskos ku nenga Yehova!​—1 Tim. 5:8.

Nos Adorashon Ta Algu Serio Pero Tòg un Fuente di Goso

 6. Kon nos por sa ku nos tin ku tuma nos adorashon na Yehova na serio?

⁶ Pa Yehova, semper tabata importante pa su sirbidónan ador’é n’e manera korekto. P’esei, ora e israelitanan a desviá for di adorashon berdadero, nan a haña nan ku e konsekuensianan ku Lei di Moisés a stipulá. (Jos. 23:​12, 13) Den e promé siglo di nos era, siguidónan di Kristu mester a hasi esfuerso vigoroso pa mantené adorashon berdadero liber di siñansa falsu i kondukta perhudisial. (2 Juan 7-11; Rev. 2:​14-16) Awe tambe kristiannan berdadero ta konsiderá nan adorashon na Yehova komo un asuntu serio.​—1 Tim. 6:20.

 7. Kon Pablo a prepará pa su sirbishi?

⁷ Nos sirbishi di vèlt ta un fuente di goso. Sinembargo, pa nos por mantené e goso ei, nos tin ku konsiderá nos sirbishi komo algu importante i prepará di antemano. Pablo a splika kon el a tene kuenta ku e personanan ku el a siña. El a skirbi: “Mi a bira tur kos pa tur hende, pa di tur manera mi por salba algun. I mi ta hasi tur kos pa kousa di evangelio, pa mi por tuma parti den dje.” (1 Kor. 9:​22, 23) Pa Pablo tabata un plaser pa yuda hende siña konosé Dios, i di antemano e tabata pensa seriamente kon pa satisfasé e nesesidatnan spesífiko di su oyentenan. P’esei, e por a enkurashá i motivá nan pa adorá Yehova.

 8. (a) Ki aktitut nos mester tin pa ku e hendenan ku nos ta siña den nos ministerio? (b) Dikon un estudio di Beibel ta duna goso?

⁸ Kon importante sirbishi na Dios tabata pa Pablo? Pablo tabata dispuesto pa ‘hasi su mes esklabo’ di Yehova i di e personanan ku a skucha e mensahe di e bèrdat. (Rom. 12:11; 1 Kor. 9:19) Komo kristian, nos a aseptá e enkargo di siña hende e Palabra di Dios—sea durante un estudio di Beibel, un reunion kristian òf un seshon di Adorashon Komo Famia. Nos ta realisá ki responsabilidat serio nos tin pa ku e hendenan akí? Kisas nos ta pensa ku no ta fásil pa dirigí un estudio di Beibel riba un base regular; podisé nos ta haña esei un karga pisá. Ta sierto ku pa nos por kumpli ku esaki nos tin ku kita tempu for di asuntunan personal pa yuda otro hende. Pero esaki ta na armonia ku loke Hesus a bisa, esta, ku “duna ta hasi hende mas felis ku risibí.” (Echo. 20:35, BPK) Sí, no tin nada ku por hasi nos mas felis ku siña un persona kon e por haña salbashon.

9, 10. (a) E echo ku nos ta tuma nos sirbishi na serio ta nifiká ku nos no por relahá ni pasa un ratu plasentero ku otro hende? Splika dikon. (b) Kiko lo yuda un ansiano pa e ta un persona aserkabel i un fuente di animashon pa otronan?

⁹ E echo ku nos ta tuma nos sirbishi na serio no ta nifiká ku nos no por relahá ni pasa un ratu plasentero huntu ku otro hende. Hesus a pone un ehèmpel perfekto pa nos; el a tuma tempu no solamente pa siña hende sino tambe pa relahá i sera amistat. (Luk. 5:​27-29; Juan 12:​1, 2) Ademas, no ta pasobra nos ta tuma nos sirbishi na serio, semper bai nos kara mester ta serio. Si Hesus tabata un persona demasiado serio, hende lo no a sinti nan atraí na dje. Pero asta mucha a sinti nan kómodo serka dje. (Mar. 10:​13-16) Kon nos por imitá Hesus su aktitut balansá?

¹⁰ Un ruman hòmber a bisa di un ansiano: “E ta eksigí hopi di su mes pero nunka e ta ferwagt perfekshon di otro hende.” Otronan por bisa esei di bo? Ta bon pa nos ta rasonabel den loke nos ta ferwagt di otronan. Mucha, por ehèmpel, ta reakshoná bon ora nan mayornan ta pone metanan rasonabel i ta yuda nan alkansá esakinan. Di mes manera, ansianonan por animá otro miembronan di kongregashon pa progresá den sentido spiritual i duna nan sugerensianan spesífiko pa logra esei. Ademas, ora un ansiano tin un punto di bista balansá di su mes, lo e ta un persona kariñoso i aserkabel. (Rom. 12:3) Un ruman muhé a bisa: “Mi no ta gusta ora un ansiano ta kue tur kos hasi wega kuné. Pero si tur ora bai e ta serio, ta difísil pa mi aserk’é.” Un otro ruman muhé a bisa ku e ta haña ku algun ansiano “ta duna bo miedu di aserká nan pasobra semper nan kara ta serio.” Pues, ansianonan mester hasi esfuerso pa laga tur ruman sigui mira adorashon na Yehova, e “Dios felis,” komo un fuente di goso.​—1 Tim. 1:11, NW.

Aseptá Responsabilidat den Kongregashon

11. Kiko “aspirá” mas responsabilidat den kongregashon ta enserá?

¹¹ Ora Pablo a animá ruman hòmbernan pa hasi esfuerso pa kualifiká pa mas responsabilidat den kongregashon, su intenshon no tabata pa animá niun hende pa satisfasé nan ambishon. Mas bien, el a skirbi: “Si un hòmber aspirá na e puesto di ansiano, ta un bon trabou e ta deseá di hasi.” (1 Tim. 3:​1, 4) Un kristian ku ta “aspirá” mas responsabilidat den kongregashon tin ku kultivá un deseo fuerte pa traha duru pa atkerí e kualidatnan spiritual nesesario pa por sirbi su rumannan. Si un ruman hòmber tin por lo ménos un aña batisá i e ta kumpli na un grado rasonabel ku e rekisitonan bíbliko pa sirbidó ministerial deskribí na 1 Timoteo 3:​8-13, ansianonan por rekomendá pa nombr’é. Tuma nota ku versíkulo 8 ta mustra bon kla ku diákononan, òf sirbidónan ministerial, “tambe mester ta hòmbernan digno.”

12, 13. Splika kon ruman hòmbernan por hasi esfuerso pa haña mas responsabilidat.

¹² Bo ta un ruman hòmber batisá di mas o ménos 20 aña di edat ku ta tuma e bèrdat na serio? Tin vários manera ku bo por demostrá ku bo ke mas responsabilidat. Por ehèmpel, bo por mehorá e kualidat di bo sirbishi. P’esei puntra bo mes: ‘Mi ta gusta traha ku rumannan di tur edat den sirbishi di vèlt? Mi ta hasi esfuerso pa haña un estudio di Beibel?’ Si bo ta sigui e sugerensianan ku nos ta haña na reunionnan di kongregashon ora bo ta dirigí estudio di Beibel, bo abilidat di siña lo mehorá. Es mas, lo bo siña kon pa mustra empatia pa e persona ku ta siñando e kamindanan di Yehova. I ora bo studiante kuminsá mira e nesesidat di hasi kambio, lo bo sa kon pa yud’é diskretamente i ku pasenshi pa apliká prinsipionan bíbliko.

¹³ Boso ku ta mas yòn por pone boso mes disponibel pa yuda rumannan di mas edat i ofresé pa yuda nan den tur loke boso por. Ademas, boso por presta atenshon na e kondishon di e Salòn di Reino; yuda ten’é limpi i nèchi. Ora bo ta ofresé bo mes pa yuda kaminda bo por, bo ta demostrá ku bo ta tuma bo sirbishi na Dios na serio. E ora ei, meskos ku Timoteo, bo tambe por siña kon pa perkurá pa e nesesidatnan di kongregashon.​—Lesa Filipensenan 2:​19-22.

14. Kon ruman hòmbernan hóben por ‘proba’ si nan ta apto pa sirbi den kongregashon?

¹⁴ Ansianonan, hasi sigur di duna tarea na ruman hòmbernan hóben, kendenan ta hasi esfuerso pa “hui pa e pashonnan di hubentut” i ta sigui tras di ‘hustisia, fe, amor, pas’ i otro bon kualidatnan. (2 Tim. 2:22) Ta ora nan haña algu di hasi den kongregashon, nan por ‘proba’ si nan por karga responsabilidat. I di e manera ei, nan “progreso por ta bisto pa tur hende.”​—1 Tim. 3:10; 4:15.

Demostrá Seriedat den Kongregashon i den Famia

15. Na armonia ku 1 Timoteo 5:​1 i 2, kon nos por mustra seriedat den nos trato ku nos rumannan?

¹⁵ Seriedat ta enserá trata nos rumannan ku dignidat. Ora Pablo a konsehá Timoteo, el a mustra ku ta importante pa kristiannan trata otro ku rèspèt. (Lesa 1 Timoteo 5:​1 i 2.) Esaki ta spesialmente importante ora nos ta trata ku e sekso opuesto. E manera respetuoso ku Jòb a trata hende muhé, foral su kasá, ta un ekselente ehèmpel pa nos. El a hasi sigur pa no wak otro hende muhé ku pashon. (Jòb 31:1) Si nos ta trata nos rumannan ku dignidat, esta ku rèspèt, nos no ta flirt ku nan ni hasi nada ku por laga nan sinti nan inkómodo. Spesialmente personanan ku ta namorá otro ku e intenshon di kasa mester trata otro ku dignidat. Un kristian ku ta respetá otronan hamas lo hunga ku sintimentu di un otro ruman.​—Pro. 12:22.

16. Mustra e diferensia entre e punto di bista ku algun hende den mundu tin di e papel di esposo i tata i esun di Beibel.

¹⁶ Ademas, nos tin ku tuma na serio e papel ku Dios a duna kada miembro di famia. E mundu di Satanas ta ridikulisá e papel di esposo i tata. Pa e industria di entretenimentu, kabes di famia a bira un kos di hasi bofon di dje i no di respetá. Ma segun e Skritura, e esposo tin un responsabilidat serio; e ta ‘kabes di su esposa.’​—Efe. 5:23; 1 Kor. 11:3.

17. Splika den ki sentido nos partisipashon den Adorashon Komo Famia por demostrá ku nos ta tuma nos responsabilidatnan na serio.

¹⁷ Si un esposo ta perkurá materialmente pa su famia pero no ta hasi esei den sentido spiritual, e ta falta madures i sabiduria. (Deu. 6:​6, 7) P’esei 1 Timoteo 3:4 ta mustra ku si bo ta un kabes di famia i ta hasi esfuerso pa haña mas privilegio den kongregashon, bo mester ta un hòmber ku “ta manehá su mes kas bon, ku ta tene su yunan bou di kontròl ku tur dignidat.” Pues, puntra bo mes: ‘Mi ta apartá tempu regularmente pa nos por tin nos Adorashon Komo Famia?’ Algun esposa kristian práktikamente tin ku roga nan esposo pa e perkurá pa e famia den sentido spiritual. Esposo, puntra bo mes onestamente: ‘Kiko mi ta pensa di mi responsabilidat komo kabes di famia? Mi ta kumpli kuné?’ Ta klaru ku un esposa kristian mester apoyá e Adorashon Komo Famia i kooperá ku su esposo pa esaki por bira un éksito.

18. Kon mucha por siña tuma responsabilidat na serio?

¹⁸ Beibel ta animá mucha tambe pa enfoká riba aspektonan importante di bida. (Ekl. 12:1) Trabou no ta mata mucha. Ta bon pa nan siña hasi trabou di kas ku ta pas pa nan edat i abilidat. (Lam. 3:27) For di tempu ku Rei David tabata mucha el a siña kon pa ta un ekselente wardadó di karné. Tambe el a siña toka instrumènt i komponé músika; e abilidatnan akí a pone ku e por a sirbi e gobernante di Israel. (1 Sam. 16:​11, 12, 18-21) No tin duda ku David a hunga ora e tabata mucha. Ma ademas di esei, el a desaroyá abilidatnan balioso ku el a usa despues pa alabá Yehova. Su abilidatnan komo wardadó di karné a yud’é guia e nashon di Israel ku pasenshi. Kiko di abo, hóben? Bo ta desaroyando e abilidatnan ku lo yuda bo sirbi bo Kreador i ku ta prepará bo pa futuro responsabilidatnan?

Keda ku un Punto di Bista Balansá

19, 20. Ki aktitut balansá pa ku bo mes i adorashon na Yehova bo ta determiná pa mantené?

¹⁹ Nos tur por hasi esfuerso pa keda ku un punto di bista balansá tokante nos mes, esta, pa no tuma nos mes muchu na serio. Nos no mester bira “demasiado hustu.” (Ekl. 7:16) Ora ta apropiá, un sentido di humor por baha tenshon, sea ta na kas, na trabou òf ora di trata ku nos rumannan kristian. Miembronan di famia mester tene kuidou pa nan no ta demasiado krítiko i asina kita e pas ku mester tin den un hogar. Komo miembro di kongregashon, nos tur por siña hasi prèt i pasa un ratu plasentero ku otro basta nos sòru pa nos kòmbersashonnan i manera di siña ta edifikante i positivo.​—2 Kor. 13:10; Efe. 4:29.

²⁰ Nos ta bibando den un mundu ku no ta tuma Yehova ni Su leinan na serio. Na kontraste ku esei, kristiannan berdadero ta tuma nan obedensia i lealtat na Yehova masha na serio. P’esei, ta un plaser pa ta parti di un grupo asina grandi di hende ku ta tuma nan adorashon na Yehova na serio. Pues, laga nos keda determiná pa sigui mira bida i tambe nos adorashon komo un asuntu serio!

[Nota]

Kon Lo Bo Kontestá?

• Kon nos por evitá ku mundu su falta di seriedat ta afektá nos?

• Kon nos por tuma nos sirbishi na serio i tòg keda gososo?

• Kon un kristian serio ta mira su responsabilidatnan?

• Dikon ta importante pa nos trata nos rumannan i nos famia ku rèspèt?

[Plachinan na página 16]

Un esposo tin ku perkurá tantu materialmente komo spiritualmente pa su famia