Usa Metanan Spiritual pa Glorifiká Bo Kreadó

“ORA un hende no sa kua haf ta su destinashon, no ta importá ki direkshon bientu ta supla.” E palabranan aki, atribuí na un filósofo romano di promé siglo, ta mustra un bèrdat bon kla: pa bo por tin un direkshon den bida, ta importante pa pone meta.

Beibel ta duna ehèmpel di sierto personanan ku semper a traha ku meta. Noe a traha rònt di 50 aña pa “prepará un arka pa salbashon di e hendenan di su kas.” Profeta Moisés “tabatin su bista riba e rekompensa.” (Hebreonan 11:7, 26) Dios a duna Josué, susesor di Moisés, e meta pa konkistá e tera di Kánaan.—Deuteronomio 3:21, 22, 28; Josué 12:7-24.

Den e promé siglo di nos era, e palabranan di Hesus di ku “e evangelio aki di e reino lo wòrdu prediká den henter mundu,” sin duda tabatin hopi influensia riba e metanan spiritual di apòstel Pablo. (Mateo 24:14) Pablo a hunga un papel importante den yuda establesé un seri di kongregashon kristian rònt Asia Menor i te den Europa. Loke a stimul’é tabata e mensahenan personal i vishonnan di parti di Señor Hesus, inkluso e tarea ku Hesus a dun’é pa “hiba [Hesus su] nòmber na e paganonan.”—Echonan 9:15; Kolosensenan 1:23.

Sí, atraves di historia Yehova su sirbidónan a fiha metanan elevá i a kumpli ku nan p’e gloria di Dios. Kon nos awe por fiha metanan spiritual? Ki metanan nos por hasi esfuerso pa alkansá, i ki pasonan práktiko nos por dal pa alkansá nan?

E Motivashon Korekto Ta Importante

Nos por pone meta den tur área di bida, i den e mundu aki tambe hopi hende tin nan metanan. Sin embargo, metanan teokrátiko no ta meskos ku ambishonnan mundano. E motivashon prinsipal tras di hopi meta den mundu ta e opseshon pa yega na rikesa i un hamber insasiabel pa haña puesto i poder. Lo ta un gran ekibokashon pa sigui e meta di haña poder i prominensia. Metanan ku ta trese gloria pa Yehova Dios ta direktamente konektá ku nos adorashon na dje i ku interesnan di Reino. (Mateo 6:33) E metanan ei ta ser motivá pa nos amor pa Dios i pa próhimo, i nan propósito ta pa sirbi Dios na un manera deboto.—Mateo 22:37-39; 1 Timoteo 4:7, NW.

Ora nos ta pone metanan spiritual—sea pa haña mas privilegio di sirbishi òf pa bai dilanti spiritualmente—i ta traha pa alkansá nan, nos motivashon mester ta puru. I tòg, tin biaha, ni ora nos tin e motivashon korekto, nos no ta alkansá nos metanan. Kon nos por fiha metanan i oumentá e chèns di alkansá nan?

Nos Mester Tin un Deseo Fuerte pa Alkansá Meta

Tuma nota kon Yehova a realisá kreashon di universo. Ku e palabranan “tabata atardi i tabata mainta,” Yehova a separá e periodonan di kreashon ku a sigui tras di otro. (Génesis 1:5, 8, 13, 19, 23, 31) Na komienso di kada periodo di kreashon, e tabata sa presis kiko ta su meta p’e dia ei. I Dios a kumpli ku su propósito pa krea kosnan. (Revelashon 4:11) E patriarka Jòb a bisa: “Loke [Yehova] su alma ta deseá, ta esei e ta hasi.” (Jòb 23:13) Ku gran satisfakshon Yehova lo a mira “tur loke el a traha” i deklará ku e tabata “masha bon”!—Génesis 1:31.

Pa nos metanan bira realidat, nos tambe mester tin un deseo fuerte pa alkansá nan. Kiko lo yuda nos desaroyá un deseo intenso asina? Asta tempu ku tera tabata sin forma i bashí, Yehova por a premirá e resultado final: un bunita hoya den espasio ku ta trese gloria i onor p’e. Asina tambe, ora nos meditá riba e resultadonan i e benefisionan ku un sierto meta ku nos alkansá lo trese kuné, nos deseo pa logr’é ta bira mas fuerte. Esei tabata e eksperensia di Tony di 19 aña. Nunka el a lubidá e promé impreshon ku el a haña dia el a bishitá un ofisina di sukursal di Testigunan di Yehova na Wèst Europa. Djei padilanti, e pregunta ku a keda den mente di Tony tabata: ‘Kon lo ta pa biba i sirbi den un lugá asina?’ Nunka Tony a stòp di pensa riba e posibilidat ei, i el a sigui traha pa logra e meta ei. Anto, el a keda masha kontentu ora ku vários aña despues nan a aprobá su solisitut pa sirbi n’e sukursal!

Ora nos asosiá ku otro hende ku ya a alkansá sierto meta kaba, esei tambe por krea den nos un deseo pa alkans’é. Jayson, di 30 aña, no tabata gusta traha den sirbishi di vèlt tempu ku e tabatin 13 pa 14 aña. Pero despues ku el a kaba skol sekundario, el a kuminsá traha yen di entusiasmo komo pionero, i asina a bira un proklamadó di Reino di tempu kompletu. Kiko a yuda Jayson kultivá e deseo pa traha pionero? E ta kontestá: “Dos kos ku a hasi un impakto grandi riba mi tabata: kòmbersá ku pioneronan i traha ku nan den sirbishi.”

Pone Nos Metanan Riba Papel Tambe Ta Yuda

Un idea vago ta bira mas kla i ta haña mas forma ora nos ekspres’é ku palabra. Salomon a bisa ku palabranan apropiá por ta manera un pui ku por guia nos den sierto direkshon. (Eklesiastés 12:11) Ora e palabranan ei ta skirbí, nan ta hasi un impreshon profundo riba mente i kurason. Ta pa e motibu ei mes Yehova a manda e reinan di Israel skirbi un kopia personal di e Lei. (Deuteronomio 17:18) P’esei, nos lo ke pone nos metanan i tambe e strategia pa alkansá nan riba papel, huntu ku e opstákulonan ku nos ta ferwagt di topa i e maneranan pa superá nan. Lo por ta bon tambe pa identifiká e temanan riba kua nos mester haña mas konosementu, e abilidatnan ku nos tin ku dominá i e personanan ku por yuda nos i sostené nos.

Pa Geoffrey, un pionero spesial di hopi aña den un teritorio isolá den un pais asiátiko, e metanan spiritual ku el a fiha pa su mes tabata manera un kalmante p’e. Morto inesperá di su kasá tabata un sla duru p’e. Despues di un periodo den kua Geoffrey mester a kustumbrá ku su situashon, el a disidí di okupá su mes kompletamente ku su trabou di pionero dor di fiha meta. El a pone su plannan riba papel, anto ku yudansa di orashon el a pone e meta pa e kuminsá tres studio di Beibel nobo promé ku fin di luna. Tur dia e tabata repasá su aktividat i kada dies dia, e tabata chèk su progreso. El a alkansá su meta? Sí, kontentu di su alma, el a raportá kuater studio di Beibel nobo!

Fiha Metanan di Término Kòrtiku pa Indiká Logro

Na promé instante algun meta por parse demasiado difísil pa alkansá. Pa Tony, menshoná anteriormente, sirbi na un ofisina di sukursal di Testigunan di Yehova, a parse un soño inalkansabel. Esei ta pa motibu ku su estilo di bida no tabata masha di gaba, ni e no a ni dediká su bida na Dios. Pero Tony a disidí di drecha su bida di akuerdo ku Yehova su normanan i a pone e meta di kualifiká pa boutismo. Despues ku el a alkansá e meta ei, el a pone meta pa traha pionero ousiliar i pionero regular, markando riba su kalènder e fechanan pa e kuminsá. Despues ku el a traha pa un tempu komo pionero, sirbishi na un ofisina di sukursal no tabata parse un meta dje irealístiko ei.

Ta bon pa nos tambe dividí nos metanan di término largu den un par di meta di término kòrtiku. Segun ku nos ta alkansá e metanan di término kòrtiku, nan ta indiká ku nos ta riba kaminda pa alkansá e meta di término largu. Dor di evaluá regularmente nos progreso relashoná ku e metanan aki, nos mente ta keda enfoká riba nos meta di término largu. Orashon konstante na Yehova tokante nos plannan tambe lo yuda nos keda riba e kaminda pa alkansá nos meta. Apòstel Pablo a konsehá nos pa “hasi orashon sin stòp.”—1 Tesalonisensenan 5:17.

Determinashon i Persistensia Ta Nesesario

Pa bon definí ku nos plannan por ta i pa fuerte ku nos deseo por ta pa kumpli ku nan, algun meta ta keda inalkansabel. Disipel Juan Marko lo mester a keda hopi desapuntá ora apòstel Pablo a nenga di bai kuné riba su di dos biahe komo misionero! (Echonan 15:37-40) Marko tabatin ku siña un lès for di e desepshon aki i ahustá su meta pa hasi mas den sirbishi. I tur kos ta mustra ku Marko a siña su lès, pasobra despues Pablo a papia bon di dje i tambe e tabata un kompañero íntimo di apòstel Pedro na Babilonia. (2 Timoteo 4:11; 1 Pedro 5:13) Kisas su privilegio di mas grandi tabata e echo ku e por a skirbi un relato inspirá di e bida i ministerio di Hesus.

Den nos afan pa logra metanan spiritual, nos tambe por haña nos ku desepshon. En bes di entregá, nos tin ku repasá, reevaluá, i si ta nesesario, reahustá nos metanan. Ora opstákulo presentá, nos tin ku hasi esfuerso pa progresá ku determinashon i persistensia. Rei Salomon ta sigurá nos: “Enkomendá bo obranan na SEÑOR, i bo plannan lo wòrdu establesí.”—Proverbionan 16:3.

Tòg, tin biaha sirkunstansianan ta pone ku nos no por logra sierto metanan. Por ehèmpel, mal salú òf obligashon di famia por stroba nos di alkansá sierto metanan. Laga nos nunka pèrdè for di bista e echo ku e premio final ta bida eterno—sea den shelu òf den Paradeis riba tera. (Lukas 23:43; Filipensenan 3:13, 14) Kon nos por haña esaki? Apòstel Juan a skirbi: “Esun ku hasi e boluntat di Dios ta permanesé pa semper.” (1 Juan 2:17) Ounke nos situashon kisas no ta permití nos alkansá sierto meta, loke sí nos por hasi ta “teme Dios i warda su mandamentunan.” (Eklesiastés 12:13) Metanan spiritual ta yuda nos keda enfoká riba hasi e boluntat di Dios. P’esei laga nos usa nan pa glorifiká nos Kreadó.

[Kuadro na página 22]

Posibel Metanan Spiritual

○ Lesa Beibel tur dia

○ Lesa tur edishon di E Toren di Vigilansia i Spièrta!

○ Mehorá e kalidat di nos orashonnan

○ Desplegá e fruta di spiritu

○ Hasi esfuerso pa oumentá nos sirbishi

○ Bira mas efikas den prediká i siña otro hende

○ Siña kon pa duna testimonio informal, testimonio via telefon i den teritorio di negoshi